LUK 7
7
शताधीपतीन नोकर
मत्तय 8:5-13
1इनेतोर मंदीक येशुड वानी आन्नी वचनलु शप्पीनेंका वाड कफर्णहुम नगरला प्रवेश शेशा.
2आप्पुड यादो वगा शताधीपतीन प्रिय दास बिमार फडी सच्चेदेंक टेकाशीन्या. 3आप्पुड रोमी अधिकारी येशुन बद्दल इनी यहुदी आब्बागारनी वान देगार आंपी, नु वच्ची ना दासनी वाचायमत, इल्ला वानकी विनंती शेशा. 4यप्पुड वार येशुन देगार वच्चीर आप्पुड वार वानकी काळ मोक्की विनंती शेशीर, नु यवान इचांग इदी मदत शेशाव, वाड मदत इचांग योग्य उंडाड. 5येनटीक की वाड मा यहुदी मंदी मिंदा प्रेम शेस्ताड इंगा वाड मा इचांग माद यहुदी सभास्थान कट्टी इच्या. 6दिनिचांग येशुड वार जताक दावाता नडस्का फोया इंगा वाड वान इल्लुकेल शेंगेम धुराम लेकुंड्या, आप्पुड आ शताधीपती वान मित्रलान वान देगार आंपी आन्या, प्रभु, नु स्वताक त्रास इयाक, येनटीक की नु ना इल्लुक दावाला दिन योग्य निन लेन. 7इंगा नी देगार वच्चे योग्य निन स्वतान मानायान, पण नु फक्त शब्द माटलाड, आंटे ना सेवक बागा आय फोई. 8येनटीक की निन पण इंगोगोर अधिकार किंदा उंडीनोड मनशी उंडी ना शेय किंदा पण शिपाईल उंडार; इंगा यवान निन आंटान फो, तर वाड फोयताड इंगा इंगोगोन आंटान दा, तर वाड वस्ताड इंगा ना दासनी आंटान, इदी शेय तर वाड आदी शेस्ताड. 9यप्पुड येशुड आदी इन्या आप्पुड वानकी वान बद्दल नवल वाटाशा, वाड वान यंका वच्चीने समुदायनी तिरगी, “निन मिक शपतान, इंता विश्वास नाक इस्राएलला पण कमसा लेद.” 10इंगा यवार येशुन तीकुड वच्चीनीर, वार इल्लुक फोईर, आप्पुड वारकी कमशा की, वाड सेवक बागा आयनाड.
विधवादान कोडकु
11इंगा इंगोगो नाड इल्ला आय्या की, येशुड नाईन फेर उळ्योंग फोयतुन्या इंगा वान शिष्यल इंगा फेद्दाद समुदाय वान यंका फोदु. 12यल्ला वाड आ उर देगार वच्या आप्पुड सुडना, वगा सच्चीने मोगाबिडान बुडशेदेंक उर बैटीक येकेन फोदुर. वाड वान आम्माक वक्काडे कोडकु उंड्या इंगा आदी विधवा उंड्या; इंगा उळ्योन्टोर शेंगेम मंदी दान जताक उंडीर. 13आप्पुड दान सुशी प्रभुनकी दान मिंदा दया वच्या इंगा वाड दान आन्या “येडवाक” 14मंग वाड फाळ्या देगार फोई फाळ्यान मुट्ट्या; आप्पुड खांदा इच्चेतोर थांबाशीर इंगा वाड आन्या, “बिडा, निन निक शपतान, लेय!” 15इंगा वाड सच्चीनोड लेशी कुसन्या इंगा माटलाडदेंक आंट्या; इंगा येशुड आ मोगाबिडान वान आम्माक इच्या. 16आप्पुड आंदार यरस्कुनीर इंगा वार परमेश्वरकी गौरव इच्ची आनीर, “मा नडमा फेद्दा संदेष्टा वच्चीनाड इंगा परमेश्वर वान मंदीद भेट तिस्कुंडाड.” 17येशुन बद्दल इदी बातमी आंता यहुदीया प्रांतला इंगा आजुबाजुक उंडीने परिसरला पसराशा.
