यूहन्ना 21
21
दह कर धरी में चेला मन ला ईसू देखार देथे
1एकर पाछू ईसू हर अपन चेला मन ला, तिबिरियास दह कर धरी में देखार देहीस, अऊ ओहर ए नियर देखार देहीस। 2समोन पतरस अऊ थोमा जेहर दिदुमुस कहावत रहीस अऊ नतनएल, जेहर गलील जिला कर काना गांव कर रहीस, अऊ जबदी कर बेटा मन, अऊ ईसू कर दुई झन आने चेला मन ओजग जूटे रहीन। 3समोन पतरस हर ओमन ला कहीस, “मंए मछरी मारे बर जाथों” त ओमन कहीन, “हमूच मन तोर संगे जाबो” अऊ ओमन जाए के डोंगा में चघीन, बकिन ओ राती ओमन एकोच ठे मछरी नई पाईन।
4भिनसरहा जुआर ईसू, ओ बड़खा दह कर धरी में आए के ठड़होए गईस, बकिन चेला मन तो ओके नई चिन्हींन कि ओहर ईसू लागे। 5तेकर ईसू हर ओमन ला कहीस, “ए मोर दुलरुवा लईका मन, का तुमन मछरी नई पाया?” त ओमन ईसू ला जबाब देहीन, “एकोच ठे नई पाएन।”
6तेकर ईसू हर ओमन ला कहीस, “डोंगा कर जवनी कती जाल ला फेंका, त मिलही।” जे घनी ओमन जाल ला फेंकीन, त ढेरेच बगरा मछरी बाएझ गईस, अऊ ओमन जाल ला खींचे नई सकीन। 7तब ओ चेला जेकर ठन ईसू मया करत रहीस, ओहर पतरस ला कहीस, “भई, एहर तो परभू लागे!” जब समोन पतरस सुनीस कि एहर परभू लागे, त ओहर अपन कनिहां में एगोट सांफी बाएंध लेहीस, काबरकि ओहर कांही नई पहिरे रहीस, अऊ पानी में तरेक देहीस। 8बकिन दूसर चेला मन, मछरी ले भरल जाल ला खींचत डोंगा में आईन, काबरकि डोंगा हर धरी ले ढेर दुरीहां में नई रहीस, करीबन दुई सौ हाथ कर दुरीहां में रहीस।
9जब ओमन धरी में उतरीन, त ओमन देखीन कि ओजग कोईला कर आगी बरत हवे, अऊ ओमे मछरी राखल हवे अऊ ओजग तनिक रोटीयोच मड़हाल हवे। 10ईसू हर ओमन ला कहीस, “जे मछरी मन ला तुमन अझेर बझाए हवा, ओमे ले चटिक ला लाना।”
11तेकर समोन पतरस हर, डोंगा में चएघ के मछरी ले भरल जाल ला खींच के, धरी में लानीस, अऊ ओमे एक सौ तिरपन बड़खा मछरी रहीस। एतना बगरा मछरी रहीस, तबो ले जाल हर नई चिराईस। 12ईसू हर अपन चेला मन ला कहीस, “आवा अऊ खाए लेआ।” अऊ कोनो चेला मन ला ओकर ठन ए पूछे कर हिमेत नई होईस, “तंए कोन लागस?” काबरकि ओमन जानत रहीन कि एहर परभू लागे। 13ईसू हर आईस अऊ रोटी ला लेके ओमन के देहीस, अऊ ओहीच कस मछरीओच ला देहीस। 14एहर तीसर दाएर रहीस, जब ईसू हर मरल में ले जी उठे कर पाछू, अपन चेला मन ला देखार देहीस।
ईसू पतरस ला आखरी उपदेस देथे
15जब ओमन खाए दारिन, त ईसू हर समोन पतरस ला कहीस, “ए समोन, यूहन्ना कर बेटा, का तंए एमन ले बएढ़ के, मोर जग मया करथस?” त ओहर कहीस, “हां परभू, तंए तो जानथस कि मंए तोर जग मया करथों।” ईसू हर ओके कहीस, “मोर भेंड़ी छउआ मन ला चरा।” 16ईसू हर ओके फेर कहीस, “ए समोन, यूहन्ना कर बेटा, का तंए मोर जग मया करथस?” ओहर जबाब देहिस, “हां परभू, तंए तो जानथस कि मंए तोर जग मया करथों।” तेकर ईसू हर कहीस, “मोर भेंड़ी मन कर पहरा कर।” 17फेर ईसू हर तीसर दाएर पतरस ला कहीस, “ए समोन, यूहन्ना कर बेटा, का तंए मोर जग मया करथस?” पतरस हर उदास होए गईस, काबरकि ईसू हर तीसर दाएर ओकर जग पूछीस, “का तंए मोर जग मया करथस?” पतरस हर कहीस, “ए परभू, तंए तो सब जाएत ला जानथस, तंए जानथस कि मंए तोर जग मया करथों।” ईसू हर पतरस ला कहीस, “मोर भेंड़ मन ला चरा।”
18ईसू हर फेर कहीस “मंए तोके फूरोंच में कहथों, जब तंए जवान रहे, त खुद कनिहां ला बाएंध के जिहां चाहत रहे, उहां चएल देहत रहे, बकिन जब तंए बूढ़ाए जाबे, त अपन हाथ ला लमाबे, अऊ कोनो दूसर झेमन तोके ओढ़ना पहिराहीं अऊ जिहां तंए जाए बर नई चाहबे, उहां तोके ले जाहीं।” 19ए गोएठ ला कहीके ईसू हर इसारा कएर देहीस, कि पतरस हर कोन मधे कर मिरतु ले मरही, अऊ परमेस्वर कर महिमा करही। तेकर ईसू हर पतरस ला कहीस, “मोर पाछू होए ले।”
20पतरस हर पाछू कती मुईड़ के, ओ चेला ला ओमन कर पाछू आवत देखीस, जेकर ठन ईसू मया करत रहीस, अऊ एहर ओही चेला रहीस, जेहर खाए कर जुआर ईसू कर छाती कती नीहूर के, ईसू जग ए पूछे रहीस कि ए परभू, “ओहर कोन लागे जेहर तोके धरवाही?” 21जब पतरस हर ओके देखीस, त ईसू जग पूछीस, “ए परभू, एकर का होही?”
22ईसू हर पतरस ला जबाब देहिस, “अगर मंए चाहूं कि ओहर मोर फिर के आवत तक जीयत रही, एकरले तोके का? तंए मोर पाछू होए ले।”
23तेकर ले भाई-बहिन मन कर मंझार में, ए गोएठ हर बगेर गईस कि ओ चेला हर नई मरही, बकिन ईसू हर एकस नई कहे रहीस कि ओहर नई मरही, बलकि ओ सिरीप एकस कहे रहीस, “अगर मंए चाहूं, त ओहर मोर फिर के आवत ले जीयत रही, एकरले तोके का?”
24एहर ओही चेला लागे, जेहर ए गोएठ मन कर गवाही देथे अऊ ए गोएठ मन ला लिखीस हवे। हमरे जानथी कि ओकर गवाही हर सचा हवे। 25ईसू हर अऊ ढेरेच मधे कर काम करीस, अगर ओहर एक-एक कएर के लिखल जातीस, त मंए सोंचथों कि जे किताब मन लिखल जातीन, ओमन ला राखे बर जमो संसार में जघा नई पुरतीस।
Tällä hetkellä valittuna:
यूहन्ना 21: SGJ
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© (Active) Wycliffe Bible Translators, Inc. All rights reserved.
