Luukasiup Aglangit 2
2
Jiisusiup Irnianguninga
Maatiusi 1:18-25
1Ulluni taikkunani Ruumamiut angajuqqaarjuangat Siisari Aagastasi angajuqqauvingminiittut inulimaat naasaqtauqulauqpait piqutingit piqasiutilugit. 2Tamanna naasaqtauniq sivulliqpaangulauqpuq Kuiriniasi aulatsijiutillugu Siriami. 3Inulimaat titiraqtaujaqtulauqput sivuliviningita nunavininginnut aillutik.
4Juusipittauq Naasariitimit pilluni Galiliamiittumit Pitliamuarivuq Juutiamiittumut, Taivitiup iglugasanginnut, Pitliamik atilingmut, tavvunngalauqpuq Taivitiup kinguvaaringmagu. 5Titiraqtaujaqtulauqpuq Miari piqatigillugu, taanna nuliaksariingnirmut angiqatigisimajani, nutaraksalik. 6Pitliamiiliqtillugik, Miariup irniviksanga nalliutivuq, 7tavvani nutaraqtaariurutiminik irniqtaaqpuq, annuraanik immusiqpaa, uumajuit nirivinganut ilillugu, siniktarvingmi iniksaqannginnamik.
Siipilirijit Aingilillu
8Pitliamlu qanigijaani paiqsijitaqalauqpuq siipiqutimingnik mianiqsijunik unnuakkut. 9Ataniup aingilingata saqqivvigivait, Ataniullu niqturnarningata qaummagvigivait, kappiasulirlutik. 10Aingiliup uqautivait, “Kappiasunngillusi; takugit, tusaruminaqtumik uqautijaqtuqpassi quvianaqturjuamik inulimaanut tikinniaqtumik; 11ullumi tavva piuliji Ataniq Christuusi irniangungmat Taivitiup iglugasanginni. 12Imaak qaujimajjutiqarniaqpusi; nutarakuluk takuniaqpasi annuraavinirnik immusiqsimajuq uumajuillu nirriviani ilisimajuq.”
13Tavvainnaq aingiligasagjuat qilangmit pijut aingilik taanna ilagiliqpaat, inngirlutik Guuti niqtuqpaat, uqarlutik,
14“Guuti niqtuqtauli quttingniqpaangujuq,
Saimanarniqarlunilu nunarjuarmi inungnut, Guutimut quviagijaujunut!”
15Aingilit qilaliarmata, siipilirijit immingnut uqaqput, “Pitliamualauqta tainna uqausiurataaqtuq takujaqturlugu, Ataniup qaujititsijjutigijanga uvattinnut.”
16Tuavirlutik ailiqput, nanisillutik Miarimik Juusipimiglu, nutarakulungmiglu uumajut nirivingani nalajumik. 17Takujariiramijjuk unikkaaliqput uqaujjaulaurnirmingnik nutarakuluk taanna pillugu; 18tusaqtulimaat kamaniaqput siipilirijit uqausinginnik. 19Miariulli tamakkualimaat isumamiutariliqpait, isumaksaqsiurutigillugillu. 20Siipilirijit tavva utirivut, Guuti niqtuqpaat quviasuutigillugu tusalauqtatik takulauqtatiglu pijjutigillugit, uqaujjaulaurnitik aingilimut nalautsitsiarmata.
Jiisusiup Atiqtaarninga
21Ulluit sitamaujuqtut anigurmata, kipijauviksanga nalliutingmat, attiqtauvuq Jiisusimik, aingiliut taimaak atiqaqulaurmagu nutaraksarijaulauqtinnagu suli.
Jiisusiup Tunirrutauninga Tuksiarvigjuarmi
22Juusipiup Miariullu ukpirnikkut salummaqtitauviksangat#2:22 Juutit pijjusiqalaurmata nutaraqtaaqtut salumainniraqtaullutik Muusisiup piqujangitigut salummaqtitaujariaqarlutik tuksiarvigjuami tunirrusirlutiglu nalliutingmat Muusisiup piqujangit maliglugit, Jiisusi tuksiarvigjuarmut pitippaat Jiruusalimmut, Atanirmut tunijaqturlugu. 23Imaak uqaqsimangmat Ataniup piqujanginni, “Nutarakuluit angutaukpata sivulliqpaamik nutaraqtaarijaujut tunijaujuksauvut Atanirmut.” 24Juusipikkuk tunisijariaqalauqpuuk Ataniup piqujangit maliglugit tingmiangnik marruungnik, tuuvingnigluunniit marruungnik aqiggiujaaqtuungnik, akiggiujaaqtuungniglu marruungnik qakuqtaunngittuungnik.
25Taissumani angutitaqalauqpuq Jiruusalimmi, Simiunimik atilingmik, inuusiqaqtumik Guutimut naammagijaujumik tunisimatsiaqtuulluni, taanna utaqqilauqpuq Isarialimiut piulijauviksangannik, Anirniup Ijjurnaittuup najuqpaa. 26Taanna nalujunniiqtitaulauqpuq Anirnikkut Ijjurnaittukkut tuquniannginnirminik Ataniup Christuusinganik takulaunnginnirmini. 27Anirnirmut Ijjurnaittumut tasiuqtaulluni tuksiarvigjuarmuaqpuq; nutarakuluk Jiisusi angajuqqaangingnit tuksiarvigjuamut pititautillugu, piqujat maliktaujariaqarningit maliglugit, 28Simiuniup nutarakuluk tiguvaa, Guuti niqturlugu uqaqpuq:
29“Ataniq maanna pijiit saimanirmi angirraqtiliruk,
Uqausirilauqtait maliglugu;
30Piulijiksautitait nangminiq ijinnut takugakku,
31Taanna upalungairutigisimagaviuk inulimaat qaujiqullugit,
32Qaumajuq qaummaksaiqullugu Juutiunngittunik,
Inuqutivillu Isarialimiut niqturnarutiksangat.”
33Ataatangata Anaanangatalu nutarakuluup taimaak uqaujjauninga kamagimmarikpaak; 34Simiuniup saimmaqtippait anaananganut Miarimut uqarluni, “Takugit, una nutarakuluk unuqtunut Isarialimiunut katagutaujumaaqpuq makijjutaujumaarlunilu, nalunaikkutaujumaaqpuq akiraqtutauluni. 35Ivvit Miari uummatiit killiktaujumaaqpuq savigjuatitut, inuit amisut isumangit saqqitittumaaqpait.”
36Tavvaniittuqalaurivuq nalauttaijumik arnarmi Aanamik atilingmik, Panuiliup paninganik, Aasuriup kinguvaanginnut ilagijaujumik; taanna ningiungulilauqpuq, sivuningagut uiqalauqtuq arraagunik 7-nik, 37uiggarniuliqtuq arraaguqalirluni 84-nik.#2:37 Uvvaluunniit uiggarniuliqtuq arraagunik 84-nik naliannituinnaq tukiqaqtuq taanna qautamaat tuksiarvigjuarmiiqattalauqpuq tuksiarluni nirittailivaglunilu. 38Ikarrami tavvanitsainnaq itiqpuq Guuti niqtulirlugu, nutarakuluk uqausirivaa utaqqijulimaanut Jiruusalimmiunut piulijauviksauninganik.
Juusipikkut Utirningat Naasariitimut
39Ataniup piqujangitigut aturiaqaqtamingnik pijariramik, angirramingnut utiqpuuk Naasariitimut Galiliamiittumut. 40Nutarakuluk piruqpallialiqpuq sanngijuulirluni, silatujuulirlunilu; Guutiup saimmaningata najuqpaa.
Jiisusiup Surusiulluni Tuksiarvigjuarmuarninga
41Arraagutamaat Jiisusiup angajuqqaangik Jiruusalimmuaqattalauqpuuk nalliunniqsiuriaqturlutik Qaangiqtauvingmik. 42Jiisusi 12-nik arraaguqaliqtillugu, angajuqqaangikta ilagillugu Jiruusalimmuaqput nalliunniqsiuriaqturlutik iliqqusirivaktamiktitut; 43nalliunniqsiurvik isulimmat, utililauqput, Jiisusili Jiruusalimmit nuulaunngilaq. Angajuqqaangik qaujilaunngilaak nuulaunngittumik, 44isumalaurmatik ilagijamingnut ilaunasugillugu ullulimaaq pisulauqput, kinguningagut qiniliqpaak ilamingni ilannarijamingnilu; 45naninnginnamijjuk, Jiruusalimmut utiqpuuk, qiniriarlugu. 46Ulluit pingajunganni nanivaak tuksiarvigjuarmi, Juutit ilisaijinginnit iksivaqataujuq, naalalaurlugit apiqsuqattaqpait. 47Tusaajulimaat taassuminga kamaniaqput qaujimaninganik kiggusinginniglu. 48Angajuqqaangikta takugamijjuk quaqsaarutigivaak; Anaanangata uqautivaa, “Irniik, sungmat taimailiuqpitiguk? Takugit, ataataillu qinilauqpattigit pingigammariglunuk.”
49Jiisusiup kiuvaa, “Sungmat uvannik qiniqpisik? Qaujimanngilasik Ataatama iglunganiiksariaqarninnik?” 50Angajuqqaangik tukisinngilaak kiggusirijanginnik.
51Jiisusiup angajuqqaangni angirrauqatigiliqpaak Naasariitimut, naalatsiarlugik; Anaanangatali tamakkua uqausilimaangit isumamiutariliqpait. 52Jiisusi piruqpallialauqpuq timimigut silatuliqpallialluni, quviagijaullunilu Guutimut inungnullu.
Tällä hetkellä valittuna:
Luukasiup Aglangit 2: EAIBR
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Eastern Arctic Inuktitut Bible (Romanized) © Canadian Bible Society, 2022-2023.