Dioni 20
20
Yesuna ro dapa para na-wisaya ei
(Madiu 28:1-8; Maka 16:1-8; Luka 24:1-12)
1Sande palumu yapi ambe na-kepele rimba pa yambainya Makedala wena Meari Yesuna dapa pi para popisayapare Yesuna dapa pi pora gape kea pisimiya kana paripape, lombapa wisaya ei andisaya. 2Go eina nipumi Saimono Pida pange kou nane raluaisaya ali menda pange Yesu nipuna pumi raname komisaya ali para alo popisaya. Mearimi ali laapo para lalore, Realiri dapa pi para na-wia. Ambala alinu mendame ma-puamenae. A para ma-puamepae, ane wimipae, naa marea, lisaya.
3Go eina goleme Pida pange mo kou nane raluaisaya ali menda nipumi anda minyapalaoma mo Yesu dapa pi para paisipiya. 4Ali laapo raida mendaa dina alo popisayapare mo kou nane raluaisaya ali mendame Pida ma-lombae paoma paisaya. Nipu ambala alo puma Yesuna dapa para opapala paisaya.
5Nipumi pua andainyaoma andisayapare aka komea wisaya ei andisayapare apenda para na-konda pambisaya. 6Ongesinda werepe, Saimono Pida ipisaya. Gupuma nipumi Yesu dapa apenda para pua konda pambisayapare aka menda para komea wisaya ei andisaya. 7Gupuma Yesuna kaluna korae aka komea andisaya. Aka menda para rapu mendaa para na-wisaya. Ora dia. Yesu koraisimiya aka rongaya ei komea pelapa wisaya. 8Gupuma monde ririna Yesu dapa para popisaya kou nane raluaisaya ali nipumi pange pua konda pamboma go au pua andoma kone rulaisaya.
9Go naarenare Yesu wala rekola loma Godena angele wia bukana walea ei, kone na-wisipiya. 10Gupuma kou nane raluaisaya ali laapo anda nane wala lekeya popisipiya.
Yesu Meari Makedala ree anda nane aoma wena ipisaya ei
(Madiu 28:9-10; Maka 16:9-11)
11Go dinare Meari mo ali dapa pia lena kama nane ara ree loaisaya. Gupuma andainyaoma ree lala ara mo ali dapa kana apenda rupara andisaya. 12Gupuma kake pi aka pambae eindiolo laapo andisaya. Niipu laapo mo ambala Yesuna ro wisaya para pirisipiya. Gupuma eindiolo mendare kaluyae nane pirisaya. Mendare angeyae nane pirisaya. 13Niipu laapome lalore, Wenao, akepeanda ree lalepae, lisipiya. Go eina Mearimi niipu laapona angele yango liada ara lalore, Na Reali ma-pemepare a para ma-puma wimipale ni marea, lisaya.
14Go angele loma perekeyoma Yesu aisaya ei andisaya. Gupisayapare Mearimi gore ora Yesu, kone ora na-wisaya. 15Yesumi lalore, Wenao, akepeanda ree lalepae. Nena konemere api aisa pilipae, lisaya. Mearimi kone sialore, Go aliri e andere-ae ali menda, kone wisaya. Go eina nipu para gurupa lisaya. Andaa alio, gore neeme ma-pelendare ni para la giae, lisaya. Neme nipuna ro mulameyanda laloae, lisaya.
16Yesumi lalore, Meario, lisaya.
Go eina Mearimi nipu para perekeyoma Iburu angeleme lalore, Rabounai, lisaya. (Go angelere Andaa Waloale Ali lea.)
17Yesumi Meari para lalore, Neeme ni na-siambape. Niri so mandaa ambe na-pe. Na Apa para ambe na-pe, pa ayole. Nee puma na amenu para go angele pua lape. Ni so mandaa puma na Apa pange nimina Apa para pola. Na Gode pange nimina Gode para pola, lisaya.
18Gupuma mo Makedala wena Meari puma mo kou nane raluaisimiya alinu para pua lalore, Reali neme ora andawa, lisaya. Gupuma nipumi monde Yesumi lisaya angelenu raayo mo alinu para la alisaya.
Yesu nipuna kou nane raluaisimiya alinu para ipisaya ei
(Madiu 28:16-20; Maka 16:14-18; Luka 24:36-49)
19Monde Sande pena rimbayalo-ainya monde Yesuna kou nane raluaisimiya alinu nimu anda rupara piri pora po siaoma piri komea para mombea pirisimiya. Nimumi mo pora po siaoma pirisimiya eiri mo Isaraelimi mandu rangala pae wenaalinuna kalu alinu para paala komala ara pisimiya. Gore Yesu nipu nimu rapu epa rekoma ara lalore, Kuma pi ei nimi para epena, lisaya. 20Go angele loma werepe nanere nipuna ki laapo pange nipuna perali nane pange nimu para walisaya. Monde kou nane raluaisimiya alinumi nimuna Reali andala ara raname waru komisimiya. 21Gupuma Yesumi nimu para wala lalore, Kuma pi ei nimi para epena, lisaya. Na Apame ni raparipa rupa neme nimi pange rapado, lisaya. 22Nipumi go angelenu loma nipuna kou nane raluaisimiya alinu para nipuna pomo polala ara lalore, Epe Yaakopi Sipiridi mipa, lisaya.
23Nimimi wenaali menda para nimuna koae koae einu para kone na-wilimindare gore koae koae einu ora na-wilia. Go peapare nimimi kone pa wilimindare gore koae koae einu ora pa wilia, lisaya.
Yesumi Domasi para angele lisaya ei
24Yesu nipu mo kou nane raluaisimiya alinu para ipisaya dinare kou nane raluaisaya ali komea, kou nane raluaisimiya alinu ki laapo pereyoma angena laapopu aisimiya para ali komea, na-aisaya. Nipuna biri Domasi, bi mendare Didimasi. 25Go eina kou nane raluaisimiya alinu menda parame Domasi andoma lalore, Naame Yesu Reali andamae, lisimiya. Domasi nimu para lalore, Neme Yesuna ki warana ikokome lii para kondo andoma na ki malame monde kondo para na-waraluanda pange na kimi nipuna peralina awe para kondo na-waraluandare gore neme kone na-rulalua, lisaya.
26Pula komea perelenaloma monde kou nane raluaisimiya alinu nimu wala anda rupara mombea komea para pirisimiya. Domasi pange komea para pirisimiya. Pora pombaisayapare Yesu nimu rapu epa reka ara lalore, Kuma pi eiri nimi para epena, lisaya.
27Gupuma Yesumi Domasi para lalore, Nena ki mala go para sia, lisaya. Gupuma na ki laapo anda. Go pumare nena ki menda rindapeaoma na perali para yapa sia. Nena kone na-rulale ei minyapaoma kone rula, lisaya.
28Domasimi Yesuna angele yango liada ara lalore, Neere na Reali pange na Gode ale, lisaya.
29Yesumi nipu para lalore, Neeme ni andala ara kone ruladepae. Wenaalinu menda parame ni na-ande ara kone rulalimindare Godeme nimu para raname waru ma-komalia, lisaya.
Go angele akepeanda wape peapae
30Yesumi nipuna kou nane raluaisimiya alinumi andenayanda na-ande aunu menda para andapu pala pisayapare go buka rupara raayo na-wape pea. 31Go wape pea einu raayo nimimi Yesu ora Keriso Godena Naki aya kone rulaliminyayanda wape pea. Go kone rulademe eimi nipuna bimi endoaya ei ora meapeya.
Tällä hetkellä valittuna:
Dioni 20: POLENT23
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
