Aposolo 4
4
Pida Dioni laapo kalesoro alinu rapu angele yokanali pisimiya ei
1Pida Dioni laapome mo wenaali para angele lala-ainya mo alinau puaisimiya ei andere-aisimiya alinu pange Gode para alinau puaisimiya andaa anda andambae alinuna kalu ali pange Sadiusi alinu pange mo ali repo para ipisimiya. 2-3Pida, Dioni laapome Yesu komoma wala endoaya ei ora muma wala reke ei waloaisipiya eimi ande komamende wenaalinu wala rekeleme lo walisipiyanda mo alinumi rono pangala ara niipu laapo ripinyuma rimba ambala lisayandare yapi kepea nane angele yokanali pulameya, dipula anda para ma-piraisimiya. 4Gupisimiyapare mo angele pangisimiya wenaali andapumi angele pangoma Yesu para kone rulaisimiya. Gupuma mo kone rulaisimiya alinu raayore daoseni supu rupa aisimiya.
5Yapi kepelisayandare Isaraelimi mandu rangala pae wenaalinuna kalu alinu pange rondopao piri alinu pange Mosesimi Rudule Angele waloaisimiya alinu pange Diurusaleme ree anda para mandaoma mombelisimiya. 6Alinau puaisimiya ei andere-aisimiya alinuna ririna kalu ali Anasi pange nipuna anda repaa menda para pange Kaiapasi pange Dioni pange Alekasanda pange mendaa para mombelisimiya. 7Mo alinumi mo Yesuna angele ma-puao-aepe ali laapo para lalore, Akipuma go ei papepae. Ale kongapuaya eina o apina bina go ei papepae, lisimiya.
8-9Gupuma Pida Epe Yaakopi Sipiridimi rumbili alimi lalore, Wenaalina kalu alinu pange rondopao piri alinuo, ambiare go pora pope-nae ali para epe einu papa eina pange mo ali ma-rekapa eina go au papa eina angaa mealemepae, lisaya. 10Pidame lalore, Nimi raayo pange Isaraelimi mandu rangala pae wenaali pange go ei pangalepape. Mo Nasarere ali Yesu Keriso nimimi ekeraisa wape pi repanana liiamepare Godeme wala ma-rekaripa ali, nipuna puri waru pale bina go ali epe rupa endoma kongapu go ao-ayanda, lisaya. 11Go Yesu para Godena angele wia bukame lalore,
Go kanare nimi anda pimi alinumi gipia
lameparere gore kuma wi kana wia, lea, lisaya.
12Go eina naa rambamuma ma-endape ali menda na-aya. So yaa oro para wenaali rambamuma ma-endaya alina bi menda diaeyanda lawa, lisaya. Go Yesuna bimi komea Godeme naa wenaali raayo rambamuma endoaya ei minyayanda gea, lisaya.
13Mo kalesoro alinumi Pida Dioni laapome paalame na-komisipiya ei andala ara pange sukulu kone wi ei andapu kone na-wisipiya ei andala ara lee opaminyambepe pumare kone siala arare Yesu rapu mendaa pamuala ara pepe, kone wisimiya.
14Gupuma monde rekoma aisaya ali mo Pida Dioni laaposi aisayanda andala ara angele menda na-lisimiya.
15-16Go eina, mo alinumi mo ali laapo para lalore, Go kalesoro anda gioma pulupa, loma werepena mendaa para mombea piri nimuna nimunale angele lalalo ara lalore, Go ali laapo parare ake paminyapae, lisimiya. Mo Diurusaleme ree anda para aeme wenaalimi mo ali laapome ora epe au pepe eiri ambala pangamepare naame pereke pereke angele lala ara dame ei angele lape-nae-ya, lisimiya. 17Go peapare go au pe ei wenaalimi papana go ali laapo para monde Yesuna bina wenaalinu para wala na-wadapape, loma angele puri paloma rudu laminya, lisimiya.
18Go eina Pida Dioni laapo wi loma lalore, Go wenaali para Yesuna bi loma lalore, Au menda o angele menda na-wadapape, lisimiya. 19Go lisimiyanda Pida Dioni laapome lalore, Saame Godena angele pangoma ora papeya o nimina angele pangoma papeyapae, lisipiya. Nimi niminale Godeme go angele laapore ai ora epeleapae, nimimi niminale kuralepape, lisipiya.
20Saame andapa einu pange pangapa einu raayo kone suma ora pandaliaoma wadoame pipa, lisipiya.
21Gupuma wenaali raayome gupisipiya ei andomare Godena angele laisimiyanda ali laapo rendaa na-ale monde kalesoro alinumi rudule angele wala rendaa puma lomare anda penaya rapaisimiya. 22Go ali laapome na-ande au menda puma monde ange koae ali ma-rekaisaya aliri nipuna kuni gipare ali ria laapo rupa ambala perelisaya.
Keriso wenaalinumi naame paalame na-komamonoya yainya pisimiya ei
23Kalesoro alinumi Pida Dioni laapo dipula pereyaoma pulupa, lisimiyanda niipu laapona yangonu para puma monde Gode repara alinau puaisimiya alinuna kalu alinu pange rondopao piri alinumi niipu laapo para lisimiya einu pua la alisipiya. 24-25Gonde angele pangoma nimu raayosimi Gode para yainya pula ara lalore, Yaa pange ipa pange su pange pa piri alenu raayo warisiya Realio, neeme nena angele Deipidi para lenaya nena Yaakopi Sipiridimi la alisiyande ei wala naana kasua Deipidi nena pupudengi nae alimi naa para lea, lisimiya. Go nena Yaakopi Sipiridimi la ale ei Deipidimi angele gurupa lalore,
Wenali anda ruru andapu para nimumi rono
pangala ara wiliri akepeanda rungulu
rumbamepae, lea.
Ande wenaalinumiri Gode rapu liiape-nae yanda
duame yala pi yandare akepeanda rombamepae,
lea, lisimiya.
26Go suna andasu rili alinu pange kalu alinu
raayome Reali pange nipuna Keriso rapu
yanda duame dolo endali anana siamba ara
mombeaisimiya, lea, lisimiya.
27Gurupare Erodi pange Pondiasi Pailadi laapo Isaraelimi na-mandu rangala pae wenaalinu pange Isaraelimi mandu rangala pae wenaalinu rapu Diurusaleme ree anda para mombelisimiya. Nimu gurupa mombele auri neeme Keriso ma-aoma nena yaakopi pupudengi nao-ae ali Yesu duame yanda rombisimiya. 28Nimumi pulame mombelisimiya eiri pena au menda pulame na-mombelisimiya. Nena kone pea ei nena purimi pinyaloma ambalande la wi ei pulame pisimiya. 29Go einare Realio, naa ma-koyaluame dame ei pangae, lisimiya. Gupuma naame nena pupudengi nadema wenaali nena angele pu kana nongopema ara lamono naa rambameape, lisimiya.
30Nena puri pale ei wale wenaalina one mone yainya ma-epeape, lisimiya. Gupuma pange nena yaakopi pupudengi nao-ae ali Yesuna bina kone na-suaeme einu pange na-andoaeme einu pamono naa rambameape, lisimiya. Go au pilimandare gore Gode ora aripana deme, lisimiya.
31Yainya pu pereyaisimiya dina, nimuna mombelisimiya andare sumi sumi pisaya. Godena Epe Yaakopi Sipiridimi nimu raayosina pu rombaa para rumbiaisayanda nimu raayosimi Godena angelenu paalame na-kome puri paloma ara walaisimiya.
Alenda alenda raayosi rali rali pisimiya ei
32Gupuma monde Yesu para kone rulaisimiya wenaali raayomere au komea kone suma au komea puma aisimiya. Gupuma ali mendame nipuna siambae alenda alenda Ora nai komea angele lape-nae lisaya. Komeame wi alere raayona ei lisimiya. 33Gupuma puri waru palea ei andaaimiri Yesuna angele ma-puao-aeme alinumi Yesu Kerisona wala reke eina la ale ale puma gupuma Gode nipumi nimu para epe einumi rumbiaoma ma-epeaisaya. 34-35Andasu e mapu siala pisimiya Keriso wenaalinumiri nimuna andasu e mapu muni meala pisimiya. Gupa meala pisimiya muniri monde Yesuna angele ma-puao-aeme alinu para epa alala pisimiya. Go epa alala pisimiya muniri alenda alenda diale wenaalinu menda para rali rali pala paisimiya. Gupisimiya eimi go wenaalinu para alenda alenda mandana wisimiya.
36-37Gupisimiya einare ali mendame nipuna su ali menda para ropo puma muni mumare Yesuna angele ma-puao-aeme alinu para epa alisaya. Go aliri Lipaina anda repaa ali Saiparusi anda ara mandi ali Diosepame pisaya. Nipuri Yesuna angele ma-puao-aeme alinumi nipuna bi menda Banabasi alisimiya. Go eiri puri ma-palao-ae ali, loma bi ma-aisimiya.
Tällä hetkellä valittuna:
Aposolo 4: POLENT23
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.