Luk 22
22
Chutas Iskaliot ʋt Chisʋs a̱ ishit na‐holitompa isht a̱sha pehlichi ʋhleha ha̱ ibbak fohka chi̱ kʋt nan it im apesa, 1, 7 Pita, Chan ita tuklo hosh ont ai ʋbanʋblit isht ʋlhpisa ka atahli ho̱, Chisʋs ʋt auah‐tuklo yash it ibai impa mʋt, 19 opiaka na holitopa impa isht ʋlhpisa ka apesa. 31 Pita na‐yimmi im anukfila hatuk ʋt i̱ kʋnia chi keyu, amba hituchina ha yo̱ ilapa ik ithano chatuk ʋt miha chi̱ ka, Chisʋs ʋt im anoli. 39 Nana kʋt im a palʋmmi, micha ʋba pit anumpohonlit osapushi anu̱kaka ya̱ anta; 47 Chisʋs a̱ okla isht ia na na holitompa isht a̱sha pehlichi a̱ im ona. 54 Pita yʋt hituchina ha yo̱ Chisʋs a̱ ik ithano ka miha tuk osh, i̱ himmak o̱ nukha̱klot yaha̱ya fehna, 63 mihma Chisʋs a̱ okla ik ahobalot na mihachi. 66 Chisʋs a̱ ilauelit nan ai apesa ya̱ isht ona na illa chi̱ im ʋlhpisa.
1Mihma ʋbanʋblit ont ia achi, pʋska ik shatʋmmo impa hʋt ai ona̱ he tok.
2Yʋmohmi ma okla hak o̱ i̱ nukshopa hatuk osh, na‐holitompa isht a̱sha pehlichi ʋhleha, micha na‐holissochi puta kash ot yʋmma kaniohmichit ʋba hinla kʋt akostininchi baha̱na tok.
3Yohmi ma Setan ʋt Chutas Iskaliot hohchifo, auahtuklo ka ai iba holhtina hatuk ash ont chukowa tok.
4Mihma yʋmmak ash ot ia mʋt, kaniohmichit ishit ibbak fohka hinla kʋt, na‐holitompa isht a̱sha pehlichi ʋhleha, micha kʋpitʋni ʋhleha aiena ka ont isht it im anumpuli tok.
5Mihma okla na yukpa mʋt, yʋmmak ash tʋli holisso ima chi̱ kʋt im apesa tok.
6Mihma, Yohma hinla kʋt miha mʋt, okla laua yʋt ai iksho ma ataklʋchit ishit, ibbak a̱ fohka hinla kʋt ai ʋlhpesa hi a̱ hoyo tok.
7Atuk o̱ pʋska ik a shatʋmmo ka he, micha ai ʋbanʋblit ont ia illa he nitak ʋt ai ona tok.
8Mihma Chisʋs ʋt Pita, Chan ita tuklo ka pit tihlelit, Iʋt ai ʋbanʋblit ont ia ya̱ hʋsh pim atahli tuk o̱, iloh impashke, achi tok.
9Mihma yʋmmak ash ot, Katima yak o̱ il ai atahla hinla ka ish ahni cho? im achit okla tok.
10Mihma, Yakeh! tʋmaha ha̱ ont hʋsh chukowakma, hatak ʋt lukfi kotoba oka ʋlhto ho̱ sholi kʋt hʋchi afama chi̱ hoke; yʋmmak o̱ api̱hʋt aboha kanima yo̱ pit chukowakma, hʋsh chukowashke.
11Mikmʋt hatak chuka yʋmma ai ʋtta yatuk ash, Nan‐ithʋnanchi ʋt, Katima ko̱ ai impa aboha yʋt talaia ho̱, nan ʋm ai ithʋna ʋhleha ha̱ pehlichit ai ʋbanʋblit ont ia ya̱ ai it ibai impa la chi̱ cho? auet chim achi kʋno; hʋsh im achashke.
12Yohmikma yʋmmak ash ot ʋba potʋlhpo chito hosh nana ai ʋlhtaha achukma ho̱ hʋchi pisacha chi̱ hoke; yʋmmak o̱ hʋsh ai atahlashke, im achi tok.
13Mihma itiachi tuk osh, yʋmmʋt nana ai i̱ miha hatuk ash ont ai ʋlhpiesa na pisʋt okla tok; yohmi mʋt ai ʋbanʋblit ont ia ya̱ ai atahlit okla tok.
14Atuk o̱ hʋshi kanʋlli ʋt ai ona ma, ʋbanumpeshi auah‐tuklo kash ot api̱ha ho̱, binili tok.
