Ad’u Tinda 1
1
AD’U TINDA
(1—11)
Alona mi lahlena pet
1Avok ka va nga d’uo tua d’a, Alona mi lakulod’a kandagad’a. 2Andagad’a yat ti ni hawa kikid’ik, nduvunda duk yam mbiyo alum ma ngolâ, Muzu’â hAlonina nga mi ngui yam mbiyo máma mi.
3Ata yi máma Alona mi dala: Ar b’od’a ti nde woyo; b’od’a ti nde woi mi. 4Alona mi wala b’od’a ti djivid’a, mi wal ir b’od’a woi ki nduvunda. 5Mi yi b’od’a ala Faleid’a; mi yi nduvunda ala Andjeged’a. Fladeged’a nga, yorogod’a nga mi; ni bur ma avo’â.
6Alona mi de kua ala: Ar hur alona mi nde woi á wal ir mbiyo ma akulona ki ma kä na. 7Wani hur alona mi nde woi mi. Ni hina ba, Alona mi wal ir mbiyo ma kä na ki ma akulona. A nga hina mi. 8Alona mi yi hur alona ala Akulod’a. Fladeged’a nga, yorogod’a nga mi; ni bur ma mbàna.
9Alona mi de kua ala: Ar mbiyo ma kä ad’u akulod’ina, mi tok ata yima tuna tala ar yima sod’a mi nde woyo d’a. Mi le hina mi. 10Alona mi yi yima sod’a ala Andagad’a; mi yi mbiyo ma mi tok ata yima tuna ala Alum ma nglona. Alona mi wala ni djivid’a iramu.
11Alona mi de kua ala: Ar asuna mi deî yam andagad’a, ar asuna mi le irâ ad’u andjavamu, ar agu ma lara ge pî mi vut andjavamu. A le hina mi. 12Kayam ndata, andagad’a ti deî asuna, asuna mi le irâ ad’u andjavamu, aguna mi vut ad’u andjavam teteng mi. Alona mi wala ni djivid’a iramu. 13Fladeged’a nga, yorogod’a nga mi; ni bur ma hindina.
14Alona mi de kua ala: Ar ahle suma b’o yina a kak sä akulo á wal ir faleid’a kandjeged’a, á tak burâ ki bizad’a katchogoid’a mi. 15Ar azi a b’o yam andagad’a. A le hina mi. 16Alona mi lahle suma b’o yi suma nglona mbà; b’o d’a ngola nafata á te yam faleid’a; d’a gora ni tilâ á te yam andjeged’a; mi le tchitchiud’a kua mi. 17Mi tinizi sä kur akulod’a á b’o yam andagad’a, 18á te yam faleid’a kandjeged’a, á wal ir b’od’a ki nduvunda mi. Alona mi wala ni djivid’a iramu. 19Fladeged’a nga, yorogod’a nga mi; ni bur ma fid’ina.
20Alona mi de kua ala: Ar ahle suma arina a zul mimiyâk aduk mbina, ar aluweina a pir akulo yam andagad’a mi. 21Alona mi lamburei suma nglo suma aduk mbinina, kandjaf ahle suma ari suma a nga djang kä aduk mbinina, kandjaf aluwei suma a nga pir akulona pet mi. Alona mi wala ni djivid’a iramu. 22Alona mi b’e vunam kaziya, mi dazi ala: Agi vud’ugiya, agi zulugiya, agi oyôgi alum ma nglona; ar aluweina a zul yam andagad’a mi. 23Fladeged’a nga, yorogod’a nga mi; ni bur ma vahlâ.
24Alona mi de kua ala: Ar andagad’a ti buzuk kahle suma arina woi abua, nala, d’uwarâ, ahle suma dramba, azureina kambureina, ad’u andjavazi teteng mi. A le hina mi. 25Hina Alona mi lazureina, ambureina, d’uwarâ kahle suma dramba, ad’u andjavazi teteng. Alona mi wala ni djivid’a iramu.
26Alona mi de kua ala: Ei lei sana d’igi ei na; ma hle tam d’igi ei na na. Ar mi te yam kulufâ, yam aluweina, yam azurei suma nglona, yam ambureina kahle suma gurei suma a dram kä yam andagad’ina pet mi. 27Hina Alona mi le sana d’igi mam na, mi lum hle tam d’igi mam na; mi le mandjufâ katchad’a mi.
28Alona mi b’e vunam kaziya, mi dazi ala: Agi vud’ugiya, agi zulugiya, agi oyôgi yam andagad’a; agi tagi kad’u, agi tagi yam kulufâ, yam aluweina, yam ambureina, yam azurei suma a nga tit yam andagad’ina pet mi.
29Alona mi dazi kua ala: An hagi ir asu ma yam andagad’ina kandjavam pet kagu ma vuta kandjavam pet; azi ni te magina. 30An he asu ma nguloma mambureina kazureina kaluweina kahle suma a dram kä yam andagad’ina; ni te mazina. A le hina mi. 31Alona mi gol ahle suma mam lazina pet, a djivid’a heî. Fladeged’a nga, yorogod’a nga mi; ni bur ma karagayana.
اکنون انتخاب شده:
Ad’u Tinda 1: BA
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Azumeina Bible © Alliance Biblique du Tchad, 1999.