MAT 9
9
लकवा आंटीनोड मनशी
1दिन बाद येशुड नावला कुसनी गालील सरोवर आतुक वान उरुक कफर्णहुम नगरलोंग फोया यंदु वाड निलदु. 2आप्पुड काही मंदी लकवा आंटीने वगा मनशीन येशुन देगार यकोचीर. वाड मंचाम मिंदा उंड्या. येशुड वारदी विश्वास सुशी आ लकवा आंटीने मनशीन आन्या, “हे कोडका, दम फट. नी पापुल क्षमा शेशेदेंक वच्चीनाय.” 3इंगा सुडना, काही मोशेन नियमशास्त्र शिक्षकलु इदी इनीर इंगा वार वगामेगारनी आनीर, “इ मनशी तर परमेश्वर विरुद्ध वाईट माटलु माटलाडतुनाड.” 4पण येशुनकी वारी विचारलु तेलच्या इंगा वाड वारनी आन्या, “मी अंतकरणला मीर वाईट विचार येनटीक शेस्तार? 5येनटीक की, नी पापलु क्षमा शेशेदेंक वच्चीनाय, इल्ला आनेद लेकाते लेय इंगा नडशेदेंक आंट, इल्ला आनेद दिंटलेल येम सोपा उंडाद? 6पण, मनशी कोडकुक पृथ्वी मिंदा पापलु क्षमा शेशेद अधिकार उंडाद, इदी मिक तेल्वाला आंका,” येशुड आ लकवा आंटीने मनशीन आन्या, “लेय! नीद मंचाम यतकेन इल्लुक फो.” 7इंगा वाड लेशी इल्लुक फोया. 8इदी सुशी मंदी येरस्कुनीर इंगा या परमेश्वर मनशीक इल्ला अधिकार इच्चीनाड वानदी वार गौरव शेशीर.
येशुड मत्तयनी फिलस्ताड
9इदी आयनेंका यप्पुड येशुड आंदुकेल मुंदारकी फोयतुन्या, आप्पुड वाड मत्तय फेरोन वगा मनशीन, कर जमा शेयदुर आ नाका मिंदा कुसनीनोन सुशा. आप्पुड येशुड वान आन्या, “ना यंका दा.” आप्पुड वाड लेशा इंगा वान यंका फोया.
10यंकसार लगेच येशुड मत्तय इंटल्या रोट्या तिनेताप्पुड, शेंगेम जकातदारलु इंगा पापी मंदी आंदुक वच्चीर इंगा येशुड इंगा वान शिष्यला जताक तिनेदेंक कुसनीर. 11यप्पुड परुशील इदी सुशीर आप्पुड वार येशुन शिष्यलान आडगीर, “मी गुरु जकातदार इंगा पापी मंदी जताक येनटीक तिंटाड?” 12इदी इनी, येशुड वाड वारनी आन्या, “वैद्यद गरज यवार बागा उंडार वारकी लेद, तर यवार बिमार उंडार वारकी उंडाद. 13निन मिक शपतान, फोंडा इंगा पवित्र शास्त्र लोन्केल दिनदी अर्थ शिकायंडा; नाक दया बेक पण बलिदान लेद, येनटीक की निन नितीमान मंदीन लेद, पण पापी मंदीन पश्चात्ताप इचांग फिल्चेदेंक वच्चीनान.”
येशुड उपवास बद्दल नेरपुताड
14वगा नाड योहान बाप्तिस्मा शेशेतोन शिष्यल वान देगार वच्चीर इंगा वार वान आडगीर, “मिम इंगा परुशील शेंगेम उपवासलु शेस्ताम. पण नि शिष्यल उपवास शेयार. इल्ला येनटीक?” 15येशुड वारकी उत्तर इच्या, “यप्पुड फेंडली कोडकु जताक उंटाड आप्पुड वान वर्हाडलोन मंदीक दु:खी यल्ला उंडा वच्ची? पण इल्ला वेळ वच्ची यप्पुड फेंडली कोडकुन वार देगाटेल धुराम शेशेदेंक वच्ची आप्पुड वार उपवास शेशार. 16यवाडुच कोत्ता बट्टाद तुकडा फाता बट्टाक आंचाड, येनटीक की आदी तुकडा आ बट्टान शिंचेस्ताद इंगा बोक्का जास्त फेद्दाद आयताद. 17आल्ले यवार पण कोत्ता अंगुरला रसनी फाता तोल थैलीला येय्यार, येशीर की आदी थैली शिंगताद इंगा अंगुरला रस सल्ली फोयताद; तर कोत्ताद अंगुरला रस कोत्ता तोल थैलीला येस्तार. आंटे रोंड पण टीकाशी उंटाय.”
