San Mateo 3
3
Caꞌmii natáj Juan Síí Cutaꞌ Ne man yuvii̱ a
1Dan me se ga̱a veé da̱nj vaa yáán Jesús chumanꞌ Nazaret, ne̱ cavii síí cuꞌna̱j Juan Síí Cutaꞌ Ne man yuvii̱ tacaan estadó Judea, ne̱ caꞌmii natáj ndoꞌo soꞌ, 2cataj soꞌ a:
―Nuchra̱nꞌ nimán soj, ne̱ ta̱náj soj chrej chiꞌi̱i̱ á. ꞌO̱ se a̱j nichrunꞌ se vaa gu̱un chij Yaꞌanj na̱nj ado̱nj ―taj soꞌ, aꞌmii natáj soꞌ a.
3Síí nataꞌ snana̱ Yaꞌanj rihaan yuvii̱ ga̱a naá síí cuꞌna̱j Isaías roꞌ, cataj xnaꞌanj cheꞌé síí cuꞌna̱j Juan, cataj soꞌ a:
Nucua̱j ndoꞌo caꞌmi̱i̱ natáj ꞌo̱ soꞌ rej tacaan,
ne̱ cata̱j soꞌ a:
“Naquiꞌya̱j sa̱ꞌ soj chrej
cheꞌé se caꞌna̱ꞌ Síí ꞌNi̱j Raꞌa man níꞌ á.
Naquiꞌya̱j nica̱ soj chrej anica̱j cache̱n soꞌ á.”
Dan me nana̱ cachrón Isaías rihaan yanj ga̱a naá nana̱ taj xnaꞌanj cheꞌé Juan a.
4Dan me se Juan roꞌ, nu̱u̱ soꞌ yatzíj cutziin xcuu camelló, ne̱ ꞌni̱j catuu̱n soꞌ marque̱ nu̱j, ne̱ chá soꞌ ina̱nj rquíí, ne̱ catziꞌ xtaan ma̱n quij coꞌo soꞌ ado̱nj. 5Ne̱ curiha̱nj ri̱i̱ ndoꞌo yuvii̱ ma̱n chumanꞌ Jerusalén do̱ꞌ, yuvii̱ ma̱n nu̱ꞌ estadó Judea do̱ꞌ, yuvii̱ ma̱n nij chumanꞌ na̱j tuꞌva chráá cuꞌna̱j Jordán do̱ꞌ, caꞌnaꞌ rihaan Juan a. 6Dan me se nataꞌ ya̱ nij yuvii̱ cheꞌé nu̱ꞌ cacunꞌ tumé nij yuvii̱, ga̱a ne̱ cataꞌ ne nij yuvii̱ rá chráá Jordán, quiꞌyaj Juan ado̱nj.
7Ga̱a queneꞌen Juan se vaa caꞌnaꞌ ndoꞌo nij síí fariseo do̱ꞌ, nij síí saduceo do̱ꞌ, me rá nij soꞌ cuta̱ꞌ ne Juan man nij soꞌ, ga̱a ne̱ caꞌmii natáj soꞌ rihaan nij soꞌ, cataj soꞌ a:
―Ase vaa xcuáá yuva̱a̱ vaa soj á. Me síí cataj xnaꞌanj rihaan soj cuna̱nj soj, ne̱ nani̱i̱ soj rihaan sayuun quiꞌya̱j Yaꞌanj ga̱. 8Sese ya̱ nuchranꞌ nimán soj, ne̱ caꞌa̱nj soj quiꞌya̱j soj nda̱a vaa ꞌyaj yuvii̱ cunuu sa̱ꞌ nimán na̱nj á. 9Ne̱ ta̱dó soj sese quisi̱j rá soj cata̱j soj se vaa taꞌníí taꞌnij siꞌno̱ síí cuꞌna̱j Abraham síí cayáán ga̱a naá me soj, ne̱ ne tumé soj cacunꞌ, cata̱j soj á. Daj chiha̱a̱ míj se̱ caꞌmii soj da̱nj maꞌ. Ma̱an se cata̱j xnaꞌanj ꞌu̱nj rihaan soj se vaa né se yaꞌa̱nj tihaꞌ taꞌníí taꞌnij siꞌno̱ Abraham me soj a̱ maꞌ. Sese me rá Yaꞌanj, ne̱ caꞌve̱e ni̱caj Yaꞌanj náá guun yahij na̱j rihaan yoꞌóó nihánj, ne̱ quiꞌya̱j Yaꞌanj man ꞌo̱ taꞌníí taꞌnij siꞌno̱ Abraham ado̱nj.
10’ꞌO̱ se nichrunꞌ quiꞌya̱j Yaꞌanj sayuun man nij síí naꞌvej rá cuno̱ rihaan soꞌ na̱nj ado̱nj. Ase vaa síí oro̱ꞌ agaꞌ aꞌneꞌ chruun caꞌne̱ꞌ soꞌ chruun roꞌ, da̱nj vaa Yaꞌanj cuano̱ ado̱nj. Cheꞌé dan ase vaa ꞌyaj nii man chruun roꞌ, taꞌngaꞌ da̱nj quiꞌya̱j Yaꞌanj man nij síí ne uno rihaan soꞌ a. Dan me se aꞌneꞌ nii chruun nuviꞌ chruj sa̱ꞌ raa̱, ne̱ araa nii man chruun yoꞌ rihaan yaꞌan a.
