لوکا 22
22
ایسّائے کُشگئے پَندَل و سازش
(مَتّا 26:2–5؛ مَرکاس 14:1–2)
1بێهُمیرێن نگنئے ائیید، هما که سَرگوَز گوَشگَ بیت نزّیکّ اَت. 2مزنێن دینی پێشوا و شَریَتئے زانۆگر په ایسّائے کۆشارێنگا، راه و نیمّۆنے شۆهاز کنگا اَتنت، بله چه مردمانَ تُرستِش. 3هما وهدا، یَهودا که اِسْکَریوتی نام کپتگ‌اَت و وت چه ایسّائے دوازدهێن مریدان یکّے اَت، شئیتان آییئے پۆستا پُترت. 4یَهودا، مزنێن دینی پێشوا و مزنێن پرستشگاهئے نِگهپانێن سپاهیگانی مسترانی کِرّا شت و گۆن آیان گِند و نِندی کرت که چِه پئیما ایسّایا بدرۆهیت و آیانی دستا بدنت. 5آ باز وشّ بوتنت و شئورِش کرت که آییا چیزّے زَرّ بدئینت. 6یَهودایا مَنِّت و نون گوَم و گێگێن وهد و مۆهێئے شۆهازا اَت که چه مردمانی مُچّیا دور، ایسّایا آیانی دستا بدنت.
سَرگوَزئے شامئے تئیاری
(مَتّا 26:17–19؛ مَرکاس 14:12–16)
7گڑا، بێهُمیرێن نگنئے ائییدئے هما رۆچ آتک که گوَرانڈا کُربانیگَ کننت. 8ایسّایا پِتْرُس و یوهَنّا دێم داتنت و گوَشتی: ”بِرئوێت سَرگوَزئے ائییدئے شامئے تئیاریا بکنێت که بوَرێن.“ 9آیان جُست کرت: ”تئو چے لۆٹئے، ما اے تئیاریا کجا بکنێن؟“ 10پَسّئوی دات: ”شهرا که رسێت، مردێا گندێت که آپی کونزگے گۆن اِنتی،#22:10 اے اَجَبێن هبرے. آپ کَشّگ جنێنانی کار اَت. آییئے رَندا هما لۆگا برئوێت که آ رئوت. 11لۆگئے واهندا بگوَشێت: ’استاد جُستَ کنت: ”مهمانهانه کجا اِنت که من گۆن وتی مریدان سَرگوَزئے شاما همۆدا بوَران؟“‘ 12آ مرد، شمارا وتی لۆگئے سَربُرا، پْراهێن بان#22:12 بان، بزان کۆٹی، کَمرَه، اۆتاک. و دیوانجاهے پێشَ داریت که اۆدا هر چیزّ هست، شامئے تئیاریا همۆدا بکنێت.“ 13آ شتنت. اۆدا، آیان هر چیزّ هما پئیما دیست که ایسّایا گوَشتگ‌اَت. سَرگوَزئے شامِش همۆدا تئیار کرت.
