संत.लुकास 2
2
ईसु आला जनम
(संत.मत्ती 1:18–25)
1हिमीन बेरा गोटा रोम राईज रिनकु होड़कु के, नुमू लिलिखाः ची लःअय राजा अगुस्तुस कैसर पखा तरअः हुकूम उडुंग नेना। 2रोमी राईज रआ नोःआँ पहिला घर-सोमारी ताहिनेना हिमीन बेरा, कोरनेयुस सिरिया रिनी राजपाल ताहिनाय। 3हिना लःअय जामा होड़, नुमू लिखाः ची लःअय, अपन-अपन सहर सेन नेनाकु।
4जोसेफ होः दाऊद घराना, हेतरअ खानदान रिनी ताहिनाय। हिना लःअय गलील रेनअः नासरत सहर तरअः जाहुदिया रेनअः दाऊद आला जनम सहर बाइतुलेम सेन नेनाय। 5हुनी नुमू लिखाः ची लःअय मरियम लोः सेन नेनाय। जेकर जोम नु जोसेफ लोः हुयाव ताहिना, तेकर हुनी भारी होड़ो ताही नेनाय। 6हुंकिन के होंड़े तहीनोः, रेगी जजनमाव रेनअः दिन पुराव नेना। 7तेकर आएंग आली पाठ बेटा जनम नेनाय, तेकर गेन्दरअ रे गुड़मुड़ाव केते काठुत रे दोहो लियाय एतान लःअय ची डेरा ओड़ाअ रे डेडेरा लःअय ठाँव का ताहिना।
सिरमादूत तेकर चरवाहाकु
8तेकर होना राईज रे चरवाहा ताही नेनाकु। हुंकू निदा टोनांग रे तहीनोः केनाकु आउर अपन भेंड़ा गोहड़ा के होरहो कु केनाकु 9तेकर परभु आली मियांड दूत हुंकू दुबाःड़े हीःग केते तिंगु नेनाय, तेकर परभु आला महिमा रआ इंजोत गोटाते मरसल किद कुआय, हेतरअ हुंकू मुरुक बोरोः नाकु। 10होले सिरमादूत कंहड़ीओ लिकुआय, “आलपे बोर, नेलेपे ईङ आपे के मुरुक रीझोः रआ बेस खभाईर सुनाव उपेईङ, जे जामा होड़ लःअय ताही कोआ। 11तिसिंग दाऊद आला सहर रे आपे लःअय मियांड उ-उधार अवला जनमाव तनाय हेतरअ नीई ख्रीस्त परभु हेके। 12तेकर आपे लःअय नोःआँ चिनहा ताही कोआ ची आपे मियांड बालेक चेंगा के गेन्दरअ रे गुड़मुड़ाव लिनी काठुत रे गितीःग ऊनी नाम कियापे।”
13तेकर अचाका हुनी सिरमादूत लोः सिरमादूतकु आला खुड़हा परमेसर के बड़ाई याःते, हेतरअ नोकान कंहड़ी याःते नेल नेनाकु,
14“सिरमा रे परमेसर के महिमा तेकर ओत रे,
जे होड़ लःअय परमेसर रिझ तनाय हुनी के सानती भेटाअः!”
