Luukasiup Aglangit 3
3
Juanasi Paaptitsirijiup Ajuriqtuininga
Maatiusi 3:1-12; Maakusi 1:1-8; Juanasi 1:19-28
1Arraagunik 15-nik Siisari Taipiriasi angajuqqaarjuanguliqtillugu, Puuntiusi Pailaatuusi aulatsijiutillugu Juutiami; Iruutasi angajuqqaarjuangutillugu Galiliami, Iruutasiup qatanngutaa Pilippuusi angajuqqaangutillugu Aituriami Turaakunaitisimilu, Laisaniasi angajuqqaangutillugu Apilinimi, 2Aanasi Kaiapaasilu tunirrusiqtitsijinut angajuqqaangutillugik, Juanasi Sakaraiaup irninga Guutiup uqarvigivaa inuqanngittumiitillugu. 3Juanasi kuungmi Juartanimi qanigijalimaanganilu pinasualilauqpuq, ajuriqtuilluni paaptitauniup nalunaikkutauninganik saagiarnirmut ajurnit isumagijunnaiqtauninginnut. 4Nalauttaijuq Aisaiasi uqaqsimangmat,
“Inuqanngittumi qaigalaaqtuqaqpuq:
‘Ataniup aqqutiksanga aaqqiksuqsiuk;
Aqqutiksanga tukiliaqsitillugu.
5Naqsait tamarmik nangaqtiqtaujumaaqput,
Pinguit qaqqaillu pukkiglititaujumaarlutik,
Aqqutit sanguingajut tukiliaqsititaujumaaqput,
Maniittut maniqqaksarlugit.
6Inulimaat takujumaaqput Guutiup piulijauviksautitanganik.’”
7Inugiaktut Juanasimuarmata paaptitaujumallutik, Juanasiup uqautivait, “Quglugiangujaaqtusi! Kia qimaaquvaasi Guutiup ninngausinganit tikittumaaqtumit? 8Atii saqqititsilirissi saagiarnisi nalunaiqtaujjutinganik, isumattailigissi imaak: ‘Guutiup inuqutigivaatigut Aiprahaam kinguvaaringmatigut.’ Imaak uqautivassi; Guuti makuninga ujarangnik Aiprahaammut kinguvaannguqtitsijunnaqpuq! 9Maanna ulimaut upalungaiqtausimaliriiqpuq napaaqtut manguksimaningitigut nakatiqtauqullugit; taimaimmat napaaqtulimaat paurngaqanngittut nakatauniaqput igitaulutik ikumamut.”
10Inuit Juanasi apirivaat, “Qanurli tavva pijariaqaqpita?”
11Juanasiup kiuvait, “Marruungnik uviniruqaqtuup, aippanga tunijaksarivaa piqanngittumut; niqiqaqtuq, nirijaksaqanngittumik pititsijuksauvuq.”
12Ruumamiut kiinaujaiqtitsijiqutingit#3:12 Juutit Ruumamiunit iqqanaijaqtitaujut kiinaujaiqtitsijiullutik Juutiuqatinginnit qiimigijaujut piunngittulijumik taijaullutik, tuksiarvigjuamut itirunnaqtitaunngittut Ruumamiunut iqqanaijarmata qailaurivut paaptitaujaqturlutik, Juanasimut uqarlutik, “Ajuriqtuiji, qanuq pijuksauvita?”
13Juanasiup uqautivait, “Kiinaujaiqtitsiqujaunissi ungataanut piqattariaqanngilasi.”
14Amma unataqtuksait Juanasi apirigivaat, “Uvagulli qanuq pijuksauvita?”
Juanasiup uqautivait, “Suungusangnirmut tigliqattanngillusi kiinaujanik sagluqitsinirmulluunniit, kiinaujjaliasi naammagisiuk.”
15Inuit niriungniqaqpallialiqput, isumaqalirlutiglu Juanasi Christuusiunasugillugu. 16Juanasiup tamarmik uqautivait, “Imirmut paaptippassi; uvannilli pijunnarniqsaq tikinniaqpuq, naluqqutivunga taassuma itigagutinginnik singiijjaaqsijariaksaq; taassuma paaptittumaaqpaasi Anirnirmut Ijjurnaittumut ikumamullu. 17Taassuma iviijaijjutini tigumiaqpaa, niaquujaksalirivvingmini niaquujaksat iviijarniaqpait, niaquujaksat puuqqarlugit niaquujaksakkuvingminut, iviuningit ikinniaqpait ikumamut qamisuittumut.”
