San Mateo 2
2
Nanoꞌ nij síí tucuꞌyón ndoꞌo cheꞌé yatiꞌ man Jesús a
1Dan me se caꞌngaa Jesús chumanꞌ Belén chumanꞌ na̱j estadó Judea, ne̱ síí cuꞌna̱j Herodes me síí nica̱j suun rey uun chij rej yoꞌ ga̱a caꞌngaa Jesús a. Quisíj caꞌngaa Jesús, ga̱a ne̱ caꞌnaꞌ do̱j nij síí tucuꞌyón ndoꞌo cheꞌé yatiꞌ nda̱a chumanꞌ cuꞌna̱j Jerusalén, ne̱ síí cavii rej síj güii me nij soꞌ a. 2Ne̱ xnáꞌanj nij soꞌ man nij síí ma̱n Jerusalén, cataj nij soꞌ a:
―Neꞌej gu̱un síí nica̱j suun rey uun chij rihaan nij yuvii̱ israelitá roꞌ, me rej caꞌngaa soꞌ ga̱. Queneꞌen núj yatiꞌ taj xnaꞌanj se vaa caꞌngaa soꞌ na̱nj á. Cavii yatiꞌ yoꞌ rej xta̱ꞌ rej síj güii, ne̱ cheꞌé dan caꞌnaꞌ núj cara̱a̱ gue̱e̱ núj rihaan soꞌ ado̱nj ―taj nij síí tucuꞌyón ndoꞌo cheꞌé yatiꞌ a.
3Ga̱a ne̱ cuchiꞌ nana̱ yoꞌ rihaan síí nica̱j suun rey cuꞌna̱j Herodes, ga̱a ne̱ cuchuꞌviꞌ ndoꞌo soꞌ ga̱ nij síí ma̱n chumanꞌ Jerusalén a. 4Veé dan, ne̱ cunuu chre̱ꞌ ta̱ranꞌ nij xrej ata̱ suun noco̱o do̱ꞌ, nij síí naquiꞌyaj cu̱u stucua̱nj Moisés do̱ꞌ, rihaan soꞌ, quiꞌyaj soꞌ, ne̱ xnáꞌanj Herodes man nij soꞌ me rej caꞌnga̱a̱ Síí Caꞌne̱j Yaꞌanj Ti̱nanii man Yuvii̱ rihaan Sayuun a. 5Ga̱a ne̱ cataj nij soꞌ rihaan Herodes a:
―Caꞌnga̱a̱ soꞌ chumanꞌ Belén chumanꞌ na̱j estadó Judea cheꞌé se cachrón síí nataꞌ snana̱ Yaꞌanj rihaan yanj nana̱ nihánj a:
6Ma̱ꞌán so̱ꞌ Belén, chuma̱nꞌ na̱j yoꞌóó Judea roꞌ,
né chuma̱nꞌ noco̱ꞌ doj mé so̱ꞌ rihaan nij síí ꞌni̱j raꞌa yoꞌóó Judea a̱ maan ado̱nj.
Dan me se rque ma̱ꞌán so̱ꞌ cu̱riha̱nj ꞌo̱ síí gu̱un chij,
ne̱ soꞌ me síí veꞌé tu̱mé man se‑chuma̱nꞌ ꞌu̱nj yuvii̱ israelitá ado̱nj.
Nihánj me nana̱ cachrón síí nataꞌ snana̱ Yaꞌanj rihaan yanj ga̱a naá ―taj nij soꞌ rihaan Herodes a.
7Cuno síí nica̱j suun Herodes nana̱ caꞌmii nij soꞌ, ga̱a ne̱ caꞌnéé yuve̱ soꞌ nana̱ rihaan nij síí tucuꞌyón ndoꞌo cheꞌé yatiꞌ se vaa caꞌna̱ꞌ nij soꞌ rihaan Herodes a. Ga̱a ne̱ xnáꞌanj Herodes man nij soꞌ me yavii curuviꞌ naca̱ yatiꞌ taj xnaꞌanj cheꞌé neꞌej yoꞌ, taj Herodes a. Ga̱a ne̱ cataj xnaꞌanj nij soꞌ rihaan Herodes a. 8Ga̱a ne̱ caꞌnéé Herodes man nij soꞌ caꞌa̱nj nij soꞌ chumanꞌ Belén, ne̱ caꞌneꞌ Herodes suun rihaan nij soꞌ, ne̱ cataj Herodes a:
―Nano̱ꞌ uxrá soj man neꞌej yoꞌ, ne̱ asa̱ꞌ nariꞌ soj man neꞌej, ne̱ cata̱j xnaꞌanj soj rihanj me rej yáán neꞌej yoꞌ, ga̱a ne̱ caꞌa̱nj ma̱ꞌanj cara̱a̱ gue̱e̱ ꞌu̱nj rihaan neꞌej yoꞌ ado̱nj ―taj Herodes tihaꞌ soꞌ man nij síí tucuꞌyón ndoꞌo cheꞌé yatiꞌ a.
