Matie 22
22
Matɔ ti kota yenga ti mungbingɔ
(Luk. 14.15-24)
1Yezo ti tɛnɛ tɛnɛ fani mɛ ndɛ̃ na matɔ hɛ̃ awa mangɔ lo, lo pa hɛ̃ la ya: 2“Lo Lɛngɔ Gbia tɛ Nzapa akpa nga ma gbia mɛ atɔ tɛ ti yenga ti mungbingɔ tɛ nyi lo ti kɔli na nyi wali kɔi. 3Lo to awa kwa tɛ lo na pɛ azi mɛ ndo lo ili la ya, ala ga atɛ ye, ko ta azi ni ko aye gangɔ ma. 4La lo to awa kwa mɛ ndɛ̃ ya, ala nɔ apa hɛ̃ la ya: ‘Ĩ pa hɛ̃ azi mɛ mbi ili la ya, akpɔ ato abagara tɛ mbi na asa tɛ mbi mɛ akpɛ̃ nyɔkpɔ̃ nyɔkpɔ̃, mbi tɔ tɛ ti yenga ni wɛ, alɛkɛ ye kwɛ na olo wɛ. Wa ĩ ga yenga ti mungbingɔ!’ 5Ala ĩ nɔ ĩ pa hɛ̃ azi ni ko, azi ni ko ahũ ni ka lɛ la gɛgɛrɛ, ala hã nɔ, agwe so lingɔ aye tɛ la nvɛni. Kɔi agwe ka yaka tɛ lo, omɛ ndɛ̃ agwe so dɛngɔ buze tɛ lo. 6Ala mɛ ndɛ̃ agbɔ̃nɔ awa kwa tɛ gbia ko, asɔ̃nɔ la, aho la. 7La ngɔnzɔ agbɔ̃ gbia, lo to aturugu tɛ lo, anɔ akpɔ nga awa kpɔngɔ awa kwa tɛ lo, azɔrɔ nga kɔdɔrɔ tɛ la. 8So pɛni, lo pa hɛ̃ awa kwa tɛ lo mɛ ndɛ̃ ya: ‘Alɛkɛ tɛ ti yenga ti mungbingɔ wɛ, kanda ta azi mɛ ndo mbi ili la adu azi mɛ alengbi ti tɛngɔ tɛ ti yenga ni ma. 9Wa i nɔ ka ndo akota lege, azi zu mɛ ĩ tã la ko, ĩ ili la ya, ala ga atɛ ye.’ 10La awa kwa agwe ka ndo alege, abombi anzɔ̃ azi zu, na asiɔ azi zu mɛ ala tã la. Ala mu azi ni ko, agwe na la ka yenga. Na lo ni ko, ya da ti yenga asĩ na azi mɛkɛ̃. 11“La gbia ali ka ya da ni so bangɔ azi mɛ lo ili la, ko lo hũ kɔli kɔi mɛ ta ayu tɛ lo bɔngɔ mɛ andoyu na ngoi yenga ti mungbingɔ ma. 12Gbia apa hɛ̃ lo ya: ‘Kwa, ta mɔ yu bɔngɔ mɛ andoyu na ngoi yenga ti mungbingɔ ma, ko kɔdɛ mɛ mɔ li ge nga sia?’ Ko ta kɔli ko agbinya tɛnɛ kɔi ma. 13La gbia ko apa hɛ̃ awa kwa tɛ lo ko ya: ‘Ĩ gbɛlɛ ti lo na gɛrɛ lo, ĩ bi lo gegi, ka ya mbingo. Kai ko, lo to gbanda to, lo dema nga gbanda tɛrɛ lo.’ ” 14Yezo apa nga ya: “Nzapa aili azi gba, kanda lo sara bo azi yakere ya ala du azi tɛ ni.”
