MRK 14
14
क्रुस मिंदा खिळाशेद कथा — 14:1—15:47
येशुन फट्टे बद्दल अधिकारीलाद चर्चा
1वल्हांडन इंगा बेखमीर रोट्या फंडगा काना रोंड नाळा मुंची मुख्य याजक मंदी इंगा नियमशास्त्र शिक्षकलु वान जेमफडा मतेद दावा फुडकुदुर. 2येनटीक की वार आंदुर “मनाम इदी फंडगाला शेयाराद लेकाते मंदी दंगा शेशार.”
बेथानी इंदु येशुनदी तैल्याभ्यंग
3येशुड बेथानी इंदु शिमोन कुष्ठरोगी इन इंटल्या मेज मिंदा तिनेदेंक कुसनीन्या आप्पुड यादो वगा आंडीद जटामांसी शुद्ध सुगंधी नुन्याद शेंगेम फिर्याम अलबास्त्र कुप्पी येकेन वच्या. आदी अलबास्त्र कुप्पी फगला मत्या इंगा सुगंधी नुन्या येशुन नत्ती मिंदा येशा. 4आंदु उंडीने मंदी कोफाम वच्या, वार वगामेगारनी आनीर, “अत्तर इल्ला नाश शेशेद शिंगार लेद. 5येनटीक की इदी अत्तर तीनशे बंगार कलदार काना जास्त किंमतला आम्मा वस्तुन्या इंगा आय दुडलु गरीबोरकी इच्चेदेंक वस्तुन्या.” इल्ला आनी वार दान उलटा कुरकुर शेयदुर. 6पण येशुड आन्या, “दान इडस्काडना. दानकी येनटीक त्रास इस्तार? आदी ना इचांग वगाट शिंगार फनी शेशीनाद. 7गरीब मंदी तर नेहमी उंड्यार इंगा मिक वाटाशी आप्पुड मीर वारकी मदत शेशी शकास्तार. पण निन नेहमी मी जताक उंड्यान इल्ला लेद. #अनुवाद 15:11. 8दानकी येम शक्य उंड्या आदी शेशा. आदी नन्नु बुडशे तैयारी काना मुंची ना फय मिंदा सुगंधी नुन्या येशा. 9निन मिक खरेम शपतान, आन्नी दुन्यामला यंदु पण सुवार्ता शप्पेदेंक वच्ची आंदु दानदी ध्यानाम आंका आदी येम शेशा आदी नेहमी शप्पेदेंक वच्ची.”
यहूदाड शेशीने विश्वासघात
10मंग बारा शिष्यल लोन्केल वगाड, यहूदा इस्कर्योत येशुन विश्वासघातता फट्टी इच्चेदेंक मुख्य याजक तीकुड फोया. 11यप्पुड याजकलु इदी इनीर वारकी शेंगेम आनंद आय्या इंगा वार वानकी दुडलु इच्चेद वचन इच्चीर. मंग यहूदाड येशुन फट्टी वार शेतल्या इच्चेदेंक दावा सुशेदेंक आंट्या.
शिष्यल जताक फंडगाद शेवटदी तिनकाम
लूक 22:7-13
12बेखमीर रोट्या फंडगा पहिला दिनमुनाड यप्पुड वल्हांडन फंडगाक मेंढऱ्याद बली इद्दुर आप्पुड येशुन शिष्यल वान आनीर, “मिम यंदुक फोई नी इचांग वल्हांडन फंडगा वंटाद तैयारी शेयाला इल्ला नीद इच्छा उंडाद?” 13येशुड वान इद्दार शिष्यलान आंप्या इंगा वारकी शप्या, “शहरलोंग फोंडा इंगा नेळाद बतकु येका फोयेतोड मनशी मिक भेटाशी, वान यंका फोना. 14इंगा यंदुक वाड लोनीक फोई आ इल्लु मालकुनकी शपना, ‘गुरुजी आंटाड, यंदु नाक ना शिष्यल जताक वल्हांडन फंडगाद वंटा शेशेद शक्य आय्यी इल्ला खोली यंदु उंडाद?’ 15इंगा वाड मिक माडी मिंदुडदी खोली सुपीच्ची, आंदु मना इचांग तैयारी शेयना.” 16शिष्यल येलीर इंगा वार शहरलोंग फोईर इंगा येशुड शप्पीनेलेका वारकी आल्ले कमशा. मंग वार वल्हांडन फंडगाद वंटा तैयार शेशीर.
