जोहन 4
4
ईसु जोटोः समरी लंञी
1फरीसीकु नोआँ अयुम लअकु चि, ईसु जोहन एतेन बगरा चेला बनावकुअय, जोटोः हुँकू बतिसमा ओवा कुअय। 2(ईसु खुद काय एम यते दोहोना, बकिन हुँनि रेनकु चेला बतिसमा एम यते दोहोनाकु।) 3ईसु तआ नोआँ पता चलावना दो हुँनि जहुदिया बय केते फिन गलील सेनोः लेनय, 4जोटोः हुँनि समारिया सोझ सेन दरकार दोहोलेना। 5#अँगन 33:19; जहो 24:32हुँनि समारिया रआ सुखार ञुमुन नगर हमाः सेनलेनय। नोआँ नगर होना ओत ठँव रेए जेके जाकुब अपन होपोन ते जोसेफ ओवा दोहोलाअय। 6जोटोः जाकुब रआ डडी हों होंडे दोहोलेना, ईसु सेन-सेन ते थकाव दोहोनय हिनाते होना डडी एडे दुड़ूः यनय; नोआँ दुखमा तीकिन जुवार लेका रे होयावना।
7हेनेन रे मियड् समारिया लंञी दाअ् पेरेज् वेज्नय, ईसु हुँनि कथावा लअय, “इञः दाअ् पियावेञमी।” 8चितानतआचि हुँनि रेनकु चेलाकु, नगर रे जो-जोमा किरिञ अगु सेन दोहोलेनाकु। 9#एजरा 4:1–5; नहे 4:1,2जहुदी होड़कु सामरिया रेनकु तुली चिताना ककु बेवहार यते दोहोना, हिना करने सामरिया रेनि लंञी हुँनिए कथावा लअय, “अमः जहुदी हके रेहों इञः सामरिया रेनि लंञी एतेन तन तआ दाअ् मी कोययतेआ?” 10ईसु कथा रुवाड़ लअय, “अगर अमः परमेसर रआ वरदान ठुवा लेड्, जोटोः नोआँ होम ठुवा लेड् चि इञः दाअ् पियावेञमी कथायतेअय हुँनि ओके हके दो अमः हुँनि एतेन कोय केदम अने, जोटोः हुँनि अमः तआ जीवन रआ दाअ् ओवाकिड्मीअय अने।” 11लंञी हुँनि कथावा लअय, “ओय परभु, अमः एडे दो दाअ् लु तआ दो चितानहों कोनाआँ, जोटोः डडी गडाआ। दो फिन जीवन रआ दाअ् अमः एडे ओका एतेन वेज्लेना? 12तना अमः आले रेनि बबा जाकुब एतेन सेंड़ाअम, जे आले नोआँ डडी ओवा तड्लेअय। हुँनि खुद, हुँनि रेनकु सेंगोज्कु जोटोः हुँनि रेनकु म-मासीकु नोंडे नोआँ डडी रे दाअ् ञू यते दोहोनकु।” 13ईसु कथा रुवाड़ लअय, “जे ओके नोआँ दाअ् ञुवेअँय, हुँनि फिन तेताङोअय, 14बदे जे ओके होना दाअ् ञुवेआकु जे इञः हुँकूञ ओवा कुआ, हुँकू फिन कहियो एरोकु तेताङना; बदे जे दाअ् इञः हुँकूञ ओवा कुआ हुँकू एडे पझरा पड़ी एंडायोओ जे का अन्तोः अवला जीवन तआ तू इञोआँ।” 15लंञी हुँनि एडे कथालअय, “ओय परभु! होना दाअ् इञः ओवाञमी जेकर ते फिन अलोञ तेताङ दोहोकोः जोटोः न नोंडे हमाः दाअ् पेरेज् वेज्कोः।” 16ईसु हुँनिए कथावा लआ, “जू अपन हड़ाम-मी नोंडे राअ् अगुइमी।” 17लंञी कथा रुवाड़ लअय चि, “इञः बेगर हड़ाम रेनिञ हके।”
ईसु कथालअय, “अमः ठीक मी कथायतेअम, ‘चि इञः बेगर हड़ाम रेनिञ हके।’ 18चितानतआचि अमः पाँच गोट हड़ाम चुकाव तड्कुअम, जोटोः जेकर तुली नहाः अमः इदानमिआँ हुँनि हों अमः रेनि हड़ाम नालगे। नोआँ अमः सनारीम कथा तड्आ।”