बाप्तिस्मा शेशेतोड योहान
मत्तय 11:2-19
18योहान देगार शिष्यल फोईगास आन्नी माटलु शप्पीर, 19आप्पुड योहान वान इद्दार शिष्यलान फिलच्या इंगा वाड वारनी प्रभुन देगार आडगेदेंक आंप्या की, यवाड वच्चेतोड ख्रिस्त उंड्या वाड नुये उंडाम येम की मिम इंगोगोनदी दावा सुशेद? 20आप्पुड आ मंदी वान देगार वच्चीर इंगा वान आनीर, “बाप्तिस्मा शेशेतोड योहान मोमलान नी देगार इदी आडगेदेंक आंपीनाड की, यवाड ख्रिस्त वच्चेतोड उंडाड वाड नुये उंडाव का मिम इंगोगोनदी दावा सुशेद?” 21आद्दे वेळला येशुड शेंगेम मंदीन वार बिमारीलाकेल बागा शेशा इंगा शेंगेम मंदी लोन्केल दुष्टात्माल तिशा इंगा गुड्ड्योरकी कंडलु इच्या. 22येशुड वारकी उत्तर इच्या, “फोंडा इंगा मीर येम इंटीर इंगा सुस्तीर आदी योहानकी शपना, गुड्योर सुस्तार, लंगड्याल नडस्तार, कुष्ठरोगील शुद्ध आयतार, बहिऱ्याल इंटार, सच्चीनोर जित्ता आयतार इंगा गरीब मंदी सुवार्ता इंटार.#यशया 35:5-6; 61:1. 23इंगा यवारकी ना बद्दल शक लेद वार धन्य उंडार.”
24आप्पुड योहान शिष्यल फोईनेंका वाड योहान बद्दल मंदी जताक माटलाडेदेंक आंट्या, “मीर येम सुशेदेंक मरु भुमीलोंग फोइंटीर? घालीता हालाशेद गड्डी येम? 25तर मीर येम सुशेदेंक फोइंटीर? मंची बट्टाल फेटकुनीनोड मनशी येम? सुडना, यवार मंची बट्टाल फेटकुंटार इंगा ऐशोआरामला निलस्तार वार राजवाडाला उंटार. 26तर मंग मीर येम सुशेदेंक फोइंटीर? संदेष्ट्यान येम? हुं, निन मिक शपतान, संदेष्ट्याल काना पण यवाड फेद्दावोड उंडाड वान.
27 सुड, ‘निन ना दुतनी
नी मुंदारकी आंपतान वाड नी मुंदारकी फोई नीद दावा तैयार शेशी,’
इल्ला वान बद्दल पवित्र शास्त्रला राशीनेद उंडाद वाड इडे उंडाड. #
मलाखी 3:1; यशया 40:3.
28 निन मिक शपतान की आंडीदान तीकेल यवार फुट्टीर वार दिंटल्या योहान काना फेद्दावोड इल्ला यवाडुच लेड, पण परमेश्वर राज्यला यवाड शेंगेम शिन्नावोड उंडाड, वाड वान काना फेद्दावोड उंडाड.” 29इंगा जकातदारला जताक आंता मंदी इनी 'परमेश्वर न्यायी उंडाड' इल्ला स्वीकार शेशीर येनटीक की वार पण योहानदी बाप्तिस्मा तिस्कुंडीर. 30पण परुशी मंदी इंगा नियमशास्त्र शिक्षकलु इर वान तीकेल बाप्तिस्मा तिस्कुनाक फोईर इंगा वार बद्दल उंडीने परमेश्वर योजनान नाकारीच्चीर.
31प्रभुड आडग्या, “तर मंग निन इ पिढीलोन मंदीद यवार जताक तुलना शेयदुन की वार यवार लेका उंडार? 32वार संताला कुसनीने आ शिन्ना बिळ्ळालेका उंडार यवार वगामेगारनी फिल्ची आंटार, मिम मी इचांग हलगी वास्तीम तरी मीर नाचायालेद, मिम शोक शेशेय फदुल फाडतीम तर मीर येडवालेद. 33येनटीक की बाप्तिस्मा शेशेतोड योहान वच्या यवाड रोट्या तिनाकुंदु इंगा अंगुरलाद रस तागाकुंदु इंगा मीर आंटार, वानकी दैयाम फट्टीनेद उंडाद. 34मनशी कोडकु तिनका तागका वच्या आंका मीर आंटार, सुडना, इड खादोड्याड इंगा पिदाड्या मनशी जकातदारला इंगा पाप्याल मित्र उंडाड! 35पण ज्ञान दान आन्नी बिळ्ळा तीकेल खरेम ठराशीनाद.”