17माप आय्या आप्पुड येशुड बारा शिष्यल जताक वच्या. 18मेज मिंदा कुसनी वार रोट्या तिनेताप्पुड येशुड आन्या, “निन मिक खरेम शपतान, मी लोन्केल यवाड वगाड नन्नु शत्रुला शेतल्या फट्टी इच्ची, वाड ना जताक इंदु रोट्या तिंटुनाड.” #स्तोत्रसंहिता 41:9. 19शिष्यल शेंगेम खिन्न आय्यीर इंगा आंदार वान आडगेदेंक आंटीर, “वाड निन उंडान येम?” 20वाड वारनी आन्या, “बारा मंदी लोन्केल वगाड यवाड ना जताक तल्याला रोट्या आद्दुतुनाड वाडे उंडाड. 21वान बद्दल पवित्र शास्त्र आंटाद, आल्ले मनशी कोडकुन फट्टी इच्यार पण यवान शेयता मनशी कोडकुन फट्टी इच्यार, वानी यंता येल्याल आय्यी. वाड फुट्टा लेकुंटे तर आदी वान इचांग शिंगार आयतुन्या.”
शिष्यल जताक प्रभुभोज
मत्तय 26:26-30; लूक 22:4-20; योहान 11:22-25
22वार रोट्या तिनेताप्पुड येशुड रोट्या तिस्कुन्या, धन्यवाद शेशी आदी इरगा मत्या इंगा वारकी इच्या. वाड आन्या, “तिस्कोंडा, इदी नाद फय उंडाद.” 23मंग येशुड प्याला तिस्कुन्या, धन्यवाद इच्या. आदी प्याला वारकी इच्या इंगा आंदार दिंटल्योन्केल तागीर. 24मंग येशुड आन्या, “इदी नाद कोत्ता करारदी रक्ताम उंडाद. शेंगेम मंदी इचांग आदी सल्लेदेंक वस्तुनाद. #निर्गम 24:8; जखऱ्या 9:11. 25निन मिक खरेम शपतान की, परमेश्वर राज्यला निन कोत्ताद अंगुरलाद रस ताग्यान आड नंताक निन दिन मुंदारकी अंगुरलाद रस उपज तागाक फोयान.”
26मंग वार उपकारस्तुती फदुल फाडीर इंगा जैतुन कोंडा तीकुड यल्ली फोईर.
पेत्र नाकार शेशेद भविष्यवाणी
मत्तय 26:31-35; लूक 22:33-34; योहान 13:36-38
27येशुड शिष्यलान आन्या, “मी आंदारदी विश्वास कडमा आय्यी येनटीक की पवित्र शास्त्रला इल्ला राशीनेद उंडाद की,
‘निन मेंढपाळनी मत्यान
इंगा मेंढऱ्यालदी दानादान आय्यी’”.
28 “पण नाद पुनरुथान आयनेंका निन मी मुंदारकी गालील प्रांतलोंग फोयान.” 29पेत्र आन्या, जरी आंदार इडशी फोयना तरी निन इडशी फोक फोयान. 30मंग येशुड वान आन्या, “निन निक खरेम शपतान की इबद मोब्बुला रोंड तुकुल फुंजु आरवाकाना मुंची नु मुड तुकुल नाद नकार शेशाव.” 31तरी पण पेत्रड जोर इच्ची आन्या की, “जर नाक नी जताक सया जरी बेक आय्या तरी पण निन नीद नकार शेय्याक फोयान.” इंगा आंदार आल्ले आनीर.
गेथशेमनी बागला प्रार्थना
मत्तय 26:36-46; लूक 22:39-46
32मंग वार गेथशेमन फेर आनीनेद बगीच्यालोंग वच्चीर, आप्पुड येशुड वान शिष्यलान आन्या, “निन प्रार्थना शेशी नंताक इंदु कुसुंडा.” 33येशुड वान जताक पेत्र, याकोब इंगा योहाननी तिस्कुन्या. दु:खता इंगा पिडाता वारदी मन निंडी फोयन्या. 34वाड वारनी आन्या, “ना जेम साव वच्चीन लेका जास्त पिडा सहन शेस्तुनाद. इंदु उंडा इंगा मेल्का उंडा.” #स्तोत्रसंहिता 42:5.
