संत.जोहन 19
19
ईसु के गोगोएःग रेनअः हुकूम
1तब पिलातुस ईसु के इदी केते कोड़राव ची लिकुआय। 2सिपाहीकु जानुम रेनअः मुकूट गलाङ केते हुनी आला बोहोअ रे दोहो लअकु आउर हुनी के मलमल गेन्दरअ सोलोंग-उलियाकु। 3फिन हुनी दुबाःड़े हीःग-हीःग, “ए जाहुदीकु आली राजा जोहार” बेताई केनाकु आउर हुनी के चटकांड़ी केनाकु।
4पिलातुस फिन बाहरी उडुंग केते होड़कु के बेता लिकुआय, “नेलेपे ईङ हुनी के फिन आपे दुबाःड़े आगुः-दियीङ जेकर से आपे पड़ीपे ची ईङ हुनी रे एतान कसुर होः काईंग नामेआ।” 5तब ईसु जानुम रेनअः मुकूट आउर मलमल गेन्दरअ सोलोंग उनी बाहरी हीःग नेनाय। पिलातुस होड़कु के बेता लिकुआय, “नेलीपे निई हेरेल!” 6महापुरोहितकु आउर बड़े बिनती ओड़ाअ रिनकु सिपाहीकु हुनी के नेल तोरन गुल दाकु, “नुई के कुरूस रे रकाबीपे! नुई के कुरूस रे रकाबीपे!”
पिलातुस हुंकू के बेता लिकुआय, “आपे-गी नुई के इदी केते कुरूस रे रकाबीपे, एता लःअय ची नुई रे ईङ एतान कसुर होः काईंग नामेआ।” 7जाहुदीकु उतारा एम लअकु, “आले आला मियांड कनहुन एदनाआ आउर होना कनहुन मोताबिक नुई गो-गोएःग चाही लकान एदानिया, एता लःअय ची नुई अपने के परमेसर आली होपोन कंहड़ीयाय।” 8जब पिलातुस नोःआँ आयुम लःअय दो आउर गी बोरोअ नाय, 9आउर फिन बंगला भीतरी बोलो केते ईसु के कुली लियाय, “आम ओका रेनमे हेके?” बकिर ईसु एतान होः जबाप काय एमा लिया। 10नोःआँ रे पिलातुस हुनी के बेता लियाय, “आम ईङ लोः एता लःअय काम कंहड़ीया? एतान आम काम पाड़ीआ ची आम के बाबाई रअः हक एदनाआ, आउर आम के कुरूस रे रा-रकाःब रेनअः होः ईङ के हाक एदनाआ।” 11ईसु कंहड़ी रूवाड़ोः लियाय, “जदि आम के तेंग तरअः हक एरे भेटाव ताहिकोआ, दो आम आला ईङ रे एतान हाक एरे ताहिकोआ। हिना लःअय जे ईङ के आम आला तीः रे सःब ची तदिङाय हुनी जादे दोसी एदानिया।” 12नोःआँ रे पिलातुस बाबाई नाम नेनाय, बकिर जाहुदीकु छेराव-छेराव कंहड़ीः दाकु, “जदि आम नुई के बाईयाम दो आम रोमी महाराजा कैसर आली गाती नलागे। जाहें होः अपन के राजा मेन गेआय, हुनी रोमी महाराजा कैसर आला बिरोधेआय।” 13नोःआँ आयुम केते पिलातुस ईसु के बाहरी आअगु लःअय हुकूम एमा लिकुआय। “होनाःड़े मियांड चबुतरा ताहिना” जेके इब्रानी भाखा रे “गब्बाता” कंहड़ीयाकु, आउर हुनी नेयाय रअः गद्दी रे दुड़ूः नाय। 14नोःआँ पासका रेनअः साईर-सपाईर रअः दिन#19:14 पासका रेनअः साईर-सपाईर रअः दिन तेयारी रअः दिन जे कि सुख हिला जब जाहुदी सबद रअः तेयारी केनाकु। ताहिना, आउर करीब बारह बजाव ताहिना। पिलातुस जाहुदीकु के बेता लिकुआय, “नेलीपे नीई आपे आली राजा हेके!”
15नोःआँ रे हुंकू गुल एहेःब लअकु, “इदीपे! इदीपे! नुई के कुरूस रे रकाबीपे!”
