Marko 3
3
Kɔli mɛ ti lo azɛ
(Mat. 12.9-14; Luk. 6.6-11)
1So pɛni, Yezo adiri ali ka ya da sambela. Mbanga kɔli kɔi mɛ ti lo azɛ̃ ndo nga so ya da sambela ni ko. 2Lá ni ko adu ndo lá ti wɔngɔ tɛrɛ tɛ Ayuda, ko azi mɛ so ndo ko so ndoba Yezo toka toka ya, bere lo na sarangɔ kɔli ko. Ta sanga ma, ala ndogi ndo ya, ani lua lo na ló, wa ani vɔ̃ to tɛrɛ lo ya, lo li siɔni. 3Yezo apa hɛ̃ kɔli ko ya: “Lo ndozu ndo ko na gbɛlɛ azi zu.” Kɔli ko adɔ alo. 4Yezo ahũnda azi mɛ so ndoba lo ya: “Ye mɛ ndia tɛ e ahɛ̃ lege ya, e li na lá ti wɔngɔ tɛrɛ nɛ? Ndia tɛ e ahɛ̃ lege ya, e li nzɔ̃ ye, bere e li siɔ ye? E sara zo, bere e zia lo lo kpi?” Ko ta ala ye ndo gbinyangɔ tɛnɛ hɛ̃ lo ma. 5Yezo aba la zu na ngɔnzɔ gati gati, vundu agbɔ̃ nga lo sĩ nvɛni na lo ti siɔ bɛ tɛ la. La lo pa hɛ̃ kɔli ko ya: “Ye ti mɔ.” Kɔli ko ĩ ye ti lo ko, ti lo ati nzɔ̃ni. 6Afarizeo alo ka ya da sambela asi. Bo na ngoi ni ko, ala na ava Erodɛ agbe lingo, so bangɔ se mɛ ala lengbi ti gbɔ̃ngɔ Yezo, hongɔ lo.
Azi butu butu aga ka tɛ Yezo
7Ngoi mɛ Yezo na ava lo ĩ diri ka lɛ kpo ti Galilea ko, azi butu butu aɔ pɛko lo. Azi ni ko alo ka Galilea, ka Yudea, 8ka Yeruzalɛmɛ, nga ka sese ti Idumea la aga. Ambanga alo nga ka sese mɛ ka mbage ngu ti Yurdɛnɛ, nga ka sese mɛ ndũ na kɔdɔrɔ ti Tirɛ, na ti Sidona la aga. Azi ni ko aɔ pɛko Yezo, na lo mɛ ya, ala ma pa ti aye kwe zu mɛ lo ndoli. 9La Yezo apa hɛ̃ ava lo ya, ala gi ngɔ hɛ̃ ni, ni ko ya ni. Ta so ma ko, azi mɛ aga butu butu na fɔ̃fɔ̃ngɔ ni. 10Ta sanga ma, lo ndosara azi sĩ, ko awa ngã zu ndogbangbi nɔngɔ ka tɛ lo ya, ani bɔrɔ tɛrɛ lo, wa tɛrɛ ani ahã. 11Ngoi mɛ asiɔ tɔrɔ ĩ hũ lo ko, ala sa gbɛlɛ lo, ala so ndodɛrɛ kɔngɔ ya: “Mɔ Nyi Nzapa! Mɔ Nyi Nzapa!” 12La Yezo akɛ̃ hɛ̃ la kpengbani ya, ta ala pa hɛ̃ azi ya, ni Nyi Nzapa ma.
Yezo asara azi akpa la awa pangɔ kwa tɛ lo
(Mat. 10.1-4; Luk. 6.12-16)
13So pɛni, Yezo ama ka ndo hɔtɔ, aili azi mɛ lo ye la, ala nɔ ka tɛ lo. 14Lo sara azi sui kɔi ndoni sɛ na popo tɛ la, lo kpã la awa pangɔ kwa tɛ lo. Lo sara nga la ya, ni na la ani du ndoni kɔi, ni to la so pangɔ tɛnɛ tɛ Nzapa, 15ni hɛ̃ nga la nguru, ko ala toma na asiɔ tɔrɔ na ya tɛrɛ azi. 16Ili awa pangɔ kwa tɛ lo sui kɔi ndoni sɛ mɛ lo sara la lo mɛ: Simɔ (mɛ Yezo adi ili lo ya Petro), 17na Zaki ana nyita lo Yoanɛ mɛ ala aya Zebedeo (Yezo adi ili la ya, Boanɛrgɛsi, nda ili ni ko ya: “Azi mɛ nga ma bekpa”), 18na Andre, na Filipo, na Bartelemi, na Matie, na Toma, na Zaki mɛ nyi Alafe, na Tadeo, na Simɔ mɛ wa gingɔ lipandasi, 19nga na Yudasi Iskariɔtɛ mɛ ndo aka Yezo hɛ̃ awa kɛ̃ngɔ Yezo.
Asongo Yezo aga so mungɔ lo
(Mat. 12.22-32; Luk. 11.14-23; 12.10)
20So pɛni, Yezo na ava lo ati adiri, ali na ya da kɔi. Azi butu butu aga abombi tɛrɛ la fani mɛ ndɛ̃ na tɔ̃nda lo, ko ta se mɛ ya, lo na ava lo alua bɛ nyi ngoi yakere, atɛ ye da ma. 21Ngoi mɛ asongo lo ĩ ma so ko, ala ga ya, ani mu lo, ta sanga ma, ala ndonɛ ndo ya: “Nyingɔ ahã lo!”
Yezo akɛ̃ ya ta nguru tɛ ni alo ka tɛ Satana ma.
22Awa hangɔ ndia mɛ ndo alo ka Yeruzalɛmɛ aga so ndo ko apa ya: “Belzebulɛ mɛ Satana ali ya tɛrɛ Yezo!” Ambanga mɛ ndɛ̃ apa ya: “Biani, gbia tɛ asiɔ tɔrɔ la ahɛ̃ lo nguru ti tontangɔ na asiɔ tɔrɔ ni ko!” 23La Yezo aili azi ni ko, apa hɛ̃ la tɛnɛ na matɔ ya: “Kɔdɛ mɛ Satana alengbi ti tontangɔ tɛrɛ lo nvɛni nga sia? 24Sese tɛ gbia ko la azi ni ndotiri to na popo tɛ la ko, ta aninga ma ló gbia ni awɛ. 25Wa se asongo atiri to na popo tɛ la ko, ta aninga ma, nda songo ni akɔ. 26Wa se Satana atiri nga tɛrɛ lo nvɛni na to, se lo kangbi ya ngbo tɛ lo ko, ta lɛngɔ gbia tɛ lo anɔ yɔngɔrɔni ma.
27“Se ta zo agbe wa nguru na kpu uzu ma ko, ta zo ni alengbi ti lingɔ ka ya da tɛ wa nguru, nzĩngɔ aye tɛ lo ma. Wa se lo gbe wa nguru wɛ ko, lo lengbi ti nzĩngɔ ye kwɛ zu mɛ ka ya da tɛ lo. 28“Mbi pa hɛ̃ ĩ ti beta tɛnɛ ya, Nzapa na kangɔ lɛ lo na ndo siɔ ye zu mɛ azi ndoli, nga na ndo gu zu mɛ ala ndoguru na lo. 29Kanda ta lo na kangɔ lɛ lo ndo siɔ ye tɛ zo mɛ aguru Tɔrɔ Santo ma, ta sanga ma, lo li siɔ ye mɛ ndongbã kaka.” 30Yezo apa hɛ̃ la so, ta sanga ma, ala ndopa ndo ya: “Lo na siɔ tɔrɔ na ya tɛrɛ lo.”
Ta Yezo na ayata Yezo
(Mat. 12.46-50; Luk. 8.19-21)
31Ta Yezo na ayata Yezo aga angbã ka gegi, ato zo kɔi ya, lo ili Yezo hɛ̃ ani. 32Na ngoi ni ko, azi butu butu adunga so tɔ̃nda Yezo, la apa hɛ̃ lo ya: “Ta mɔ na ayata mɔ la ka gegi, ala ndogi mɔ.” 33Yezo agbinya hɛ̃ la ya: “Ta mbi na? Ko ayata mbi nga na?” 34Ko lo ba azi mɛ adunga so tɔ̃nda lo kɛrɛrɛ, lo pa ya: “Ĩ ba ta mbi na ayata mbi lo mɛ. 35Ta sanga ma, zo ko la ali ye mɛ be Nzapa aye ko, zo ni ko lo nyita mbi ti kɔli bere ti wali, bere lo nga ta mbi.”
Tällä hetkellä valittuna:
Marko 3: NGB87
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Ngbandi New Testament © United Bible Societies, 1987.