Lapo mɛ andofuta hɛ kota gbia ti Roma
(Mar. 12.13-17; Luk. 20.20-26)
15La Afarizeo anɔ agbe lingo so gingɔ se kɔdɛ mɛ ala lengbi ti gbɔ̃ngɔ na nda Yezo na ya hũnda mɛ ala na hũndangɔ na lo. 16So pɛni, ala to ambanga ava la, na ambanga ava Erodɛ ya, ala nɔ apa hɛ̃ Yezo ya: “Wa hangɔ lo tɛ Nzapa, e hĩnga ya, mɔ ndotɛnɛ bɛta tɛnɛ, ko mɔ ndoha nga bɛta lo na ndo sé du mɛ Nzapa ndoye. Ta mɔ ndokpɛ lɛ zo ma, ta sanga ma, ta mɔ ndoda bɛ mɔ na ndima mɛ zo na ni ma. 17Wa pa hɛ̃ e dangɔ bɛ tɛ mɔ na ndo tɛnɛ olo: ndia tɛ e ahɛ̃ lege ya, afuta lapo hɛ̃ kota gbia ti Roma, bere ta afuta ma?” 18Ko Yezo ahĩnga ndo siɔ dangɔ bɛ tɛ la, la lo pa hɛ̃ la ya: “Ĩ awa poroso, nda mɛ ĩ ndogi kɔdɛ ya, ĩ gbɔ̃ nda mbi nɛ? 19Ĩ fa mbi na faranga kɔi mɛ andomu afuta na lapo hĩ.” Ala mu faranga kɔi ahɛ̃ Yezo. 20Ko Yezo ahũnda la ya: “Eɛ zo na ili zo mɛ na lɛ faranga olo mɛ ko, adu tɛ na?” 21Ala gbinya hɛ̃ lo ya: “Adu lɛ kota gbia ti Roma nga na ili lo la.” La Yezo apa hɛ̃ la ya: “Wa ĩ futa lapo tɛ kota gbia ti Roma hɛ̃ lo, ko ĩ futa nga ye tɛ Nzapa hɛ̃ Nzapa.”
22Ala ĩ ma Yezo ĩ gbinya so ko, ala bema sĩ. La ala dɔ lo azia, agwe.
Asaduseo ahũnda Yezo na lo ti songo tɛ azi na pɛ kwa
(Mar. 12.18-27; Luk. 20.27-40)
23Asaduseo adu azi mɛ ndopa ya, se zo akpi ko, ta lo so ma. Bo: na lá ni ko, ambanga Asaduseo aga ka tɛ Yezo, ahũnda lo ya: 24“Wa hangɔ lo tɛ Nzapa, ma tɛnɛ mɛ Mɔizɛ apa lo mɛ: ‘Se kɔli adu na wali, ko se ta ala dú nyi ma, ko kɔli akpi ko, ale nyita lo ti kɔli amu we muã ko, adu na lo, ko adu lo na ayangambi hɛ̃ nyita lo wa kwáni.’ 25Ko ka tɛ e ko, aya kɔli mbara mbara asi na ya ta la kɔi to la kɔi. Kɔzo nyi adu na wali, ta ala dú nyi ma, ko kɔzo nyi akpi, la lo zia we muã ni hɛ̃ nyita lo, ko nyita lo adu na lo. 26Bo gi tɛrɛ ye ko ali nyingambi ti se, so pɛni ali nyingambi ti ta, ko ali nga ala zu mbara mbara. 27Na pɛ kwá tɛ la zu ko, wali nvɛni akpi nga. 28Wa na lá ko gbanda awa kwáni aso ko, kɔ wali nvɛni so popo tɛ aya kɔli ko mbara mbara gbanda na? Omɛ ala zu adu ndo na wali ko mɛ!”
