Lukasi 14
14
Yesu angumuponetsa munu munya wutamwa wa kutuna muvili gweka
1Siku yimwe ya Kwesela, Yesu ho avaga alibulitswe kulya mu nyumba ya chilongotsi va Mafwalisayo, vanu vakavaje vangumuhima. 2Halutalo ha Yesu kwavaga na munu yumwe munya namwa ya kutuna muvili gweka. 3Yesu akavaputsaje Mafwalisayo na vadahitsi va malajitso ga Musa, “Hino ndawuli, finofu awu siyo finofu kumuponetsa munu Siku ya Weselo?” 4Lechelelo vene vakakatukaje myee. Kahi Yesu akamubataje liwoko mutamwa yula na kumuponetsa na akamulonjelaje abite. 5Kaha Yesu akavaputsaje, “Mbe, nani yoali hagati henyu manyi mwanage awu senga yake yigweye mu chisima siku ya Weselo yoaka kuleka kwangufitsa kuyihetsa na yivaje siku ya Weselo?” 6Lechelelo vene vakavaje valihela chinu chochive cha kulonga.
Kidutsa na kwika
7Yesu akawonaje vala vajentsi wo valibulitswe fyo vahagulaga figoda fya kutalo, akavalonjelaje muhwano guno, 8“Manyi munu akulibulitse ku liwungo, ulekaje kwikala figoda fya hesima. Kwasawuli yifuluche yive alibulitswe munu yunji muvina kulutila heve mu chigoda icho, 9na munyaliwungo yo avalibulitse akutsa na kukulonjela hino, ‘Umulechele munu yuno chigoda chako.’ Ihyo heve ukuhonga nyoni hala ho ukuganika kwinuka na kubita kikala kumbele. 10Lechelelo manyi ulibulitswe hono ha liwungo, wikalaje hono ha kumbele, ili hala yoakulibulitse hoakuva kutsa akulonjele hino, ‘Bee muyangu, utse kuno kulutalo, hono hanofu ndalahela.’ Iho ho ukuva upasile hesima halutalo ha vajentsi vayago veka.” 11Kwasawuli munu yoyuve yo angidita muvina akwiswa, na yo ankwika akuva munu muvina.
12Kaha Yesu akamulonjelaje yula yo avalibulitse kuta, “Manyi uvaditile vanu chilyo cha liwungo mu munyi awu mumihe, Ulekaje kuvalibulitsa vanu va habehi na heve awu vang'olotso awu vafuchifu ng'ani. Manyi udite ihyo vene nawo vafuluche vakulibulitse kwawo, na vakuva vakuhombite chila cho uvaditye. 13Lechelelo ho ukuva unvika liwungo, uvalibulitsaje vagayu, na filema, na fiteve na fibofu, 14kwa kudita ihyo ukuva uditilwe wuwuya na Mulungu, nayivaje vene valihela wuvetso wa kukuhomba heve ukuhombwa hala ha wutsilipuko wa vanu wo vangidichilwa na Mulungu.”
Muhwano gwa vanu yovalibulitswe muliwungo likomi
Matayo 22:1-10
15Kahi munu yumwe yo avaga ichite hamwe na Yesu vankulya, akavaje kuhulika ihyo akamulonjelaje Yesu hino, “Aditilwe wuwuya na Mulungu munu yula yo akulya chilyo mu liwungo lya Wuntsajila wa Mulungu!”
16Yesu akamulonjelaje, “Munu yumwe adisile liwungo likomi, akavalibulitsaje vanu wolofu. 17Chipindi cha liwungo hochavaga kufika, akamutumaje mutantsi vake akavalonjele vala wo avalibulitse kuta avalonjele, Mutse, chila chinu chili chang'ani!” 18Lechelelo veka wo valibulitswe vakalongaje hino, Mulongola akamulonjelaje mutantsi yula kuta, Umbonele lusungu heni ngutsile mugunda ntsin'ganika mbite ngagulole. 19Yunji akalongaje kuta, Umbonele lusungu heni ngutsile senga tsa kulimila, lelo ntsinsuka mbite ngatsidahitse kulima. 20Yunji akalongaje, Umbonele lusungu heni nweye mudala luvala lulu. 21“Mutantsi uyo akawuyaje na kumulonjela mutwa vake lulongwa ulo. Yula munya nyumba akavipaje, akamulonjelaje mutantsi vake kuta, Ubite kubalabala na mumitava ja muji, uvalete mugati vagayu, fiteve, fibofu na vanya filema vanji. 22Hambele mutantsi yula akamulonjelaje, Mutwa, gala malajitso geka go undajitse ntsigadisile, lechelelo bado hono ha liwungo hana nyafwasi. 23Hoihyo Mutwa yula akamulonjelaje mutantsi vake, Ubite kubalabala na mumitava ja muji uvagongoletse vanu vinjile ili nyumba yangu yimeme. 24Ntsinguvalonjela kuta, vala veka wovalibulitswe mu liwungo vakalemaje, kuduhu yo akujela alye chilyo mu liwungo lyangu.”
Hila fyoyin'ganika kudita ili uve mudahitswa va Yesu
Matayo 10:37-38
25Vanu wolofu vavaga hamwe na Yesu mulujendo, Yesu akavapituchilaje na kuvalonjela, 26“Manyi munu yoyuve an'gana kuva mudahitswa vangu, ang'anika angane heni kulutila kuvagana dade na yuve, awu vang'olotse valume na vadala, awu mudala vake na vanage awu wumi wake mwene manyi aleche kudita ihyo siafuluche ave mudahitswa vangu. 27Munu yoyuve yosiangidichila kukodeka na kufwa kwasawuli ya kufwata heni, siafuluche ave mudahitswa vangu. 28Mbe, nani hagati henyu yo an'gana kutsenga nyumba ngomi, yosiikalaga tandi hasi alave magobole gogan'ganika kuta anago gogakukwila kusinda katsi iyo awu ndaya? 29Munu yoyuve manyi aviche musinji na kulemwa kusinda kutsenga nyumba yeka vanu veka vakumuheka, 30vakulonga kuta, Munu yuno akantsitse kutsenga, lechelelo alemilwe kusinda. 31Ndonje muhwano gunji. Mbe, kuna muntsajila vachi munya vatova ligalu elufu kumi, yosaikalaga hasi tandi na kuhotsa manyi ana ludali lwa kuvetsa kitova na muntsajila yunji munya vatova ligalu elufu isilini? 32Manyi awone sakuvetsa kitova, akuvatuma vanu kwa muntsajila muyage kugana vasinde ndongwa na yula muntsajila yunji ang'acha kutali, 33hoihyo duve lulongwa ulo luli hihyo,” kwasawuli, “Kuduhu munu yoyuve hagati henyu yoafuluche ave mudahitswa vangu manyi siakuleka fyeka fyo anafyo.”
Mwino gosinambe gukole
Matayo 5:13; Maliko 9:50
34Mwino munofu, lechelelo manyi sinambe gukole, gukuditwa ndawuli mbaka gukole? 35Sigufwayaga kaha nambe kwa lilongo awu mboleya, na vanu vadibulaga kutali, “Munya mapulichilo na ahuliche cho ntsilonga!”
اکنون انتخاب شده:
Lukasi 14: SBV
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
The New Testament in Sagala Language @The Word for The World International and Sagala Language translation. All rights reserved.