35वार देगाटेल रव्वासा धुराम फोई वाड भुमी मिंदा फड्या इंगा वाड प्रार्थना शेशा की, “शक्य उंटे तर इदी घटना ना देगाटेल यल्ली फोवाला.” 36वाड आन्या, “हे अब्बा-यब्बा, निक आंता शक्य उंडाद. इदी प्याला ना देगाटेल धुराम शेय तरी ना इच्छाता लेद तर नी इच्छाता कावाला.”
37आप्पुड येशुड वच्या इंगा वानकी आंदार फंडकेन कमशीर. वाड पेत्रन आन्या की, “शिमोन, नु फंडकुन निंटी येम? वगा घंटा नु मेल्का निलची शकायाव येम? 38मेल्का उंडा इंगा प्रार्थना शेयना आंटे मीर परीक्षाला फडाक फोयार. आत्मा उत्सुक उंडाद पण फय कमजोर उंडाद.”
39इंगा येशुड धुराम फोया इंगा आय्ये माटलु आनीगास वाड प्रार्थना शेशा. 40मंग वाड वापस वच्या इंगा आंदु वार फंडकेन कमशीर येनटीक की वारी कंडलु भोरु आयनाय इंगा वानकी येम उत्तर इच्चेद इदी वारकी तेल्वाकुंदु.
41वाड इंगा तिसरातुक वच्या इंगा वारनी आन्या, “मीर इंगाना फंडकुंडार इंगा आराम शेस्तुनार येम? पुर्ण आय्या! इप्पुड वेळ वच्चीनाद. मनशी कोडकुन पापी मंदी शेतल्या फट्टी इच्चेदेंक वस्तुनाद. 42लेंडा, मनाम यल्ली फदाम. सुडना, नन्नु फट्टी इच्चेतोड मनशी इक्काड वस्तुनाड.”
येशुन फटकाम
43यप्पुड येशुड माटलाडदु आप्पुड बारा शिष्यल लोन्केल वगाड यहूदाड आंदुक वच्या. वान जताक मुख्य याजक मंदी इंगा नियमशास्त्रटोर शिक्षकलु इंगा आब्बागार आंपीने आंदार मंदी तलवार इंगा कटलु येकेन वच्चीनीर. 44विश्वासघात शेशेतोड वारकी इल्ला शप्पी फेटन्या की, “निन यवारदी मुत्ता तिस्कुन्यान, वाडे वाड उंडाड, वान फटना सांभाळीच्ची येका फोंडा.” 45मंग यहूदाड वच्ची वाड येशुन तीकुड फोया इंगा आन्या, “रब्बी!” इंगा इल्ला आनी यहूदाड येशुनदी मुत्ता तिस्कुन्या. 46मंग वार वान मिंदा शेय येशी इंगा वान फट्टीर. 47आंदु वान देगार नीला फडीनोर लोन्केल वगाड तलवार तिशा इंगा महायाजक सेवक मिंदा वार शेशी वानदी गुम्मा कोसकाड्या. 48मंग येशुड वारनी आन्या, “नन्नु डाकू समजाशी तलवारलु इंगा कटलु तिस्केन नन्नु फट्टेदेंक वच्चीनार येम? 49निन धीन्नाम परमेश्वर भवनला नेरपेताप्पुड मी जताक उंटीन आप्पुड मीर नन्नु फट्टालेद. पण इदी आय्या दिनिचांग की पवित्र शास्त्रला राशीनेद पुर्ण कावाला.” 50आंदार शिष्यल वान इडशी फारी फोईर.#स्तोत्रसंहिता 88:18.
51वगा जवान मनशी फय मिंदा चादर कपकेन वान यंका नडदु. वान मंदी फट्टीर, 52पण वाड चादर येशी बेत्तालगाने फारी फोया.
महासभा मुंदार येशुनदी विचारपुस
53मंग वार येशुन आंदुकेल महायाजक तीकुड येका फोईर इंगा मुख्य याजक मंदी, आब्बागार इंगा नियमशास्त्रटोर शिक्षकलु जमा आय्यीर. 54रव्वा अंतर फेट्टी पेत्रड येशुन यंका महायाजक इल्लुक फोया. आंदु पेत्र रक्षा शेशेतोर जताक आग्गी कास्का कुसन्या.