گُڈّی شام
(مَتّا 26:24، 26–29؛ مَرکاس 14:22–25)
14هما ساهت که رَست، ایسّا گۆن مریدان پَرزۆنَگئے سرا نِشت. 15گۆن آیان گوَشتی: ”منی مسترێن اَرمان همے بوتگ که گرانێن سکّی و سۆریانی سگّگا پێسر، اے سَرگوَزئے شاما گۆن شما هۆریگا بوَران. 16شمارا گوَشان، تان هُدائے بادشاهی برجاه دارگ مبیت، دگه برے اے شاما نئوَران.“
17گڑا، جامے چستی کرت، هُدائے شُگری گپت و گوَشتی: ”اے جاما بزورێت، وتی نیاما بهر کنێت. 18شمارا گوَشان که چه اِد و رَند، تان هُدائے بادشاهی مئیئیت و مرسیت، من انگورئے دَهل و سَمَرا ننۆشان.“ 19نگنی هم زرت، هُدائے شُگری گپت، چُنڈ چُنڈی کرت، مریدانا دات و گوَشتی: ”اے منی جسم اِنت که په شما کُربانیگَ بیت، اے رسما په منی یات و یاتمانا برجاه بدارێت.“
20همے ڈئولا، چه ورگا رَند، جامے زرت و گوَشتی: ”اے جام، منی نۆکێن اَهد و کَرارئے هۆن اِنت که په شمئیگی رێچگَ بیت. 21بله، هما که منا درۆهیت، آییئے دست گۆن منی دستا یکّێن پَرزۆنَگا اِنت. 22چێا که هما ڈئولا که پێشا شئور بُرّگ#22:22 شئور بُرّگ، بزان پئیسله کنگ. بوتگ، انسانئے چُکَّ رئوت، بله بَژن و اَپسۆز په هما مردما که آییا درۆهیت.“ 23آ وهدی، مرید یکدومیا جُست کنگا لگّتنت: ”بارێن، چه ما کئے چُشێن کارے کنت؟“
مزنی و مستریئے بارئوا
(مَتّا 20:25–27؛ مَرکاس 10:42–44)
24مریدانی نیاما اَڑ و داواے پاد آتک که ”بارێن، مئے نیاما سجّهێنانی مستر و کماش کئے اِنت؟“ 25ایسّایا گۆن آیان گوَشت: ”درکئومانی بادشاه، وتی مردمانی سرا گۆن زۆراکی واجهیَ کننت و آیانی هاکمانی مکسد و مُراد اِش اِنت که مردم آیان هئیر و برکت دئیۆک بزاننت. 26بله شما چُش مکنێت، بِلّێت که شمئے مسترێن، کَسترێنئے ڈئولا ببیت و شمئے هاکم، هِزمتکارئے ڈئولا. 27بارێن، کئے مستر اِنت؟ هما که نِشتگ و ورگا اِنت، یا هما که هِزمت کنگا اِنت؟ البت، هما که نِشتگ و ورگا اِنت. بله من شمئے نیاما، هِزمتکارێئے ڈئولا آن. 28شما هما اێت که منی آزمائِش و چَکّاسان، گۆن من همراه و همکۆپگ بوتگێت. 29هما ڈئولا که پتا منا بادشاهی بَکشتگ، من هم آییا شمارا بکْشان 30تان منی بادشاهیئے تها چه منی پَرزۆنَگا بوَرێت، بنۆشێت، تَهتانی سرا بنندێت و بنی اِسراییلئے دوازدهێن کَبیلهانی دادرسیا بکنێت.
پِتْرُسئے اِنکارئے پێشگۆیی
(مَتّا 26:31–35؛ مَرکاس 14:27–31؛ یوهَنّا 13:36–38)
31شَمون، او شَمون! شئیتانا مۆکل و اِجازت لۆٹت که شمارا گندمئے ڈئولا کَمَک بکنت و بگێچیت. 32بله من په تئو دْوا کرت تان تئیی باور و ایمان زئوال مبیت. گڑا، وهدے پِر ترّت و پدا منی راها آتکئے، وتی براتانی دستا بگر و دِلبڈّی بدئے.“ 33بله پِتْرُسا پَسّئو تَرّێنت: ”او هُداوند! من گۆن تئو هۆریگا په کئید و بَند و مَرکا هم تئیار آن.“ 34ایسّایا گوَشت: ”او پِتْرُس! من ترا گوَشان که مرۆچی تئو چه کرۆسئے بانگا پێسر، منی پَجّاه آرگا سئے رَندا اِنکارَ کنئے.“