15Mihmʋt, Ik si ai ilbʋsho ki̱sha ta̱kla kak osh ai ʋbanʋblit ont ia ilʋppa a hʋch ibai impa ka ahni kʋt aha̱ni li fehna tuk oke.
16Himak a pilla ma yʋmma ak ai ʋpo mak o̱, Chihowa apehlichika yak o̱ ai isht aia̱hla chi̱ mak oke, hʋchim achi lishke, im achi tok.
17Mihmʋt isht ishko a̱ ishi cha, ʋba pit aiokpʋchi mʋt, Ilʋppa oh ishi cha, hʋsh ita kashkoashke;
18Pa̱kʋpi a waya ka ak ai ishko mak o̱, Chihowa apehlichika yʋt ʋla chi̱ mak oke, hʋchim achi lishke, im achi tok.
19Mihmʋt pʋska ya̱ ishi cha, ʋba pit aiokpʋchi mʋt, tushalichi cha, yʋmmak ash o̱ ima mʋt, Ilʋppʋt sa nipi yosh hʋchishno yak o̱ isht hʋchi ʋlhtoba mak oke, isht hʋs sʋthaiyana chi̱ mak osh ilʋppa hʋchi yʋmohmashke, achi tok.
20Impʋt issa ma, isht ishko ma aieninchit, Isht ishko ilʋppʋt nan ʋlhpisa himona yosh ʋm issish ʋt hʋchishno atuk mak o̱ hlatapa ka isht a toba mak oke.
21Yohmi kia yakeh! sʋshit inla ibbak fohka chi̱ ibbak ʋt si awant ai impa ya̱ a̱shʋshke.
22Yohmi ka Hatak Ushi yokʋto ai im ʋlhpisa tok mak osh yohmi mʋhli; amba ishit inla ibbak fohki yʋmmak okʋto ai i̱ palʋmmi mak oke.
23Yohmi ma, E katima mak osh ilʋppa a pi yakohma chi̱ hatuk oh cho? ahnit il im asilhhʋchit ma̱ya tok.
24Atuk osh anonti, E katima kak osh moma i̱ shahli ha hinla chishba? ahnit ai ita‐chapoʋt ma̱ya tok.
25Yohmi ma yʋmmak ash ot, Chentail okla i̱ mi̱ko ʋhleha hak osh i̱ na‐hullo ho̱ tobʋt, nana ho̱ ahnikmʋt, ai i̱ yʋmihchi chatuk; micha yʋmma ai i̱ shahlit nan im ai ʋlhpisʋt antakmʋt, nana achukmali yo̱ hohchifo chatuk.
26Amba hʋchishno ʋto hʋchi yʋmohma he keyu hoke; mikma kʋna hosh moma i̱ shahli kʋt hʋch ibafo̱ka hokmʋt, yʋmmak osh himmak o̱ chohmashke; mikma na pehlichi yokmʋt, nan‐isht im ʋtta yo̱ chiyuhmashke.
27A̱shʋt impa kak okmá, nan isht im anta kak okmá, nanta kak osh i̱ shahli yo̱? a̱shʋt impa kak keyu̱? yohmi kia ʋno ʋto nan isht im ʋtta mak o̱ chohmi hosh hʋchi ibafo̱ka lishke.
28Isht ai imomaka sa pesa a puta ka hʋchishno ak osh hʋs si apeha beka tuk mak oke.
29-30Yohmi ka a pehlichi li a̱ ʋm ai impa ai impʋt, ai ishkot, aiasha holitopa ka chieyʋt, Islael hatak isht‐ai‐unchululi auah‐tuklo ka nana hʋsh im apihi̱sa chi̱ mak o̱, apehlichika ya̱ hʋch im apesa li kʋt, ʋno a̱ A̱ki ʋt ai ʋm apesa tok a̱ chiyuhmichi lishke, im achi tok.
31Mihmʋt Chitokaka yash ot Saimon, Saimon, yakeh! Setan ʋt chishi cha, mʋshlichit onush o̱ chiyuhmichi ka bʋnna tuk.
32Yohmi kia na chi yimmi tuk ʋt ik chi̱ kʋnio ka chi̱ ka, ʋba pit isht chi anumpuli li tuk; yohmi ka a filemʋt ish ile kostininchikmʋt, ish itibapishi ʋhleha ha̱ ish hlampkochashke, achi tok.
33Mihma yʋmmak ash ot, Chitokaka ma! aboha kʋllo, micha ai‐illi aiena ka chi awant ona la hi ʋt ʋm ʋlhtaha hoke, im achi tok.
34Mihma, Pita chia ha̱ chim anoli lishke, himak nitak a̱ aka̱ka yʋt ik olo ki̱sha ho̱, hituchina ha chik sʋthano ish miha chi̱ hoke, achi tok.
