Dioni 21
21
Yesu nipuna kou nane raluaisimiya alinu warapu para ipisaya ei
1Gupuma werepe nane Yesumi mo Daipiriasi ipa repara ranamena nipuna kou nane raluaisimiya alinu para wala popisaya. Gurupa pisaya. 2Saimono Pida pange Domasi nipuna bi menda Didimasi pange Nadaniele nipuri Galili ali Kaena ree anda para ipisaya ali, pange Sebedina naki laapo pange ali laapo menda mendaa para mombeaisimiya. 3Saimono Pidame mo Yesuna kou nane raluaisimiya alinu para lalore, Niri repali mulame angona mainda pulu lisayanda mo alinumi lalore, Naa pange nee rapu bainya, lisimiya. Nimu puma kawaso para pua pirisimiya. Gupuma go rimbalare repali komenda ora na-misimiya.
4Naare pena ipula-ainyalomare Yesuri mo ipa repaa lena aisayapare mo kou nane raluaisimiya alinumiri mongore Yesu aya kone na-wisimiya. 5Go eina Yesumi nimu para lalore, Nakinuo, nimiri repaliri menda meamepae, lisaya. Mo alinumi Yesuna angele yango liada ara lalore, Dia, ora komeasinda pange na-meama, lisimiya.
6Go eina Yesumi mo alinu para lalore, Nimina angona nu mo kawasona ara popeke nane kimi ipa mone reena lopalepa, lisaya. Go au pilimindare nimimi repali menda para milimi, lisaya. Go ei pangoma mo alinumi angona ipa para kusuma mandisimiyandare repali waru andapu mandisaya. Gupuma angona nu repalimi rumbialumboma kama nane yola meape rupa repalimi kenda waru pisaya.
7Yesumi nipuna pumi raname komisaya kou nane raluaisaya ali mendame Pida para kundiripu lalore, Reali Yesu aya, lisaya. Pida nipumi monde angele laya aliri Yesumi lana kone sialore nipuna mandaa akame ke koraisaya. Gupuma nipu ipa para kondo pambisaya. Akepeare nipuna akanu raayo koyo wisaya. 8Gupuma mo kou nane raluaisimiya alinu menda para mo kawaso para piruma ipisimiya. Gupuma mo angona nu pange repali maidapale yola misimiyapare mo ipa repalenare papare na-aisimiya. Ipa mandaame kawasona piruma repali angona nuna pirapale yola misimiya eiri rombo andalu lula mandana ali ria ki komeapu rupa wisaya.
9Ipa repaa lena ipisimiya. Gupuma repana lengana ralo-ainya andisimiya. Repana lengana repali kiramba aya ei pange palawa kiri pange wisaya. 10Yesumi nimu para lalore, Repali ambia go meamende eiri mendapare ma-ipulupa, lisaya.
11Go eina Saimono Pida mo kawaso para opaisiaoma mo angona nu pua yola muma ipa repale nane yola ma-ipisaya. Andaa repali penu waru andapu angona nu para rumbialumbisaya. Repali raayore gurupa. Ali ria warapu pereyoma ki laapo pereyoma angena repopu repali waru andapupe pirisayapare angona nu na-indipilisaya. 12Yesumi mo alinu para lalore, Repali palawa kiri epa nalepa, lisaya. Go eina mo kou nane raluaisimiya alinu menda parame Yesu para angaa meapere paalame komala ara na-angaa misimiya. Nimuna konemere gore Reali Yesuae, kone wisimiya.
13Gupuma Yesumi repana ralaya para puma palawa kiri pange repali pange muma mo alinu para rali rali paisaya.
14Yesu dapa para wala rekisaya dinare gore go eiri rana repopao mo kou nane raluaisimiya alinuna lee wilina ara nipumi walisaya.
Yesumi Pida para angele lisaya ei
15Gupuma enda no pere-ainyaloma Yesumi Saimono Pida para lalore, Saimono, Dionana nakio, pa marea neemere alinu menda para ma-wanduaoma nena pumi ni para ora kone waru suma kone rulaliyapae, lisaya. Pidame Yesuna angele yango liada ara lalore, Ee, Realio, nee kone wili. Neme nee para raname komoma kone sialo, lisaya. Yesumi Pida para lalore, Gore neere na sipisipi mena sinu para enda aloma waru andere-ape, lisaya.
16Gupuma Yesumi rana laapopao Pida para wala lalore, Saimono, Dionana nakio, neemere ni para nena pumi kone waru suma kone rulaliyapae, lisaya. Go eina Pidame Yesuna angele yango liada ara lalore, Ee, Realio, Neeme kone wili. Nee para raname komoma kone wi, lisaya. Yesumi Pidana angele pangoma lalore, Neere na sipisipi menanu waru andere-ape, lisaya. 17Gupuma Yesumi rana repopao Pida para wala lalore, Saimono, Dionana nakio, neemere ni para raname komalepae, lisaya. Go eina Yesumi rana repopao, Neeme ni para raname komalepae, gurupa lisayanda Pidame nipuna pu para kendame waru komala ara Yesu para lalore, Realio, neeme alenda alenda raayo kone wili. Neme nee para raname komalo eiri kone wili, lisaya. Yesumi Pidana angele pangoma lalore, Neeme na sipisipi menanu para endanu alala pape, lisaya.
18Go eina nee para ora laloae. Ambala ririna neere pena naki aripindare nena kone suma ako yamoma pamulo paende eiri nena kone suma pa pamulopala paende. Go paendeparere werepe nanere nee yomogai alindare go naarena nena ki laapo rindapealindare ali mendanumi nena ki laapo kopeme koraoma nee kone na-pi pora nane karu peleme, lisaya. 19Go eiri Yesumi werepe nane Pida komeleandare akipuma komeleapae, go dina Godena bi andaai ma-minyasialia, loma walisaya. Go eina Yesumi go naarele rombo siala ara Pida para gurupa lisaya. Pida, neere na kou nane ora raluma ipuape, lisaya.
Yesu pange nipuna kou nane raluaisaya ali menda aisipiya ei
20Go eina Yesumi nipuna pumi raname komisaya ali para Pidame perekeyaoma andisaya. Mo aliri Yesuna kou nane raluma ipisaya ali. Go aliri ambala ririna Yesuna ange nane piri enda nala piri, Yesu para lalore, Realio, nee parare apimi yanda rombeleapae, loma lora pisaya ali ae. 21Go eina Pidame mo kuou nane raluaisaya ali menda andoma Yesu para lalore, Realio, mongo aliri ake piliapae, lisaya.
22Yesumi nipuna angele yango liada ara lalore, Ni puma wala lekeya epolale mo ali pa ainya doanda ana peale neeme kone na-wi. Nee ni raluma epape, lisaya.
23Go ei pangoma Yesuna kou nane raluaisimiya alinumi kenda ruma lalore, Go kou nane raluaisaya ali na-komelea, lisimiyapare Yesumi Mo ali na-komelea, angele nipumi na-lisaya. Yesumi lalore, Ni puma wala lekeya epolale mo ali pa ainya, doanda, ana peale neeme kone na-siape, lisaya.
24Ande go angelenu loayanda kou nane raluae ali gondae. Nipumi pange go angelenu wape pea. Naame kone wimapare nipumi lande angelenu ora angelenu lande.
Pereda pea angele lea ei
25Go eina Yesumi alenda alenda andapu menda para pange pisayapare go einu raayo ali mendame komea komealo wape pala piliandare go su raayo para go bukanu anana na-wilia.
Tällä hetkellä valittuna:
Dioni 21: POLENT23
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