35رَندا چه آیان جُستی کرت: ”بارێن، هما وهدا که من شمارا بے زَرتورَگ و پێلک، بے چئوَٹ و سواسا دێم دات، شما په چیزّے وازمند و مُهتاج بوتێت؟“ آیان پَسّئو دات: ”نه، په هچّ چیزّا.“ 36گڑا گوَشتی: ”بله نون چه شما اگن کَسێئے کِرّا زَرتورَگ و پێلک هست، گۆن وت بزوریت و آییئے کِرّا که زَهم نێست، وتی کباها بها بکنت و زَهمے بها بگیپت، 37چێا که اے نبشته منی بارئوا، باید اِنت پوره و سَرجم ببیت که گوَشیت: آ گۆن گُنهکاران هساب کنگ بوت.#22:37 اِشئیا نبیئے کتاب 53:12. هئو! آ چیزّ که منی بارئوا نبیسگ بوتگ نون سَرجم بئیگی اِنت.“ 38مریدان گوَشت: ”او هُداوند! بچار، مارا دو زَهم گۆن اِنت.“ گوَشتی: ”بَسّ اَنت.“
جِتْسیمانیئے باگا ایسّائے دْوا
(مَتّا 26:36–46؛ مَرکاس 14:32–42)
39رَندا، ایسّا در آتک و اَنچُش که آییئے هێل و آدت اَت، دێم په زئیتونئے کۆها شت. مرید هم آییئے رَندا شتنت. 40اۆدا که سر بوت، گوَشتی: ”دْوا کنێت که آزمائِش و چَکّاسا مکپێت.“ 41رَندا، یکّ ڈۆکێئے چَگلجاهئے کِساسا، چه مریدان دور بوت، کۆنڈانی سرا نِشت و چُش دْوایی کرت: 42”او منی پت! اگن تئیی رزا اِنت گڑا اے سکّیانی جام و پیالها#22:42 ایسّائے مکسد وتی مَرکئے سکّی و سۆریان اِنت. چه من دور کن و بٹَگلێن، بله نه په منی لۆٹ و واهگا، په تئیی جندئے وَشنۆدیا.“ 43هما وهدا، چه آسمانا پرێشتگے زاهر بوت و ایسّایی دلداری و دِلبڈّی دات. 44آ، یکّ گران و جان‌سۆچێن رنجێا دُچار اَت، پمێشکا گێشتر دْوایی کرت و آییئے هێد، هۆنئے ترَمپانی ڈئولا زمینئے سرا پِٹِّتنت.
45چه دْوایا که پاد آتک، مریدانی نێمگا پِر ترّت، دیستی که چه بازێن گَم و اَندۆهان، واب کپتگ‌اَنت. 46گوَشتی: ”په چے وپتگێت؟ پاد آێت، دْوا کنێت که چَکّاسا مکپێت.“
ایسّائے دَزگیر کنگ
(مَتّا 26:47–56؛ مَرکاس 14:43–50؛ یوهَنّا 18:3–11)
47اَنگت ایسّا گۆن مریدان هبر کنگا اَت که رُمبے مردم آتک و رَست. چه ایسّائے دوازدهێن مریدان یکّے، بزان یَهودا، آیانی رهشۆن اَت. آ، ایسّائے نزّیکّا آتک تان بچُکّیتی. 48ایسّایا گوَشت: ”او یَهودا! تئو گۆن چُکّگ و درۆت،#22:48 درۆت، بزان چُکّگ، بۆسه. انسانئے چُکّا گراێنئے؟“
49وهدے ایسّائے همراهان دیست چے بئیگا اِنت، جُستِش کرت: ”او هُداوند! وتی زَهمان بکَشّێن؟“ 50چه مریدان یکّێا وتی زَهم کَشّت و مسترێن دینی پێشوائے نئوکرئے راستێن گۆشی سِست. 51بله ایسّایا گوَشت: ”بَسّ اِنت! دست بدارێت!“ آییئے گۆشا دستی پِر مُشت و دْراهی کرت.