18Ajjigiinngittutigut Juanasi ajuriqtuilauqpuq inungnut uqausirnik tusaruminaqtunik. 19Juanasiup Iruutasi angajuqqaaq iniqtilauqpaa Iruutiasimik nuliaqalilaurmat nukangata nulianganik, asinginniglu piunngittulijjutigijalimaanginnik. 20Iruutasi piunngittulinirijami piunngiqqijanginnik piunngittulilauqpuq Juanasimik tigujautitsilaurmat.
Jiisusiup Paaptitauninga
Maatiusi 3:13-17; Maakusi 1:9-11
21Inulimaat paaptitausimaliqtillugit, Jiisusi paaptitaulaurivuq. Tuksiaqtillugu, qilak angmaqpuq, 22Anirniup Ijjurnaittuup aqqarvigivaa takuksaulluni tingmiatitut tuuvititut, nipimik qilangmit nilliqtuqaqpuq, “Irnirivagit nagligijara; quviagitsiaqtara.”
Jiisusiup Sivuliviningit
Maatiusi 1:1-17
23Jiisusi pinasuariasitillugu 30 qanigijaani arraaguqalilauqpuq, taanna Juusipiup irnirivaa, inuit isumagijangitigut, Juusipi Hiliup irnirivaa, 24Hili Maatatiup irnirivaa, Maatati Livaip irnirivaa, Livai Milkaip irnirivaa, Milkai Jaanaip irnirivaa, Jaanai Juusipiup irnirivaa, 25Juusipi Matataiasiup irnirivaa, Matataiasi Aimuusiup irnirivaa, Aimuusi Naihumiup irnirivaa, Naihumi Isliup irnirivaa, Isli Naaggaip irnirivaa, 26Naaggai Maatiup irnirivaa, Maati Matataiasiup irnirivaa, Matataiasi Siiminiup irnirivaa, Siimini Juusikiup irnirivaa, Juusiki Juutaup irnirivaa, 27Juuta Juananaup irnirivaa, Juanana Riisaup irnirivaa, Riisa Jirupapiul irnirivaa, Jirupapi Sialtiup irnirivaa, Sialtiul Niraiup irnirivaa, 28Nirai Milkaip irnirivaa, Milkai Aatiup irnirivaa, Aati Kuusamiup irnirivaa, Kuusami Ilmatamiup irnirivaa, Ilmatami Iriup irnirivaa, 29iri Jaasuap irnirivaa, Jaasua Ilaisariup irnirivaa, Ilaisari Jurimiup irnirivaa, Jurim Maatatiup irnirivaa, Maatati Livaip irnirivaa, 30Livai Simiuniup irnirivaa, Simiuni Juutaup irnirivaa, Juuta Juusipiup irnirivaa, Juusipi Juunamiup irnirivaa, Juunami Iliakimiup irnirivaa, 31Iliakim Miliap irnirivaa, Milia Minnaup irnirivaa, Minna Mataataup irnirivaa, Mataata Naitaniup irnirivaa, Naitani Taivitiup irnirivaa, Taiviti Jisiup irnirivaa, 32Jisi Upitiup irnirivaa, Upiti Puasiup irnirivaa, Puasi Saalmaniup irnirivaa, Saalman Naisanaup irnirivaa, 33Naisana Aminataup irnirivaa, Aminatap Atminiup irnirivaa, Atmini Aarniup irnirivaa, Aarni Hisraniup irnirivaa, Hisran Pirisiup irnirivaa, Pirisi Juutaup irnirivaa, 34Juuta Jaikuup irnirivaa, Jaiku Aisakiup irnirivaa, Aisaki Aiprahaap irnirivaa, Aiprahaam Tiiraup irnirivaa, Tiira Nahuriup irnirivaa, 35Nahuri Sirugiup irnirivaa, Sirugi Riup irnirivaa, Riu Piligiup irnirivaa, Piligi Ipriup irnirivaa, Ipri Siilaup irnirivaa, 36Saila Kainaniup irnirivaa, Kainani Arpaaksatiup irnirivaa, Arpaaksati Siimiup irnirivaa, Siimi Nuap irnirivaa, Nua Laimikiup irnirivaa, 37Laimiki Mituusalaup irnirivaa, Mituusala Inuukiup irnirivaa, Inuuki Jaritiup irnirivaa, Jariti Mahalaliup irnirivaa, Mahalaliu Kainaniup irnirivaa, 38Kainani Inuusiup irnirivaa, Inuusi Siitiup irnirivaa, Siiti Aatamiup irnirivaa, Aatami Guutiup irninga.
Tällä hetkellä valittuna:
Luukasiup Aglangit 3: EAIBR
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Eastern Arctic Inuktitut Bible (Romanized) © Canadian Bible Society, 2022-2023.