15तेकर सिरमादूत हुंकू दुबाःड़े तरअः सिरमा सेनोः नाकु, दो चरवाहाकु “दु आबु बाइतुलेम सेन केते जे हुयाव ताना, परभु उदूः तडबुआय के नेलेआबु,” मेन केते आकु-आकु कंहड़ीयोः तनाकु।
16तेकर हुंकू झट के सेन केते मरियम हेतरअ जोसेफ के नाम लियाकु, तेकर काठुत रे हुनी बालेक चेंगा के गितीःग ऊनी नेल लियाकु। 17हुनी के नेल केते चरवाहाकु, हुनी बालेक चेंगा रआ बारे सिरमादूत हुंकू के कंहड़ी उदूः ताही लिकुआय, होना बात हुंकिन के कंहड़ी उदूः लअकु। 18तेकर जामा आ-आयुमकु जे चरवाहाकु हुंकू के कंहड़ी उदूः लिकुआकु दो होना बात रे छकित नाकु। 19बकिर मरियम नोःआँ जामा कंहड़ी के आएंग आला मन रे दोहो केते उ-उईहार केनाय। 20तेकर चरवाहा के जे लकान कंहड़ी लअः थिना, हिना लकान गी जामा आयुम केते हेतरअ नेल केते परमेसर आला बड़ाई तेकर सिरिंग याःते रूवाड़ नेनाकु।
ईसु के गोनो लियाकु
21 #
लेवी 12:3;
सं.लुका 1:31
तेकर आठ रोज पुराव नेना, हेतरअ हुनी के ख-खतना रआ बेरा हीःग नेना, दो हुनी आला नुमू ईसु दोहो लअकु, जे सिरमादूत हुनी के लाहीःग रे अनौरी सिरजअः तरअः पहिल रेगी कंहड़ी ताही लःअय।
22तेकर मुसा आला कनहुन लकान, हुंकिन आला सुधोअ रेनअः दिन पुराव नेना। दो जोसेफ आउर मरियम हुनी चेंगा के परभु दुबाःड़े हाहजीर लःअय जिरोसलेम ईदी लियाकिन। 23#उइठ 13:2,12“जामा पाठ बेटा के परभु लःअय पबितर मनाअ कु” नोःआँ परभु आला कनहुन रे लिखा लअः एदनाअ। 24#लेवी 12:6–8तेकर परभु आला कनहुन लकान, “मि जोड़ा पंड़की चाहे मि जोड़ा पेरवाँ छउना” आगु केते बलिदान रकाःब कुपे।
सिमोन आला सिरिंग
25हिमने बेरा जिरोसलेम रे सिमोन नुमू रिनी मियांड होड़ ताही नाय। तेकर हुनी होड़ धरमी हेतरअ परमेसर के बोर वाला ताही नाय, तेकर इसराइल रआ छुटकारा रेनअः होरा नेल असरायोः केनाय। तेकर हुनी रे पबितर आतमा ताही नेना 26तेकर पबितर आतमा आम परभु आली ख्रीस्त के अनौरी नेली जगुत, एरोम गोजोआ मेन केते उदूः ताही लियाय। 27हुनी पबितर आतमा रआ आगवाई रे, बड़े बिनती ओड़ाअ हीःग नेनाय। हिमने रे ईसु लःअय परभु आला कनहुन रआ नेग पुपुरा लःअय एंगा-आपा ते ईसु के भीतरी आदेर लियाकिन, 28हिमीन रे सिमोन ईसु के कोयोङ लियाय, तेकर परमेसर के धन्यवाद केते कंहड़ी लःअय,
29“ए मलिक, नहाअः दो आम अपन बचन के पुरा लआम हिना लःअय,
बंधाउवा ताम के सानती से बिदाई मे।
30एता लःअय ची ईङ दो मेःड तिंग रे आम कुलगोःड लिनी आम आली उ-उधार अवला के नेल किदयीङ,
31जेके आम जामे राईज रिनकु होड़ मड़ांग रे कुलगोःड तदिङाम,
32 #
जसा 42:6; 49:6; 52:10 हुनी एटाअ जाईतकु के बंचाअ रअः होरा उउदूः लःअय मरसल,
तेकर आम आलकु अपन होड़ इसराइल रआ महिमा हुयाआ।”
33हुनी आलकिन एंगा-आपा, ईसु बारे कंहड़ी केनाय होना कंहड़ी रे चाकित नाकिन। 34तेकर सिमोन ईसु के आसीस एमा केते, हुनी आली आयाते मरियम के कंहड़ीओ लियाय, “नेलेमे नुई दो इसराइल रे ढेर होड़ के उयुगोः हेतरअ बि-बिरिःड लःअय परमेसर आला चिनहा हुयाअः लःअय ठहराव लिनी एदानिया। हुनी आला बिरोध रे बात कंहड़ी केआकु 35आउर ढेरकु आला मन रेनअः विचार दिसतार कोआ, आम के मुरुक बिपाईत हुयाव कोआ, जे लकान मियांड चोख तलवाईर रे, आम आला जीव होनोन-नोनोन जोबाव परोम जुनोआ।”
