संत.लुकास 22
22
ईसु के गोगोएःग ची लःअय बिचार
(संत.मत्ती 26:1–5; संत.मरकुस 14:1–2; संत.जोहन 14:10–11)
1 #
उइठ 12:1–27
अमचुर लाःड रेनअः परब जे पासका परब कंहड़ी योआ होना हेनाःड ताहिना। 2तेकर बड़े पुरोहित हेतरअ धरम पुथी सि-सिखावकु होड़कु तरअः बोर केनाकु, हिना लःअय परभु ईसु के एता लकान गुजियाबु मेन केते, सिड़िःग-सिड़िःग ऊखी कु नाम केना।
3तेकर ईसु के बारा चेलाकु रे मिहोंड़ जहुदा रे सैतान बोलो नेनाय, हुनी इसकारयोती नुमुयोः केनाय। 4तेकर हुनी सेन केते ईङ ईसु के एता लकान आपे आला तीः रे सःब चियींग मेन केते बड़े पुरोहितकु हेतरअ सिपाहीकु आली मलिक दारोगाकु लोः बतियाव लःअय। 5हुंकू हुनी के रिझ नाकु आउर ढिबुआ एमोअ लःअय गछाव नेनाकु। 6हुनी आंगराव नेनाय तेकर जे बेरा भीड़ का ताहिनोआँ, हिमीन रे हुंकू आला तीः रे ईसु के सःब चियींग मेन केते घाईत नाम बड़ाय केनाय।
पासका रेनअः आखरी भोज रेनअः तेयारी
(संत.मत्ती 26:17–25; संत.मरकुस 14:12–21; संत.जोहन 13:21–30)
7तेकर बे आमचुर लाःड रेनअः परब हिला सोदोर नेना, होना रे पासका रअः भेंड़ा बलिदान जरूरी ताहिना। 8तेकर ईसु, पतरस आउर जोहन के, “जु सेन बेन तेकर आबु जोजोम लःअय पासका भोज बनाय बेन” मेन केते कुलगोःड लिकिनाय।
9हुंकिन “ओकाःड़े लिङ बनाया, आम ओकाःड़े चाहाः तनाम?” मेन केते कुली लियाकिन।
10ईसु हुंकिन के बेता लिकनाय, “नेले बेन डिही बोल तोरन, दाअः घाईला गोः लिनी मिहोंड़ हेरेल नाम कियाबेन, आबेन होः हुनी के ओतोङ ईदी बेन। जे ओड़ाअ रे बोलाय होना ओड़ाअ रे बोलबेन, 11तेकर ईङ चेलाकु लोः पासका भोज जोमेईङ होना गुतिया ओड़ाअ ओकाःड़े एदनाअ ‘नोःआँ गुरू कुली तदमेआय मेन केते, ओड़ाअ मुंवार के कंहड़ी उयबेन?’ बेता लिकिनाय। 12तेकर हुनी पटान ओड़ाअ के सिंगराव लआ सेंड़ाः केन कुड़िया उदूः केबेनाय, हिना रे बनाय बेन।”
13हुंकिन सेन केते, ईसु उदूः ताही लिकिनाय हिना लकान गी नाम लआकिन, तेकर पासका रअः भोज सरा जमा लआकिन।
परभु भोज
(संत.मत्ती 26:26–30; संत.मरकुस 14:22–26; 1 कुरिन्थी 11:23–25)
14तेकर होना बेरा सोदोर नेना, हिमीन रे ईसु बारा प्रेरितकु लोः हुनी जोजोम दुड़ूः नेनाय। 15तेकर हुनी हुंकू के कंहड़ीओ लिकुआय, “ईङ बिपाईत सहाव आउर गोजोः तरअः पहिल रे नोःआँ पासका भोज आपे लोः जोजोम सुहाव ताहिलिङा! 16एता लःअय ची ईङ दो परमेसर आला राईज रे नोःआँ पासका रआ मतलब अनौरी पुरायोः जगुत होना के ओका हिला होः नोःआँ भोज के इरिंग जोमेआ” बेताः दिपीईङ।
17तब ईसु कटोरा ईदी केते, हुनी धन्यवाद केते, “ने नोःआँ के हाटीङे पे मेन लःअय। 18ईङ कंहड़ीओ दिपीईङ, परमेसर आला राईज अनौरी हिजोअ जगुत अंगुर रेनअः रस नहाअः तरअः ओका हिला होः इरिंग नुयाँ” मेन लःअय।
19तेकर हुनी लाःड इदी केते, आउर गी धन्यवाद केते होना के केचाअ लःअय, तेकर हुंकू के नोकान कंहड़ी याःते एमा लिकुआय, “नोःआँ ईङ आला होड़ो हेके, जे आपे लःअय एम लअः एदनाअ, ईङ आला याईद रे निआँ लकानेपे” मेन केते कंहड़ीओ लिकुआय। 20#जिर 31:31–34निआँ लकान, हुनी बियाड़ी जोम तयोम कटोरा के होः, नोकान कंहड़ी याःते एमा लिकुआय, “नोःआँ कटोरा आपे लःअय तु लआ, ईङ आला मयोम तरअः इया लआ परमेसर आला नावाँ करार हेके।”
21 #
सिरिंग 41:9
बकिर “नेलेपे! ईङ के ससःब चिई ईङ लोः जोम दाय! 22मनवा होपोन के दो गोजोः एदनाअ गी, जाईसन ची परमेसर ठहराव तदाय, बकिर हाय हुनी होड़ के जे सःब चिङाय!”
23तेकर हुंकू कुली उपड़ीनोः तानाकु, आबु रे नोःआँ कामीई ओके हेके।
चेला रे ओके बड़ेआय
24 #
सं.मत्ती 18:1; सं.मर 9:34; सं.लुका 9:46 तेकर चेलाकु रे झमेला नेना, आबु रे ओके बड़ेआय। 25हुनी हुंकू के कंहड़ीओ लिकुआय, “एटाअ जाईत रिनकु हुंकू आलकु राजा हुंकू रे राईजेआकु, तेकर जे हुंकू रे हक दोहो याकु ‘हुंकू भभलाई कु कंहड़ी योआकु।’ 26#सं.मत्ती 23:11; सं.मर 9:35#सं.मत्ती 20:25–27; सं.मर 10:42–44बकिर आपे आलपे नोकानोः; जे आपे रे बड़ेआय हुनी छोटेकु लकान ताहीनोः पे, अगुवा के मियांड धाँगड़ लकान बनाअः चाही। 27#सं.जोह 13:12–15बकिर बड़ेई दो ओके हेके, जोजोम दुड़ूः उनी ची धाँगड़? जोजोम दुड़ूः उनी काय बड़ेआ एतान, बकिर ईङ आपे आला तलारे धाँगड़ लकानिंङ।
28“ईङ आला बिपाईत रे ईङ लोः ताहीनोः कु आपे गी हेके; 29तेकर बाबा तिंग ईङ लःअय राईज ठहराव तदाय, हिना लकान ईङ होः आपे लःअय ठहराव तदिङ। 30#सं.मत्ती 19:28तेकर आपे ईङ आला राईज रे ईङ आला टिबुल रे जोम नुईपे, तेकर आपे राईज गदी रे दुड़ूः केते इसराइल रिनकु बारा गोतोरकु आला नेयाय केआपे।”
पतरस ईसु के काईङ पाड़ीआ रेनअः आगमजानी
(संत.मत्ती 26:31–35; संत.मरकुस 14:27–31; संत.जोहन 13:31–38)
31ईसु सिमोन के बेता लियाय, “सिमोन! ए सिमोन! नेलेमे! आपे के गोहोम लकान, गुगुम लःअय सैतान परमेसर के कुली तदियाय। 32बकिर आम आला बिसवास आलु चबायोः मेन केते, ईङ आम लःअय बिनती लिईङ। तेकर आम रूवाड़ोआम दो, बोको ताम के असथीर कुमे,” मेन लःअय।
33तेकर पतरस ईसु के बेता लियाय, “हे परभु, आम लोः जेहेल सेनोः लःअय हेतरअ गोजोः लःअय होः तेयारीङ!”
34तेकर ईसु, “ए पतरस, तिसिंग गी सीम कु अनौरी रागे जगुत आम पे खेप हुनी के काईङ पड़ीआ मेन केआम निआँ ईङ बेताः देमेआ” मेन केते हुनी कंहड़ीओ लियाय।
बाटुवा झोला तेकर तलवाईर
35 #
सं.मत्ती 10:9,10; सं.मर 6:8,9; सं.लुका 9:3; 10:4 आउर गी ईसु हुंकू के कंहड़ीओ लिकुआय, “ईङ आपे के बेगार बाटुवा, झोला हेतरअ बेगार खड़पा रे कुलगोःड ताही लेपेआ, दो आपे के जहान जिनीस रेनअः घटी हुयाव नेना?”
हुंकू “एतान जिनीस होः का घटाव नेना,” मेन लअकु।
36तेकर हुनी, हुंकू के, बकिर “नहाअः दो जेकर दुबाःड़े बाटुवा एदनाअ, हुंकू होना के ईदीकु तेकर हेंकान गी झोला होः, आउर जेकर दुबाःड़े तलवाईर कनोआँ, हुनी अपन गेन्दरअ आखरिंग केते मियांड तलवाईर किरिङेपे बेता लिकुआय। 37#जसा 53:12ईङ आपे के कंहड़ीओ दिपीईङ, ‘हुनी पापीकु लोः लेखा नेनाय’ मेन केते धरम पुथी रे लिखा लअः होना बात ईङ रे पुरायोः जरूरी एदनाअ। आउर जे ईङ आला बारे रे लिखा ताना होना जामा पुरा हुयाअः वाला एदनाअ।”
38चेला ताय कंहड़ी लअकु, “ए परभु, नेलेमे बरिया तलवाईर नोआँड़े एदनाअ” हुनी ढेर एदनाअ बेता लिकुआय!
जैतुन बुरु रे ईसु आला बिनती
(संत.मत्ती 26:36–46; संत.मरकुस 14:32–42)
39ईसु बाहरी उडुंग नेनाय, पहिल रे सेनोः केनाय लकान जैतुन बुरु ते सेन नेनाय; तेकर चेलाकु हुनी के ओतोङ ईदी लियाकु। 40होना ठाँव रे सोदोर केते “हुनी बिनती पे” परीकछा रे आलपे उयुअ कोअ, मेन केते बेता लिकुआय।
41तेकर हुनी मियांड टुकू लेलेबदा उमिन लंका हुंकू तरअः एटाअ ते सेन केते इकड़ुम केते नोकान बिनतीः दाय, 42“ए बाबा, आम चहाअ तनाम होले, नोःआँ दुख रेनअः कटोरा के, ईङ दुबाःड़े तरअः ओचोः गेमे। बकिर ईङ आला मन लकान दो कोवान, बकिर आम आला मन पुरायोः।” 43तब मियांड सिरमादूत हुनी के ढाढ़स एमोअ लःअय, हुनी लोः देखार नेनाय। 44ईसु मुरुक दुख रे धेयान एम केते बिनती केनाय; तेकर हुनी आला बलबल दाअः ओत रे मयोम लकान टिपागोः केना।
45तेकर हुनी बिनती केते बिरिःड नेनाय, हेतरअ चेला ताय दुबाःड़े रूवाड़ केते, हुंकू के उदास आउर थकाव रे निन्दोः नाम लिकुआय। 46तेकर हुंकू के, “एतान लःअय निन्दोः तनापे? बिरिःड पे हेतरअ बिनती पे कोवान दो परीकछा रे उयुअ कोआपे” बेता लिकुआय।
ईसु के धोखा रे सःब लियाकु
(संत.मत्ती 26:47–56; संत.मरकुस 14:43–50; संत.जोहन 18:3–12)
47तेकर ईसु नोकान कंहड़ी केनाय हिमने रे तुन्दरा होड़ हीःग नेनाकु, हेतरअ हुंकू बारहों चेलाकु रे मिहोंड़ जहुदा नुमू रिनी चेला, हुंकू मड़ांग-मड़ांग हिजोअ केनाय। आउर हुनी मड़ांग रे हीःग केते ईसु के चुमा लियाय। 48तेकर ईसु बेता लियाय, “ए जहुदा, एतान आम मनवा होपोन के चुमा केते धोखा रे सःब चिईः दियाम?”
49तेकर ईसु लोः ताहिनाकु, हुंकू एतान हुयाअः ताना होना के नेल केते, “ए परभु, आले तलवाईर रे मांअ कुआले एतान?” बेता लियाकु। 50तेकर हुंकू रे मिहोंड़ बड़े पुरोहित आली बंधाउवा ताय आला, जोम लुतूर के तलवाईर रे मांअ खांड़ा केदाय।
51नोःआँ राअः चलते ईसु, “नहाअः दो निमनेपे मेन लःअय!” तेकर हुनी धाँगड़ आला लुतूर के सःब केते जोड़ाव लःअय।
52तेकर ईसु आएंग दुबाःड़े हीःग उनकु बड़े पुरोहितकु हेतरअ बड़े बिनती ओड़ाअ होरहोकु आलकु सरदारकु हेतरअ नेताकु जे हुनी बिरोध रे बिरिःड हीःग ताहिनाकु के, “आपे ईङ के डाकु मेन केते तलवाईर, हेतरअ हापा सःब केते ईङ दुबाःड़े हीःग तनापे एतान? 53#सं.लुका 19:47; 21:37ईङ बड़े बिनती ओड़ाअ रे रोज दिन आपे लोः ताहिनिंग, हिमीन रे आपे ईङ के कापे सःब लिङा। बकिर नोःआँ आपे आला बेरा हेके, हेतरअ अंधार रेनअः हक हेके,” बेता लिकुआय।
पतरस ईसु के काईङ पाड़ीआ मेन लःअय
(संत.मत्ती 26:57,58,69–75; संत.मरकुस 14:53–54,66–72; संत.जोहन 18:12–18,25–27)
54हुंकू ईसु के सःब ईदी केते, महापुरोहित आला ओड़ाअ आगु लियाकु; पतरस उकु-उकु हुनी के ओतोङ ईदी लियाय। 55तब थोड़ेक होड़ ताला राच रे सेंगेल जुल केते मिएड़े दुड़ूः नेनाकु, दो पतरस होः हुंकू लोः सेन केते दुड़ूः नेनाय। 56तेकर मियांड धाँगड़ीन हुनी के सेंगेल ईंजोत रे दुड़ूः नेल केते, हुनी के नेल थिताव केते, “नुई होः दो ईसु लोः ताहिनाय” कंहड़ी लःअय!
57बकिर हुनी, “ए आउराईत, ईङ हुनी के काईङ पाड़ीआ” बेता लियाय!
58घड़ीक तयोम एटाअ होड़ हुनी के नेल केते, “आम होः दो हुंकू मेसे मिहोंड़ हेके” बेता लियाय!
पतरस, “ए बोको, ईङ हुनी नलागे” कंहड़ी रूवाड़ लःअय!
59तेकर मि घंटा लकान तयोम आउर एटाःई, “सचे गी नुई होः हिनी लोः ताहिनाय, नुई होः दो गलीली हेके” कंहड़ी लःअय!
60बकिर पतरस, “ए बोको, आम एतान कंहड़ी तनाम सेके ईङ काईङ पाड़ी ताना” बेता लियाय!
हुनी क-कंहड़ी केनाय, हिमने रे सीम रअः केदाय। 61हिमीन रे परभु उलटाव केते पतरस पखी लुड़ीःग लःअय, तेकर पतरस के, “सीम अनौरी रागे रे आम पेखेप ईङ हुनी के काईङ पाड़ीआ कंहड़ी, परभु कंहड़ीओ ताही लियाय के उईहार लःअय।” 62तेकर पतरस बाहरी उडुंग केते सिसकाव-सिसकाव ईयाम लःअय।
ईसु आला ठठ्ठा लअकु
(संत.मत्ती 26:67–68; संत.मरकुस 14:65)
63ईसु के पापहराकु, हुंकू हुनी के ठठ्ठा केते हुमाःगी केनाकु 64तेकर हुनी आला मेःड ताय के तोल एसेःड केते, “आगमजानी केते उदूः गेमे आम के ओके हुमाअ लेमेआय?” कंहड़ी केते कुली लियाकु! 65तेकर हुंकू एटाअ-एटाअ ढेर निन्दा रअः कंहड़ी हुनी आला बिरोध रे कंहड़ी लअकु।
बड़े पंचाईत दुबाःड़े ईसु
(संत.मत्ती 26:5–66; संत.मरकुस 14:55–64; संत.जोहन 18:19–24)
66तेकर आँगा नेना, हिमीन रे होड़कु आलकु नेताकु, हेतरअ बड़े पुरोहित, तेकर धरम पुथी सि-सिखावकु जुमाव नेनाकु, हेतरअ जाहुदीकु आला बड़े पंचाईत रे ईदी लियाकु। 67आउर हुनी के कुली लियाकु, “जदि आम परमेसर पखा तरअः कुलगोःड लिनी उधार एमोई ख्रीस्त हेके, होले आले के कंहड़ी गोअ तामे?”
हुनी, “ईङ आपे के कंहड़ीओ पेईङ दो, आपे एरपे बिसवासेआ; 68जदि सवाल कुली-पेईङ दो एरपे कंहड़ी रूवाड़ोईङा। 69बकिर नहाअः तरअः मनवा होपोन जामा तरअः सवांगिया परमेसर आला जोम पखी दुड़ूः ताही कोआय” कंहड़ी रूवाड़ोः लिकुआय।
70तेकर जामाकु बेता लियाकु, “तब दो, आम परमेसर आली होपोन हेके एतान?”
हुनी हुंकू के, “आपे गी कंहड़ी तनापे दो ईङ गी हेके।”
71हुंकू कंहड़ी लअकु, “नहाअः दो आबु के आउर एतान गोवाह चाही! हुनी आला आहा तरअः आबु खुदे आयुम केदाबु” मेन लअकु!
اکنون انتخاب شده:
संत.लुकास 22: ASR
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023 NLCI CC BY-NC-ND 4.0