यूहन्ना 20
20
ईसू हर जी उठीस
(मत्ती 28:1-8; मरकुस 16:1-8; लूका 24:1-12)
1एतवार दिन कर भिनसरहे, जब अंधार रहले रहीस, त मगदल गांव कर मरियम हर मरघेटिया में आईस, अऊ देखीस कि पखना हर मठ कर दुरा ले कगरावल हवे। 2तेकर ओहर कुदत, समोन पतरस अऊ दूसर चेला, जेकर ठन ईसू मया करत रहीस, ओमन जग गईस, त कहीस, “ओमन परभू ला मठ ले निकाएल के ले गईन हवें, अऊ मंए नई जानों कि ओमन ओके कहां राखीन हवें।” 3तेकर पतरस अऊ ओ दूसर चेला, निकेल के मरघेटिया कती गईन। 4ओमन दुनो झन संगे-संगे कुदत रहीन, बकिन ओ दूसर चेला हर ढेरेच जोर से कुईद के, पतरस ले आगू बएड़ गईस, अऊ मरघेटिया में आगू पहुंचीस। 5अऊ निहूर के मठ कर भितरी झांकीस, त कफन ला अलगे परल देखीस, बकिन ओहर तो मठ कर भीतरी नई गईस। 6तेकर समोन पतरस ओकर पाछू-पाछू पहुंचीस, त मठ कर भीतरी गईस अऊ कफन ला अलगे परल देखीस। 7अऊ ओ सांफी जेहर ओकर मूड़ी में बांधल रहीस। ओहर कफन कर संगे नई रहीस, बकिन अलगेच एक जघा में संथीयाए के राखल देखीन। 8तेकर दूसर चेलोच हर, जेहर मठ में आगू पहुंचे रहीस, भीतरी गईस, अऊ ओला देख के बिस्वास करीस। 9ओमन तो अझेर ले पबितर किताब कर ओ गोएठ ला, नई समझे रहीन कि ईसू हर मरल में ले जरूर जी उठही। 10तेकर ए चेला मन अपन-अपन घरे फिर गईन।
ईसू हर मरियम मगदलीनी ला देखार देथे
(मत्ती 28:9-10; मरकुस 16:9-11)
11बकिन मरियम हर, रोवत मठ कर बाहरी ठड़होए रहीस। अऊ रोवत-रोवत ओ मठ कर भीतरी ला नीहूर के देखीस। 12त उहां ओहर उजर ओढ़ना पहिरल, दुई झे सरगदूत मन ला बईठल देखीस। जिहां ईसू कर लास हर राखल रहीस, ओजग एक झन सरगदूत ला मूड़ कती, अऊ दुसर झेला गोड़ कती बईठल देखीस।
13सरगदूत मन मरियम जग पूछीन, “ए बहिन, तंए काबर रोवत हस?” तेकर मरियम हर ओमन ला कहीस, “ओमन मोर परभू ला उठाए के ले गईन हवें, अऊ मंए नई जानों कि ओमन ओके कहां जग राखीन हवें।” 14ए कहिके ओहर पिछुवाईस, त ओजग ईसू ला ठड़होवल देखीस, बकिन नई चिन्हीस कि ओहर ईसू लागे।
15ईसू हर ओके कहीस, “ए बहिन, तंए काबर रोवत हस? तंए काके खोजत हस?” ओहर ईसू ला बगीचा कर माली समझ के कहीस, “ए महराएज, अगर तंए ओके उठाए के ले गए होबे, त मोके बता कि तंए ओके कहां जग राखे हस। मंए ओके ला ले जाहूं।”
16तेकर ईसू हर ओके ला चिकरीस, “मरियम” त मरियम हर ईसू कती पिछुवाए के, इबरानी भासा में कहीस, “ए रबूनी” जेकर मतलब होथे, ए मोर गुरूजी। 17ईसू हर ओके कहीस, “मोके झईन छू काबरकि मंए अझेर ले दाऊ जग सरग में नई गए हों, बकिन मोर भाई मन जग जाए के ओमन के बताए दे कि मंए मोर दाऊ, अऊ तुमन कर दाऊ अऊ मोर परमेस्वर, अऊ तुमन कर परमेस्वर जग ऊपरे जाथों।” 18तेकर मरियम मगदलहीन हर चेला मन जग जाए के कहीस, “मंए परभू ला देखे हवों।” अऊ जेला बताए बर ईसू हर ओके कहे रहीस, मरियम हर ओमन के बताईस।
ईसू हर अपन चेला मन ला देखार देथे
(मत्ती 28:16-20; मरकुस 16:14-18; लूका 24:36-49)
19ओही एतवार कर दिन सांझ जुआर, ईसू कर चेला मन यहूदी नेता मन कर डर कर मारे, दुरा ला भीतर ले हुरेक के एक जघा बईठे रहीन। ते घनी ईसू हर आईस अऊ ओमन कर मझारे ठड़होए के, ओमन ला कहीस “तुमन ला सांती मिले।” 20अऊ ए कहिके ईसू हर अपन हाथ, अऊ अपन पांजर ला ओमन के देखाईस। तेकर चेला मन परभू ला देख के ढेरेच खुस होईन। 21त ईसू हर फेर ओमन ला कहीस, “तुमन के सांती मिले, जेकस दाऊ हर मोके भेजीस हवे, ओही कस मंए तुमन के भेजत हों।” 22ए कहिके ईसू ओमन कर ऊपरे फूंकीस, अऊ ओमन ला कहीस, “पबितर आत्मा लेआ। 23अगर तुमन ककरो पाप ला छमा करीहा, त ओमन के छमा मिल जाही, अऊ जेमन कर पाप ला छमा नई करीहा, त ओमन के छमा नई मिलही।”
थोमा ला ईसू देखार देथे
24जे घनी ईसू चेला मन जग आए रहीस, ओ घनी बारहों चेला मन ले एक झन थोमा, जेहर दिदुमुस कहाथे, ओमन कर संगे नई रहीस। 25तेकर दूसर चेला मन ओके कहे लागीन, “हमरे परभू ला देखे हन” ते घनी थोमा हर चेला मन ला कहीस “जब तक मंए परभू कर हाथ में, कांटी कर बेधा ला नई देखहूं अऊ ओ कांटी कर बेधा में अपन अंगठी ला नई घुसाएर लेहूं, अऊ ओकर पांजर में मंए अपन हाथ ला नई घुसाएर लेहूं, तब तक मंए बिस्वास नई करों।” 26आठ दिन कर पाछू, ईसू कर चेला मन फेर घरे रहीन, अऊ थोमा ओमन कर संगे रहीस, अऊ घर कर दुरा हर हुरकल रहीस, ते घनी फेर ईसू आईस, अऊ ओमन कर मझारे ठड़होए के कहीस, “तुमन के सांती मिले।” 27तेकर ईसू हर थोमा ला कहीस, “मोर हाथ मन ला देख अऊ अपन अंगठी ला घुसार, अऊ अपन हाथ ला मोर पांजरो में घुसार। तंए संका झईन कर बकिन बिस्वास कर।” 28एला सुईन के थोमा कहीस, “ए मोर परभू, ए मोर परमेस्वर।” 29ईसू हर कहीस, “तंए मोके देखे हस, तेकर ले बिस्वास करथस। बकिन धन्य हवें ओमन, जेमन बिगर देखे बिस्वास करथें।”
30ईसू हर अऊ ढेरेच चिन्ह चमत्कार, अपन चेला मन कर आगू में देखाईस, जेहर ए किताब में लिखल नईए। 31बकिन एहर एकर बर लिखल गईस हवे कि तुमन बिस्वास करा कि ईसू हर, परमेस्वर कर बेटा मसीह लागे, अऊ बिस्वास कएर के ओकर नांव ले जीवन पावा।
Tällä hetkellä valittuna:
यूहन्ना 20: SGJ
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© (Active) Wycliffe Bible Translators, Inc. All rights reserved.
