Ɛksadɔso 2
2
Mose aworɛ
1Biaa bie bɔ ofi Lewi abusua nu oogyale Lewi abusua nu braa. 2#Aso 7.20; Heb 11.23 Braa ne nwonzɛle, na ɔwole baa bienzua. Na onwuni kyɛ ye nwo yɛ nyemene nen, ɔfale ye feale toonn bosome nza. 3Afei de, né ɔfa ye fea a ɔnyɛ yee ko, yiti ɔfale elemmire kɛndɛen, ɔfale pɔweɛ nzue ne ehwaa fale ye nwo, ɔfale adɔma ne tole nu, na ɔɔfale ye siele ngyɛngyɛma nu wɔ asue Naele noa. 4Na adɔma n’aliɛma brasua oogyinane dedeede neane bɔ ɔkɔto adɔma ne ɔ. 5#Aso 7.21 Faro awa brasua wale kyɛ ɔbaabia asue ne anu. Né ye abaawa nemɔ natenate asue ne noa. Onwuni kyɛ kɛndɛen ne gyi ngyɛngyɛma ne anu, na ɔsomane ye abaawa ne ko kyɛ ɔɔfa bra. 6Obukyele so nen, onwuni adɔma bienzua bɔ osũ ɔ. Ɔyɛle ye anwumvo, na ɔhane kyɛ, “Hebrifoɛ mma ne bie ɛne.” 7Na adɔma n’aliɛma brasua ne bisale Faro awa brasua ne kyɛ, “Ngɔmvrɛ Hebri mmrasua nemɔ ko mmrɛ wɔ ma ɔma adɔma ne nyɔfone ma wɔ anaa?” 8Na Faro awa brasua ne buale ye kyɛ, “Yoo, kɔ.” Na abaayaa ne ɔɔfrɛle adɔma ne maame wale. 9Na Faro awa brasua ne sele ye kyɛ, “Fa adɔma ne kɔma ye nyɔfone ma me, na ngotua wɔ kerɛ.” Yiti braa ne fale ye hɔle ɔɔmane ye nyɔfone. 10Akwadaa ne nyini, na ɔɔfale ye mane Faro awa brasua ne. Ɔfale ye yɛle ɔwa, na ɔtole ye dumaa Mose,#2.10: MOSE: Hebri dwudwolɛ nu, ye bo kyire: “Ye fi”. ofikyɛ ɔhane kyɛ, “Nzue nu yeɛ nyele ye mvili ɔ.”
Mose nwati kɔ Midian
11 #
Aso 7.23; Heb 11.24 Mose nyini ne, ɛlɛho bie ɔɔpasale oliɛma mɔ Hebrifoɛ nwo, na onwuni adwuma serɛ bɔ né bɛ́hyɛ bɛ maa bɛyɔ ɔ. Na onwuni kyɛ Misraimniɛ bie ɔ́bo oliɛma Hebrifoɛ nemɔ anu ko ɔ. 12#Aso 7.24 Ɔtotole ye nye bra yiale, na onwuni kyɛ sona biala nne berɛ nen, ohuni Misraimniɛ ne, na ɔfale ye feale anweaa nu. 13Aleɛ hyene ne, ofitele, edwirɛ nwanwa, onwuni Hebrifoɛ nyɔ kyɛ bɛ́ko ɔ. Na obisale bɔ ye dwirɛ nyɛ fɛ ne kyɛ, “Nzu ati yeɛ ɛ́bo eliɛngo ɔ?” 14#Aso 7.27, 28 Na obuale kyɛ, “Nwa yeɛ ɔyɛle wɔ yɛ so panyi ne ndɛenbualɛniɛ ɔ? Ɛpena kyɛ eku me kyɛbɔ ehuni Misraimniɛ ne anaa?” Yiti edwirɛ ne mane Mose surole, na ɔhane ye ye ti anu kyɛ, “Eh, edwirɛ ne afite amba!”
15 #
Aso 7.29
Na Faro tele sɔ dwirɛ nen, ɔyɛle kyɛ okohu Mose. Nakoso Mose nwatili Faro, na ɔɔtenane Midian maen nu wɔ abura bie anwo. 16Né Midian sɔfo le mmaa mmrasua nzoo, na bɛwale berɛ kyɛ bɛbaato nzue begua nningyein bɔ bɛ baba nyɛmmoa no nu nzue ne anu. 17Mmoaenneafoɛ biemɔ wale bɛɛfoane bɛ, nakoso Mose dwɔsole, ohuru gyinane bɛ si, na ɔmane mmoaen nemɔ nzue. 18Na besa bɛwale bɛ baba Rewel#2.18: REWEL: Besa bɛfrɛ ye Yɛtro. berɛ nen, obisale bɛ kyɛ, “Nzu ati yeɛ ɛnɛ de ɛmɔawa ndɛ sɔa ye?” 19Bebuale kyɛ, “Misraimniɛ bie lele yɛ fili mmoaenneafoɛ nemɔ sa nu, ɔtole nzue mane yɛ po, na ɔmane yɛ mmoaen nemɔ nzue.” 20Na obisale ye mma mmrasua nemɔ kyɛ, “Ɔwɔ nisua? Nzu ati yeɛ ɛmɔayakyi biaa ne dɔ ɔ? Ɛmɔɔfrɛ ye ma oodidi.” 21Mose penene so ɔne biaa ne bɛtenane, na ɔfale ɔwa brasua Sipora mane Mose gyale. 22Sipora wole baa bienzua, na Mose tole ye dumaa Gɛsɔm,#2.22: GƐSƆM: Hebri dwudwolɛ nu, ye bo kyire: amanvraniɛ. ɔnate kyɛ Mose hane kyɛ, “Maayɛ ɛwɔfoɛ wɔ amanvrafoɛ aseɛ so.”
23Afoɛ pee pɛle nu, na Misraim hene wuli. Afei Yisraelfoɛ nwuni ngoaasolɛ nu amaneɛ piri paa; bɛbɔle awuye, na bɛ suɛ wɔ ngoaasolɛ nu ne dwuli Nyameɛ nyunu. 24#Aso 7.34 Nyameɛ tele b’awuyebɔlɛ ne, na ɔkayele apam bɔ ɔne Abraham, Yisake ne Yakob bɛyɛle ne. 25Nyameɛ neane Yisraelfoɛ nemɔ, na bɛyɛle ye anwumvo.
Tällä hetkellä valittuna:
Ɛksadɔso 2: EBP
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Esahie Bible © Bible Society of Ghana, 2018.