KALATE METATAʼA 4
4
Kan baa Abél
(Hé 11:7; 1 Pi 3:19-20; Yb 22:15-17)
1Fam é nga jôʼôbô Eve e minga wé; a nga nyoñ abum a biaé Kan. A nga jô na: Me biaya fam a e mvolane Nti. 2A nga beta biaé Abél monyañ. Abél a nga bo mbaʼale mbame bone biyem, kane ki mbéé mefup. 3E mvuse nté éziñ, Kan a nga zuu bibuma ya si ane mvean e be Nti. 4Abél, nye fe, a nga zuu mintôle ya mbame bone biyeme wé a avoñe dap. Nti a nga yen Abél a e mveane wé mvaé; 5vʼa nji yene Kan a mveane wé mvaé. Kan a nga dañe wôʼô ôlun a asu dé e nga biban. 6Nti a nga jô Kane na: Wo wôʼô ôlun amu jé? A asu dôé e ne mbiban amu jé? 7Nge wo bo mvaé, wo ye beta telé nlô wôé tetele, ve nge ô nji bo mvaé, abé e ne ñyametan e mbé wôé, a minkômbane mié mia lumbu be wo; ve wo jôʼô de. 8Ve da Kan a nga kobô monyañ Abél a e mbôlô be mbe mefup, Kan a nga tebe monyañe ngame yat a wôé nye.
Kan baa Zambe
(Mt 23:35; Hé 12:24; Yb 15:20-24)
9Nti a nga jô Kane na: Monyoñ Abél a ne vé? Nye na: Me nji yem; ye ma me ne mbaʼale mojañ? 10E nde Zambe a jô na: Jé wo te bo? Tyiñe metyi me monyoñ ja yôn ataté si été a kui be ma. 11Eyoñe ji, wo ye yoʼoban ôyap, a si ja te yooé anyu dé a nyoñe metyi me monyoñ e wo wôé été. 12Eyoñe wo ye bé bidi si, ja ye bo te beta ve wo mefoʼo mé. Wo ye bo nyô a ndeñendeñ ô nyeñembaʼan e si nyôna été. 13Kan a nga jô Nti na: Adite ya ékobe jam é dañeya ngule ya jibi. 14Wo titane ma den ôyap a si ba senan; ma ye yiane sobô ôyap a asu dôé, ma ye bo nyô a ndeñendeñ a ko woñ e si nyô, a nge môt éziñ a koone ma, a ye wôé ma. 15Nti a nga jô nye na: Nge môt éziñ a wôé Kan, ba ye kune nye biyoñe zamgbwa. A e Nti a nga futi ndem e be Kan ndembene bôte ba ye koone nye ba ye bo te wôé nye. 16Wôna Kan a nga kôlô vôme Nti a né a ke tabe e sii Nôd, e mfaʼa jôbe da tôô Eden.
Mvoñe bôte Kan
(Met 2:24; Mt 19:4-9; Met 5:3-8)
17Kan a nga yeme ngal; nye ve bo abum a biaé Enok. Wôna a nga lôñe tison a yôlé je jôé monafame wé Enok. 18Enok a nga biaé Irad, Irad a nga biaé Mewuyaél, Mewuyaél a nga biaé Metusaél, Metusaél a nga biaé Lemék. 19Lemék a nga luʼu binga bebaé, wua jôé na Ada, nyô baa na Sila. 20Ada a nga biaé Yabal; e nye a ne émvame bebaʼale biyem be ne te tabe ngume vôm. 21Monyañ a mbe jôé na Yubal; e nye a ne émvame ba bese ba bôme ntyam ateba a mfañ. 22E mfaʼa Sila, a nga biaé Tubal-Kan, nyô a mbe a luik bivôl bise bi ne mvot a étyé. Kale Tubal-Kan é mbe Nama.
23Lemék a nga jô beyale na:
Ada baa Sila, vôʼôlaʼane tyiñe jam!
Binga be Lemék, keʼan alo e nkobô wom!
Me nga wôé môt asu aveñe dam
a mon asu mimbaʼa miam.
24Ba ye kune Kan biyoñe zamgbwa,
a Lemék biyoñe mewôme zamgbwa a zamgbwa.
25Adam a nga beta jôʼôbô nga; a nga biaé monafam a yôlé nye jôé na: Sét; amu ngal a nga jô na: Zambe a beteya ve ma mvoñe bôte fe éjiane Abél e nye Kan a nga wôé. 26Sét fe a nga biaé monafam jôé na Enos. Eyoñe te ñhe be nga taté na ba loone jôé Nti.
اکنون انتخاب شده:
KALATE METATAʼA 4: BULU09
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© LʼAlliance Biblique du Cameroun, 2009