35Mihmʋt, Tʋli holisso i̱ shukcha, micha bahta pinak ai‐ʋlhto, mihmʋt shulush aiena kʋt iksho ho̱ pit hʋchi tihleli li chash, nanasi kia isht ik hʋchim ai ono ke tuk o̱? im achi tok; mihma, Nanasi kia ik pim ai ono ke tuk keyu, okla achi tok.
36Mihma, Amba himak okʋno, kʋna hosh tʋli holisso i̱ shukcha yʋt in tonla tukmʋt, i̱shi cha, anonti bahta pinak‐ai‐ʋlhto ma mihinlashke; yohmikma kʋna hosh bʋshpo falaia yʋt ik im iksho ke tuk mʋt, im anchi a̱ kanchi cha, achʋfa ka chumpashke.
37Yohmi kʋt yʋmmak ash ot, Nan‐ʋlhpisa kobʋffi ʋhleha ho̱ ai iba holhtina tok, achi holisso tok ilʋppʋt ʋno ak o̱ ant si ai isht ai a̱hla chi̱ ka pulla moma hoke; nana kʋt ʋno ak o̱ sʋsht anumpa tok okʋto ont ai ʋhla chi̱ mak oke, im achi tok.
38Mihma, Yakeh! Chitokaka ma! bʋshpo falaia yʋt tuklo hosh yak chi̱yʋshke, achi tok. Mihma, Yʋmmak oh kia ʋlhpesa hoke, im achi tok.
39Mihmʋt yʋmmak o̱ yohmi chatuk okʋt, kocha ia mʋt, Alif nʋnih chaha ya̱ ona ma, nan‐im ai ithʋna ʋhleha hash kia iakaiya tok.
40Mihma yʋmmak ash ot yʋmma ont anta mʋt, A yoshuba ya̱ hʋch ik iba chukowo ka chi̱ kʋt ʋba pit hʋsh anumpohonlashke, im achi tok.
41Mihmʋt ai i̱ filʋmmit tʋli bohpoa ont ai itola ho tuk ohmi foka ho̱, ont hʋchukbihlepʋt hikia cha, ʋba pit anumpulit,
42A̱ki ma! ʋlhpesa ish ahni hokmʋt, isht‐ishko ilʋppa i̱s sa̱ kanʋllichashke: yohmi kia ʋno ak osh ahni li kak o̱ keyu; amba chishno ish aiahni kak o̱ ai yʋmohmashke, achi tok.
43Mihma enchil ʋba minti kʋt ant i̱ haiakʋt hlampkohonchi tok.
44Mihma i̱ palʋmmi kʋt a fehna hatuk okʋt, i̱ shahlichit a chilitʋt ʋba pit asilhha tok: mihma laksha kʋt issish hlatapa chinto aka fohompa ho̱ chiyuhmi tok.
45Atuk osh ʋba pit asilhha tuk ash ot wakaya cha, nan im ai ithʋna ʋhleha aiasha ka ʋla mʋt, nukha̱klo kʋt nusi tuk osh aiasha na pisa mʋt,
46Nanta katiohmi ho̱ hʋchi nusi cho? ai‐ashʋchika ya̱ hʋch ik iba chukowo ka chi̱ kʋt, tanit ʋba pit oh asilhhá, im achi tok.
47Mihma yʋmmʋt anumpuli moma ho̱, auahtuklo ai iba holhtina Chutas hohchifo hash ot okla la̱wa ka in tikba hikʋt a̱ya tuk osh, i̱ su̱ksowa chi̱ kʋt Chisʋs a̱ atukonofʋt ia tok.
48Yohmi kia Chisʋs ash ot, Chutas ma! na su̱ksowa hak o̱ Hatak Ushi a̱ isht haksichit ishit inla ibbak a̱ ish fohki hoh cho? im achi tok.
49Mihma apeha atuk ash ot nana kʋt a kaniohma hinla ka pisa mʋt, Chitokaka ma! bʋshpo falaia yo̱ isht e fahama chi̱ cho? im achi tok.
50Mihma achʋfʋt na‐holitompa isht a̱sha pehlichi i̱ shahli in tishu ho̱ fahama cha, ishtimpak imma haksobish a̱ tʋbli tok.
51Mihma Chisʋs ash ot anumpulit, Yʋmmak okʋno ant ik a yohmi na hʋsh aiahnashke, achi tok. Mihmʋt haksobish ash i̱ potoli mʋt, hlakofichi tok.
