MAT 16
16
स्वर्गीय चिन्ह आडगुकाम
1काही परुशी इंगा सदुकी मंदी येशुनदी परीक्षा सुशेदेंक वान आडगीर माक स्वर्गलोनदी यादाना चिन्ह सुपी. 2पण येशुड वारकी उत्तर इच्या, “मीर फद्दु मुनगीनेंका आंटार इबदोडदी हवामान बागा उंडी येनटीक की मोडाम यर्राद उंडाद, 3इंगा मीर फद्दीना आंटार, इबद वाना फडी येनटीक की मोडाम यर्राद इंगा फिकट उंडाद. मिक मोडामदी रूप गुरतु फट्टा वस्ताद, पण वेळदी चिन्ह गुरतु येनटीक फट्टा दाद? 4इ युगलोन दुष्ट इंगा व्यभिचारी मंदी चमत्कारलु फुडकुतार, पण वारकी योना संदेष्ट्यान चिन्ह शिवाय इंगोगोट यादुच चिन्ह इच्चेदेंक दाका फोई.”#16:4 योना संदेष्ट्यान चिन्ह शिवाय इंगोगोट यादुच चिन्ह इच्चेदेंक दाका फोई. योना संदेष्ट्यान कथाला, वगा फेद्दा मीन योनान मिंगेस काड्या. वाड मुड नाळ मोब्बु-फगुल मीन कडपुला उंड्या. आप्पुड मीन वान कोरडा भुमी मिंदा कक्केशा, आप्पुड वाड जिवंत यल्ली वच्या. यंकसार वाड वारनी इडशी फोया.
परुशी इंगा सदुशी मंदीद खमीर
5येशुड इंगा वान शिष्यल गालील समुद्र आतुक फोईर आप्पुड वारकी ध्यानाम वच्या वार रोट्याल तिस्कुनेद मरशी फोयनार. 6आप्पुड येशुड वारनी आन्या, “परुशी इंगा सदुकी मंदी खमीर बद्दल सावधान उंडना.” 7आप्पुड वार वगामेगारनी आनेदेंक आंटीर, “मनाम रोट्याल तिस्कुनालेद आंका वाड इल्ला आंटुनाड.” 8पण येशुड इदी गुरतु फट्टी आन्या, “अरे अल्पविश्वासी, मनाम रोट्याल तिस्कुनालेद इल्ला मीर वगामेगारनी येनटीक आंटार? 9मिक इप्पुड पण तेल्वाद येम? आय्यीद रोट्यालला पाच हजार मंदी तिनीर इंगा आदी आयनेंका मीर यन्नी गम्पाल निंचकुन्टीर आदी मिक ध्यानाम लेद येम? 10आल्ले चार हजार मंदी योड रोट्याल तिनीर इंगा मीर यन्नी गम्पाल निंचकेन तिस्कुंटीर इदी मिक ध्यानाम लेद येम? 11निन रोट्याल बद्दल माटलाडा लेद, तर परुशी इंगा सदुकी इर खमीर बद्दल सावधान उंडना, इल्ला आंटीन, इदी मिक यल्ला तेल्वाद?” 12आप्पुड वारकी तेलच्या की, वाड वारकी रोट्या खमीर बद्दल सावधान उंडेदेंक शप्पा लेकुंड्या पण परुशी इंगा सदुकी मंदी खोटा शिक्षण बद्दल सावधान उंडेदेंक शप्पीन्या.