19लंञी हुँनि कथावा लअय, “ओय परभु, इञः समझाव यनइञ चि अमः परमेसर पड़ा एतेन दुखमाय अवला होड़ हके। 20आले रेनकु बबा-ताताकु निआँ टोंगरी रे अराधना लआकु, जोटोः अमः कथायम चि जेरुसलेम रे अराधनय चही।” 21ईसु हुँनि कथावा लअय, “ओय लंञी, इञः रआ दुखमा रे सारीयोमी चि होना बेरा वेजो गोना, जब होड़कु बबा रआ अराधना न नोआँ टोंगरी न जेरुसलेम रे करावेअकु। 22आपे जेके कपे ठुवावना हिनी रआपे बिनतीया; जोटोः आले जेकेले ठुवावना हिनी रआ अराधनाया, चितानतआचि पाप एतेन बंचाव जहुदीकु एतेन ही इदानआँ। 23बदे होना बेरा वेजो गोना, जोटोः वेज् ही यना, जेकर रे सनारी भक्त बबा परमेसर रआ अराधना आतमा जोटोः सचाइ ते करावेअकु, चितानतआचि बबा परमेसर नेंकन अराधना करावे अवलाकुइ ञमा। 24परमेसर आतमा हके, जोटोः परमेसर रआ अराधना करावे अवलाकु आतमा जोटोः सनारी ते करावे चही।” 25लंञी हुँनिए कथावा लअय, “इञः ठुवा यतेअइञ चि मसी जे ख्रीस्त कहलावओय वेजोः अवलाया; जब हुँनि वेजोअय, दो अबुन गोटा दुखमा बतलाव वाबुनाय।” 26ईसु हुँनि कथावा लअय, “इञः जे अमः सुधञ दुखमायोना, हिनी हके।”
चेलाकु रआ रुवाड़ोः
27हिमेन रे हुँनि रेनकु चेला वेज्लेनाकु, जोटोः छकरीत नाकु चि हुँनि मियड् लंञी सुधा दुखमा योनय, सेकरो रे ओके हों ककु सोधाव लिदिया, “अमः चितानम चहावओ?” चहे “चितान तआ हुँनि सुधा दुखमायोओय?” 28हेनते लंञी गगरी हेनेन रे बयअटु केते नगर रुवड़लेनय, जोटोः होड़कुइ कथावा लआ, 29“एला, मियड् होड़ ञेलेपे, इञः जेञ कराव लआ होना गोटा बतलाव केदय, कहीं निई दो मसी न लगे?” 30तब होड़कु नगर एतेन उडुङ कोते, ईसु एडे जुमावोः तआ सेन लेनाकु। 31हिना घनी ईसु रेनकु चेला हुँनि एडे गोहराव लेनाकु चि, “ओय गुरु, कटीज् एकेन जोम कुमी।” 32बदे ईसु हुँकूइ कथावा लआ, “इञः एडे जो-जोम तआ नोंकन मंडी इदानआँ, जेकर बारे आपे कपे ठुवावना।” 33हेनते चेलाकु अकु-अकु सोधव ओपड़ेञ नाकु, “तना ओकेकुन नुई तआ एम तड्आकु तोरा?” 34ईसु होंकु कथावा लअय, “इञः रआ मंडी नोआँ हके चि इञः बिदा-ई रआ हिछा मोताबिक सेने जोटोः हुँनि रआ कामइञ पुराय। 35तना आपे कपे कथाया, ‘ईरोः होयावोः तआ नहाः चार महिना बंचाव तना?’ ञेलेपे, इञः आपेञ कथावा यना, अपन मेड् ते केता रे ञेलेपे चि होना ईरे तआ पकराव चुकाव तना। 36ई-ईरी बनी ञमेअँय जोटोः का अन्तोः अवला जीवन तआ फल जवारेए, जेकर ते बेरोई जोटोः ईरोः-ई बनार संघे संघे खुसी मनावेअकिन। 37चितानतआचि नोआँ रे कहावत सनारी होयावओ चि ‘मियड् बेरेअय जोटोः एटाः-ई ईरेअय।’ 38इञः अमः होना पयदा ईरे तआ बिदा तड्मिअइञ जेकर रे अमः रआ मेहनात का लगाव तना, जे एटाःकु मेहनात तड्आ जोटोः अमः तआ हुँनि रआ मेहनात रआ फल ञमोःयना।”
सामरियाकु रआ सारीयोः
39हुँनि लंञी गोवाही कथालअय, “हुँनि जे इञः कराव दोहो लाअइञ होना गोटा बतलाव केदय।” हिनाते होना नगर रेनकु अगम सामरिया रेनकु ईसु एडे सारी लेनाकु। 40हिनाते जब हुँकू सामरिया रेनकु हुँनि एडे वेज् लेनकु, हुँनि एडे गोहराव लेनाकु चि आले एडे दोहोनमी। हेनते हुँनि होंडे बारसिञ हमाः दोहोलेनय। 41ईसु रआ दुखमा चलते जोटोः हों अगम होड़ सारी लेनाकु, 42तब हुँकू लंञी सुधा कथा लआकु, “अब आले अमः रआ कथाय ही ते कले सारीयोना; चितानतआचि आले अपन ही अयुम तड्अले, जोटोः आले ठुवा केदाले चि सनारी नेनेनी दुनियाँ रेनि पाप एतेन ब-बंचावी हके।”
राइज करमचारी रेनि होपोन रआ नपायोः
43होना बारसिञ रआ तयोम, हुँनि होंडे एतेन उडुङ कोते गलील सेनोः लेनय। 44#मती 13:57; मर 6:4; लुका 4:24चितानतआचि ईसु खुद गोवाही एम दोहोलअय, “चि परमेसर पड़ा एतेन दुखमाय अवला होड़ अपन देस रे इजात काय ञमेआँ।” 45#जोह 2:23जब हुँनि गलील रे वेज्लेनय, दो गलीलीकु हुँनि सुधा खुसीतेकु जुटावना; चितानतआचि जे तना काम हुँनि जेरुसलेम रे परब रआ बेरा कराव दोहोलअय, हुँकू होना गोटाकु ञेल दोहोलआ, चितानतआचि हुँकू हों परब रे सेन दोहोलेनाकु।
46 #
जोह 2:1–11
हेनते ईसु फिन गलील रआ काना नगर रे वेज्लेनय, जे एडे हुँनि अँगुर रास रे बदली दोहोलअय। होना बेरा कफरनहूम राइज रेनि मियड् अधिकारी रेनि होपोन जंडिरा दोहोलेनय। 47अधिकारी नोआँ अयुम लअय, चि ईसु जहुदिया एतेन गलील रे वेज् कनाय, ईसु एडे सेनलेनय जोटोः गोहराव लेनय, चि वेज् कोते इञः रेनि होपोनिञ नपायेमी चितानतआचि हुँनि गोजोः लेका दोहोलेनय। 48ईसु हुँनि कथावा लिदियय, “आपे चिन जोटोः अचराज काम जबरे कपे ञेले तब रे एरोपे सारीलेना।” 49राजा रेनि अधिकारी हुँनि एडे कथालअय, “ओय परभु, इञः रेनि सेगोःज् गोजोः एतेन पहिल दू।” 50ईसु हुँनिए कथावा लअय, “जू, अमः रेनि सेगोःज् जीवेड्अय।” हुँनि होड़ ईसु कथा लआ दुखमा रे सारी लेनय जोटोः सेनोः यनय। 51हुँनि होरा रे ही दोहोलेनय चि हुँनि रेनकु बन्धुवा वेज् जुटावनकु जोटोः कथा लअकु, “अमः रेनि होपोनमी जीवेड्अय।” 52हुँनि हुँकू सोधाव लिड्कुअय, “ओकिन बेरा नपायोः बुहड़ी लेनय सुरुलेनय?” बन्धुवाकु कथा रुवाड़ लअकु, “होला तीकिन मी बजे दोहोना घनी हुँनि रआ जंडिरा ञीरयना।” 53तब अपाते ठुवा केदय चि नोआँ होना बेरा होयावना जे बेरा ईसु हुँनि एडे कथालअय, “अमः रेनि होपोनमी जीवेड्अय,” हुँनि जोटोः हुँनि रेनकु गोटे घराना सारी लेनाकु। 54नोआँ एटाः चिन-चमतकर काम दोहोलेना, जे ईसु जहुदिया एतेन वेज् कोते गलील रे एरञेल लअय।
اکنون انتخاب شده:
जोहन 4: BIX
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023 NLCI CC BY-NC-ND 4.0