52Mihmʋt Chisʋs ash ot na‐holitompa isht a̱sha pehlichi ʋhleha, micha tempel i̱ kʋpitʋni ʋhleha, mikmʋt hochitoka ʋhleha aiena kʋt ai im ʋla tuk ash, Na‐hu̱kopa yo̱ a̱yʋt i̱ kohcha ho̱ chiyuhmit bʋshpo falaia, mikmʋt iti tʋptua aiena ka sholi hosh hʋsh itʋnowa cho?
53Nitak moma hʋchi takla tempel a̱ anu̱kaka ya̱ ahanta li kʋno; ibbak nana kia hʋch ik si o̱ welo ke tuk; yohmi kia himak okʋto hʋchishno, micha aiokhlilika nana im aia̱hli aiena ka hʋchi̱ nitak mak okʋt, im achi tok.
54Yohmi ma yʋmmak ash o̱ okla ishi mʋt, isht iʋt na holitompa isht a̱sha pehlichi i̱ shahli in chuka yo̱ ont ishit chukowa tok. Mihma Pita yʋt auet i̱ mishemanchit iakaiya tok.
55Atuk o̱ kʋsbi aboha ai itin‐takla talaia tuk a̱ ai iklʋnna ka okla luak ai oti cha, binohlit taha ma, Pita yʋt takla binili tok.
56Atuk o̱ yʋmmʋt luak bili̱ka ont binili ka, ohoyo himita achʋfʋt pisa cha, atokolit pisa fehna mʋt, Hatak ilʋppak kia yʋmma awant a̱ya kamo, achi tok.
57Mihma ik ithano ilahobit, Ohoyo ma! yʋmma ak ithanoshke, achi tok.
58Atuk o̱ anonti in chekosi ma, inla yosh yʋmmak ash pisa mʋt, Chishno ʋt yʋmma ai achʋfa chia akinli, achi ma; Pita ash ot, Hatak ma! mihi yo̱ sia keyushke.
59Atuk o̱ yʋmmak atuk a̱ i̱ hʋshi kanʋlli achʋfa foka ma, inla hosh kʋllochi fehnʋt miha mʋt, Ilʋppak kia yʋmma awant a̱ya yatuk ʋt aia̱hli hoke; ilʋppʋt Kalili hatak oka, achi tok.
60Mihma Pita yash osh, Hatak ma! nana ho̱ ish miha ka ak ithanoshke, achi tok. Mihma ashali̱ka anumpohonli moma na aka̱ka yʋt ola tok.
61Mihma Chitokaka yʋt filemʋt Pita ya̱ pisa tok. Mihma Pita yash ot, yʋmmʋt, Aka̱ka yʋt ik olo ki̱sha ho̱, hituchina ha chik sʋthano ish miha chi̱ hoke, im achi tuk Chitokaka im anumpa hash ithaiyana tok.
62Mihmʋt Pita yʋt kohcha cha, yaha̱ya fehna tok.
63Mihma Chisʋs ash apesʋchit ma̱ya tuk hatak ash ot ik ahobalot na‐mihachi mʋt, boli tok.
64Micha nishkin a̱ okla ompohomot, nashuka ya̱ isso mʋt, kʋta hosh chisso ho̱? akostininchit anolí, achit i̱ ponaklo tok.
65Mihmʋt ik ahobalo fehnʋt nan ilaiyuka isht im i̱ sanalit mihachi kʋt lauachi tok.
66Atuk o̱ onnʋt taha mak inli ho̱, hochitoka ʋhleha, micha na holitompa isht a̱sha pehlichi ʋhleha, mikmʋt na‐holissochi ʋhleha aiena kʋt itahoba cha, yʋmmak ash ilauelit im ai‐apesa aboha ya̱ ishit chukowa mʋt,
67Chishno ak osh, Klaist mak o̱ chia hoh cho? pim anolí, im achi tok. Mihma, Hʋchim anoli li mak o̱, hʋchi yimma he keyu.
68Micha ʋno mʋt na hʋchim asilhha li mak o̱, afalaminchit hʋs sʋm anumpula he keyukmʋt, anonti ant ik i̱ hotofá, hʋs sʋm ahna he keyu.
69Himak a pilla ma Hatak Ushi ʋt Chihowa nan oklu̱ha imaiya im ibbak isht impak imma ya̱ a binila he mak oke, im achi tok.
70Mihma momʋt, Mih‐kʋto chishno ak osh Chihowa Ushi chia ho̱? okla achi tok. Mihma yʋmmak ash ot, Mihi yo̱ sia mak atuk o̱ hʋsh mihʋshke, im achi tok.
71Mihma, Hʋpishno akinli hosh ilap itih fehna iloh a haklo kʋt, himmakma nan isht atokowa ka iloh ahna hinla cho? okla achi tok.
Tällä hetkellä valittuna:
Luk 22: CHH
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Published by the American Bible Society 1848-1886, reprinted 1913