52آ وهدا، ایسّایا گۆن مزنێن دینی پێشوا، مزنێن پرستشگاهئے نِگهپانێن سپاهیگانی مستر و کئومئے کماشان که په آییئے دَزگیر کنگا آتکگ‌اَتنت، گوَشت: ”زانا، من یاگی و رَهزنے آن که شما گۆن زَهم و لَٹّان په منی دَزگیر کنگا آتکگێت؟ 53من هر رۆچ مزنێن پرستشگاها گۆن شما هۆر و یکجاه بوتگان، اۆدا شما منا دست نجتگ. بله هئو! نون وهد شمئیگ اِنت و تهارۆکی هاکم اِنت.“
پِتْرُسئے اِنکار
(مَتّا 26:57–58، 69–75؛ مَرکاس 14:53–54، 66–72؛ یوهَنّا 18:12–18، 25–27)
54گڑا، ایسّااِش دَزگیر کرت و مسترێن دینی پێشوائے لۆگا برت. پِتْرُس دور دورا، آیانی پُشتا رئوان اَت. 55لۆگئے پێشگاها، آسے رۆکِش کرتگ‌اَت و آسئے چاگردا نِشتگ‌اَتنت. پِتْرُس هم گۆن آیان نِشت. 56مۆلدێا، آسئے رُژناییا، پِتْرُس دیست، رُگورُگو چارت و گوَشتی: ”اے مرد هم گۆن ایسّایا همراه بوتگ.“ 57بله پِتْرُسا نمَنّت و گوَشتی: ”او جنێن! من آییا نزانان.“
58کمّے وهدا رَند، دگرێا پِتْرُس دیست و گوَشتی: ”تئو هم چه همایان ائے.“ پِتْرُسا پَسّئو دات: ”او مرد! من چه آیان نه‌آن.“
59کمّ و گێش ساهتێا رَند، دگه یکّێا پِتْرُسئے نێمگا چارت و په دلجمی گوَشتی: ”اے مرد اَلّما ایسّائے همراه بوتگ چێا که آ هم جَلیلیے.“ 60پِتْرُسا درّاێنت: ”او مرد! من سرپدَ نبان تئو چے گوَشگا ائے.“ پِتْرُس همے هبرا گوَشگا اَت که کرۆسا بانگ دات. 61هُداوندێن ایسّایا چَکّ تَرّێنت و پِتْرُسئے نێمگا چارت. گڑا، پِتْرُس هُداوندئے هبرئے یاتا کپت که گوَشتگ‌اَتی: ”تئو مرۆچی کرۆسئے بانگا پێسر، سئے رَندا منی پَجّاه آرگا اِنکارَ کنئے.“ 62نون ڈنّا در آتک و سکّ گْرێتی.
ایسّائے سرا مَلنڈ و ریشکند
(مَتّا 26:67–68؛ مَرکاس 14:65)
63آ سپاهیگان که ایسّا وتی نیاما گپتگ‌اَت، آییئے جنَگ و مَلنڈ و مَسکرا کنگِش بُنگێج کرت. 64ایسّائے چمِّش بستنت و گوَشتِش: ”نون پئیگمبری کن، بگوَش کئیا ترا جت؟!“ 65دگه بازێن بَد و رَدے هم گوَشتِش.
سرۆکانی دیوانا ایسّائے پێش کنگ
(مَتّا 26:59، 63–66؛ مَرکاس 14:61–63؛ یوهَنّا 18:19–21)
66وهدے رۆچ بوت، کئومئے کماشانی دیوان، بزان مزنێن دینی پێشوا و شَریَتئے زانۆگر یکجاه بوتنت، ایسّااِش لۆٹت و آورت. 67جُستِش کرت: ”اگن تئو مَسیه ائے گڑا مارا بگوَش.“ ایسّایا پَسّئو دات: ”اگن من بگوَشان، باوَرَ نکنێت. 68او اگن جُست بگران، پَسّئوَ ندئیێت. 69بله چه انّون و رَند، انسانئے چُکّ زۆراورێن هُدائے راستێن نێمگا نندیت.“ 70آ وهدا سجّهێنان گوَشت: ”اَچه، تئو هُدائے چُکّ ائے؟!“ پَسّئوی دات: ”شما وت گوَشگا اێت که من هما آن.“ 71آیان گوَشت: ”نون دگه چۆنێن گواه و شاهدیے لۆٹێن؟ ما وت چه آییئے جندئے زبانا اے هبر اِشکت.“
Tällä hetkellä valittuna:
لوکا 22: HPKB
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2016-22 Wycliffe Bible Translators, Inc.