رُومیا 10
10
فصلِ دَهُم
1اَی بِرارو، آرزوی دِل و دُعای مه دَ پیشِ خُدا بَلدِه قَومِ اِسرائیل امی اَسته که اُونا نِجات پَیدا کُنه. 2چُون ما مِیتنُم شاهِدی بِدیُم که اُونا بَلدِه خُدا غَیرَت دَره، لیکِن نَه از رُوی دانایی. 3چُون اُونا عدالتی ره که از طرفِ خُدا مییه پَی نَبُرد و دَ تَلاشِ ثابِت کدونِ عدالتِ خودون خُو بُر شُد، امزی خاطر اُونا تابِع عدالتِ خُدا نَشُده. 4چراکه مسیح تکمِیل کُنِندِه شریعت#۱۰:۴ دَ جای «تکمِیل کُنِندِه شریعت» دَ زِبونِ یونانی «خَتمِ شریعت» نوِشته یَه. اَسته، تا هر کس که دَزُو ایمان بیره عادِل حِساب شُنه.
نِجات بَلدِه پگ
5مُوسیٰ دَ بارِه عدالتی که از شریعت مییه، اینی رقم نوِشته مُونه: ”آدمی که احکامِ شریعت ره دَ جای میره، اُو دَ مُطابِقِ ازوا زِندگی مُونه.“ 6لیکِن عدالتی که از ایمان مییه، مُوگیه: ”دَ دِل خُو نَگی، ’کِی دَ عالمِ باله موره؟‘“ یعنی تا مسیح ره تاه بیره. 7”یا ’کِی دَ عالمِ مُرده ها موره؟‘“ یعنی تا مسیح ره از مینکلِ مُرده ها باله کده بیره. 8بَلکِه چی مُوگیه: ”کلام دَ نزدِیک تُو اَسته، دَ دان تُو و دَ دِل تُو.“ اِی امُو کلامِ ایمان اَسته که مو اِعلان مُونی. 9چُون اگه قد زِبون خُو اِقرار کُنی که عیسیٰ «مَولا» اَسته و دَ دِل خُو ایمان بیری که خُدا اُو ره از مُرده ها دُوباره زِنده کد، نِجات پَیدا مُونی. 10چُون یگ شخص دَ دِل خُو ایمان میره و عادِل حِساب مُوشه و قد زِبون خُو اِقرار مُونه و نِجات پَیدا مُوکُنه. 11امُو رقم که نوِشتِه مُقَدَّس مُوگیه: ”هر کسی که دَزُو ایمان بیره، شرمِنده نَمُوشه.“ 12چُون دَ بَینِ یهُود و غَیرِ یهُود فرق وجُود نَدره، چراکه امُو «مَولا،» مَولای پگ اَسته و تمامِ کسای که نامِ ازُو ره مِیگِیره، اُو بَلدِه ازوا بےاندازه بَرکت مِیدیه؛ 13چُون نوِشته یَه: ”هر کسی که نامِ خُداوند ره بِگِیره، اُو نِجات پَیدا مُونه.“
14لیکِن اُونا چِطور مِیتَنه نامِ کسی ره بِگِیره که دَزُو ایمان نَوُرده؟ و چِطور مِیتَنه دَ کسی ایمان بیره که دَ بارِه ازُو هیچ نَشِنِیده؟ و چِطور مِیتَنه بِشنَوه بِدُونِ که کُدَم کس دَزوا اِعلان کُنه؟ 15و اُونا چِطور مِیتَنه اِعلان کُنه اگه کس اُونا ره رَیی نَکُنه؟ امُو رقم که نوِشته شُده: ”چِیقَس نُوربَند اَسته پایای کسای که خوشخبری میره.“ 16لیکِن پگ خوشخبری ره قبُول نَکد، چُون اِشَعیا مُوگیه: ”خُداوندا، کِی دَ پَیغامِ ازمو باوَر کده؟“ 17پس ایمان از شِنِیدونِ پَیغام دَ وجُود مییه و چِیزی که شِنِیده مُوشه از کلامِ مسیح اَسته.
18مگم ما پُرسان مُونُم: آیا اُونا نَشِنِیده؟ اَلبَته که شِنِیده، چُون نوِشته یَه:
”آوازِ ازوا دَ تمامِ زمی رسِیده
و کلِمه های ازوا تا آخِرای دُنیا.“
19 بسم پُرسان مُونُم: آیا قَومِ اِسرائیل نَفامِید؟ چُون اوّل مُوسیٰ مُوگیه:
”ما دَ وسِیلِه کسای که هیچ قَوم حِساب نَمُوشه، شُمو ره سرِ غَیرَت مُونُم
و تَوَسُطِ یگ مِلَّتِ جاهِل قار شُمو ره باله میرُم.“
20و اِشَعیا دَ جُراَت مُوگیه:
”کسای مَره پَیدا کد که دَ طلب مه نَبُود،
و ما بَلدِه کسای ظاهِر شُدُم که دَ جُستُجوی مه نَبُود.“
21مگم دَ بارِه قَومِ اِسرائیل مُوگیه:
”تمامِ روز دِستای خُو ره
سُون قَومِ نافرمان و سرٹمبه دِراز کدُم.“
Tällä hetkellä valittuna:
رُومیا 10: HAZ
Korostus
Kopioi
Vertaa
Jaa
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Text of this book may be quoted in any form (written, visual, electronic or audio) up to and inclusive of five hundred (500) verses without express written permission of the publisher, provided the verses quoted do not amount to a complete book of the Bible nor do the verses quoted account for 25% of the total text of the work in which they are quoted. Notice of copyright must appear on the copyright page of the work as follows:
Scripture taken from Hazaragi Bible.
Copyright © 2025 United Bible Societies Association and Pamir Ministries. Used by permission. All rights reserved.
