Genesis 48
48
Jacob-gum Uqautimmagik Ephraim-lu Manasseh-lu Piḷḷuatautiqaquvlugik
1Qakugulimman Joseph kiliŋagaat aapaŋa naŋiliġñivḷugu. Tavraasii iġñagni, Manasseh-lu Ephraim-lu piqatigivlugik tautugiaŋagaat Jacob. 2Tavra Jacob uqallautimmanni iġñiŋata Joseph-gum tautugiaġnivḷugu, sayanikhuni aquvinŋaruq siñigvigmiñi. 3#Gn 28.13, 14.Jacob-gum uqallautigaa Joseph, “Sapiġñaqtuaq God niptaŋaruq uvamnun Luz-mi nunaŋani Canaan suli quviasaaġunmik qaitchivḷuŋa. 4Uqallautigaaŋa, ‘Miqłiqtuksriññiaġikpiñ iñugiaktuanik, kiŋuniitin iñugiaglutiŋ nunaqpaguġumaut; Nuna manna qaiññiaġiga kiŋuniiġnun iliŋisa piginiaġaat taimuŋa isuitchuamun.’”
5Jacob uqavsaaqtuq, “Joseph, malġuk iġñakiñ, aniŋaruak iliŋnun Egypt-mi qaiŋaiñŋaġma mauŋa, uvaŋa pigigikka; Ephraim-lu Manasseh-lu iġñiġigikka tainnaptauq Reuben-tullu Simeon-tullu. 6Iġñiqavsaaġuvich, uvaŋa pigimmatun inniaŋitchut; kiŋuvaannaktaaŋat qaiñiaqtuq iliŋiññun Ephraim-kuaġuni suli Manasseh-kuaġuniḷu. 7#Gn 35.16-19.Taamna tainna pigiga pisigivlugu aakan Rachel. Isumaaqpaŋaruŋa tuqumman nunaŋani Canaan, uŋasiŋitchuami Ephrath-miñ, Mesopotamia-miñŋaqtilluŋa. Iḷuviŋagiga taavuŋa saniġaanun apqutim Ephrath-muksaġiam.” (Ephrath paŋmami Bethlehem-mik pisuugaat.)
8Jacob-gum tautukkamigik Joseph iġñiŋik, apiqsriruq, “Kitkuk ukuak nukatpiaġruuk?”
9Joseph kiugaa, “Tavra taapkuak iġñaka, God-miñ aitchuusiaka maani Egypt-mi.”
Jacob uqallaktuq, “Qaġġisuutikkik uvamnun piḷḷuatautiksraŋigñik qaitchiyumagikka.” 10Jacob irraŋik qiñilguiḷiŋaruak aŋayuqaksraġuŋavluni, tautulguiḷiŋaruq. Joseph-gum ilaanuutigaik nukatpiaġruuk, aasii iqimmalaaġaik suli kunikł̣ugik. 11Jacob-gum uqallautigaa Joseph, “Taututqigñiaġasugiŋaitkaluaqtaqpiñ, naakkauvva God-im qiñiqtitkaik unnii miqłiqtukiñ.” 12Tavraasii Joseph-gum tiguvlugik saġliaqsiqsuak Jacob-mi, punŋaruq sivuġaanun kiiñani nunamukługu.
13Joseph-gum inillakkaa Ephraim Jacob saumianun aasii Manasseh taliqpianun. 14Aglaan Jacob-gum mumiksiłługik argagni, taliqpiñi iḷigaa niaquanun Ephraim, nukaqłiugaluaqtillugu, saumiñiasii niaquanun Manasseh-m, aŋayukłiuruam. 15Tavra uqautimmigaa piḷḷuatautiksraŋanik Joseph:
“God-imtuq, aapagma Abraham-guvlu Isaac-guvlu savautiŋaraakta, quviasaaġunmik aitchuġligik ukuak nukatpiaġruuk!
God-imtuq, imnaiḷiqirigiraġma uvlupagmuaglaan, quviasaaġunmik aitchuġligik!
16Isaġulgumtuq, annaurrisuuruam uvamnik anniġñiksrakkaluamniñ, quviasaaġunmik aitchuġligik!
Atiġatuq suli atiŋik aapagma Abraham-lu Isaac-guvlu sivunmun iñuuyumaut ukugnuuna nukatpiaġruukkun!
Miqłiqtuukkaġumauktuq, iñugiaktuanik kiŋuniiqaġutiŋ!”
17Joseph iviġaŋiñŋaruq tautukkamiuŋ taliqpiŋa aapami Ephraim niaquanugmagu; tavraasii tiguvlugu aapami argaŋa nuutchaŋagaa Ephraim niaquaniñ Manesseh-m niaquanun. 18Uqallautigaa aapani, “Tainnaŋiḷaaq, aapaaŋ. Uvva unatchiq aŋayukłiuruq; iḷḷiuŋ taliqpiiñ niaquanun.”
19Aapaŋa tainna pisuŋitchuq, uqaqłuni, “Iḷisimaruŋa, iġñiiŋ, iḷisimaruŋa. Manasseh-mtauq kiŋuniiŋich kamanaqtuaguniaġmiut. Aglaan nukaaluŋa kamanałhaaġniaqtuq ilaaniñ, suli kiŋuniiŋich nunaqpaguġniaġmiut.”
20 #
He 11.21. Tavraasii quviasaaġunmik aitchuġniġaik taaptumani uvlumi, uqaqłuni, “Israel-gum kiŋuvaaŋich atuġniaġaich atisik qaitchiraġigumiŋ taiḷugich piḷḷuatautiksrat. Uqallagniaqtut, ‘God-imtuq itillisin Ephraim-tullu Manasseh-tullu.’” Tavra tainnaqami Jacob-gum Ephraim sivulliġuutiniġaa Manasseh-miñ.
21Jacob uqallaktuq Joseph-mun, “Tautukkiŋma, tuquyasitilaamnik, aglaan God-im itqatiginiaġaatin suli utqutilutin nunaŋannun maŋŋuuvich. 22Ilignun aniqatiiŋiḷaaġnun qaitkiga Shechem, naurivigiksuaq piññaktaaġiŋaraġa Amor-miuguruaniñ savikpamniglu pisiksimniglu.”
Tällä hetkellä valittuna:
Genesis 48: INUPIAQ
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)