Mbandukulu 2
2
1Yulu na butoto na byobinso biri mu byo byawa kuyirika. 2Mu kiluumbu kyansaamu Nzaambi waba mwamana kisalu kyaandi. Nde wawuuma mu kiluumbu kyansaamu mu kisalu kyaandi kikasariri. 3Nzaambi wasakumuna kiluumbu kyansaamu, wasa kyo kyangisi, bukuri nde wawuumini mu kiluumbu kikyo, mu kisalu kyaandi kya nyirukulu.
4Bubwo bwayirimini yulu na butoto na byobinso biri mu byo.
Dzuumbu dya Edeni
Mu kiluumbu kyayirikiri Yaave Nzaambi butoto na yulu, 5kwaba kwahele muti ti mosi wa kibiti, na kitiiti ti kimosi kyaba kyope ha butoto, bukuri Yaave Nzaambi waba wakiri mvula kunokoso pe ; na kwaba kwakiri baatu pe mu kubusalila. 6Nto ya maampa yabapalaana mu butoto na yababolosaana butoto bwobunso.
7Yaave Nzaambi wabuumba muutu mu fuunda dya butoto, wamufula muheebulu wamwooyo mu myeelu mya mboombo yaandi, na muutu wakituka kiyiriki kyamwooyo. 8Yaave Nzaambi wakuna dzuumbu mu Edeni, ku mpele ya esete. Kukwo nde kasuusa muutu wukabuumba. 9Yaave Nzaambi wamenese, mu butoto miti myominso myamibwe mu kumono, na myamibwe mu kudya. Nde wasuusa muti wa bumwooyo ha kakati dya dzuumbu, na muti wanyaabulu mamabi na mamabwe.
10Nyari mosi yapala mu Edeni mu kunyaka dzuumbu maampa. Kuholosono haho, yakabuma mu midzuumbu mina. 11Mudzuumbu watete nkuumbu Pisoni ; nde ngo wadyengekele nsi yoyinso ya Habvila, kukwo kubabakaa woolo. 12Woolo dya nsi yiyo diri dyadibwete. Kuri se bedelyumi na tari dya onikese. 13Mudzuumbu wamyoolo nkuumbu Ngihoni, wadyengekele nsi yoyinso ya Kusi. 14Nkuumbu ya mudzuumbu wamitatu Tingere, watalisa ku esete dya nsi ya Asiri. Mudzuumbu wamina nkuumbu Efarata.
15Yaave Nzaambi, kaholaa muutu, wumusuusiri mu dzuumbu dya Edeni, mu kudihatila na kudikebe. 16Yaave Nzaambi waha lutumu kuri muutu ti : Ye sa wadya bimbutu bya miti myominso miri mu dzuumbu, 17ngo mu mitariri muti wanyaabulu mamabwe na mamabi, yaa dya bimbutu bya nde ko, bukuri kiluumbu ki wudya byo, lo ye sa wafwa.
18Yaave Nzaambi waleele ti : Buri bwabubwete ko ti muutu kaba nde kaka. Me nyimuyirikila mubakisi wuri bunu nde-meene. 19Yaave Nzaambi wabuumba mu butoto bibulu byobinso bya bibiti, banoni bobanso ba yulu. Nde wabinata kuri muutu mu kumono bunu bukaheele byo mankuumbu, na bibulu byobinso byataambula mankuumbu maha muutu. 20Muutu waluka bibulu byobinso bi batwiilaa, banoni bobanso ba yulu na bibulu bya musitu mankuumbu. Ngo muutu waba wahele na mubakisi, wuri bunu nde-meene. 21Yaave Nzaambi wabwiisa muutu tolo twampoondo, waholo lumbaansi lumosi mu nde, na wabweese kubvutula muswiinyi ha kibeendu kikyo. 22Yaave Nzaambi wayirika mukyeetu mu lubaansi lu kahoriri mu muutu, na wamunata kuri muutu. 23Muutu waleele ti :
Lolo di, wumawu ngo wuri, muyisi wa miyisi myaami,
muswiinyi wa miswinyi myaami !
Wumawu sa bamuluka "mukyeetu",
bukuri wapalila mu mubakala.
24Mu ntoono yiyo, mubakala sa kasiisa taayi na nguri yaandi mu kukaangama na mukasi waandi, na sa baba beki muswiinyi mosi.
25Boboolo baba mpene, wamubakala na wamukyeetu, na dyaba diri dyansoni ko.
اکنون انتخاب شده:
Mbandukulu 2: ATBABC
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Alliance Biblique du Congo 2024