पिलातुस हुंकू के बेता लिकुआय, “एतान आपे आली राजा के कुरूस रे राकाबीयीङ?” महापुरोहितकु कंहड़ी रूवाड़ोः लियाकु, “कैसर के बाई केते आले आली ओके होः राजा कनिकुआ।”
16तब पिलातुस ईसु के कुरूस रे रा-रकाःब लःअय हुंकू आला तीः रे जिमाओ लिकुआय। तब हुंकू ईसु के अपन कबजा रे इदी लियाकु।
ईसु के कुरूस रे रा-रकाःब
(संत.मत्ती 27:32–44; संत.मरकुस 15:21–32; संत.लुकास 23:26–39)
17हुनी अपन कुरूस गोअ केते “खपरोही नुमू रअः ठाँव” सेन नेनाय। इब्रानी भाखा रे होना रअः नुमू “गुलगुता” कंहड़ीयाकु। 18होनाःड़े हुंकू ईसु के आउर हुनी लोः आउर बनहोंड़ के कुरूस रे रकाःब लिकिनाकु, मियांड के नोःआँ पखी, एटाअ के होना पखी आउर ताला रे ईसु के।
19पिलातुस मियांड पाटी रे दोस चिठी लिखाअ ची केते कुरूस रे हकाअ चिलिकुआय, होना रे नोःआँ लिखा लअः ताहिना, “नासरत रिनी ईसु, जाहुदीकु आली राजा।” 20ढेर जाहुदीकु नोःआँ पाटी के पड़हाव नेनाकु, एता लःअय ची होना ठाँव जे एड़े ईसु के कुरूस रे रकाःब थिलयाकु, सहर हेनाःड रे ताही नेना, आउर होना पाटी रे इब्रानी, लातीनी आउर युनानी भाखा रे लिखा लअः ताहिना।
21हिना लःअय जाहुदीकु आलकु महापुरोहितकु पिलातुस के बेता लियाकु, “‘आम जाहुदीकु आली राजा’ आलुम लिखाय, बकिर नुई ईङ जाहुदीकु आली राजा हेके कंहड़ी लःअय लिखाय में।” 22पिलातुस कंहड़ी रूवाड़ोः लिकुआय, “जे ईङ लिखा किदिंग, से लिखा किदिंग।”
23जब सिपाहीकु ईसु के कुरूस रे रकाःब चुकाव नाकु, दो हुनी आला गेन्दरअ इदी केते चाईर भागा लअकु, मि-मिहोंड़ सिपाही लःअय मि भागा आउर कुड़ता होः इदी लअकु, बकिर कुड़ता बेगार सियान तेंग तरअः लतार जगुत गलांग-लअ ताही नेना। 24#सिरिंग 22:18हिना लःअय हुंकू आकु-आकु कंहड़ी लअकु, “आबु नोःआँ के इरबु चिराया, बकिर चिठी लगाव केते नेलेआबु ची नोःआँ ओके के भेटाआ।” नोःआँ, निआँ लःअय हुयाव नेना ची धरम-पुथी रअः नोःआँ बचन पुरा जुनोः,
“हुंकू ईङ आला गेन्दरअ आकु-आकु हाटिङ लअकु,
आउर ईङ आला गेन्दरअ लःअय चिठी लगाव लअकु।”
सिपाहीकु हेंकान-गी लअकु।
ईसु आली आया
25ईसु आली आया, हुनी आली काकी, क्लोपस आली गोमकाईन ते मरियम, आउर मरियम मगदलिनी, ईसु आला कुरूस दुबाःड़े तिंगु थिनाकु। 26जब ईसु अपन आया के, आउर हुनी दुबाःड़े हुनी चेला के, जेके ईसु दुलारी केनाय तिंगु उनी नेल लिकिनाय दो आया तेके बेता लियाय, “ए आउराईत, नेलीमे, नुई आम आली होपोन हेके।” 27तब हुनी चेला के बेता लियाय, “नुई आम आली आया ताम हेके।” आउर हिमीन बेरा तरअः हुनी चेला हुनी के अपन ओड़ाअ इदी लियाय।
ईसु आला गोजोअः
(संत.मत्ती 27:45–56; संत.मरकुस 15:33–41; संत.लुकास 23:44–49)
28 #
सिरिंग 69:21; 22:15 तब ईसु नोःआँ पाड़ी केते ची नहाअः दो जामा पुरा हुयाव चुकाव ना, धरम पुथी रे लिखा लअः पुपुरा लःअय कंहड़ी लःअय, “ईङ तेतांग तानिङ” 29होनाःड़े जोजो अंगुर रस पेरेःग ओना मियांड बसान दोहो लअः ताहिना। हिना लःअय होड़कु रुवा लकान दाअः सो-सोखाव वाला के, सोहों खाता सिंङ दुबा रेनअः तोम्बहाःड रे तोल केहेः बसान रे जोबराव केते, हुनी आला आहा जगुत चेचेपेःग लःअय आगु लअकु। 30ईसु जोजो अंगुर रस के चखाव केते, “जामा पुरा हुयाव चुकाव ना” कंहड़ी लःअय आउर बोहोअ कोयोअ केते जीव बाई केदाय।
बरछा तरअः जोजोबाव
31होना पासका रेनअः साईर-सपाईर रअः दिन ताहिना, जाहुदीकु पिलातुस तरअः गोहराव नेनाकु ची, हुंकू आला टांगरी के टोटअ गुलता आउर हुंकू के अड़गु कु, जेकर से ची सथाअ हिला हुंकू आला गोएःग होड़ो कुरूस रे आलु ताहिनोअ, एता लःअय ची होना सथाह हिला बड़े परब पड़ाअ केना। 32हिना लःअय सिपाहीकु हीःग केते, जे ईसु लोः कुरूस रे रकाःब थिलकिनाकु। पहिल रिनी आला आउर एटाःई आला के होः टांगरी के टोटअ लअकु। 33बकिर ईसु दुबाःड़े सेन केते नेल लियाकु दो हुनी गोएःग तनाय, दो हुनी आला टांगरी के काकु टोटअ लअः। 34बकिर मियांड सिपाही हुनी आला पंजरा के बालोम रे भोसाव लःअय, दो होना तरअः तुरते मयोम तेकर दाअः उडुंग नेना। 35जे नोःआँ के नेल लःअय, हिनी गोवाही एम तदाय, आउर हुनी आला गोवाही साथे एदनाआ, हुनी पड़ीआय ची हुनी सचे कंहड़ीयाय, जेकर से आपे होः बिसवासे पे। 36#उइठ 12:46; गन 9:12; सिरिंग 34:20नोःआँ हिना लःअय हुयाव नेना ची धरम पुथी रेनअः होना कंहड़ी पुराव जुनोः “हुनी आला मियांड-मिन जांग इरकु टोटागेआ।” 37#जखरि 12:10; दि.वचन 1:7फिन धरम पुथी रअः एटाअ ठाँव रे नोकान लिखा ताना “जेके हुंकू भोसाव लियाकु, हुंकू हिनी पखा नेल केआकु।”
ईसु के तेतेपेःड
(संत.मत्ती 27:57–61; संत.मरकुस 15:42–47; संत.लुकास 23:50–56)
38नोःआँ तयोम अरमतिया रिनी जोसेफ, जे जाहुदीकु रअः बोर रअः चलते ईसु आली उकु-उकु चेला तहिनाय, पिलातुस तरअः ईसु आला गोएःग होड़ो के इईदी लःअय गोहराव नेनाय। पिलातुस छुट्टी एमा लियाय, हिना लःअय जोसेफ हीःग केते, ईसु आला गोएःग होड़ो इदी लःअय।
39 #
सं.जोह 3:1,2 निकोदिमुस होः सोदोर नेनाय, जे पहिल रे ईसु लोः भेंटोः निदा हीःग थिनाय। हुनी तीस किलो गंधरस आउर मंह-मंहाअ वाला मेसा लअः आगु लःअय। 40तब हुंकू ईसु आला गोएःग होड़ो के इदी लअकु, आउर जाहुदीकु आला काम-किरया रअः दसतुर मोताबिक, हुनी के सोहों सुनूम लोः कफन गेन्दरअ रे मेरहाव लियाय। 41जे एड़े ईसु के रकाःब थिलयाकु, होनाःड़े मियांड बाखड़ी ताही नेना आउर होना बाखड़ी रे मियांड नावाँ माँड़ा रअः मारघटा ताहिना, होना रे ओका हिला होः ओके केहोः काकु दोहो थिलकुआ। 42हिना लःअय हुंकिन, ईसु के हिना रे दोहो लियाकिन। एता लःअय ची होना हिला जाहुदीकु आला सार-समाईन रअः दिन ताहिना आउर होना मारघटा हेनाःड ताहिना।
اکنون انتخاب شده:
संत.जोहन 19: ASR
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023 NLCI CC BY-NC-ND 4.0