ROMETE 11
11
Israelte chu paihkhiahden diing ahi sih uh
1Ahihleh Pathian in a mite paaikheta ahiai mah? Paaikhe lou hial. Bang jiahin ahiai i chih leh kei zong Israelmi, Abraham haah, Benjamin phung a mi ka hi. 2Pathian in a mi a heetlawhte a paaikhe sih hi. Pathian lehkhathu in, Elijah thu a soi na he sih viai mah? Ama’n Israelte tung thu Pathian kawmah a tut a, 3Lalpa na zawlneite a that va, na maitaamte a suchim va; huleh keimah tangin ka um a, kei zong thah ahung tum uhi, chi'n. 4Hizongleh Pathian in a dawnna’n bangchi’n a soi ei? Baal lim ma a khupdin ngei lou mi saang sagih keimah diingin ka kikoihheh hi, chih a dawng hi. 5Hutobangin tulaiin zong hehpihna a teel dungjuiin paihmawh honkhat a um nalai hi. 6Huleh hehpihna jiah ahih inchu, natoh jiah ahita sih hi; huchilou in chu hehpihna chu hehpihna ahita sih diing hi. Hizongleh natoh jiah ahih inchu, hehpihna ahita sih diing; huchilou inchu natoh zong natoh ahita sih diing hi. 7Ahihleh bangchi ahita diai? Israelte’n a hawl uh a mu sih va, hizongleh teelte’n chu a mu uh; a dang zousiah chu suhtawt in a umta uhi. 8Pathian in tuni dongin a kawmvah lusuhna hagau a pia a, a muhtheihlouhna diing uh mitte leh, a jah theihlouhna diing uh bilte toh, chih gelh bangin. 9Huleh David in, A dohkaan uh chu amahuh diingin thaang leh, pial leh, puuhna leh, phubalahna hung hi heh; 10A muhtheihlouhna diingun a mitte uh hung mial henla, huleh nangma’n a nunguh kuunsah zingin, a chih hi. 11Ahihleh ka chi ahi, A kisuih uh a puuhdenna diinguh ahiai mah? Hilou hial. Hizongleh a puuh jiahun amahuh thangsiatsahna diingin Jentelte kawmah hutdamna ahung tung zawta hi. 12Huleh a puuh uh bawn khovel suhhauhsatna ahih a, huleh a kiamna uh zong Jentelte hauhsatna ahih inchu, a buchinna uh bangchi phet a hauhsatna ahita diai mah?
Jentelte hutdamna olive sing phuhluut a etsahna
13Hizongleh nanguh Jentelte kawmah ka soi ahi, kei Jentelte sawlleh ka hih jiahin ka natohna ka paahtawi hi. 14Bangchizawng ahakhat a ka chipihte ka thangsiatsah a, a lahva khenkhatte beeh ka hutdam theih khaah leh chi'n. 15Bang jiahin ahiai i chih leh amahuh paihkhiahna bawn khovel toh kituah kiitna ahihleh, amahuh deihkiitna chu sihna apat hinkiitna loungal bang ahi diai? 16Ajiahchu a gah masa a sianthou inchu a lawmpi zong huchimahbangin a siangthou hi; huleh a zung a sianthou inchu a bate zong huchimahbangin a siangthou hi. 17Huleh a ba khenkhatte suhtana a um a, nang, olive tahlou a lahva phuhluut a na um leh, olive singa hoihna kikoppih na hih jiahin, 18Ba dangte tungah kiuangsah sin. Kiuangsah zonglechin a zung tawmtu nangmah na hi sih a, a zung chu nang hung tawmtu ahi zaw hi. 19Ahihleh nangin, Phuhluut a ka um theihna diingin bate suhtana um ahi, na chi ahi diing. 20Ahi, a gintaat louh jiahun ahi suhtana a um uh, huleh nang na ginna jiahin na diing ahi. Kiuangsah sinla, lau zaw in. 21Bang jiahin ahiai i chih leh Pathian in ba tahte bawn a hawi louh inchu, nang zong ahung hawi tuam sih diing hi. 22Hujiahin Pathian hoihdan leh thukhauhdan en in: a puuhte tungah a thukhauh ahi; nang lamah chu a hoih ahi, a hoihna a na um zing leh; huchi ahih louh inchu nang zong saatkhiahin na um ve diing hi. 23Huleh amah u’zong gingta loua a um zing louh unchu, phuhluut in a um diing uhi; ajiahchu Pathian in amahuh a phutluut thei hi. 24Ajiahchu nang, piandan a olive tahlou apat saatkhiah bawn piandan louh a olive sing hoih a phuhluut a na um leh; hi ba tahte chu amahuh olive sing ngei ah phuhluut in naah umsem na unchia?
Pathian lungtup chu mi zousiah khotuah ahi
25Bang jiahin ahiai i chih leh unaute, na kipilsah louhna diingun, hi thuguuh, Jentelte bukimna ahung tun tokalin Israelte tungah heetsiamlouhna hunkhop chiang ahung tung tadih ahi, chih na heet louh uh ka deih sih hi. 26Huchi'n Israel mi zousiah hutdam in a um diing uhi; Zion akipanin Hundampa ahung diing a, Jakob akipat Pathian ngaihsahlouhna a sumang diing hi. 27Ajiahchu, A sualnate uh ka laahmang tahchianga a kawmva ka thuhun diing chu hikhu ahi, chih gelh bangin. 28Tanchinpha lam ngaihtuahin chu nanguh jiahin meelma ahi va; hizongleh teel thu lam ngaihtuahin chu pulepate jiahin deihtahte ahi uhi. 29Ajiahchu Pathian in a silthawnpiah ah leh a kouhna ah lungsim a kheel ngei sih hi. 30Bang jiahin ahiai i chih leh nidang laiin Pathian na gingta sih va; hizongleh tuin chu amahuh awi louh jiahin khotuahna na muta uhi. 31Hutobangmahin nanguh ahung khotuahna jala khotuahna a muh theihna diingun, tuin hite’n zong gingta lou ahita uhi. 32Ajiahchu Pathian in a khotuah veh theihna diingin, mi zousiah chu thumanlouhna nuaiah a khum vehta hi. 33Aw Pathian pilna leh heetna thuuh hina lawmlawm e! A vaihawmnate bawl guallouh leh, a lampite muh guallouh hina meijen e! 34Ajiahchu Lalpa lungsim kua’n ahiai he? Ahihlouhleh kua ahiai amah lemguatpihtu a pang ngei? 35Ahihlouhleh a dit kiit diing a zong kua’n ahiai a kawma sil pe masa phot? 36Bang jiahin ahiai i chih leh amaha kipan leh, amah jalin leh, amah diinga sil zousiah um ahi; amah kawmah kumtuang in loupina um hen. Amen.
Tällä hetkellä valittuna:
ROMETE 11: SIMTBSI
Korostus
Jaa
Vertaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.