हन्ना आला गोवाह
36आसेर गोतोर रे हन्ना नुमू रिनी फनुएल आली माई मियांड आगमजानी ताही नेनाय, हुनी मुरुक सिंयाड़ी ताही नेनाय, तेकर बिहा तयोम सात बरीस हुनी हेरेल ताय लोः ताही नेनाय होना तयोम राँड़ीः नाय।
37हुनी चौरासी बरीस रिनी ताही नेनाय। तेकर बड़े बिनती ओड़ाअ के काय बाई केना, बकिर निदा ना सिंङ उपास हेतरअ बिनती रे परमेसर के सेवाई केनाय। 38तेकर हुनी हिमीन रे होनाःड़े हीःग केते परमेसर के धन्यवाद दियाय, तेकर जिरोसलेम रआ छुटकारा रेनअः होरा नेल आसरा ताही नेनाकु के हन्ना ईसु रअः बारे उदूओ दिकुआय।
जोसेफ तेकर मरियम आला नासरत रूवाड़ोः
39 #
सं.मत्ती 2:23
जब हुंकू परभु आला कनहुन लकान जामा पुरा केते, हुंकू अपन गलील रेनअः नासरत सहर रूवाड़ नाकु। 40तेकर हुनी चेंगा हरायोःते तेकर केटेगोःते हेतरअ बुधी रे पेरेःग सेन नेनाय; तेकर परमेसर आला, दया हुनी तेङ रे ताही नेना।
ईसु बड़े बिनती ओड़ाअ रे
41 #
उइठ 12:1–27; कन 16:1–8 ईसु आलकिन एंगा-आपा सालेक साल पासका परब रे जिरोसलेम सेनोः केनाकिन। 42जब ईसु बारह बरीस रिनी हुयाव नाय हिमीन रे परब रेनअः नेग लकान जिरोसालेम सेन नेनाकिन। 43तेकर हुंकू परब रेनअः दिन चबा केते, ओड़ाअ रूवाड़ोः केनाकु, हिमीन रे कोड़ा ईसु जिरोसलेम रे ताहिः नाय। होना के एंगा-आपा ते ककिन पाड़ी केना; 44हुंकिन एटाअ होरा डीड़ोः कु लोः एदानिया हुई मेन केते मुसिङ रेनअः होरा सेनोः नाकिन। तेकर हुनी के अपन गुतियाकु हेतरअ जन चिनहारकु रे हुनी के नाम बड़ाअ दियाकीन। 45बकिर हुनी काय भेटाव नेना, हिमीन रे नाम-नामते आउर गी जिरोसलेम सोदोर नाकिन। 46तेकर पे रोज तयोम हुंकिन हुनी के बड़े बिनती ओड़ाअ रे, धरम पुथी सि-सिखावकु हुंकू ईसु आला कंहड़ी के आयुमे केनाकु, तेकर सवाल जबाप याःते नाम लियाकिन। 47जामा हुनी आला कंहड़ी के आयुमे केनाकु, हुंकू जामा हुनी आला समझाअ तेकर कंहड़ी रूवाड़े केनाय नोःआँ बात रे छकीतोः केनाकु 48तेकर हुंकिन नेल केते छकित नाकिन, तेकर एंगाते, “ए बाबु आम आलिंग लोः एतान लःअय नोकान बेवहार लआम? नेलेमे आम आली बाबा ताम हेतरअ ईङ कुंहराःते आम के दांड़ाः देमे आलिंग” बेता लियाय।
49ईसु आएंग आलकिन एंगा-आपा के, “आबेन ईङ के एता लःअय दांड़ाः दिङाबेन? ईङ के अपन आपा आला ओड़ाअ रे तहीनोः दरकार एदनाअ?” मेन केते बेता लिकिनाय 50बकिर जे बात ईसु कंहड़ीओ लिकिनाय होना बात के ककिन बुझाव नेना।
51तेकर हुनी हुंकिन लोः नासरत रे हीःग नेनाय, तेकर हुंकिन आला हुकूम रे ताहिनाय। तेकर एंगाते नोःआँ जामा कंहड़ी के अपन मन रे दोहो लःअय। 52#1 समु 2:26; बेव 3:4तेकर ईसु बुधी रे हेतरअ होड़ो रे, तेकर परमेसर हेतरअ होड़कु आला दया रे हरा सेन नेनाय।
اکنون انتخاب شده:
संत.लुकास 2: ASR
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023 NLCI CC BY-NC-ND 4.0