Juan 1
1
Diidza bzooje Juan
1Kati zia'a sulau yugute' chik'z de Diidza'a; len bënni'a nake Diidza'a gzue' len Dios len Le' nake Dios. 2Le' gzue' len Dios kati zia'a sulau yugute'. 3Lu ne'e Le', Dios beene yugute'; gat'ga de le ku beene Le'. 4Len le' gzua yëla naban, len yëla naban'a guk yëla yeni ki yugute' bunach. 5Yëla yeni ni rze'ni ga nak'tzka chul len yëla chul ni ti rzaki'i kzuul ley. 6Gzue' tue' bënni gxhi' le' Juan, bënni Dios psë'le'e 7ki dujxaka'lau'e ki yëla yeni naar yugute'ke layajle'ke lea rne'a. 8Juan ti nake yëla yeni'a, nak'ze tue' bënni zdujxaka'lau'e ki yëla yeni'a. 9Ley'kz yëla yeni le rze'ni yugute' bunach za' yëdz'lyu ni.
10Bënni'a nake Diidza'a gzue' lu yëdz'lyu; len zala Dios beene yëdz'lyu lu ne'e Le', bënni'a nak'ke ki yëdz'lyu ti gulumbe'e Le'. 11Lu yëdz'lyu kie' biide, san bënni'a nakik'de kie' ti gulazi'ke Le'. 12San bënni'a gulazi'ke Le' len gulayajle'ke Le', bnëëdzje kieke yëla rnabe' lake xi'ine Dios. 13Len nak'ke xi'ine Dios, keg ka naleebi'ru rak, keg ka tazelaadxi'i'ke bunach, nak'ke xi'ine Dios koma Le' bzaalje leke.
14Bënni'a nake Diidza'a beene kuine bënni bunach len gzue' len ro'u. Len ble'i'ru yëla Xhën kie', yëla Xhën le bnëëdzje kie' Xuuz'ru Dios, le' nake Xi'ine lazdui, nadze'iz'de yëla nadxi'i len yëla li. 15Juan dujxaka'lau'e kie' Jesús, gne': «Bënni ni nake bënni'a be'a kie' diidza kati gnia' ki ze'e kuudza'a bënni nak're blou ka neda, koma chik'z zue' zia'at ka neda.»
16Ki yëla tzawi kie' Dios ruzalaadxi'tekze kieeru yëla rak'len kie'; 17koma xhba kie' Dios lu ne'e Moisés benne, san yëla rak'len kie' len yëla li lu ne'e Jesús benne. 18Nutunu bënni nale'i'de Dios; Le' Xi'ine lazdui, Le' nake Dios len nake tuuz len Xuuze, Le' beene ga umbe'ru'ne Dios.
Juan bënni Rkiile nis Bunach dujxaka'lau'e kie' Cristo
(Mt 3:11-12; Mr 1:7-8; Lc 3:15-17)
19Kati bënni tunabe'ke bënni Judea gulusë'le'e ki Jerusalén pxuuz len bënni tuune dxin lu gdou' tzajnaab'kde Juan nuxh nake le', le ni nak le le' dujxaka'lau'e kie'. 20Len le' gdixhjë'e dxia'a'tit:
—Ti naka neda Le' Cristo.
21Gulunaab'de le' yubl ka:
—¿Nuxh naku, xhki? ¿Naku Elias bënni be'e diidza ulaaz kie' Dios?
Juan gne':
—Ti naka Elias.
Leke gulunaabe yubl ka':
—¿Naku bënni rue'e diidza ulaaz kie' Dios bënni'a rala giide?
Bubi'e diidza:
—Keg needa'a.
22Gle'ke le':
—¿Nuxh naku, xhki? De ki yubi'i'tu kieke diidza bënni'a gulusë'le'e netu. ¿Bixh gunn gnou' larakz kiu'?
23Juan bubi'e diidza:
—Neda naka chi'i tu le ruskua' zidzj lu yu biidx: “Gulusaalj tu nëëz li kie' Xan'ru”, ka'teez gne' Isaías bënni be'e diidza ulaaz kie' Dios.
24Bënni'a gulusë'le'e bënni fariseo tzaje'leen'ke diidza Juan, 25gulunaab'de le':
—Xhki ti naku Le' Cristo, ti naku Elias, len ti naku bënni rue'e diidza ulaaz kie' Dios, ¿Bixhkia' rkiilu nis bunach?
26Juan bubi'e diidza:
—Neda rkiila bunach len nis; san ladj'li zue' tue' bënni ti numbe'li'ne 27len ze'e kuudza'a. Len ti nak'kza bach kseedxa xhtui lëële'.
28Yugute' le ni glak latj nazi' lei' Betania, tzala'a yeego Jordán, ga Juan rkiile nis bunach.
Jesús, nake Bëku'xhiila kie' Dios#1:29
29Bueikj dza'a Juan ble'i'de Jesús gbiige'e ga'la ga ze' le', len gne': «¡Guluyu'tzka, bënni'a nake Bëku'xhiila kie' Dios, bënni rgue' dula ki yëdz'lyu! 30Bënni ni nake bënni'a be'a kie' diidza kati gnia': “ki ze'e kuudza'a bënni nak're blou ka neda, koma chik'z zue' zia'at ka neda.” 31Lez neda ti numbe'a'ne; san za'a rkiila nis bunach naar Israel umbe' le'.»
32Juan lekz'ka' gne': «ble'i'da'ne Bë' la'ay kie' Dios bëtje ki xhba ka tuuba palom len dusue' len le'. 33Ti numbe'a'ne nuxh bënni'a; san bënni'a psë'le'e neda jkiila nis bunach, gudxe neda: “Bënni'a gle'i'du'ne tzajsuáleene le' Bë' la'ay kie' Dios, le' jkiile bunach len Bë' la'ay kie' Dios.” 34Neda chi ble'i'da'ne len rdujxaka'lau'a ki le' nake Le' Xi'ine Dios.»
Bënni glake zia'al bënni useed kie' Jesús
35Bueikj dza'a, Juan zue' ni' yubl ka dzaage chope' bënni useed kie'. 36Kati ble'i'de gdëëde Jesús, Juan gne':
—¡Guluyu'tzka, bënni'a nake Bëku'xhiila kie' Dios!
37Grop'te'ke bënni useed kie' Juan gulayëën'de le ni, len yajak'leene Jesús. 38Jesús bueikje len kati ble'i'de zjak'leene le' bnaab'de leke:
—¿Bixh rugiilj'li?
Leke gulanake:
—Bënni Useed, ¿Gaxh zu'?
39Jesús bubi'e kieke diidza:
—Gulduyu'tzka.
Yajake na' guluyue' gaxh zue' ati gulakua'leene le' ye tzka ni nak te'dza, koma chik'z za ral dza.
40Tue' kieke bënni'a gulayëën'de le gne' Juan len yajak'leene Jesús guke Andrés bënni bë'che'e Simón Pedro. 41Bënni budzaage zia'al Andrés guke bënni bë'che'e le' Simón len gudxe le':
—Chi budzëëli'tu'ne Le' Mesías, Le' Cristo.
42Chi nak ka Andrés pche'e Simón ga zue' Jesús; len kati Jesús ble'i'de le', gudxe le':
—Li naku Simón bënni xi'ine Juan, san na'a si' lou' Cefas, (le re'e'ni gna': Pedro).
Jesús rliidze Felipe len Natanael
43Bueikj dza'a, Jesús pchuug'laadxe'e tziije yu ki Galilea. Budzaage Felipe len gudxe le':
—Dia' len neda.
44Felipe nake bënni yëdz Betsaida, lekz'ka' Andrés len Pedro nak'ke bënni yëdz'a. 45Felipe yajdiilje Natanael len gudxe le':
—Chi budzëëli'tu'ne bënni'a, Moisés bzooje kie' lu gich ki xhba kie' Dios len lekz'ka' bënni glui'ke diidza ulaaz kie' Dios guluzooje kie'. Nake Jesús bënni xi'ine José, bënni yëdz Nazaret.
46Natanael gne':
—¿Naru gunn groj le dxia'a ki yëdz Nazaret?
Felipe bubi'e kie' diidza:
—Da len byu'tzka.
47Kati Jesús ble'i'de ze'e ga'la Natanael, gne':
—Ni ze'e tue' bënni nake gdulei'ti bënni Israel, ti rzi'ye'e.
48Natanael bnaab'de le':
—¿Nakxh ruunu li' numbe'u neda?
Jesús bubi'e kie' diidza:
—Ble'i'da li' rë'u xhani yaag higuera, kati ti rliidze li' Felipe.
49Natanael gudxe le':
—Bënni Useed, ¡li' naku Le' Xi'ine Dios, li' naku Bënni Rnabe' ki Israel!
50Jesús bubi'e kie' diidza:
—¿Naru le re'za li' ki ble'i'da rë'u xhani yaag higuera rajle'u? Le xhën'r ka le ni zia'a gle'i'du.
51Lekz'ka' gne' Jesús:
—Le nak'te rnia', lbi'ili ule'i'li tzaalj xhba, len Gbaaz La'ay kie' Dios tëtje len tubeene ga zue' Le' Xi'ine Bënni.
Tällä hetkellä valittuna:
Juan 1: PZD
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© Sociedad Biblica de México AC
