Dolabololo 29
29
1Ngowa'a ga'a 'aḏi sanga ḇangata da-dadunu mada'a manga 'akala re sinyingara 'i te'e moju,
pa'i ma 'orasa 'i tero ḇato, ananga raḏi wejere singadolo sidiai mai ri yoḏu'u
2Na'o ngowa'a loasa re banari 'aḏi dogo repe, rayata 'aḏi maroanga,
mada'a na'o ngowa'a kajahatana 'aḏi parenta, ngowa'a kawasa 'aḏi kuḏubungu.#29:2 sababu 'aḏi basono kangela 3Ngowa'a ga'a 'aḏi nyanyaḏi 'akala soro'unu, 'aḏi sigasa monere tamanga ḇaḇa 'ai 'akala re sinyingara,
mada'a ngowa'a matengo ga'a ma'u ḏagilomu reo we-were'a su-sudala, unanga 'a simoini 'ai 'ori i'a rana. 4'Olana matengo 'o parenta pake 'adili nagara dadi te'e,
mada'a ngowa'a ga'a 'aḏi golo'o balastengi pa'i woḏi 'aḏi siwejere nagara.
5Ngowa'a ga'a sakala sitoro ngowa'a lelegu
ananga gena-ge 'aḏi 'a'a jojoḏi di'a ananga masiretene.
6Ngowa'a ma jira 'aḏi sado tamanga ḏosa masiretene,
mada'a ngowa'a loasa re banari ḏuanga i'a 'aḏi manyanyi remanga roanga.
7Ngowa'a loasa re banari 'aḏi waro ngowa'a ma dinga'unu ua manga haku,
mada'a ngowa'a kajahatana ya kalesanga ua.
8Ngowa'a ga'a 'aḏi situ-tuhu 'akala soro'unu nyengara 'aḏi siruwahe limau,
mada'a ngowa'a 'akala soro'unu nyengara 'aḏi siogoro.
9Na'o ngowa'a 'akala soro'unu re ngowa'a haga ma'u hali,
ngowa'a haga gena-ge pa'i ruta re nyelo'o, singadolo 'aḏi si'a'a nyiwere.
10Ngowa'a ga'a sisengene ngowa'a, ananga 'aḏi emono ngowa'a ga'a manga 'ahu 'i boloto,
mada'a ngowa'a loasa re banari ya'u saolo.
11Ngowa'a ga'a 'aḏi emono wo-waro, ananga gena-ge 'aḏi ruta kama gogono ua,
mada'a ngowa'a 'akala soro'unu, ananga 'aḏi tahana manga ruta.
12Na'o ngowa'a lalamo'o pa'i totoho habari sa-sakala,
manga pagawe mo-moini 'aḏi dadi ngowa'a kajahatana.
13Ngowa'a ma dinga'unu ua matengo re ngowa'a ga'a 'o sikangela unanga, ananga gena-ge 'aḏi ma tero;
Ma JOU 'o pula'a 'ahu ra ananga ngamu ḏiḏi.
14Na'o 'olana 'o pake 'adili di'a sijuruhakimi ngowa'a ma dinga'unu ua,
unanga ḏuanga i'a 'o siḏagi 'ai parenta kasingado-ngadolo i'a.
15Didiki re ḇangata 'i si'a'a 'ani ngowa-ngowa'a 'aḏi dadi 'akala soro'unu.
mada'a ngowa 'olo ga'a mete'e manga mau, ḏuanga i'a sipula'a mara'a ma ngina.
16Na'o ngowa'a kajahatana 'aḏi parenta,#29:16 ma ngale: na'o ngowa'a 'aḏi siḏagi pareta. 'o kajahatana madogo-dogo.
mada'a ngowa'a loasa re banari ḏuanga i'a 'aḏi oḏi'i ngowa'a kajahatana 'aḏi wejere. 17Doto'o 'ani ngowa 'olo re ananga ḏuanga i'a 'aḏi pula'a dame ra ngana.
re 'aḏi sisanangi ngana 'ani 'akala re sinyingara.
18Na'o sanga si nya-nyasele ua ra Ma JOU, bangsa gena-ge ma rayata si'aturu yoḏu'u,
Mada'a bara'utungu ngowa'a ga'a 'aḏi mete'e Ma JOU 'ai hukumu.
19Awa sidoto'o buda-budaka pa'i rema demo-demo ḇato,
sababu kalaha ananga ya sahe, ya totoho ua.
20Ngowa'a ga'a 'aḏi emono wo-waro, ananga gena-ge manga ngo-nganono lai repe,
reo ngowa'a ga'a 'aḏi kanau kama fikiri ua.
21Tuanga ga'a mete'e 'ai budaka ma mau 'orasa tubaie moju,
ma ḏo-ḏogumu tala, budaka gena-ge 'ai 'akala re sinyingara 'i te'e.
22Ngowa'a ga'a ruta caiti, ananga gena-ge 'aḏi sibaolo ma'u go'oro,
re ngowa'a ga'a tata-ruta 'aḏi 'a'a ḏosa repe.
23Ngowa'a momole ḏuanga i'a 'aḏi sanga mara'a,
ngowa'a ga'a maholo ḏuanga i'a 'aḏi sanga puji.
24Ngowa'a ga'a sanga balangu toma ngowa'a to-tori'i,#29:24 ma ngale: ngowa'a ga'a marimoi reo ngowa'a to-tori'i 'aḏi emono manga diri masiretene,
sababu ananga 'aḏi kanau sitaḇela'a i'a toma juruhakimi,
ananga ḏuanga i'a sanga hukumu.
mada'a ananga pa'i 'aḏi masiogoro ḇato,
ananga ḏuanga i'a 'aḏi sanga kutuki ra Ma Jou'ongu Madutu.
25Mojongo manusia 'i si'a'a jojoḏi.
mada'a ngowa'a ga'a 'aḏi ngaku Ma JOU, Unanga ya'u saolo.
26Ngowa'a manga repe 'aḏi 'oro 'akala toma ngowa'a la-lamo'o,
mada'a ananga 'aḏi sanga 'adili pa'i ra Ma JOU ḇato.
27Ngowa'a loasa re banari 'aḏi emono ngowa'a kajahatana,
ngowa'a kajahatana 'aḏi emono ngowa'a ga'a manga 'ahu 'i boloto.
اکنون انتخاب شده:
Dolabololo 29: SAJ
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
2025 Indonesian Bible Society (LAI)