Lukasi 20
20
Vanu van'wun'tsa mamulaka ga Yesu
Matayo 21:23-27; Maliko 11:27-33
1Siku yimwe Yesu hoavaga anguvadahitsa vanu mu Nyumba ya Kusalila na kuvavikulila Ndongwa Nofu, vavina va vatawula nambiko na vadahitsi va malajitso ga Musa hamwe na vavina va vanu vakatsaje, 2na kumuputsa kuta, “Utulonjele un'dita ndongwa tsino kwa mamulaka ga nani? Nani yo akupelye mamulaka gano?” 3Yesu akavalonjelaje kuta, “Na heni nguvaputsa lulongwa na henye mun'ganika mundonjele, 4mamulaka ga Yohana kubatitsa gahumye kilanga kwa Mulungu awu kwa vanu?” 5Lechelelo vene vakiputsaje, “Manyi tulonje gahumye kilanga kwa Mulungu, mwene akutuputsa, mbona situkamutumbye? 6Na manyi tulonje kuta gahumye kwa vanu, vanu veka hano vakututova na maganga, kwasawuli veka vangitumbila kuta Yohana avaga muloli va Mulungu.” 7Duve vakamulonjelaje, “Nambe tutsele kuta mamulaka igo gahumye kwiya.”
8Yesu akavalonjelaje, “Na heni singuvalonjela kuta ntsin'dita ndongwa tsino kwa mamulaka gachi.”
Muhwano gwa vanu wo vakoditse mugunda
Matayo 21:33-46; Maliko 12:1-12
9Yesu akendelelaje kuvalonjela vanu muhwano guno “Munu yumwe avaga na mugunda gwa mitsabibu, nayo akakoditsaje kwa valimi na kubita lujendo ku inyi ya kutali, akikalaje uko kwa siku ntsolofu. 10Chipindi cha kubeta, munu uyo akamutumaje mutantsi vake kwa vala valimi, akatole mibawo mitunga ja mugunda gwa mitsabibu. Lechelelo vanu vala wovavaga vakodite vakamutovaje mutantsi uyo na kumupilula ali mawoko ng'ani. 11Muntsajila yula akamutumaje mutantsi va kavili yuyo nayo vakamutovaje hihilaga na kumuditila ndongwa tsa nyoni na kumupilula ali mawoko ng'ani. 12Akamutumaje kaha mutantsi va kadatu uyo nayo vakamutetsaje, na kumudibula kutali na mugunda. 13Yula mutwa munya mugunda akahotsaje na kulonga hino, ‘Ngudita chinu chachi? Ngumutuma mwanangu yo ntsingumugana, na hanga yuno vakumuhulikitsa!’ 14Lechelelo vanu vala wovali vakodite mugunda hovavaga kumuwona hela, vakalonganaje vene kwa vene kuta, ‘Yuno yo muhali. Lelo tumukopole ili wuhali wake wukuva wetu.’ 15Ihyo vakamuhumyaje kivala kwa mugunda gwa mitsabibu na vakamukopolaje.” Yesu akaputsaje, “Yula munya mugunda akuvadita chichi vanu vala wo vakodite mugunda? 16Akutsa na kuvakopola vanu vala wo vakodite mugunda na kuvapela valimi vanji mugunda ugo gwa mitsabibu.” Vanu vala hovavaga kuhulika ndongwa itso vakalongaje, “Mulungu aleche kutuditila lulongwa ulo!”
17Lechelelo Yesu akavalolaje kwa kuvakangatsila miho na kuvalonjela, “Ndongwa tsino tsa Mulungu tsina mana yachi? Liganga lyo valilemile vatsentsi, lelo liveye liganga lya kihuvilwa kwa wutsentsi! 18Munu yoyuve yo akugwa mu lilanga ilyo, akubeneka fipande fipande, na manyi limugwile munu yoyuve likumutijina.”
Mbutso ya kuhomba Kodi kwa Kayisali
Matayo 22:15-22; Maliko 12:13-17
19Vadahitsi va malajitso ga Musa na vatawula nambiko vavina vakatselaje kuta Yesu avaselembetsaga vene kwa muhwano ugo, ihyo vaganaga kumubata hono baho, lechelelo vakawogopaje vanu. 20Hoihyo vamupelanitsaga kwa kuvatuma vapelanitsi wo vilajilaga kuta vawuya, vamupilimaga kwa ndongwa tso alongaga ili vamubate na kumusindika kwa vavina va silikali ya Chilumi. 21Vapelanitsi iwo vakamulonjelaje Yesu kuta, “Mudahitsi tun'tsela kuta unvikula na kudahitsa ndongwa tsa wukweli, na tun'tsela kuta heve ulihela wubagulo, kaha heve un'dahitsa wukweli wa ng'asi ya Mulungu. 22Lelo utulonjele mbe, malajitso ga Musa ganlajitsa tuhombe kodi kwa muntsajila muvina va ku Loma?”