29La Yezo agbinya hɛ̃ la ya: “Ĩ yu ndo, na lo mɛ ya, ta ĩ hĩnga Buku tɛ Nzapa, bere nguru tɛ lo ma. 30Ngoi mɛ gbanda azi mɛ akpili aso ko, ta akɔli na awe ati dungbi gbanda ma, kanda ala du gbanda nga ma se tɛ aangelo ka yayu mɛ ta ndodu na wali ma. 31Wa adu lo ti songɔ tɛ azi na pɛ kwá ko, ta ĩ dɛ ĩ di tɛnɛ mɛ ndo Nzapa atɛnɛ hɛ̃ ĩ ma? Lo pa ndo ya: 32‘Mbi du Nzapa mɛ Abrahama, na Izaki, nga na Yakobo ndovɔrɔ.’ Nzapa adu Nzapa mɛ azi mɛ lɛ la ngɛ̃ ndovɔrɔ lo, kanda ta lo du Nzapa tɛ awa kwáni ma. Oko afa ya, Abrahama, na Izaki, nga na Yakobo ndodu lɛ la ngɛ̃.”
33Azi butu butu mɛ ndo ama lo ko, ala bema sĩ na lo ti lo mɛ lo ha.
Ndia mɛ aɔ andia kwɛ
(Mar. 12.28-34; Luk. 10.25-28)
34Afarizeo ĩ ma ya, Yezo aha lo, ko Asaduseo aha gbinyangɔ ni gba ko, ala bombi tɛrɛ la ndoni kɔi, agwe ka tɛ Yezo. 35La mbanga kɔi na popo tɛ la, lo wa hangɔ ndia, lo ye ndo gbɔ̃ngɔ nda Yezo, la lo hũnda Yezo ya: 36“Wa hangɔ lo tɛ Nzapa, na popo tɛ andia zu ko, ndia mɛ aɔ andia kwɛ nɛ?” 37Yezo agbinya hɛ̃ lo ya: “Ndia mɛ aɔ andia kwɛ la: ‘Ale mɔ ye Gbia Nzapa tɛ mɔ na bɛ mɔ kɔi, na tɔrɔ tɛrɛ mɔ zu, nga na kɔdɛ tɛ mɔ zu.’ 38Ndia mɛ kotani buai, ko aɔ nga andia kwɛ la. 39Wa ĩ ba ndia ti sɛ mɛ ngbondoni nga ma se ti kɔzoni lo mɛ: ‘Ale mɔ ye afɔ̃ mɔ nga ma se mɛ mɔ ndoye na tɛrɛ mɔ nvɛni.’ 40Ndia zu mɛ ndo Mɔizɛ asu, na ló zu mɛ ndo awa pangɔ nyɔ Nzapa aha ko, alo bo na ndo andia olo sɛ.”
Mɛsia adu Gbia tɛ Davidi
(Mar. 12.35-37; Luk. 20.41-44)
41Ngoi mɛ Afarizeo ĩ bombi tɛrɛ la ndoni kɔi ko, Yezo ahũnda la na ndo ya: 42“Dangɔ bɛ mɛ ĩ na ni na ndo Mɛsia nɛ? Lo tara na?” Ala gbinya hɛ̃ lo ya: “Lo tara Davidi.” 43Yezo apa hɛ̃ la ya: “Wa kɔdɛ mɛ ndo Tɔrɔ Santo azi kɔdɛ li Davidi, ko Davidi aili lo ya lo Gbia sia? Ta sanga ma, Davidi apa ndo ya:
44‘Gbia Nzapa apa hɛ̃ Gbia tɛ mbi ya:
Du na ndo kɔti ti mbi,
Nga ka gbanda mbi nwɔ awa kɛ̃ngɔ mɔ,
Mbi kpã la gbe gɛrɛ mɔ.’
45Wa oko la Davidi aili ndo Mɛsia ya lo Gbia ko, kɔdɛ mɛ Mɛsia alengbi ti dungɔ nga tara Davidi sia?”
46Ala ĩ ma so ko, ala ha gbinyangɔ tɛne hɛ̃ lo gba, ko ato na lá ni ko, ta zo kɔi ati atara hũndangɔ lo na ndo ma.
Tällä hetkellä valittuna:
Matie 22: NGB87
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Ngbandi New Testament © United Bible Societies, 1987.