55मुख्य याजकलु इंगा आंता यहुदी सभा येशुन मतेशेद पुर्ण प्रयत्न शेयदुर. पण वारकी येमी शिक्काकुंदु. 56शेंगेम मंदी वान विरुद्ध खोटा साक्ष इच्चीर. पण वारदी साक्ष सारखा लेकुंड्या. 57मंग काही मंदी नीला फडीर इंगा वान विरुद्ध साक्ष इच्ची आनीर, मिम वान इल्ला आनेताप्पुड इंटीम की, 58“शेयता कट्टीने परमेश्वरदी भवन निन केडपेशान इंगा याद शेयता कट्टालेद इल्ला इंगोगो भवन मुड नाळाला कट्ट्यान.” 59पण तरी पण इ माटाला वार साक्षला मेळ लेकुंड्या. 60मंग महायाजक वान मुंदार नीला फड्या इंगा वाड येशुन आडग्या, “नु उत्तर इयाव येम? इ मंदी नी विरुद्ध साक्ष इस्तुनार?” 61पण येशुड तेप्पांग निलच्या. वाड उत्तर इयाक फो. मंग महायाजक इंगा आडग्या, “परम धन्य परमेश्वर उंडीने कोडकु ख्रिस्त वाड नुये उंडाव येम?” 62येशुड आन्या, “निन उंडान,
इंगा मीर मनशी कोडकुन सर्वसमर्थ
परमेश्वर मंची शेय तीकुड कुसनीनोड
इंगा मोडामलोन ढगला जताक वच्चेताप्पुड सुशार.” #
स्तोत्रसंहिता 110:1.
63महायाजक स्वताय बट्टाल शिंच्या इंगा आन्या, “मनाक इंगा साक्षीदारलाद येम गरज उंडाद?#मत्तय 26:65. 64मीर इदी निंदा इंटीर. मिक येम वाटास्ताद?” आंदार वानकी सच्चेद शिक्षा योग्य उंडाड इल्ला आनीर.#लेवी 24:16. 65काही मंदी वान मिंदा उंचेदेंक आंटीर. वानदी मुती मुशी वान गुद्देदेंक आंटीर इंगा वान आनेदेंक आंटीर, “गुरतु फट बर, निन्नु यवार मत्तीर?” रक्षा शेशेतोर सैनिकलु वान ताबाला तिस्केन वान मत्तीर.
पेत्रड येशुन नाकारीस्ताड
66पेत्रड आंगळामला उंडीनाप्पुड महायाजक दासीला लोन्केल वगात आंदुक वच्या. 67इंगा आदी पेत्रन आग्गी कास्कुनेताप्पुड सुशा. आप्पुड आदी वान तीकुड टकटक सुशा इंगा आन्या, “नु पण नासरेथकर येशुन जताक उंटी गरा?” 68पण पेत्र नकार शेशा इंगा आन्या, “नु येम आंटाव आदी नाक तेल्वाद.” पेत्र आंगळामलोन फाटक देगार वच्या इंगा फुंजु कीरल्या. 69यप्पुड दासीद वान सुशा आप्पुड या मंदी आंदु उंडीर वारनी आदी आंदु की, “इ मनशी वार दिंटल्योन्टोड वगाड उंडाड.” 70पेत्रड वापस लेद आन्या इंगा आन्या. मंग काही वेळ आय्यीनेंका आंदु नीला फडीने मंदी पेत्रन आनीर, “खरेमे नु वार दिंटल्योन्टोड वगाड उंडाव, येनटीक की नु पण गालीली उंडाव.” 71पेत्र श्राप इचकेन इंगा वट्टु येस्केन आन्या, “मीर या मनशी बद्दल माटलाडतुनार वान निन गुरतु फट्टान!” 72इंगा लगेच इंगोगो तुक फुंजु कीरल्या, “रोंड तुकुल फुंजु किरलाकाना मुंची नु नन्नु नाकारीच्याव,” इल्ला येशुड आनीन्या दिनदी पेत्रक ध्यानाम वच्या इंगा वाड शेंगेम दुखी आय्या इंगा शेंगेम येडशा.
اکنون انتخاب شده:
MRK 14: WNT
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید