Imamat 2
2
Jou-jou ngo-ngoromo
1<<Na'o matengo i'a 'o sidoa'a jou-jou ngo-ngoromo ra Ma JOU, unanga 'ai jou-jou balasu gulupungu ma rousu i'a. Unanga 'o siba-ba'ala goroho zaitun re sigare manyanyi toma jou-jou ma re'u. 2Kara unanga balasu 'a gasa toma 'imam-'imam, gena-ge 'a Harun re 'ai ngowa'a nau'u. 'Imam ga'a siḏagi munara unanga balasu 'a 'oro gulupungu jobo moi re goroho zaitun re manyanyi mo-moini kara 'a tau'u toma jou-jou ma ngi'i, gena-ge sa'olo nana'o rimoi mangale mo-moini ri siwola i'a di'a Ma JOU. Jou-jou ngo-ngoromo gena-ge rema bounu ga'a sisanangi Ma JOU 'ai 'akala re sinyingara. 3Jou-jou ngo-ngoromo ma jingianga ga'a 'i tau'u ua, gena-ge di'a 'a Harun re 'ai ngowa-ngowa'a nau'u, re jou-jou gena-ge 'i 'ofi-'ofi madutu, sababu enanga ma jingianga toma jou-jou ngo-ngoromo ga'a siwola i'a ra Ma JOU.
4Na'o ninga jou-jou ngo-ngoromo gena-ge roti ga'a ya 'osumu toma 'osu-'osumu roti ma ngi'i, ananga balasu 'aḏi 'a'a roti gena-ge kama ragi ua. Roti ga'a kapiringi gena-ge 'i si'a'a reo gulupungu ma rousu i'a ga'a 'i sicapuru reo goroho zaitun, nyengara ḏi'i roti tore nginara kama ragi ua ga'a si'ese reo goroho zaitun. 5Na'o ninga jou-jou ngo-ngoromo roti ya 'osumu toma ngo-ngosumu ma para-para, roti gena-ge ananga balasu ya 'a'a reo gulupungu ma rousu i'a kama ragi ua ga'a sicapuru reo goroho zaitun. 6Roti gena-ge ga'a sidoa'a di'a jou-jou, ananga balasu ya tola-tola'a kara siba-ba'ala reo goroho zaitun; gena-ge jou-jou ngo-ngoromo. 7Na'o ninga jou-jou ngo-ngoromo enanga roti ga'a sa'ai toma baki, roti gena-ge balasu si'a'a reo gulupungu ma rousu i'a ga'a kama ragi ua re sicapuru reo goroho zaitun. 8Roti ga'a 'aḏi 'a'a ma duhu so'o gena-ge, ga'a ngini mau ni sidoa'a sa'olo manga jou-jou ra Ma JOU, ngini na sipula'a toma 'imam ga'a 'a gasa toma jou-jou ma ngi'i. 9Re 'imam 'a 'oro ma balangu toma jou-jou ngo-ngoromo sa'olo nana'o rimoi mangale jou-jou mo-moini ri siwola i'a di'a Ma JOU. Gena ḏua, 'imam gena-ge 'a tau'u jou-jou ngo-ngoromo ma balangu gena-ge toma jou-jou tau'u ma ngi'i ma re'u sa'olo jou-jou tau'u ga'a ma bounu sisanangi Ma JOU 'ai 'akala re sinyingara. 10Mada'a jou-jou ngo-ngoromo ma jingianga gena-ge di'a 'a Harun re 'ai ngowa-ngowa'a nau'u. Jou-jou gena-ge 'i 'ofi-'ofi madutu sababu jou-jou ma jingianga gena-ge toma jou-jou ngo-ngoromo ri siwola i'a ra Ma JOU.
11Jou-jou ngo-ngoromo ga'a ngini sidoa'a ra Ma JOU, ngini balasu na sicapuru reo ragi awa, sababu jou-jou ngo-ngoromo ga'a sicapuru reo ragi bolo madu, enanga gena-ge ya sitau'u yoḏu'u sa'olo jou-jou ngo-ngoromo toma jou-jou ma ngi'i ma re'u. 12Mada'a ngini nyengara ni dogo madu re ragi taninga jou-jou ngo-ngoromo ga'a tai guḏa ma hasili ma mulaingi. Mada'a jou-jou gena-ge ngini na sidoa'a yoḏu'u di'a sitau'u toma jou-jou ma ngi'i ma re'u sa'olo jou-jou ma bounu ga'a sisanangi Ma JOU 'ai 'akala re sinyingara. 13Jou-jou ngo-ngoromo mo-moini, ngini balasu na sigare rema g̱asi, sababu g̱asi 'i dadi nana'o rimoi Ma Jou'ongu Madutu 'ai jaji ra ngini. Dadi jou-jou mo-moini ngini balasu na sigare g̱asi.
14Na'o guḏa ma hasili ma mulaingi ngini na sidoa'a sa'olo jou-jou ngo-ngoromo ra Ma JOU, ngini balasu ni sidoa'a gandum ga'a aro 'utu'u, osumu toma u'u ma re'u kara ri tutu'u singadolo 'alusu. 15Gandum gena-ge ngini balasu ni siba-ba'ala reo goroho zaitun re ni sigare manyanyi toma re'u gena-ge. Jou-jou gena-ge jou-jou ngo-ngoromo. 16Ḏua 'imam balasu 'a 'oro ma balangu toma gandum gena-ge reo goroho zaitun reo manyanyi mo-moini kara unanga 'a tau'u sa'olo nana'o rimoi mangale gandum mo-moini gena-ge ri siwola i'a di'a Ma JOU sa'olo jou-jou ngo-ngoromo.
اکنون انتخاب شده:
Imamat 2: SAJ
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
2025 Indonesian Bible Society (LAI)