11’ꞌU̱nj nihánj me se na u̱u̱n utaꞌ ne ꞌu̱nj man soj si̱j nuchranꞌ nimán canocoꞌ chrej sa̱ꞌ a. Tza̱j ne̱ vaa ꞌó síí caꞌna̱ꞌ, ne̱ si̱j nucua̱j doj me soꞌ rihanj a. Cheꞌé dan me a̱ doj ne nó xcúnj na̱chej nuj correá ꞌni̱j tacanj soꞌ maꞌ Ne̱ caꞌna̱ꞌ soꞌ, ne̱ cuta̱ꞌ ne soꞌ nimán soj ga̱ maꞌa̱n Nimán Yaꞌanj, ne̱ caxri̱i̱ yaꞌan soꞌ man soj si̱j naꞌvej rá cuno̱ rihaan Yaꞌanj, ne̱ caca̱a̱ soj ado̱nj. 12Dan me se ase vaa síí oro̱ꞌ chruun palá vaa soꞌ cuano̱ ado̱nj. Dan me se síí nica̱j chruun palá roꞌ, rii ꞌnúú trigó na̱j rihaan yoꞌóó, ne̱ naquiꞌyaj chre̱ꞌ soꞌ man ꞌnúú trigó sa̱ꞌ, ne̱ araa soꞌ man yoꞌ rá cuchruu̱, ne̱ anica̱j soꞌ araa soꞌ squíj niꞌya xráá trigó rihaan yaꞌan a. Ne̱ ase vaa síí nica̱j palá ma̱n cuano̱ roꞌ, da̱nj quiꞌya̱j síí caꞌna̱ꞌ, ne̱ naquiꞌya̱j chre̱ꞌ soꞌ man cunuda̱nj nij síí cunuu sa̱ꞌ nimán, ne̱ cara̱a soꞌ man nij síí chiꞌi̱i̱ rihaan yaꞌan, ne̱ caca̱a̱ nij soꞌ nu̱ꞌ cavii nu̱ꞌ caꞌanj, ne̱ daj chiha̱a̱ míj se̱ quinaꞌáj yaꞌan yoꞌ a̱ maan ado̱nj ―da̱nj caꞌmii Juan rihaan nij yuvii̱ yoꞌ a.
Cataꞌ ne Jesús a
13Ga̱a ne̱ curiha̱nj Jesús estadó Galilea caꞌanj soꞌ chráá cuꞌna̱j Jordán rihaan síí cuꞌna̱j Juan, ne̱ cuta̱ꞌ ne Juan man Jesús, rá soꞌ a. Dan me se cuchiꞌ Jesús rihaan Juan, 14tza̱j ne̱ veé dan me se ne caꞌve̱j rá Juan cuta̱ꞌ ne soꞌ man Jesús maꞌ. Ma̱an se cataj Juan rihaan Jesús a:
―Me cheꞌé ꞌnáꞌ so̱ꞌ cuta̱ꞌ ne ꞌu̱nj mán so̱ꞌ ga̱. Tana̱nj ma̱ꞌán so̱ꞌ me síí vaa cheꞌé cuta̱ꞌ ne man ma̱ꞌanj na̱nj á. Tza̱j ne̱ xa̱ꞌ ꞌu̱nj me se ne nó xcúún ꞌu̱nj cuta̱ꞌ nej mán so̱ꞌ maꞌ ―taj Juan rihaan Jesús a.
15Ga̱a ne̱ cataj Jesús rihaan soꞌ a:
―Caꞌve̱j so̱ꞌ cuta̱ꞌ ne so̱ꞌ manj á. Da̱nj quiꞌya̱j ro̱ꞌ, cheꞌé se no̱ xcúún ro̱ꞌ quiꞌya̱j ro̱ꞌ nu̱ꞌ se vaa me rá Yaꞌanj quiꞌya̱j níꞌ ado̱nj ―taj Jesús rihaan Juan a.
Ga̱a ne̱ caꞌvej rá Juan, ne̱ cutaꞌ ne soꞌ man Jesús a. 16Quisíj cataꞌ ne Jesús, ga̱a ne̱ naxuma̱a̱n soꞌ rque na, ga̱a ne̱ ta̱j niꞌyo̱n naxraꞌ rej xta̱ꞌ, ne̱ queneꞌen soꞌ se vaa nanij Nimán Yaꞌanj rej xta̱ꞌ, ne̱ ase vaa chaꞌaa̱n roꞌ, vaa Nimán Yaꞌanj, curuviꞌ yoꞌ rej xta̱ꞌ nanij yoꞌ xráá Jesús a. 17Ga̱a ne̱ rej xta̱ꞌ caꞌmii Yaꞌanj, ne̱ cuno nij síí nicu̱nꞌ ga̱ Jesús nana̱ caꞌmii Yaꞌanj, ne̱ dan me se cataj Yaꞌanj a:
―Taꞌníí ꞌu̱nj síí ꞌe̱e̱ ndoꞌo raj man me síí nihánj, ne̱ aranꞌ ndoꞌo raj niꞌya̱j ꞌu̱nj man soꞌ ado̱nj ―taj nana̱ cavii rej xta̱ꞌ caꞌmii Yaꞌanj a.
انتخاب شده:
San Mateo 3: trc
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Wycliffe Bible Translators, Inc. 2024 segunda versión electrónica