Matie 23
23
Yezo atisa azi ya ta ala mu se li ye tɛ awa hangɔ ndia na tɛ Afarizeo ma
(Mar. 12.38-39; Luk. 11.43,46; 20.45-46)
1La Yezo apa hɛ̃ azi butu butu na ava lo ya: 2“Kwa tɛ ɔ awa hangɔ ndia na tɛ Afarizeo la kambisangɔ nda andia tɛ Mɔizɛ hɛ̃ azi. 3Ale ĩ ndoma nyɔ la, ĩ ndoli nga ye zu ko la ala ndopa ya ĩ li. Wa ta ĩ mu se li ye tɛ la ma, ta sanga ma, ye mɛ ala ndoha na azi ko, ta ala ndoli ni na seni ma. 4Ala ndogbe kumba mɛ andonɛ nga ma ndo ko ala mu, akpã na ndo ngɔngɔ azi ya, ala yɔ ni. Ko ta ala ndomu bɛ li ti la kɔi ya, ani za na awa yɔngɔ kumba ni ma. 5Ala ndoli kwa tɛ la zu na kɔdɛ mɛ ya, azi ahũ ani. Na lo ni ko, nyi mbɛti ti tɛnɛ tɛ Nzapa mɛ ala ndogbe na ndo lɛ la, nga na omɛ ala ndogbe na ndo ti la ko, ala ti ali ni ati kotani ya, azi ahũ ni kpa. Ala ndofũfũ ti bɔngɔ tɛ la ati yɔngɔrɔni tɔngbɔ tɔngbɔ ya, azi aba ni kpa. 6Ngoi mɛ ala ndogwe yenga ko, ala ndosara tɛ la bɛta ndo, wa ala dunga da. Ka ya da sambela ko, ala ndosara ndo mɛ ka gbɛlɛ azi zu, wa ala dunga da. 7Ala ndoye ɔngɔ na ndo mɛ azi da, ya azi ni awo tɛrɛ la, abala ani. Ala ndoye nga ya, azi aili ani ya, ani awa hangɔ lo tɛ Nzapa. 8Kanda tɛ ĩ ko, ta ĩ ye ya, azi aili ĩ ya, ĩ awa hangɔ lo tɛ Nzapa ma, ta sanga ma, ĩ zu gi ayata, ko wa hangɔ ĩ na lo tɛ Nzapa bo kɔi. 9Ta ĩ ili zo kɔi so lɛ sese olo ya, lo To ĩ ma, ta sanga ma, To ĩ bo kɔi la lo mɛ ka yayu. 10Ta ĩ ye nga ya, aili ĩ ya, ĩ agbia ma, ta sanga ma, Gbia tɛ ĩ bo kɔi la Mɛsia. 11So popo tɛ ĩ, zo ko la aɔ ĩ zu ko, ale lo du wa lingɔ kwa hɛ̃ ĩ zu. 12Wa zo ko la ndomu tɛrɛ lo ya, ni ɔ azi zu ko, lo na tingɔ gbɛ gɛrɛ azi zu, wa zo ko la ndomu tɛrɛ lo ya, ni na gbɛ gɛrɛ azi zu ko, lo na ɔngɔ la!”
Yezo abela Afarizeo nga na awa hangɔ ndia
(Mar. 12.40; Luk. 11.39-42,44,52; 20.47)
13Yezo apa ya: “Siɔ lo ati na ĩ awa hangɔ ndia, ati nga na ĩ Afarizeo! Ĩ du awa poroso! Ta sanga ma, ĩ ndovĩ nyɔ gbágbá ti Kɔdɔrɔ Gbia tɛ Nzapa ya, ta azi ali kai ma. Ta ĩ nvɛni ĩ ndoli nga kai ma, ko ĩ ndogbanzi azi mɛ asepara lingɔ kai.
[ 14“Siɔ lo ati na ĩ awa hangɔ ndia, ati nga na ĩ Afarizeo! Ĩ du awa poroso! Ta sanga ma, ye zu mɛ awe muã na ni ko, ĩ ndolɔ ni na ti la, ko ĩ ti ĩ sana bo na ngoi ko, ĩ sambela ayɔngɔrɔ sambela so fangɔ ya, ĩ anzɔ̃ azi. Nda mɛ gbanda etumbu mɛ Nzapa ahɛ̃ ĩ aɔ maka la!]
