ROMETE 2
2
Jentel sahkhomite siamlouhna
1Hujiahin, Aw mihing, mi soisel haat koi hita zonglechin suanlam diing himhim nei lou na hi; ajiahchu midang na soiselna tah ah nangmah siamlouh na kitangsah ahi; nang a soiseltu’n zong hutobang silte na bawl thou jiahin. 2Hizongleh hutobang sil bawl veute tunga Pathian vaihawmna chu thutah dungjuiin ahi chih i he hi. 3Huleh hutobang sil bawl veute soisel a nang lah hute mah bawl thou, Aw mihing, Pathian vaihawmna peel diing a kigingta na hiaimah? 4Ahihlouhleh Pathian hoihna in kisiih diingin nang ahung pui chih he louin, a hoihna hauhdan leh jaidohdan leh thuaahtheihdante simmoh na hiaimah? 5Hizongleh na lungtang khauh jiah leh, na kisiih nuam louh jiahin, Pathian lungthahna ni leh valhawmna dihtat hung kilat ni chianga diingin na tungah lungthahna na kikholkhawm ahi. 6Ama’n chu mi chin a silbawl bang jelun a thuh kiit diing hi. 7Sil hoih bawl a kuhkaltaha pang a, loupina leh paahtawina leh manthai theih louhna hawl mite kawmah kumtuang hinna a pe diing a; 8Hizongleh soihah a, thutah jui loua, dihtatlouhna juizote tungah chu hehnate leh lungthahnate a um diing, 9Thuaahgimna leh lungngaihna nasatah chu silgilou bawlte hagau tungah a um diing hi; Judate hagau tungah a um masa diing a, Grikte hagau tungah zong a um diing hi. 10Hizongleh silhoih bawl photmahte kawmah chu loupinate, paahtawinate, huleh hamuanna te piah ahi diing; Judate kawmah piah masat ahi diing a, huleh Grikte kawmah zong piah ahi diing hi. 11Ajiahchu Pathian in mi deihsahtuam a nei sih hi. 12Koipouh daan nei lou a sil bawlsual chu daan louin a mangthai diing a; koipouh daan nei a sil bawlsual chu daan a vaihawmsah in a um diing hi; 13(Ajiahchu daan ja mi hih chauh chu Pathian mitmuh in midih ahi sih a; hizongleh daan banga gamta chu midih ahi diing uhi. 14Bang jiahin ahiai i chih leh daan nei lou Jentelte’n a pianpih lungtang va daan silte a bawlun, daan nei sih mahleh uh, hite chu daan in a kineihtawm jel uhi; 15A lungtang vah daan silbawl gelh ahi chih a ensah va, huchu a sialepha heetna un a heetpih a, a lungsimte uh kinialin siam leh siamlouh a kitangsah lehleh uhi; ) 16Ka tanchinpha soi dungjui a Pathian in Jesu Khrist zanga mihingte thuguuh vai a hawmsah ni chiangin.
Judate siamlouh tanna
17Ngai in, nang chu Judami kichi na hi a, daan na muang a, Pathian na suang a, 18Huleh a deihzawng na he a, daan a hilhin na um a, silhoih zote na khen thei a; 19Huleh nangmah ngei chu mittawte puitu leh miala umte diing a vaah hiin na kihe a, 20Daan a pilna leh thutah umdan na neih jiahin mingolte hilhtu hiin na kigingta hi. 21Hujiahin nang, midangte hilhtu, nang leh nang kihilhlou na hiaimah? nang guuhtaat louh diing ahi chia thusoitu, na gu veu maw? 22Nang, aangkawm louh diing ahi chi a hilhtu, aang na kawm veu maw? nang, milem kihdahpa, milem biahna inn a silte na gu veu maw? 23Nang, daan suang pa, na daan bohsiat jiahin Pathian na suminse veu maw? 24Bang jiahin ahiai i chih leh Pathian min chu nanguh jalin Jentelte lahah soisiatin a umta hi, chia gelh bangin. 25Ajiahchu daan juitu na hih inchu zehtan a phatuam ngei a; himahleh daan botsetu na hih inchu na zehtan chu tan louh bang ahung hita hi. 26Hujiahin zehtanlou mi’n daan thusehte a juih leh a zehtan louh chu tan banga ngaih ahi sih diai mah? 27Huleh piandan a zehtanlou mi’n daan a juihkim leh, nang, lehkhathu leh zehtan daan nei ngal a daan bohsetu chu ahung soisel sih diai mah? 28Ajiahchu a polaang chauh a Judami hi chu Judami tah ahi sih a, a kilang a tahsa chauh a zehtan zong zehtan ahi sih hi. 29Hizongleh a sungnung lam a Judami hi chu Judami tah ahi; huleh zehtan tah chu lungsim lam a tan ahi, lehkha thu mai a hilouin, hagau ah ahi; amah paahtaat loh chu mihing apat ahi sih a, Pathian apat ahi zaw hi.
Tällä hetkellä valittuna:
ROMETE 2: SIMTBSI
Korostus
Jaa
Vertaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.