येशुड इडे ख्रिस्त उंडाड
13येशुड फिलिप्पलोन कैसरीया नगरकी फोया. वाड वान शिष्यलान आन्या, “मनशी कोडकुन मंदी येम आंटार?” 14इंगा वार आनीर, “काही मंदी बाप्तिस्मा शेशेतोड योहान, तर काही मंदी एलीया संदेष्ट्याड तर इंगोगोर काही मंदी यिर्मया संदेष्ट्याड लेकाते संदेष्ट्याल लोन्केल वगाड इल्ला आंटार.” 15आप्पुड येशुड वारनी आन्या, “पण मीर नन्नु येम आंटार?” 16शिमोन पेत्र उत्तर इच्या, “नु ख्रिस्त, जिवंत परमेश्वर कोडकु उंडाव.” 17येशुड वानकी उत्तर इच्या, “हे शिमोन, योना कोडकु, नु धन्य उंडाव येनटीक की यादुच मनशी निक इदी शप्पालेद, पण ना परमेश्वर आब्बाड यवाड स्वर्गला उंडाड वाड निक इदी प्रगट शेशीनाड. 18इंगा निन निक इल्ला शपतान की, नु पेत्र (आंटे राय) उंडाव इंगा इ राय मिंदा निन नाद मंडळी नीला फडामत्यान इंगा अधोलोकदी शक्ती दान मिंदा प्रबळ काक फोई. 19निन निक स्वर्ग राज्य चाबील इच्यान इंगा पृथ्वी मिंदा येम पण नु कट्ट्याव आदी स्वर्गला कट्टेदेंक वच्ची इंगा पृथ्वी मिंदा येम पण नु इडशाव आदी स्वर्गला इडशेदेंक वच्ची.” 20आप्पुड वाड शिष्यलान आन्या निन ख्रिस्त उंडान इदी मीर यवारकीच शप्पाकुंडा इल्ला समजायमती शप्या.
सच्चेद इंगा पुनरुत्थानदी भविष्यवाणी
21आप्पुडनोट येशु ख्रिस्त वान शिष्यलकी शप्पेदेंक आंट्या की, इदी गरजेच उंडाद की निन यरुशलेम शहरकी फोई आब्बागार, यहुदी नेताल इंगा मुख्य याजक मंदी इंगा नियमशास्त्र शिक्षकलु इर तीकेल शेंगेम दु:ख सोसायाला इंगा जेमफडा मतेशेदेंक दावाला इंगा मुड नाळाक इंगा जिवंत कावाला. 22आप्पुड पेत्र वान बाजुक तिस्केन बेद्रीच्ची आन्या#16:22 बेद्रीच्ची आन्या वान इल्ला माटलाडाक आंकेन आन्या , “हे प्रभु, नी देगाटेल इदी धुराम उंडाला. इल्ला नीक यबदुच काक फोई!” 23पण येशुड तिरगीगास पेत्रन आन्या, “हे शैतान, ना देगाटेल यल्ली फो, येनटीक की नु परमेश्वर माटला तीकुड ध्यानाम इयाव, तर मनशी माटला तीकुड ध्यानाम इस्ताव.”
येशुन यंका नडशेद अर्थ
24आप्पुड येशुड वान शिष्यलान आन्या, “जर यवारकी आना ना यंका वच्चेद इच्छा उंटे तर वाड स्वताद नकार शेयाला इंगा वानदी क्रुस येत्ताला इंगा ना यंका दावाला. 25येनटीक की यवाडाना स्वताद जेम वाचाय मतेदेंक सुशी वाड आदी गमायमती पण यवाडाना ना इचांग स्वताद जेम गमायमती वाड दान वाचायमती. 26जर मनशी आंता दुन्याम जिंकाश्या इंगा स्वताद जेम गमाय मतकुन्या तर वानकी येम फायदा? इंगा मनशी स्वता जेम बद्दल येम इच्ची? 27येनटीक की मनशी कोडकु वान परमेश्वर आब्बान फेद्दा सामर्थ्यला वान स्वर्गदुतला जताक वच्ची आप्पुड वाड प्रत्येक मनशीक वार फनुला लेका प्रतिफळ इच्ची. 28निन मिक खरेम शपतान की, इंदु नीला फडीनोर मंदीला काही मंदी इल्ला उंडार की, वार मनशी कोडकुन वान राज्यला वच्चेताप्पुड सुशी नंताक सय्याक फोयार.”
اکنون انتخاب شده:
MAT 16: WNT
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید