Marko 2
2
Yezo asara wa ngbengule
(Mat. 9.1-8; Luk. 5.17-26)
1Ĩ la so pɛni yakere ko, Yezo adiri ka kɔdɔrɔ mɛ ili ni la Kapɛrnaumɛ. Ngoi mɛ azi ĩ ma ya, lo ka ya da ko, 2ala ga butu butu abombi tɛrɛ la ndoni kɔi, ta ndo kɔi mɛ angbã gɛgɛrɛ da ma, abɛ nga ka yanga nyɔ da ko, ta ndo nga da ma. La Yezo aha la na tɛnɛ tɛ Nzapa. 3Ambanga azi mɛ ndɛ̃ aga, ko na popo tɛ la ko, azi siɔ ayɔ wa ngbengule kɔi na ndo gbogbo, aga na lo hɛ̃ Yezo. 4Ta kɔdɛ mɛ ya, ala fa lo na Yezo da ma, na lo tɛ azi mɛ aga hingo hingo. La azi mɛ aga na wa ngbengule ama ka ndo da, ahã be li da ni ngĩ bo na ndo mɛ Yezo da. La ala mu kɔli ko na gbogbo mɛ lo se ndo ni, azu na lo ti lɛ do ti be li da mɛ ala hã. 5Yezo ĩ hũ ya, azi ko aye lo tɛ ni ko, lo pa hɛ̃ wa ngbengule ko ya: “Nyi mbi, mbi ka lɛ mbi ndo asiɔ ye tɛ mɔ.
6Ambanga awa hangɔ ndia mɛ adunga so ndo ko, so ndotenɛ ka ya bɛ la ya: 7“Kɔdɛ mɛ zo kɔli olo ndoguru Nzapa so sia? Zo mɛ alengbi ti kangɔ lɛ lo ndo asiɔ ye tɛ azi na? Bo Nzapa kɔi!” 8Bo na ngoi ni ko, Yezo ahĩnga dangɔ bɛ tɛ la, ko lo hũnda la ya: “Nda mɛ ĩ ndodu na gi tɛrɛ dangɔ bɛ so nɛ? 9Na popo ti tɛnɛ olo sɛ: pangɔ hɛ̃ wa ngbengule ya: ‘Mbi ka lɛ mbi ndo asiɔ ye tɛ mɔ,’ bere pangɔ hɛ̃ lo ya: ‘Lo ndozu, mɔ mu gbogbo tɛ mɔ, mɔ dɔ nɔ’ ko, tɛnɛ mɛ woni nɛ? 10Kanda mbi ye ya, ĩ hĩnga ya, mbi Nyi Zo mbi na nguru ti kangɔ lɛ mbi ndo asiɔ ye tɛ azi ge lɛ sese.”
La lo pa hɛ̃ wa ngbengule ko ya: 11“Mbi pa hɛ̃ mɔ ya, mɔ lo ndozu, mɔ mu gbogbo tɛ mɔ, mɔ diri ka ndo tɛ mɔ!” 12Bo na ngoi mɛ azi zu so ndoba kɔli mɛ wa ngbengule ko, lo dɔ, lo lo, lo mu gbogbo tɛ lo, lo gwe. Azi ko zu abema ndo sĩ, ala gonda Nzapa ya: “Ta e dɛ e hũ gi tɛrɛ ye nga so wɛ ma!”
Yezo aili Levi
(Mat. 9.9-13; Luk. 5.27-32)
13Yezo ĩ diri ka nyɔ kpo ti Galilea ko, azi butu butu anɔ ka tɛ lo, la lo ha la na tɛnɛ tɛ Nzapa. 14Ngoi mɛ lo so ndoɔ ko, lo hũ Levi nyi Alafe, adu so tɛrɛ mɛsa mɛ andofuta na lapo. La Yezo apa hɛ̃ lo ya: “Ga e na mɔ e ɔ ndoni kɔi.” La Levi alo, ana Yezo aɔ ndoni kɔi.
15Ngoi mɛ Yezo na ava lo so ndotɛ ye ka ya da tɛ Levi ko, awa sɔrɔngɔ lapo sĩni, nga na asiɔ azi aga adunga ka tɛrɛ mɛsa. Ta sanga ma, gi tɛrɛ azi ni ko gba ndo la ndoɔ pɛko lo. 16Awa hangɔ ndia mɛ na li nɔ tɛ Afarizeo ĩ hũ Yezo so ndotɛ ye ndoni kɔi na awa lingɔ siɔ ye, nga na awa sɔrɔngɔ lapo ko, ala hũnda ava Yezo ya: “Nda mɛ Yezo na awa sɔrɔngɔ lapo, nga na awa lingɔ siɔ ye ndotɛ ye ndoni kɔi nɛ?” 17Yezo ĩ ma so ko, agbinya hɛ̃ la ya: “Azi ko gbe tɛrɛ la nzɔ̃ni ko, ta ala ndodu na gwɛ̃ tɛ mɔnganga ma, kanda bo awa ngã la ndodu na gwɛ̃ tɛ mɔnganga. Ta mbi ga ge so ilingɔ anzɔ̃ azi ma, kanda mbi ga so ilingɔ awa lingɔ siɔ ye.”
Yezo aba azi na alo mɛ ndɛ̃
(Mat. 9.14-17; Luk. 5.33-39)
18Mbanga lá kɔi ko, ava Yoanɛ mɛ wa hɛ̃ngɔ batisimɔ, nga na Afarizeo akɛ̃ tɛngɔ ye so vɔrɔngɔ Nzapa. La azi aga, ahũnda Yezo ya: “Ava Yoanɛ na ava Afarizeo ndokɛ̃ tɛngɔ ye so vɔrɔngɔ Nzapa, ko nda mɛ ta ava mɔ ndokɛ̃ tɛ la tɛngɔ ye bɛ gbɔ na lo ni ma nɛ?” 19La Yezo agbinya hɛ̃ la ya: “Ĩ da bɛ ĩ ya, azi mɛ aili la ya, ala ga atɛ yenga ti mungbingɔ tɛ kɔli na wali ko, ala lengbi ti kɛ̃ngɔ tɛngɔ ye, na ngoi ko la kɔ wali ade so popo tɛ la? Ipɔ, ta seni la ma! Ngoi zu mɛ kɔli ko adɛ ndoni kɔi na la ko, ta ala lengbi ti kɛ̃ngɔ tɛngɔ ye ma. 20Kanda lá kɔi gbanda ko, azi ahã gbanda kɔ wali so popo tɛ la aɔ na ni, ko na lá ni ko gbanda la ala kɛ̃ tɛngɔ ye.”
21Yezo ato nga matɔ hɛ̃ la ya: “Ta zo ndomu fana nyɔ bɔngɔ, abo na ngbina bɔngɔ ma. Se lo li so ko, fana nyɔ bɔngɔ asuru nyɔ ngbina bɔngɔ yakere, ko lɛ kã ni ati kotani buai. 22Ta zo ndomu fana kana asa na ya ngbina pɔrɔ sa mɛ alɛkɛ nga ma mbenda ma. Se lo li so ko, kana ni ao ngbina mbenda, ko kana na mbenda ni zu amumana. Kanda ale asa fana kana na ya fana mbenda!”
Yezo aba azi na nda lá ti wɔngɔ tɛrɛ
(Mat. 12.1-8; Luk. 6.1-5)
23Na mbanga lá ti wɔngɔ tɛrɛ kɔi ko, Yezo na ava lo so ndofangbi lɛ yaka ti le tɛ mɛ ili ni la ble. Ko ava lo akɔrɔ le ble mɛ na nyɔ lege, atɛ. 24La Afarizeo ahũnda Yezo ya: “Ba hĩ! Nda mɛ ava mɔ ndoli ye mɛ ndia tɛ e akɛ̃ ya, ta zo ali na lá ti wɔngɔ tɛrɛ ma nɛ?” 25Ko Yezo agbinya hɛ̃ la ya: “Mbi hĩnga nzɔ̃ni ya, ĩ di mbɛti ti ye mɛ Davidi ali, na ngoi mɛ ndo gwɛ̃ agbɔ̃ lo nvɛni, agbɔ̃ nga azi tɛ lo. 26Alu ndo ndia ya, bo awa lungɔ Nzapa na ye la alengbi ti tɛngɔ mapa mɛ alu na Nzapa. Abɛ nga so ko, Davidi ali ndo ka ya, da Nzapa, alɔ mapa mɛ alu na Nzapa, atɛ. Lo hɛ̃ ndo nga mbanga hɛ̃ azi tɛ lo, ala tɛ. Na ngoi ko ndo ko, Abiatarɛ ndo la gbia tɛ awa lungɔ Nzapa na ye.” 27La Yezo apa nga hɛ̃ la ya: “Nzapa akpa lá ti wɔngɔ tɛrɛ na lo tɛ azi, kanda ta lo li azi na lo ti lá ti wɔngɔ tɛrɛ ma. 28Nda mɛ mbi Nyi Zo, mbi nga Gbia ti ndo lá ti wɔngɔ tɛrɛ la.”
Tällä hetkellä valittuna:
Marko 2: NGB87
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Ngbandi New Testament © United Bible Societies, 1987.