शिमोन परुशी
36आप्पुड परुशी मंदी लोन्केल वगाड, “नु ना जताक रोट्या तिन.” इल्ला येशुनकी विनंती शेशा. मंग वाड आ परुशी मनशी इंटल्या फोई तिनेदेंक कुसन्या. 37इंगा सुडना, आ नगरलोन यादो वगा पापी आंडीदानकी येशुड परुशी मनशी इंटल्या तिनेदेंक कुसनीनाड इदी इनी आदी अत्तरदी अलबास्त्र कुप्पी येकेन आंदुक वच्या. 38इंगा आदी येशुन यंकाक वान काळा देगार येडस्केन नीला फडी कन्नेळाता वानी काळ नानपेदेंक आंट्या इंगा दान नत्ती यंडकालता तुडशी, वान काळाय शेंगेम मुत्ताल तिस्कुन्या इंगा वानकी अत्तर आंच्या. 39आप्पुड या परुशी मनशी येशुन फिल्चीन्या, वाड इदी सुशीगास स्वता मनला आन्या, “इड जर संदेष्टा उंटे तर या आंडीद वान मुटतुनाद आदी यवात उंडाद इंगा शेस्ताद, आंटे आदी पापी उंडाद, इदी वानकी तेलस्तुन्या.” 40आप्पुड येशुड वानकी उत्तर इच्ची आन्या, “शिमोन, नी जताक नाक येम तरी माटलाडेद उंडाद.” आप्पुड वाड आन्या, “गुरुजी माटलाड.” 41येशुड आन्या, “वगा सावकारोन इद्दार कर्जदारलु उंडीर; वगान मिंदा पाचशे यंडी कलदारलु इंगा इंगोगोन मिंदा पन्नास.#7:41 वगा दीनार आंटे वगा नाडदी कमाई 42पण कर्ज फेडाशेदेंक वार देगार येमी लेकुंड्या आंका वाड इद्दारनी पण क्षमा शेशा. तर वार इद्दार लोन्केल यवाड वान मिंदा जास्त प्रेम शेशी?” 43आप्पुड शिमोन उत्तर इच्ची आन्या, “यवारदी जास्त माफ शेशा वाड, इल्ला नाक वाटास्ताद.” मंग येशुड वान आन्या, “बरोबर उत्तर इस्ती.” 44आप्पुड वाड आ आंडीदान तीकुड तिरगी शिमोननी आन्या “इदी आंडीद निक कमस्ताद येम? निन नी इल्लुक वस्तीन, पण नु नाक काळ कडगेदेंक नेळ इयालेद; पण इदी येडशीगास नाय काळ नांप्या इंगा दान यंडकालता तुडशा. 45नु नाद स्वागत इचांग नाद मुत्ता तिस्कुनालेद, पण निन लोनीक वच्चीनगाला इदी ना काळाद मुत्ता तिस्कुनेद थांबाय मतालेद, 46नु ना नत्तीक नुन्या आंचालेद, पण इदी ना काळाक अत्तर आंच्या. 47दिनिचांग निन निक शपतान, दिनी याय शेंगेम पापलु उंड्या आय क्षमा आय फोयनाय; येनटीक की इदी शेंगेम प्रेम शेशा; यवारकी थोड्यामदी क्षमा शिकताद वाड थोड्यामे प्रेम शेस्ताड.” 48आप्पुड येशुड दान आन्या, “नी पाप क्षमा आयनाद.” 49मंग वान जताक तिनेदेंक कुसनीनोर वगामेगारनी आनेदेंक आंटीर, “पापलाद पण क्षमा शेशेतोड इड यवाड उंडाड?” 50मंग वाड आ आंडीदान आन्या, “नी विश्वासता नीद तारण आयनाद, शांतीता फो.”
اکنون انتخاب شده:
LUK 7: WNT
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید