LUK 21
21
विधवादानदी दान
मार्क 12:41-44
1येशुड कंडलु फैनिक यत्ती श्रीमंत मंदीन दानपेटीला दान येशेताप्पुड सुशा. 2इंगा वाड वगा गरीब विधवादान राग्याय रोंड कलदारलु आंटे वगा दमडी येशेताप्पुड सुशा. 3आप्पुड येशुड वान शिष्यलान आन्या, “निन मिक खरेम शपतान, इ गरीब विधवाद आंदार काना जास्त येशीनाद. 4येनटीक बाकी मंदी वार संपत्ती लोन्केल दान येशीनार. पण इदी गरीब उंडी दानदी आंता उपजीविका येस्काडनाद.”
यरुशलेम शहरदी विध्वंस इंगा युगदी अंत
मत्तय 24:1-2; मार्क 13:1-2
5यप्पुड काही शिष्यल परमेश्वर भवन बद्दल माटलाडदुर की, “आदी यंता सुंदर राळाता इंगा अपर्णलाता सजाया मतनेद उंडाद.” आप्पुड येशुड आन्या, 6“इल्ला दिनमुल वच्ची की, इदी जे मीर सुस्तुनार आदी आंताच केडपेदेंक वच्ची, दानदी वगा राय पण इंगोगो राय मिंदा निलवाक फोई.” 7वार वान प्रश्न आडगीर, “गुरुजी इ माटलु यप्पुड आय्यी? इंगा इ माटलु यप्पुड आय्यी? इंगा या चिन्ह मिंदकेल तेल्ची की इ माटलु आय्येय उंडाय?” 8येशुड आन्या, “मिमलान यवार फसाय मताराद आंका सावधान उंडा. येनटीक की ना फेरता शेंगेम मंदी वच्यार इंगा 'वाड निन उंडान' इल्ला आन्यार, इंगा वार आन्यार ‘वेळ देगार वच्चीनाद, वार यंका फोकुंडा!’#१योहान 4:1; मार्क 13:21-23. 9यप्पुड मीर लढाईल इंगा दंगल बद्दल इन्यार, आप्पुड यरस्कुनाकुंडा, येनटीक की इ माटलु कावाने बेक. पण इंताटला अंत काक फोई.” 10मंग वाड वारनी आन्या “वगा राष्ट्र इंगोगो राष्ट्र मिंदा लेशी, वगा राज्य इंगोगो राज्य मिंदा लेशी.#2 इतिहास 15:5-6; यशया 19:2. 11फेद्दाय भुकंपलु आय्यी, दुष्काळ फडी इंगा शेंगेम जागालला महामारी वच्ची, भयंकर घटनाल घडाशी इंगा मोडामला फेद्दाय चिन्हल कमशी. 12पण इदी आंता कावा काना मुंची वार मी मिंदा शेय येशार इंगा मिद छळ शेशार. चौकशी इचांग वार मिमलान यहुदी सभास्थान मुंदार नीला फडा मत्यार इंगा जेलला येशार. ना फेर इचांग वार मिमलान राजाल मुंदार इंगा राज्यपाल मुंदार येकेन फोयार. 13दिनिचांग मिक ना बद्दल साक्ष इच्चेदेंक संधी शिक्की. 14आप्पुड उत्तर यल्ला इच्चेद दिन बद्दल पहिलाने विचार शेशेद लेद इल्ला मी मनुद तैयार शेयना, 15कारण निन मिक इल्ला शब्दल इंगा इल्ला बुद्धी इच्यान की वार मिद विरोध शेशी शकायाक फोयार लेकाते मी विरुद्ध माटलाडी शकायाक फोयार. 16पण मी आम्मा आब्बाड, तम्मुळ्ळु, गोनगोत लोन्टोर मंदी इंगा मित्र मिद विश्वासघात शेशार इंगा मी दिंटल्योन्केल काही मंदीद जेम तिस्कुन्यार. 17ना फेर इचांग आंता मंदी मिद कोफाम शेशार. 18पण मी नत्ती मिंदुड वगा यंडकाद पण नाश काक फोई.#मत्तय 10:30; लूक 12:7. 19मीर मी धीर्यामता मी जेमदी रक्षा शेशार.