9Quisíj cuno nij soꞌ nana̱ cataj xnaꞌanj síí nica̱j suun rey rihaan nij soꞌ, ga̱a ne̱ curiha̱nj nij soꞌ, caꞌanj nij soꞌ, ga̱a ne̱ queneꞌen uún nij soꞌ man yatiꞌ a̱j queneꞌen nij soꞌ rej síj güii a. Dan me se va̱j yatiꞌ yoꞌ, ne̱ ꞌo̱ canocoꞌ nij soꞌ man yatiꞌ, nda̱a se canicunꞌ yatiꞌ rej xta̱ꞌ rej ya̱nj neꞌej yoꞌ a. 10Ga̱a queneꞌen nij soꞌ man yatiꞌ yoꞌ, ga̱a ne̱ guun niha̱ꞌ uxrá rá nimán nij soꞌ a. 11Ga̱a ne̱ catúj nij soꞌ rá veꞌ rej canicunꞌ yatiꞌ xta̱ꞌ, ga̱a ne̱ queneꞌen nij soꞌ man neꞌej ga̱ nii neꞌej chana̱ cuꞌna̱j Mariá, ga̱a ne̱ quinij ru̱j nda̱a cayáán cuyu̱u̱ nij soꞌ, ne̱ caráj gue̱e̱ nij soꞌ rihaan neꞌej yoꞌ a. Veé dan, ga̱a ne̱ caꞌnúj nij soꞌ se‑chru̱nj nij soꞌ, ga̱a ne̱ rqué ndoꞌo nij soꞌ rasu̱u̱n sa̱ꞌ tuꞌve̱e̱ ndoꞌo rihaan neꞌej yoꞌ a. Dan me se agaꞌ oró míí do̱ꞌ, squíí cuꞌna̱j “incienso” do̱ꞌ, squíí cuꞌna̱j “mirra” do̱ꞌ, rqué u̱u̱n nij soꞌ rihaan neꞌej yoꞌ a. 12Ne̱ rej nii̱ caꞌmii nej rihaan nij soꞌ, ne̱ cataj xnaꞌanj Yaꞌanj rihaan nij soꞌ se vaa se̱ canica̱j uún nij soꞌ caꞌa̱nj nij soꞌ rihaan síí nica̱j suun rey cuꞌna̱j Herodes, taj nej rihaan nij soꞌ a. Cheꞌé dan ꞌó chrej canica̱j nij soꞌ quinanꞌ nij soꞌ chiháán nij soꞌ a.
Caꞌanj nica̱j José ga̱ Mariá man Jesús yoꞌóó Egiptó a
13Quisíj quinanꞌ nij síí tucuꞌyón ndoꞌo cheꞌé yatiꞌ, ga̱a ne̱ rej nii̱ caꞌmii nej rihaan síí cuꞌna̱j José a. Dan me se ta̱j niꞌyo̱n naquiꞌyaa ꞌo̱ se‑mo̱zó Yaꞌanj Si̱j ꞌNi̱j Raꞌa man níꞌ rihaan soꞌ, ne̱ cataj se‑mo̱zó Yaꞌanj rihaan soꞌ a:
―Na̱xaga̱a̱ so̱ꞌ, ne̱ ni̱caj so̱ꞌ man ro̱j ni̱i neꞌej, cuna̱nj so̱ꞌ caꞌa̱nj so̱ꞌ yoꞌóó noco̱o cuꞌna̱j Egiptó, ne̱ ca̱yáán so̱ꞌ yoꞌóó Egiptó nda̱a güii caꞌmi̱i̱ uún ꞌu̱nj rihaan so̱ꞌ á. ꞌO̱ se nano̱ꞌ ndoꞌo síí nica̱j suun rey cuꞌna̱j Herodes man neꞌej, ne̱ ticavi̱ꞌ soꞌ man neꞌej yoꞌ vaa taj soꞌ ado̱nj ―taj se‑mo̱zó Yaꞌanj Si̱j ꞌNi̱j Raꞌa man níꞌ rihaan José a.
14Ga̱a ne̱ naxaga̱a̱ José, ne̱ nica̱j soꞌ man ro̱j ni̱i neꞌej, ne̱ rej nii̱ cavii nij soꞌ caꞌanj nij re̱j soꞌ yoꞌóó Egiptó, 15ne̱ cayáán nij soꞌ rej yoꞌ nda̱a se caviꞌ síí nica̱j suun rey cuꞌna̱j Herodes a.
Dan me se quisíj ya̱ nu̱ꞌ nana̱ nda̱a vaa cataj xnaꞌanj Yaꞌanj Si̱j ꞌNi̱j Raꞌa man níꞌ rihaan ꞌo̱ síí nataꞌ snana̱ Yaꞌanj ga̱a naá, se vaa cataj soꞌ a: “Canacúún ꞌu̱nj man taꞌníj se vaa cavi̱i̱ soꞌ yoꞌóó Egiptó caꞌna̱ꞌ soꞌ ado̱nj.” Da̱nj taj Yaꞌanj ga̱a naá ado̱nj.
