JĔNISIS 1
1
1O jali ka Anyambě a vela oba na he.
2He yu diaka n‘ uvela, e diakindi naně; ivitit‘ i diakind‘ o boho bwa ndiba. Ka Ilina ja Anyambě ja muwa oba ya miba.
3¶ Ka Anyambě a vâ na, Bwe e diakě: na bwe na diaka.
4Ka Anyambě a yěně bwe, na e ndi bwam: na Anyambě na palwakidě bwe o ivitit‘.
5Ka Anyambě a tuba bwe na mwehe, ka mwa tuba ivitit‘ na bulu. Ka kolo n‘ ubwa bia dia buhwa bwa boho.
6¶ Ka Anyambě a vâ na, Njanjo e diakě o hanganě ya miba, na yâ e ka palwakidě miba na miba.
7Ka Anyambě a vela njanjo, ka mwa paludě miba ma diakidi ibomako ja njanjo na ma diakidi oba ya njanjo: ka yâ ya dia nonaně.
8Ka Anyambě a vangidě njanjo Oba. Ka kolo n‘ ubwa bia dia o hwi balě.
9¶ Ka Anyambě a vâ na, Miba majadi ibomako ja oba ma yolanakě iboko viâkâ, ya yahe yahe ya puma: ka yâ ya dia nonaně.
10Ka Anyambě a vangidě yahe yahe na He; ka mwa vangidě iyolaně ja miba na Manga: ka Anyambě a yěně na e bwam.
11Ka Anyambě a vâ na, ‘He e pumakě mbusanga, na behavu be ka lângâkâ ibângâ, na ele ya bebuma e ka lângâkâ bebuma bia jângâ jaju, ibângâ i na yâ mětě, o he: ka yâ ya dia nonaně.
12Ka he ya puma mbusanga, na behavu be lângâkâ ibângâ ja jângâ jaju, na ele e lângâkâ bebuma, ibângâ jaju i diakite na yâ mětě, ya jângâ jaju: ka Anyambě a yěně na e bwam.
13Ka kolo n‘ ubwa bia dia o hwi lalo.
14¶ Ka Anyambě a vâ na, Bwe e diakě o njanjo ya oba i ka paludě mwehe na bulu; na jâ i kadiaka ndembo, na begombe, na hwi, na mepuma:
15Na jâ i ka diaka bwe o njanjo ya oba ivě ja bwe o he: ka yâ ya dia nonaně.
16Ka Anyambě a vela bwe iněně ibalě; bwe eněně e pangakiě mwehe, na bwe ehâlě e pangakiě bulu: ka mwa vela tepě nyětět‘.
17Ka Anyambě a tědě jâ o njanjo ya oba ivě ja he bwe,
18N‘ ipangia ja mwehe na bulu, n‘ ipaludě ja bwe n‘ ivitit‘: ka Anyambě a yěně na e bwam.
19Ka kolo n‘ ubwa bia dia o hwi nai.
20¶ Ka Anyambě a vâ na, Miba ma běkěkidě beitě be ninganakě be di na beměnâ, na lonâni lo věvěkě oba ya he o bwe ya njanjo ya oba.
21Ka Anyambě a vela nyambimbi iněně, na elombo e ninganakě e di mihâ yěhěpi, ya miba e pumakidě eitě, ya mangâ mabu, na lonâni la mapepu lěhěpi jângâ jaju: ka Anyambě a yěně na e bwam.
22Ka Anyambě a vambia biâ ibâtâ na, Janakani, n‘ inyěni o ka vuhakani, n‘ inyěni o ka londaki miba ma manga, na lonâni lo ka vuhaka o he.
23Ka kolo n‘ ubwa bia dia o hw‘ itano.
24¶ Ka Anyambě a vâ na, He e běkěkidě elombo ya mihâ ya jângâ jaju, bembe, na elombo e landakě, na tito ya he ya jângâ jaju: ka yâ ya dia nonaně.
25Ka Anyambě a vela tito ja he ya jângâ jaju, na bembe bia jângâ jabu, na elombo yěhěpi e landakě o he ya jângâ jaju: ka Anyambě a yěně na e bwam.
26Ka Anyambě a vâ na, Ho velakě moto wa egâlan‘ ahu, a kwanakě hwě: na bâ ba ka pangakia bejaka bia manga, na lonâni la oba, na bembe, na he yěhěpi, na elombo elandakě o he yěhěpi.
27Nonaně nd‘ o Anyambě a velakidi moto na egâlan‘ aju, egâlani ya Anyambě nd‘ eaju e velaki mâ; a velaki bâ momo na mwajo.
28Ka Anyambě a vambia bâ ibâtâ, ka Anyambě a vâ na bâ na, Janakani, n‘ inyěni o ka vuhakani, wa londani o he, n‘ inyěni wa baliyâni: o ka pangakia bejaka bia manga, na lonâni la oba, na elombo e di mihâ e landakě o he yěhěpi.
29¶ Ka Anyambě a vâ na, Umbwakia, mbi věndi nyěni behavu běhěpi bejaki ibângâ, bejadi o boho bwa he yěhěpi, na ele yěhěpi, ejadi na ebuma ya ele e lângâkě ibângâ; e ka dii beja o nyěni o jadi,
30Na tito ya he yěhěpi, na lonâni la oba lěhěpi, na elombo e landakě o he yěhěpi, ejadi na eměnâ, nd‘ ibiamě be vědi behavu bia bobehu biěhěpi bia beja: ka yâ ya dia nonaně.
31Ka Anyambě a yěně elombo aju e velakidi yěhěpi, na umbwakia, ejadi bwam mětě. Ka kolo n‘ ubwa bia dia o buhwa bw‘ utoba.
Tällä hetkellä valittuna:
JĔNISIS 1: BNG1895
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Published by the American Bible Society in 1895, 1926.