ROMETE 3
3
Nialkalhna dawnbutna
1Ahihleh Judami’n hamphatna bang ahiai a neih tuan? ahihlouhleh zehtan zong bang ahiai a phattuamna? 2Lam chintengah a phatuam hi; a pipenin, Pathian kamsuaahte a kawmva kolsaha a um jiahin ahi. 3Ajiahchu khenkhatte’n gingta sih mah le uh bang a chituan diai? A gintaatlouhna un Pathian ginumna bangmahlou a suaahsah diai mah? 4Suaahsah lou hial e; Pathian chu midihtat hi henla, mi chin chu zuau thei hizaw heh; Na thusoi a siamtang a na um a, vaihawmsah a na um chianga zong na zoh theihna diingin, chi a gelh bangin. 5Hizongleh i dihtat louhna in Pathian dihtatna a suhlat hoih sem leh bang i soi diai? Pathian in mi a gawtin mi dihtatlou ahiai mah? (Mihing bangin ka soi ahi). 6Hilou hial; bang jiahin ahiai i chih leh huchi hitaleh Pathian in khovel vai bangchi’n a hawmta diai? 7Ahihvangin ka zuau soi jiaha Pathian dih jia, amah loupina khophiala a lat sem leh, bang diinga kei zong misual banga siamlouhtansaha um nalai ka hiai? 8Huleh bang diinga, (na hung heeh va, khenkhat in ka soi louhpi na hung soisah bang va) Silhoih ahung pawt theihna diingin silhoihlou i bawl diing uh chi a soizaw lou i hiviai? Hutobang mite’n siamlouh a tan uh a dih ahi.
Vaan nuai pumpi siamlouh tanna
9A hihtaahleh bang? amahuh sangin i hoihzaw tuan va ahiai mah? Hoihzaw himhim lou; ajiahchu Judate leh Jentelte a nih un sual nuaia um veh ahi uh chih a ma in i kawhchianta hi. 10Hichia gelh bangin, Koimah midihtat mawngmawng a um sih, khatmah zong a um sih. 11Koimah hesiam mawngmawng a um sih, koimah Pathian hawl mawngmawng a um sih. 12Ahilou lamah a peet zou vehta va, bangmah phatuamlou ahung suaah vehta uh; koimah silhoih bawl mawngmawng a um sih, khatmah zong a um sih. 13A lawl uh haan kihong ahi a; a lei un heemna thu a soi va; a muuh vah guulgu a um hi. 14A kam uh haanse lohna leh khaatna in a dim a. 15A kal uh sisan suah diingin a kinsuan uh; 16Manthaina leh gentheihna a lampi vah a um a; 17Huleh hamuanna lampi zong a he sih uh; 18A mit hah vah Pathian lau na mawngmawng a um sih hi chih. 19Huchi'n daan in sil bangpouh a soi photmah chu, kam chinteng hup ahihtheihna diing leh, khovel zousiah Pathian ma a mohtang a, a um theihna diingun, daan nuaia umte kawma a soi ahi chih i he uhi. 20Hujiahin daan silbawlte jiahin koimah Pathian mitmuh in siamtangin a um sih diing uh; bang jiahin ahiai i chih leh daan jiahin sual kiheetna ahung um hi.
Khrist gintaat jala dihtatna
21Hizongleh tuin chu daan leh zawlneite’n a heetsah bangun, daan lou a Pathian dihtatna chu suhlatin a umta hi; 22Huchu, Jesu Khrist gintaatna jiaha a gingta photmahte diing a suhlata um Pathian dihtatna chu ahi; bang jiahin ahiai i chih leh a kilimdanna bangmah a um sih hi; 23Ajiahchu mi zousiah in sil a bawlsualta va, Pathian loupina a ching zouta sih uhi. 24Khrist Jesu a um tatna jalin a hehpihna in a thawn a siamtansah in a um uh. 25Pathian thuaahtheihna jala malaia a sualnate uh kiheetmohbawla a um jiahin, a dihtatna etsahna diingin Khrist Jesu chu a sisana ginna jala sual thuphatawina hi diingin Pathian in a guat a; 26Amah chu midihtat ahihtheihna diing leh, Jesu gingta photmahte siamtangsahtu ahihtheihna diing a tulaia a dihtatna etsahna diing ahi. 27Ahihleh kisahtheihna diing khoiah a um ei? A um thei mawngmawng sih hi. Bang daan in ahiai? silbawl daan in ahiai? Hilou: ginna daan in ahi zaw hi. 28Hujiahin mi’n daan silbawlte jiah hilouin, ginna jiahin siam tangin i ngai ahi. 29Pathian chu Judate Pathian chauh ahiai mah? Jentelte Pathian zong hilou maw? Hi e, Jentelte Pathian zong ahi. 30Zehtante a gintaat jiah va siamtangsah diing leh zehtanloute a gintaat jiah va siamtangsah diing Pathian khat chauh ahih ngal inchu, Jentelte Pathian zong ahi na sih diai mah. 31Ahihleh ginna jiahin daan chu bangmahlou i suaahsah uh ahiai mah? Suaahsah lou hial; ahi, daan i sukipzaw uh ahi.
Tällä hetkellä valittuna:
ROMETE 3: SIMTBSI
Korostus
Jaa
Vertaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.