Caviꞌ ndoꞌo neꞌej ma̱n chumanꞌ Belén, quiꞌyaj síí nica̱j suun cuꞌna̱j Herodes a
16Quisíj caꞌanj nij re̱j Jesús yoꞌóó noco̱o cuꞌna̱j Egiptó, ga̱a ne̱ xcaj síí nica̱j suun rey cuꞌna̱j Herodes cuentá se vaa a̱j tihaꞌ yuꞌunj nij síí tucuꞌyón cheꞌé yatiꞌ man soꞌ a. Ga̱a ne̱ cuyanj ndoꞌo rá soꞌ, ne̱ cheꞌé dan caꞌneꞌ soꞌ suun rihaan tanuu se vaa ticavi̱ꞌ tanuu man nu̱ꞌ neꞌej sno̱ꞌo cunii ya̱nj nu̱ꞌ anica̱j chumanꞌ Belén a. Neꞌej va̱j vi̱j yoꞌ rej rque̱ roꞌ, cavi̱ꞌ, taj soꞌ a. Da̱nj quiꞌyaj soꞌ, ga̱a ne̱ cavi̱ꞌ neꞌej caꞌmii yatiꞌ cheꞌé taj nij síí tucuꞌyón cheꞌé yatiꞌ rihaan soꞌ, rá soꞌ a. 17Da̱nj quiꞌyaj Herodes, ne̱ quisíj ya̱ nu̱ꞌ nana̱ cataj xnaꞌanj síí nataꞌ snana̱ Yaꞌanj ga̱a naá síí cuꞌna̱j Jeremías, se vaa cataj soꞌ a:
18Cuno̱ nii taꞌve̱e ndoꞌo chana̱ ma̱n chumanꞌ cuꞌna̱j Ramá a.
Chana̱ cuꞌna̱j Raquel me noꞌ,
ne̱ taꞌvee ndoꞌo noꞌ cheꞌé taꞌníí noꞌ nij síí caviꞌ,
ne̱ ne caꞌve̱j rá noꞌ naquiꞌya̱j niha̱ꞌ noꞌ nimán noꞌ,
cheꞌé se navij taꞌníí noꞌ caviꞌ na̱nj ado̱nj,
da̱nj caꞌmii Jeremías ga̱a naá a.
Curiha̱nj nij re̱j Jesús yoꞌóó Egiptó, caꞌanj nij soꞌ chumanꞌ Nazaret a
19Ga̱a quisíj caviꞌ síí nica̱j suun rey cuꞌna̱j Herodes, ga̱a ne̱ ta̱j niꞌyo̱n naquiꞌyaa ꞌo̱ se‑mo̱zó Yaꞌanj Si̱j ꞌNi̱j Raꞌa man níꞌ rihaan José ga̱a yáán soꞌ yoꞌóó Egiptó ga̱a otoj soꞌ rej nii̱ a. 20Ne̱ cataj xnaꞌanj se‑mo̱zó Yaꞌanj rihaan José a:
―Na̱xaga̱a̱ so̱ꞌ, ne̱ ni̱caj so̱ꞌ ro̱j ni̱i neꞌej, ne̱ quina̱nꞌ so̱ꞌ yoꞌóó Israel á. ꞌO̱ se ya̱j me se caviꞌ nij síí me rá ticavi̱ꞌ man neꞌej na̱nj ado̱nj ―taj se‑mo̱zó Yaꞌanj rihaan José a.
21Ga̱a ne̱ naxaga̱a̱ José, ne̱ nica̱j uún soꞌ ro̱j ni̱i neꞌej quinanꞌ soꞌ yoꞌóó Israel a. 22Ne̱ cuchiꞌ nana̱ rihaan soꞌ se vaa síí cuꞌna̱j Arquelao guun síí nica̱j suun rey uun chij rihaan estadó Judea a. Dan me se nayón Arquelao rihaan rej soꞌ Herodes a. Cheꞌé dan cuchuꞌviꞌ ndoꞌo José caꞌa̱nj soꞌ estadó Judea, ga̱a ne̱ caꞌmii uún nej rihaan soꞌ se vaa se̱ caꞌanj soꞌ estadó Judea maꞌ. Cheꞌé dan caꞌanj soꞌ estadó Galilea, 23ne̱ cuchiꞌ soꞌ chumanꞌ Nazaret, ne̱ cayáán soꞌ chumanꞌ yoꞌ a. Veé dan quisíj ya̱ nu̱ꞌ nana̱ cataj nij síí nataꞌ snana̱ Yaꞌanj ga̱a naá a: “Síí cavii Nazaret me Síí Caꞌne̱j Yaꞌanj ado̱nj”, taj nij soꞌ a.
انتخاب شده:
San Mateo 2: trc
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Wycliffe Bible Translators, Inc. 2024 segunda versión electrónica