23Yesu akatselaje hila fyo vangumutega, akavalonjelaje, 24“Mundajile lindolosi ilyo. Mbe, sula yino na fyandisi fino fya nani?”
25Vene vakamulonjelaje, “Fya Kayisali muntsajila muvina va ku Loma.” Ihyo Yesu akavalonjelaje, “Duve fya Kayisali mumpelaje Kayisali, na fya Mulungu mumpelaje Mulungu.”
26Vakalemwaje kumubata kwasawuli ya vanu. Nawo vakatinukaje ndalahela kwa ndongwa tsila tso alongaga, hoihyo vakakatukaje.
Mbutso tsa wutsilipuko
Matayo 22:23-33; Maliko 12:18-27
27Kahi Masadukayo vamwinga wo valongaga kuta kuduhu wutsilipuko wa vanu wo vafweye, vakatsaje kwa Yesu na kumuputsa, 28“Mudahitsi, Musa atwandichilye kuta manyi mung'olotse va munu mtunga atajiche na kumuleka mufwile alihela vana, yin'ganika mung'olotse yula amuhale mufwile uyo, ili amulelele vana mung'olotse yo atajiche. 29Lelo kwetu kwavaga na vanu saba yo vavaga lukolo. Yula va mulongola akakwelaje mudala, hambele munu uyo akatajikaje bila kuleka mwana. 30Kahi yula mung'olotse va kavili akamutolaje yula mufwile, nayo kaha hambele akatajikaje 31na mung'olotse va kadatu nayo akamutolaje hihilga kota vayage. Lukavaje hihilaga kwa vanu vala veka saba vakatajikaje bila kuleka vana na mufwile yula. 32Hambele kuwudugo na mudala yula nayo akafwaje. 33Ino lelo utulonjele, Mbe, siku ya wutsilipuko mudala uyo akuva muchina va nani, kwasawuli avaga atoliche kwa valume saba wovavaga lukolo?”
34Yesu akavalonjelaje vala Masadukayo, “Ndongwa tsa kutola na kutoleka itso tsa muinyi yino ya sambi, 35lechelelo vanu vala wo Mulungu akuwona van'ganika kutsilipulwa kuhuma kwa vanu wovafweye na kwikala ku inyi yo yinkutsa, iwo wo sivakutola awu kutoleka. 36Iwo sivakufwa kaha, kwasawuli vakuva kota vatantsi va kilanga va Mulungu. Iwo wo vana va Mulungu, kwasawuli Mulungu avagavye kuva wumi. 37Lechelelo kulonga kuta vanu vakutsilipuka, nambe Musa alontsile lulongwa ulo mumandiko matunga ga Mulungu, kuta mu chila chisati cho chakaga moto bila kusila, hala Mutwa hoilaje na kulonga kuta, ‘Mwene yo Mulungu va Ibulahimu, Mulungu va Yisaka, na Mulungu va Yakobo.’ 38Mwene si Mulungu va wovafweye, ila mwene yo Mulungu va vanya wumi, kwasawuli veka yo vangikala kwa mwene vana wumi.” 39Vadahitsi vatunga va madahitso ga Musa vakamulonjelaje, “Mudahitsi, ulontsile finofu.” 40Vakalontsile ihyo kwasawuli sivahogwe kuwila kumuputsa mbutso tsinji.
Chilisito yo mwana va nani
Matayo 22:41-46; Maliko 12:35-37
41Kahi Yesu akavaputsaje, “Yinkuva ndawuli vanu vanlonga kuta Chilisito muhagulwa va Mulungu yo mwana va Dawudi?” 42Kwasawuli Dawudi mwene mu chitabu cha Tsabuli anlonga,
“Mutwa amulonje Mutwa vangu kuta,
Wikale lubali lwangu lwa wuvina na mamulaka,
43mbaka ntsivaviche vatelani vako hovakuva chigoda cha kuvichila magulu gako.”
44Manyi Dawudi angumuchema mwene, “Mutwa, yiveye ndawuli Chilisito ave mwana va Dawudi?”
Kiyangalila na vadihitsi va malajitso ga Musa
Matayo 23:1-36; Maliko 12:38-40
45Vanu veka hovavaga vangumuhulikitsa, Yesu akavalonjelaje vadahitswa vake, 46“Mwiyangalile na vadahitsi va malajitso ga Musa, wo vaganaga kujenda jenda kuno vafwite kantsu nali, na vaganaga kusamuswa na vanu kwa kufugamilwa iho ho vankuva hono ha kugutsila finu, na kwikala figoda fya kutalo mu Nyumba tsa kitang'anila Vayawudi na kikala mu figoda fya hesima mu liwungo. 47Yo vavatsulumulaga vafwile kuno vangilajila kota vawuya, na kwa wubuganitsi vamusukaga Mulungu kwa suko nali. Vanu vanya ihyo vakuhigwa wuhigo wukomi ndala hela.”
اکنون انتخاب شده:
Lukasi 20: SBV
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
The New Testament in Sagala Language @The Word for The World International and Sagala Language translation. All rights reserved.