15“Siɔ lo ati na ĩ awa hangɔ ndia, ati nga na ĩ Afarizeo! Ĩ du awa poroso! Ta sanga ma, ĩ ndofɔnɔ na ndo kwɛ ge lɛ sese, nga ka lɛ ngu, so gingɔ bo zo kɔi ya, lo gbinya bɛ lo, lo ti nga ma ĩ. Wa ngoi mɛ ĩ li, lo gbinya bɛ lo wɛ ko, lo ti siɔ zo sĩ nvɛni aɔ ndo ĩ, ko lo ti nga zo mɛ lo lengbi na lifɛlo.
16“Siɔ lo ati na ĩ awa fangɔ azi na lege, ĩ mɛ ĩ du nga ma awa ziba! Ĩ ndonɛ ya: ‘Se zo anyɔ ngɛ na ili kota da Nzapa ko, ta ngɛ ni agbɔ̃ lo ma. Wa se lo nyɔ ngɛ na ili wɔrɔ mɛ abata ka ya kota da Nzapa ko, ngɛ ni agbɔ̃ lo.’ 17Oo, ĩ awa buba mɛ lɛ ĩ avĩ nga ma lɛ awa ziba ee! Na wɔrɔ, na kota da Nzapa mɛ ndogbinya wɔrɔ ati ye mɛ santo ko, ye mɛ ngbondoni nɛ? Wɔrɔ bere kota da Nzapa? 18Ĩ ndonɛ ya: ‘Se zo anyɔ ngɛ na ili mɛsa mɛ andolu Nzapa na ye ndo ni ko, ta ngɛ ni agbɔ̃ lo ma. Wa se lo nyɔ ngɛ na ili ye mɛ alu na Nzapa ko, ngɛ ni agbɔ̃ lo.’ 19Oo, ĩ mɛ nga ma awa ziba ee! Na ye mɛ andolu na Nzapa ka ndo mɛsa, na mɛsa mɛ agbinya ye ni ati santo ko, ye mɛ ngbondoni nɛ? 20Zo ko la anyɔ ngɛ na ili mɛsa ko, afa ya, lo nyɔ ngɛ na ili mɛsa, lo nyɔ nga na ili ye zu mɛ alu na Nzapa na ndo mɛsa ni. 21Zo ko la anyɔ ngɛ na ili kota da Nzapa ko, afa ya, lo nyɔ ngɛ na ili kota da Nzapa, lo nyɔ nga na ili Nzapa mɛ ndodu ka ya kota da Nzapa ni. 22Zo ko la anyɔ ngɛ na ili ndozu ko, afa ya, lo nyɔ ngɛ na ili ngɛndɛ gbia tɛ Nzapa, lo nyɔ nga na ili Nzapa mɛ ndodu na ndo ngɛndɛ gbia ni.
23“Siɔ lo ati na ĩ awa hangɔ ndia, ati nga na ĩ Afarizeo! Ĩ du awa poroso! Ĩ ndomu nyɔ ye sui kɔi ti lɛ tɛ ndɛ̃ ndɛ̃ ndɛ̃ ti yaka tɛ ĩ, ĩ hɛ̃ Nzapa. Kanda ta ĩ ndotɔndɔ angbondo alo ti ndia ma. Angbondo alo ni lo mɛ: lingɔ ye na seni, mangɔ vundu tɛ azi, lingɔ ye na se kapa ni. Adu aye mɛ ale ĩ ndoli, ko ta bɛ ĩ ali na atanga ni mɛ ndɛ̃ ma la. 24Oo, ĩ awa fangɔ azi na lege, ĩ mɛ ĩ du nga ma awa ziba ee! Ĩ ndokonga ngu tɛ ĩ ti nyɔngɔ ya, ta ĩ nyɔ nyi ye mɛ nga ma ngungu ma, kanda ĩ ndonyɔ kota ye mɛ nga ma gbɔdi oo! 25“Siɔ lo ati na ĩ awa hangɔ ndia, ati nga na ĩ Afarizeo! Ĩ du awa poroso! Ĩ ndokpo koko kangu nga na koko sɛmbɛ tɛ ĩ, kanda ka ya bɛ ĩ ko, ĩ na gwɛ̃ ti nzĩngɔ ye sĩ, ĩ na zugbu sĩ. 26Mɔ Farizeo mɛ mɔ nga ma wa ziba ee! Kpo ya kangu tɛ mɔ uzu, wa se mɛ nga mɔ kpo ndoko ni avuru la.
27“Siɔ lo ati na ĩ awa hangɔ ndia, ati nga na ĩ Afarizeo! Ĩ du awa poroso! Ĩ du nga ma asɛndɛ mɛ ahĩni tɛrɛ ni na zua, adɛ̃ nga ma ya mɔ, kanda ka ya sɛndɛ ni ko, abio kinda, na lɛ aye kɔndɛ kɔndɛ mɛ azɔ̃zɔ̃, asĩ da sĩngɔ. 28Ĩ ba se tɛ ĩ nga la. Azi ndohũ ĩ nga ma anzɔ̃ azi, kanda ka ya bɛ ĩ ko, poroso na siɔ lo asĩ da sĩngɔ.”
Yezo apa lo ti etumbu mɛ Nzapa na hɛngɔ hɛ̃ awa poroso
(Luk. 11.47-51)
29Yezo apa ya: “Siɔ lo ati na ĩ awa hangɔ ndia, ati nga na ĩ Afarizeo! Ĩ du awa poroso! Awa pangɔ nyɔ Nzapa mɛ ndo akpili ko, ĩ ndolɛkɛ asɛndɛ tɛ la ya, ati nzɔ̃ni. Ĩ ndofua ndo asɛndɛ tɛ azi mɛ ndo ali ye na seni. 30Ko ĩ ndopa ya: ‘Se e du ndo da na ngoi mɛ akotara e akpɔ na awa pangɔ nyɔ Nzapa ko, ale ta e ye ndo hɛ̃ la ma.’ 31Oko ĩ ndonɛ so ko, afa ya, ĩ nvɛni ĩ hĩnga ya, ĩ atara azi mɛ ndo akpɔ awa pangɔ nyɔ Nzapa. 32Wa se adu nga so ko, ale ĩ nɔ bo na kwa mɛ ndo akotara ĩ ato nda ni, ko ĩ kɔ nda ni!
33“Oo, asiɔ azi ee! Ĩ da bɛ ĩ ya, ta ĩ na ltiangɔ etumbu ti lifɛlo ma? Ĩ na luangɔ ni. 34Na lo ni ko, ĩ ma mbi: mbi na tongɔ hɛ̃ ĩ awa pangɔ nyɔ Nzapa, na awa ndara, nga na awa kɔdɛ. Ĩ na kpɔngɔ ambanga, ĩ na gɔngɔngɔ ambanga ndo krusi, ĩ na sɔ̃nɔngɔ ambanga mɛ ndɛ̃ na fimbo ka ya da sambela. Ko ngoi mɛ ambanga na kpɛlɛngɔ, gwengɔ ka kɔdɔrɔ mɛ ndɛ̃ ko, ĩ na nɔngɔ pɛko la ya, ĩ gbɔ̃nɔ la. 35Nda mɛ ĩ na luangɔ etumbu, ko etumbu ni na lengbingɔ na se mɛ ndo aho na azi mɛ ta ali siɔ ye ma la. Ato nda kpɔngɔ la ndo na ndo Abɛlɛ mɛ bɛta zo, anɔ ngbĩi asi na ngoi mɛ ndo aho na Zakaria nyi Barasia. Aho ndo Zakaria ka ya kota da Nzapa, na popo ti ndo mɛ Santo na mɛsa ti lungɔ Nzapa na ye. 36Mbi pa hɛ̃ ĩ ti bɛta tɛnɛ ya, azi ti ngoi olo na luangɔ etumbu, ko etumbu ni alengbi na kwá tɛ azi tɛ Nzapa zu mɛ ndo azi akpɔ la!”
Yezo abela awa Yeruzalɛmɛ
(Luk. 13.34-35)
37“Ĩ awa Yeruzalɛmɛ, ĩ la ĩ ndokpɔ awa pangɔ nyɔ Nzapa, ĩ nga la ĩ ndomu tɛ́nɛ ĩ ndoboroka na azi mɛ Nzapa ato la ka tɛ ĩ, ĩ ho! Mbi ye ndo fani sĩni ya, mbi bombi ĩ ndoni kɔi so tɔ̃nda mbi, nga ma se mɛ ta kɔndɔ ndobombi na aya lo na gbɛ kpange ti lo, ko ĩ kɛ̃ ndo. 38Wa ĩ ma la! Nzapa na dɔngɔ kɔdɔrɔ tɛ ĩ nda ngbo li ngbo ziangɔ. 39Mbi pa hɛ̃ ĩ ya, ato na olo ko, ta ĩ na hũngɔ mbi ma, nga ka ngoi mɛ ĩ na hũngɔ mbi fani mɛ ndɛ̃, ko ĩ na nɛngɔ ya: ‘Gbia Nzapa asunu bɛ zo ko la tɛrɛ gangɔ na ili lo ma ke!’ ”
Tällä hetkellä valittuna:
Matie 23: NGB87
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Ngbandi New Testament © United Bible Societies, 1987.