Genesis 46
46
Jacob Nanmiñiq Iḷaniḷu Egypt-muktut
1Jacob-gum usiḷḷiutivlugich suġalipayaani Beersheba-muktuq, tavrani aitchuiŋaniqsuq ikipkautinik God-iŋanun aapami Isaac-gum. 2God-im uqautiŋagaa qiñiqtuuraakun unnuami suli ququulavlugu, “Jacob, Jacob!”
“Aaŋ, uvva uvaniittuŋa,” kiuŋagaa Jacob-gum.
3“God-auruŋa, God-iŋa aapavich,” uqallaktuq. “Iqsisiqaġnak Egypt-muksaġuvich; kiŋuvaatin nunaqpaguqtinniaġitka taamani. 4Aullaqatiginiaġikpiñ Egypt-mun, suli utqutilugich kiŋuvaatin mattumuŋa nunamun. Joseph-gum itqatiginiaġaatin tuquguvich.”
5Jacob aullaqiŋaruq Beersheba-miñ. Iġñiŋisa inillakkaat, miqłiqtuurallu, suli tuvaaqatiŋich aksraktuuraligaanun usiaġutinun umialgata Egypt tuyuġiŋaraŋiññun. 6#Ac 7.15.Pamiqsaatiglu suli suġaliññaktaatiŋ Canaan-mi pivḷugich Egypt-muktut. Jacob-gum aullaqatigigaich iluqaisa kiŋuvaani: 7iġñiġutiini, tutaaluuni aŋutit, paniutini, suli tutaaluuni aġnat.
8Ukua Jacob-gum nanmiñiq iḷaŋi aullaqatigiŋaraŋich Egypt-mun: aŋayukłiq iġñiŋa Reuben 9suli Reuben-gum iġñiŋich: Hanoch, Pallu, Hezron, Carmi-ḷu. 10Simeon-gum suli iġñiŋich: Jemuel, Jamin, Ohad, Jachin, Zohar, Shaul-lu, iġñiŋa Canaan-miuguruam aġnam. 11Levi-m suli iġñiŋich: Gershon, Kohath, Merari-ḷu. 12Judah-m suli iġñiŋich: Shelah, Perez, Zerah-lu. (Judah-m allak iġñiŋik, Er-lu Onan-lu, tuquruak Canaan-mi.) Perez-gum iġñiġigaik Hezron-lu Hamul-lu. 13Issachar-m suli iġñiŋich: Tola, Puah, Jashub, Shimron-lu. 14Zebulun-gum suli iġñiŋich: Sered, Elon, Jahleel-lu. 15Tavra taapkua iġñiŋich Leah-miñ aniŋaruat Jacob-mun Mesopotamia-mi, suli paniŋa Dinah. Katiłługich, kiŋuvaaŋich Leah-kun iñugiaktigiŋarut iñuiññaq qulit piŋasutun (33).
16Gad-gum suli iġñiŋich: Zephon, Haggi, Shuni, Ezbon, Eri, Arod, Areli-ḷu. 17Asher-m suli iġñiŋich: Imnah, Ishvah, Ishvi, Beriah, suli aniqataat aġnaq Serah. Beriah-m iġñiġigaik Heber-lu Malchiel-lu. 18Ukua akimiaq atausiuruat (16) kiŋuvaaġigaich Jacob-gum Zilpah-kun, kivgauruaq aġnaq, Laban-gum qaiñŋaraŋa panigmiñun Leah-mun.
19Jacob nuliaŋata Rachel-gum iġñiqaqtinŋagaa malġugnik: Joseph-miglu Benjamin-miglu. 20#Gn 41.50-52.Egypt-mi Joseph malġugnik iġñiqaŋaruq, Manasseh-miglu Ephraim-miglu, Asenath-kun, panigiraŋa Potiphera-m, aŋaiyyuliqsiqpauruam Heliopolis-mi. 21Benjamin-gum iġñiġigaich Bela, Becher, Ashbel, Gera, Naaman, Ehi, Rosh, Muppim, Huppim, Ard-lu. 22Taapkua akimiaġutaiḷauruat (14) kiŋuvaaġigaich Jacob-gum Rachel-kun.
23Dan-gum iġñiŋalu Hushim. 24Naphtali iġñiŋiḷḷu: Jahzeel, Guni, Jezer, Shillem-lu. 25Taapkua tallimat malġuk kiŋuvaaŋich Jacob-gum Bilhah-kun, kivgauruaq qaiñŋaraŋa Laban-gum panigmiñun Rachel-mun.
26Iñugiaktilaaŋat nanmiñiq kiŋuvaaŋisa Jacob Egypt-muktuat piŋasukipiaq itchaksratun (66) inŋarut, kisiuqatigigaluaġnagi iġñiġutiiŋisa tuvaaqatiŋich. 27#Ac 7.14.Malġuk iġñiŋik Joseph aniŋaruak Egypt-mi, piŋasukipiaq quliŋŋuqługich (70) Jacob qitunġaŋich taavuŋaqtuat.
Jacob Iḷaŋiḷu Egypt-mi
28Jacob-gum tiligaa Judah apiqsruġiaquvlugu Joseph kasuquvlutiŋ Goshen-mi. Tikiñmata, 29Joseph ikuvluni aksraktuuramiñun Goshen-mugniqsuq kasuġiaqługu aapani. Kasuutikamiŋ, Joseph-gum iqittauraqługu aapani quŋusiŋagun suli qiasuiqsuaŋaruq. 30Jacob uqallaktuq Joseph-mun, “Itqanaiqsuŋa tuquniksramnun, tautuanikkapkiñ suli iñuuniqavitsuli.”
31Tavraasii Joseph-gum uqallautigai aniqatiini suli iluqaisa aapagmi iḷaŋich, “Aullaqtuksrauruŋa aasii uqallautisaqtuġlugu umialik inna: ‘Aniqatiitkalu iluqaġmiglu aapagma iḷaŋich, iñuuniaqtuaguruat Canaan-mi, qaiŋarut uvamnun.’ 32Uqallautiniaġiga imnaiḷiqirauniḷusi suli qaunaksrisuuniḷusi pamiqsaanik suli qaġġisuutiniḷugich iñugiaktuat niġrutisi suli kanŋuuruat supayaurallu suġaliġirasi. 33Umialigum ququulappasi aasii apiġilusi sunik savaaqaġuutilaavsiññik, 34uqallautipiaġumagiksi qaunaksrauniḷusi niġrutinun iñuuniqtutilaavsiññi, maŋŋuuvsi piusiatitun. Tainnaġuvsi iñuuniallapkaġniaġaasi Goshen-mi.” Joseph-gum tainna uqautiniġaich qanukkii Egypt-miut suunnaġilaitkaich imnaiḷiqiraummata iñuich.
Tällä hetkellä valittuna:
Genesis 46: INUPIAQ
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)