Mak 4
4
Haruanga Babuna Mana Wit Xuyandi
(Matyu 13:1-9; Luk 8:4-8)
1Yesu ungguti tubatuba muli lang gamolingang rubinia. Baing buranga sabanga dima digugunia taxiya, binabu haing wagia. Baing rung mari mana tek lia, lipudi dili titia, lang rubinia. 2Tubatubadi axamang xumana mana haruanga babundi saing maluxu mana tubatubainganoa harua ba, 3“Alungu to! Lipu umangam tela ila umangia bu ting wit xuyandi. 4Tingdi saing teladi diri daxangia, saing mangdi dima daxangxangiadi. 5Teladi diri long sianggamia, mana longga titi sibun te. Dahaxa sap namua na titia ba tubu te. 6Ne bungina xaidaba haing, xanidi saing dimutuxu namua na oxaxadingdi diri te. 7Xuyang teladi diri long waxu ruxunamia, baing disok, dihibuadi binabu oxading te. 8Ne xuyang teladi diri mana titi xaiya. Dahaxa, dahaing saing dua xai. Oxang tela dua 30, tela dua 60 saing tela dua 100.”
9Baing Yesu harua ba, “Lipu gaxarea tangadingliana, bing dilungu haruanga baguli.”
Haruanga Babuna Mana Wit Xuyandi Namuxinoa
(Matyu 13:10-17; Luk 8:9-10)
10Bungina buranga disup mala, baing Lipu 12 rangua lipu teladi ding duxusunga mana haruanga babunadi ba. 11Baing baladi ba, “Haruanga hisangamdi mana Urana Yonggaxinoa, Urana nai ba axapdi baing. Ne lipu singamdi daxap haruanga babundi ing ganina 12bu,
“ ‘Dibagubagu mua ne dibagu daxabia te,
dilungulungu mua ne daxabia rangrang te.
Nam duxugia hatumingadingdi baing bagula ngayunga kuboluding diandi!’#Aisaya (Aisaia) 6:9-10 ”
13Baing Yesu harua nadi ba, “Axabia haruanga babuna baguba namuxinoa te? Nabu bila ba, bing bagula axabia haruanga babung teladi namuxidingdi baru? 14Lipua ting wit xuyandi bila tela ting Urana haruanganoa. 15Lipu teladi, hatumingadingdi bila daxanga ubuna, longga xuyandi diri mana. Dilungu Urana haruanganoa, ne haxek sibuna ba, Satan ma unia Urana haruanganoa sanguadi. 16Lipu teladi bila xuyandi diri long sianggamia. Dilungu Urana haruanganoa, saing daxap sap, gamodingdi diyaha mana. 17Ne dahatum haringina mongaita ing ganina namua na oxaxadingdi diraxap. Xungdi mari sap, bungina mauxangandi daxapdi kimbo bungina daxap salaga mana namua dahatum haringina mana Urana haruanganoa. 18Baing lipu teladi bila xuyanadi diri long waxu ruxunamia. Dilungu haruanganoa, 19ne dahatum xumana buk mana titia li mauxangandi, xaung xalaxaladi dituxu murak manadi, murungadingdi mana axamang xangxana xauna daxapdi, dihibuadi, saing marandi dua te. 20Ne xuyanadi diri titi xaiya bila lipuadi dilungu Urana haruanganoa, daxap dita hatumingadingia saing oxading. Lipu teladi dua 30, teladi dua 60, teladi dua 100, didali xuyadingdi bila ba.”
Nagung Yabanoa
(Luk 8:16-18)
21Yesu baladi ba, “Aria baru? Atung nagung tela, ning akaukau minia kimbo ata hawa mana kabukabua? Tegu. Ata mahaing yabania. 22Namua na axamandi dihisa duwa bila ba sanga mana disok menea. Baing axamandi duwa ulumia duwa bila ba sanga mana disok sabasabia. 23Lipu gaxarea tangadingliana, bing dilungu haruanga baguli.”
24Baladiyu ba, “Ahatum xai mana baraxinta alungu. Maxang taininau ulibu mana baraxinta ulungu, bing bagula oxop maxang taininau muli bila ba, baing bagula oxop tela muli. 25Lipu gaxarea daxap haruangagua, Urana bagula sina xabianga tela muli nadi. Lipu gaxarea dilungu te, xabianga dahagaxa ba dingia, Urana bagula xap sanguadi.”
Haruanga Babuna Mana Wit Xuyandi Dahaing
26Yesu harua muli ba, “Urana Yonggaxinoa bila li. Lipu tela ting wit xuyandi umangia. 27Baing kinu yambong, mesa buraragina haxa mauli, saing xuyanadi ba dahaxa, dahaing baru, lipua ba xabia te. 28Titia ing ganina libu disok. Muga haxadingdi disok, saking oxadingdi disok, baing aningodingdi disok. 29Bungina aningodingdi dimoya, baing lipua ba saba, namua na xauyangua sok ba.”
Haruanga Babuna Mana Mastat Xuyana
(Matyu 13:31-32; Luk 13:18-19)
30Yesu harua muli ba, “Bagula ngaharua baru mana Urana Yonggaxinoa bu ngabaxanga mana? Baru haruanga babunta bagula ngatuba? 31Bila mastat xuyang kaxukang sibung tela lipudi duxumadi umangia. Kaxukang sibuna mana xuyang longgalo. 32Ne bungina duxuma bing haing saing sok sabanga mana anginga longgalo lipudi duxumadi umangia. Ta rimandi disok sabanga, sanga mana mangdi ditongtongia numadingdi maluxu yonggaxinia.”
33Baing bungina Yesu tubatubadi, harua haruanga babung xumana bila bagudi li, sanga mana ditadi hatumingadingia. 34Harua nadi sabasabia te, harua haruanga babundi ing ganina. Ne bungina gabu lipuxindi dinaxu mana ding ganiding duwa, baxanga namu longgalo nadi.
Yesu Harua Saing Tega Manilu
(Matyu 8:18,23-27; Luk 8:22-25)
35Mana xaidapka baguba, yambonga sokkuba baing Yesu harua na lipuxindi dinaxu mana ba, “Takisi mala lang gamolingang hataina.” 36Baing diyunga burangua, dahaing mana xai wagana Yesu wa mana ba, saing daxap mala xauna. Baing xai wagang teladi dila ranguadi. 37Kimuya yang haringina mesa, baing rubadi dimakmatuxuya maluxu wagia, saing bo ba da. 38Ne Yesu wa waga abinia, kinuʼm tabu kandilongia. Binabu lipudi dinaxu mana dahaunghaung saing daharua na ba, “Laku, Lipu Tubatubaingam, uhatum makira te? Tabo ba tangarauba!”
39Baing mesa, bili yanga saing harua na rubadi ba, “Asauya! Awa mosiu!” Baing yanga mati, saing tega manilu sibuna.
40Baing harua na lipuxindi dinaxu mana ba, “Amaxuwa baru? Ang hatumingaim haringin te?”
41Baing dihixi buk mana, saing duxusunga ding ba, “Lipua li ina baru? Tabina lipudi ding ganiding te. Tabina yanga rubadi tang xauna, saing tang disu mana haruanganoa.”
Tällä hetkellä valittuna:
Mak 4: met
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2018, Wycliffe Bible Translators, Inc. All rights reserved.