सच्चीने आनबिडा इंगा रक्तस्त्रावी आंडीद
18येशुड इ माटलु शप्पेताप्पुड यहुदी सभास्थानोड वगा अधिकारी वान देगार वच्या इंगा येशुन काळलु मोक्की आन्या, “ना कुतुर इप्पुडे सच्ची फोयनाद. पण नु वच्ची नीद शेय दान मिंदा फेट, आंटे आदी जिवंत आय्यी.” 19आप्पुड येशुड लेशी वान शिष्यल जताक वान यंका फोयेदेंक आंट्या.
20इंगा सुडना, दावाला वगा आंडीद यादानकी बारा यंडलाकेल रक्तस्त्रावदी रोग उंड्या, आदी येशुन यंकाटेल वच्ची वान बट्टान मुट्ट्या. 21येनटीक की आदी दान मनला आनदु, “निन फक्त वान बट्टान जरी मुटतीन तरी बागा आय्यान.” 22आप्पुड येशुड यंकाक तिरगी दान सुशी आन्या, “बाई, दम फट! नी विश्वास निन्नु बागा शेशीनाद.” इंगा आदी आंडीद आप्पुडे लगेच बागा आय फो.
23यप्पुड येशुड आ यहुदी सभास्थान अधिकारी इल्लुक वच्या. आप्पुड वाड शोक संगीतदी वातावरण इंगा येडशी कल्ला शेशेतोर गर्दीन सुशा, 24वाड आन्या, “बैटीक फोंडा, येनटीक की आनबिडा सय्यालेद; आदी फंडकुंडाद.” आप्पुड वार वान मिंदा नग्गेदेंक आंटीर. 25यंकसार गर्दीन बैटीक आंपीनेंका वाड लोनीक फोई दानदी शेय वान शेय मिंदा तिस्कुन्या इंगा आदी सच्चीने आनबिडा लेशा. 26इंगा इदी बातमी आ आंता प्रांतला पसराशा.
इद्दार गुड्ड्योरदी विश्वास
27आप्पुड येशुड आंदुकेल फोयेताप्पुड इद्दार गुड्ड्योर वान यंका कीरलुका नडस्तुनीर. वान आनेदेंक आंटीर, “हे दाविद राजान कोडका, मा मिंदा दया शेय.” 28येशुड आ इंटल्योंग फोया आप्पुड आ गुड्ड्योर वान यंका-यंका लोनीक वच्चीर. वाड वारनी आडग्या, “निन मिक कंडलु इच्ची शकास्तान इल्ला मिद विश्वास उंडाद येम?” “हुं, प्रभु,” वार उत्तर इच्चीर. 29आप्पुड वाड वार कंडलान मुट्ट्या इंगा आन्या, “मी विश्वासलेका मी जताक कावाला.” 30इंगा वार सुशेदेंक आंटीर. येशुड वारकी चेतावनी इच्ची शप्या, “सुडना, निन मी इचांग जे शेस्तीन इदी यवारकी यरका कानियाकुंडा.” 31पण वार बैटीक फोईर इंगा वार आंता प्रदेशला वान फनी बद्दल शप्पीर.
मुकी दुष्टात्माकेल मुक्ती
32वार इद्दार गुड्ड्योर आंदुकेल बागा आय्यी फोयेताप्पुड मंदी वगा मनशीन, यवानकी मुकीद दैयाम फट्टीनेद उंड्या वान येशुन देगार यकोचीर. 33आप्पुड येशुड मुकीद दैयाम तिस्काड्या आप्पुड आ मनशी माटलाडदेंक आंट्या. मंदीक इदी सुशी आश्चर्य वाटाशा इंगा वार आनीर, “इस्त्राएलला दिन काना पहिला इल्ला घडाशीनेद यप्पुडुच सुस्कामला दालेद.” 34पण परुशी मंदी आनीर, “इड तर दैयाल राजा बालजबुल मदतता दैयालनी तिस्ताड.”
फनी शेशेतोरनी आंपेदेंक विनंती
35इल्ले येशुड गालील प्रांतलोन आन्नी नगरलाला इंगा उळालोंग फोया. वार यहुदी सभास्थानला नेरपका इंगा स्वर्ग राज्य सुवार्ताद घोषणा शेस्का इंगा आन्नी प्रकारी रोगलु इंगा बिमारील बागा शेस्का तिरग्या.
36यप्पुड येशुड मंदीद गर्दी सुशा आप्पुड वानकी वार मिंदा दया वच्या येनटीक की वार मेंढपाळ लेने मेंढऱ्याल लेका कदराशीनोर इंगा भटकाशीनोर उंडीर. 37वाड वान शिष्यलान आन्या, “फंटा खरेमे शेंगेम उंडाद, पण फनी शेशेतोर कमी उंडार. 38दिनिचांग फंटा इच्चेतोन माल्कुन देगार प्रार्थना शेयना की, वाड वान शेल्लोंग फनी शेशेतोरनी आंपाला.”
اکنون انتخاب شده:
MAT 9: WNT
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید