Aposolo 5
5
Ananayasi pange Sapaira niipu laapome pisipiya ei
1Gupisayapare Ananayasi nipuna wena Sapaira laapo niipuna suri mendame kambena, lisipiya. 2Gupuma monde misipiya muniri mendane einu niipu laapona kone suma ma-pangasumare mendane einu Ananayasimi monde Yesuna angele ma-puao-aeme alinu para ma-ipisaya. 3Gupisayapare Pidame lalore, Ananayasio, akepeanda Epe Yaakopi Sipiridi para pereke pereke angele lalepae, lisaya. Sadani nena kone para epa pirumare mo nena suna mele muni akepeanda mendane einu pangasuma pelepae, lisaya. 4Neeme andere-aripi dinare nena eiyandepare mo kambenalae dina pange go muniri wala nena eiyanae, lisaya. Neeme su ali para pereke pereke au na-pelepare Gode para pele. Go auri akipuma andasuma pelepae, lisaya. 5Go lisaya angelenu pangomare Ananayasi suna kondapa lopoma komisaya. Gupuma go ao-kopaliaisimiya alinumi pange go ei pangisimiya alinumi pange paalame komala ara lee opo andae wisimiya. 6Gupuma pena pena nakinumi monde nipu ro akame epa ma-rongaoma ma-dapa pula paisimiya.
7Ongesi piru piru puma naarele ongepusi perelisayandare nipuna wena monde pi einu kone pange na-wi anda para konda pambola ipisaya. 8Pidame mo wena para lalore, Mo niipina su kambeme muniri ora gurupayapae, lisayanda mo wename lalore, Ee, gurupa meapa, lisaya.
9Pidame mo wena para lalore, Niipimi niipina konemere mo Realina Sipiridi para koae kone ma-sialuameyare akepeanda papepae, lisaya. Andae, nena ali ma-dapa pula puame alinuri nee pange dapa pula polameya, ambala go pora gape para go epa aemenda, lisaya. 10Gupuma pa goleme mo wena Pida repara suna kondapa lopomare komisaya. Gupuma monde pena pena nakinumi epa andisimiyapare ora komisayanda ma-ria puma nipuna ali dapa para dapa pisimiya.
11Gupuma go para aisimiya Keriso wenaali raayome pange mo ei pangisimiya wenaalimi pange paalame komala arare lee opaminyambepe pisimiya.
Kone na-suaeme einu pange na-andoaeme einu pisimiya ei
12Mo Yesuna angele ma-puao-aeme alinumi wenaali para na-andoaisimiya einu pange kone na-suaisimiya einu pange waru pala pisimiya. Gupuma Keriso wenaali raayome monde Solomono nipuna epe anda polo para mombelisimiya. 13Gupuma pa aisimiya wenaalimi mo Keriso wenaali rapu aperape ei kone na-wisimiyapare mo Keriso wenaalina au andoma angele laisimiya. 14Yapi menda mendame wenaali andapumi Reali para ipuma epa raminyekepao aisimiya.
15Monde Yesuna angele ma-puao-aeme alinumi go au pisimiya einu andoma omo yainya ae wenaalinuri pora nembona rekena ria ipuma yapara ramboloma epa ru siala pisimiya. Gupisimiya eiri Pidame na-ande popelea pange pa popelea lena nipuna wasupame angula eiri popenaya pisimiya. 16Diurusaleme ree anda raayo ao-kopali ei ree anda wenaali waru andapu Diurusaleme para ipisimiya. Nimu ipula arare nimuna omo yainya pambe wenaali pange menda para koae remo piri wenaalinu ru lombao ipisimiya. Gupisimiya einu monde Yesuna angele ma-puao-aeme alinumi nimuna yainyanu randalao pange wenaalina pu para piri koae remonu ralu rumbisimiya.
Yesuna angele ma-puao-aeme alinumi pakama rendaa rendaa misimiya ei
17Monde Yesuna angele ma-puao-aeme alinumi pisimiya einu andoma monde Gode repara alinau puaisimiya alinuna kalu alinuna andaa ali pange nipuna Sadiusi anda repaa go para aeme yangonumi pangoma ora kundipa pula ara kone siala ara lalore, Sese paminya, lisimiya. 18Gupuma nimumi Yesuna angele ma-puao-aeme alinu riminyuma, dipula anda para ma-lopaisimiya. 19-20Go pisimiya dina go rimbala Realimi nipuna eindiolome dipula anda pora gapenu lomboma monde Yesuna angele ma-puao-aeme alinu ma-rapainyaya rapaisaya. Mo eindiolome Yesuna angele ma-puao-aeme alinu ma-rapada ara lalore, Mo Gode para alinau puaisimiya andaa anda para puma pua ara Godena go pena endoae angele wadapape, lisaya.
21Monde Yesuna angele ma-puao-aeme alinumi ande Godena eindiolome lisaya ei pangoma yapi doame kepeala-ainya rekoma Gode para alinau puaisimiya andaa anda para angele pua walala aisimiya. Go naarena Gode repara alinau puaisimiya alinuna kalu alinuna andaa ali pange nipuna yangonumi Isaraelimi mandu rangala pae wenaalinu rapu ralao piri ali raayosi wi loma kalesoro anda rupara angele kuruma doame mendaa para mombelisimiya. Gupuma dipula andere-aisaya endali ripinyi ali para ande Yesuna angele ma-puao-aeme alinu ma-ipulupa lo, angele rapaisimiya. 22Monde dipula piri Yesuna angele ma-puao-aeme alinu mula paisimiya alinu dipula anda para opola paisimiya. Gupisimiyapare ande Yesuna angele ma-puao-aeme alinu na-pirisimiya. 23Go eina wala lekeya puma monde kalesoro alinu para pua lalore, Mo dipula anda parare pora pa pombao-aripaya pange endali ripinyi alinumi pa pora gape pa andere-ainya opola puama, lisimiya. Gupuma pora lomba minyamboma ande alinu pidimiya andamapare na-piri pumoneameya, lisimiya. 24Gode repara alinau puaisimiya alinuna kalu alinu pange mo Gode repara alinau puaisimiya andaa anda andambao-ae alinuna kalu alimi go angele pangoma rungula mealo pambala ara lalore, Ande Yesuna angele ma-puao-aeme alinu a para puamepae, lo nimunale lora lora pisimiya.
25Go angele lala-ainya ali menda nimu para ipuma lalore, Pangalepae. Nimimi dipula anda rupara ma-lopariminde alinuri mo Gode repara alinau puaisimiya andaa anda para reka ara wenaalinu para Yesuna angelenu walala aeme, lisaya. 26Ande Gode repara alinau puaisimiya andaa anda andambao-ae alinuna kalu ali pange nipuna alinu rapu mo Gode repara alinau puaisimiya andaa anda nane ande Yesuna angele ma-puao-aeme alinu mula paisimiya. Gurupa mula puma ma-ipisimiyapare wenaalinumi kana pongopame nimu dimiya, paalame komala ara rendaapu na-mi, pawasi ma-paisimiya.
Yesuna angele ma-puaeme alinumi kalesoro alinu para paalame na-komala ara angele lisimiya ei
27Mo Yesuna angele ma-puao-aeme alinu ma-ipuma kalesoro alinuna lee rona ma-aisimiya. Gupuma mo Gode repara alinau puaisimiya alinuna kalu alinuna andaa alimi nimu para rendaa pi angele loma lora pisaya. 28Gupuma lalore, Nimi parare go alina bina angele na-wadapape, lo rudu lamandepare go peme au anda, lisaya. Naana angele runguluma Diurusaleme ree anda raayo para angele walemeae, lisaya. Wenaalimi go angele pangomare ande ali naame liiama deme, lisaya.
29Pida pange Yesuna angele ma-puao-aeme alinu menda parame angele yango liada ara lalore, Godena mana angele komea pangoma pula pemapare su alinuna mana angele rando menda demendare naame ora na-pangelema, lisaya. 30Nimimi Yesu ekeraisa repanana ikokome luma andiariminde. Go pamenda komandepare naana apa kasuana Godeme wala ma-rekaripande, lisaya. 31Godeme Yesu wala ma-rekoma nipuna popeke ki nane ma-piraya. Gupuma Yesu nipuri naana Mundu Ali pange naana Rambami aya. Go pea eiri Isaraelimi mandu rangala pae wenaalinumi nimuna koae koae einu giaoma kone menda perekeminyu winyayanda, Godeme go eina ma-aya. 32Naame andoma wala go andema aunu la gialema, lisimiya. Naame komea diayapare Godena Yaakopi Sipiridimi pange wada. Yaakopi Sipiridiri Godeme nipuna angele pangoma pimi wenaali para alea, lisaya.
33Monde Yesuna angele ma-puao-aeme alinumi go angele lisimiya ei monde kalesoro alinumi pangoma nimuna wili para repana sula mandana opisaya eimi rono waru pangisimiya. Gupuma nimunale lalore, Go Yesuna angele ma-puao-aeme alinu lu komaminya, lisimiya. 34-35Go lisimiyapare Parisi ali menda Gamaliele Mosesimi Rudule Angele waloaisaya ali pirisaya. Nipuri wenaali raayome nipuna bi waru minyasiao-aisimiya ali mo kalesoro alinu para rekoma angele lisaya. Monde Yesuna angele ma-puao-aeme alinu kama karu pulupa, loma lalore, Isaraelimi mandu rangala pae alinuo, go alinu para pulameya yanda rombaleme eiri kone waru sialepape, lisaya.
36Ambalande Siudasi gurupa nipu andaa ali loma alinu anderede malapu rupa nipuna kou nane raliamende, lisaya. Go pandepare nipu lu pa winya nipuna kou nane raluaisimiya alinu pili pili yamboma nipuna angelenu komainyaripande, lisaya. 37Go eina kou parare gapamani alimi bi meaya naarena Galili andasu ali menda Diudasimi pange Siudasi para pisimiyande rupa wenaali waru andapumi raliamende, lisaya. Go payandepare nipu pange lu pa siala-ainya nipuna kou nane raluaisimiya alinu pili pili yambisimiyande, lisaya. 38-39Go einare ambia go alinu para ale menda na-pipape, lisaya. Nimuna naleme pupudengi suna ali mendana ei nalimindare komainyaliale pinya gialepa, lisaya. Go peapare nimuna go pupudengi naleme ei Godena ei nalimindare nimu manda na-rorepalimi, lisaya. Nimimi gupi ei para na-ande ara pa marea Gode rapu yanda dimi, lisaya.
Gamalieleme go angele lisayanda monde kalesoro alinumi nipuna angele pangisimiya. 40Monde Yesuna angele ma-puao-aeme alinu anda rupara wi la misimiya. Gupuma endali ripinyi alinumi lu rakilinya loma rapada ara lalore, Yesu nipuna bi lada ara angele menda na-dapape, lo rudu loma rapaisimiya. 41Monde Yesuna angele ma-puao-aeme alinumi kalesoro anda para opalumba pula ara raname waru koma eiri paisimiya. Go raname koma eiri paisimiya eiri go kone suma pisimiya. Naame Yesuna bina rendaa pi ei meape Godeme ana pea kone suma meamono lea, kone wisimiya. 42Gupuma naare raayo Gode para alinau puaisimiya andaa anda para pange Keriso wenaalinuna anda paranu gonde wenaali mombea ara Yesu ande Keriso ali nipuna epe angele epa waloaisimiya.
Tällä hetkellä valittuna:
Aposolo 5: POLENT23
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.