JĔNISIS 2
2
1Kakana nd‘ o oba na he be hânjâbâkiedi, na ndumb‘ abu yěhěpi.
2O buhwa bwa hěmbwědi ka Anyambě a hukidě ehavu aju ya nyang‘ aju e velakidě; ka mwa yâjâ o buhwa bwa hěmbwědi o behavu biaju biěhěpi ibiaju be velakidi.
3Ka Anyambě a vambia buhwa bwa hěmbwědi ibâtâ, ka mwa nyěvidě bwâ: kabojana bwâ nd‘ ibwaju bo yâjâkidi behavu biaju biěhěpi bia Anyambě be velakidi na be hakidi.
4¶ Mbamba ja oba na he nd‘ ěkadi o biâ be velakudwě, o buhwa bwa Jěhova Anyambě bo velakidi he na oba,
5Na elombo wa ’hiki e liyakwě yěhěpi ovaně e to dia o he, na behavu bia ’hiki biěhěpi be to tombuwa: kabojana Jěhova Anyambě a diakite a to panga mbwiya e nâkâ o he, yu diaka na moto a liyaka he.
6Ka bengumbe bia beta ovia he na la oba, ka biâ bia bâhě boho bwa he bwěhěpi.
7Ka Jěhova Anyambě a vela moto n‘ ubulubulu mwa he, ka mwa veguma o vijo viaju pudi ya ’menâ; ka moto a dia ilina ja mihâ.
8¶ Ka Jěhova Anyambě a liya mwanga o mbuhwa ya Iděn; omě nd‘ o mwa dikaki moto aju a velakidi.
9O he nd o Jěhova Anyambě a tombwakidě ele yěhěpi e jadi bwam n‘ iyěně, na e jadi bwam n‘ ija; na ele ya ’menâ tepě o hanganě ya mwanga, na ele y‘ iyowě ja bwam na bobe.
10Ka viho via vala ovia Iděn ka bâhě mwanga; ka viâ via pěhě ovia omě, via bě myolo menai.
11Dina ja via boho ndi Paisân: vi něndi vi ’lwanakidě ehiki ya Havila yěhěpi, o hika e jadi;
12Hika ya ehiki těně e ndi eam: omě nd‘ ojadi na dělum na malale ma âniks.
13Dina ja viho via lobalě ndi Gaihân: viâ ndi vi ulunakidi ehiki ya Itiopia yěhěpi.
14Dina ja viho via lolalo ndi Hidikěl: viâ ndi vi kěkě o pělě mbuhwa ya Asiria. Viho via lonai ndi Ufratis.
15Ka Jěhova Anyambě a nângâ momo, ka mwa dika mâ o mwanga mwa Iděn ibonguwa n‘ itata ja mwâ.
16Ka Jěhova Anyambě a languwa momo, na, O ka jaka ele ya mwanga yěhěpi o naně:
17Nd o jake ele, y‘ iyowě ja bwam na bobe: kabojana o buhwa tě ibwâvě bo ka jeyâ pâkwě pâkwě o ka wandi.
18¶ Ka Jěhova Anyambě a vâ na, E bě bwam no momo a diaka dipâ; mbi ka veli mâ uhani o pěl‘ aju.
19Ovia he nd‘ o Jěhova Anyambě a velaki tito ja ’hiki jěhěpi, na lonâni la oba lěhěpi; ka mwa vana biâ o Adam a jadi ka yěně nyang‘ aju e ka tubě biâ: na nyanga ya Adam e tubakidi elombo e di mihâ yěhěpi, vâkâna dina jaju ndi dině.
20Ka Adam a vangidě bembe biěhěpi mina, na lonâni la oba, na tito ja ’hiki jěhěpi; nd‘ o pělě ya Adam yu duwanakia uhani mwaju.
21Ka Jěhova Anyambě a panga Adam a kwaka o viyâ viněně, ka mwa nângâ mbanj‘ aju pâkâ, ka mwa diba mehoni o maihana ma yâ.
22Mbanja, ya Jěhova Anyambě e nângâkidi o momo a jadi, nd‘ eaju e velanakidi mwajo, ka mwa vanamâ o momo a jadi.
23Ka Adam a vâ na, Ekaě ndi evehe ya bevehe biamě, n‘ uhoni mwa mehoni miamě: a ka tubwi na, Mwajo, kabojana a nângâkudwěndi o momo a jadi.
24Ovaně nd‘ o momo a ka dikě hangwě na nyangwě, na mwa lata na mwad‘ aju: na bâ běhěpi ba ka diandi uhoni umbâkâ.
25Momo na mwad‘ aju běhěpi, ba diakite mehamba, ba yoki ihâni.
Tällä hetkellä valittuna:
JĔNISIS 2: BNG1895
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Published by the American Bible Society in 1895, 1926.