20 यप्पुड मीर यरुशलेम शहरनी सैनिकला तीकेल घेराशीनेद सुशार, आप्पुड मीर तेल्चकोंडा की दानदी नाश आय्येद उंडाद. 21यवार यहुदीया प्रांतला उंडार वार कोंडाल मिंदीक फारी फोवाला, यवार यरुशलेम लोना उंडार, वार शहर बैटीक यल्ली फोवाला इंगा यवार शेल्ला उंडार, वार शहर लोनीक फोवाराद. 22येनटीक की याय आन्नी माटलु राशीनेय उंडाय आय पुर्ण आयेदेंक इ शिक्षाय दिनमुल उंडाय.#अनुवाद 32:35; यिर्मया 46:10. 23आ दिनमुला यवार रंजलमनशी आंड्योर उंड्यार इंगा बिळ्ळाक तापेतोर उंड्यार, वारदी यंता दुर्दशा आय्यी. येनटीक की पृथ्वी मिंदा फेद्दाद संकट वच्ची इंगा मंदी मिंदा प्रकोप वच्ची. 24मंदीन तलवार धारता मतेशेदेंक वच्ची इंगा वारनी कैदी बनायमती इंगोगो राष्ट्रलालोन येकेन फोयार इंगा यहुदी लेनोरदी वेळ पुर्ण आय्यी नंताक वार यरुशलेम शहरनी काळा किंदा तोक्यार.#एज्रा 9:7; स्तोत्रसंहिता 79:1; यशया 63:18; यिर्मया 21:7; दानिएल 9:26.
25 सुर्य, चंद्र, सुक्काल इटलाला चिन्हल आय्यी इंगा पृथ्वी मिंदा संकट वच्ची, समुद्रलोन लाटला गर्जना इचांग राष्ट्रलालोन मंदी यरस्कुन्यार. #
स्तोत्रसंहिता 46:2-3; 65:7; यशया 13:10; 24:19. 26यरपु इचांग इंगा दुन्याम मिंदा वच्चे माटलाद दावा सुशी मंदी जेमला जेम निलवाक फोई, इंगा मोडामलोनी शक्तील हालाशी फोई.#लेवी 26:36; हाग्गय 2:6. 27आप्पुड मंदी मनशी कोडकुन सामर्थता इंगा गौरवता ढग मिंदा वच्चेताप्पुड सुशार.#प्रकटीकरण 1:7; दानिएल 7:13. 28पण इ माटलु आय्येद सुरुवात आय्यी, आप्पुड सक्कांग नीला फडना इंगा मिद नत्ती फैनिक शेयना, येनटीक की मी सुटकाद वेळ देगार वच्चीनेद उंडी.”
मेल्का उंडेद गरज
मत्तय 24:32-35; मार्क 13:28-31
29मंग येशुड वारकी वगा दाखला शप्या, “अंजीर शट्टु तीकुड इंगा इंगोगो शटला तीकुड सुडना. 30आटलाक पालवी फुट्टेदेंक आंट्या की, मीरे तेल्चकुंटार की, इप्पुड यंडाकालाम देगार वच्चीनेद उंडाद. 31आल्ले यप्पुड मीर इ माटलु आय्येताप्पुड सुशार, आप्पुड तेल्चकोंडा की परमेश्वरदी राज्य देगार वच्चीनेद उंडाद. 32निन मिक खरेम शपतान की, इ आन्नी माटलु घडाशी नंताक इ पिढीद नाश काक फोई. 33मोडाम इंगा पृथ्वी नष्ट आय फोई पण नाय वचनलु नष्ट काक फोई.
34 पण मीर स्वतान सांभाळींडा, लेकाते भोग-विलास, सराय तागे दिंटल्या इंगा संसारलोनी चिंताल इटलाता मी मनलु निंडी फोई आदी दिनमु फासा लेका अचानक वच्ची मी मिंदा फडी. 35खरेमे, आदी पृथ्वी मिंदा निलचेतोर आंदार मिंदा वच्ची.#प्रकटीकरण 3:3; लूक 12:40. 36दिनिचांग मीर इ आन्नी वच्चे माटला तीकेल बतकाला इंगा मनशी कोडकु मुंदार नीला फडेदेंक समर्थ कावाला आंका निरंतर प्रार्थना शेस्केन मेल्का निलना.”
37येशुड फगुलाला परमेश्वर भवनला नेरपुदु इंगा मोब्बुला वाड जैतुन आनीने कोंडा मिंदा नीलस्तुन्या. 38आंता वानदी नेरपुकाम इनेदेंक नसकुलाने लेशी वान तीकुड परमेश्वर भवनलोंग वस्तुनीर.
اکنون انتخاب شده:
LUK 21: WNT
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید