JOHN 2
2
Usɔrɔ Ndɔ ke Obio Cana
1EKEM ke ɔyɔhɔ usen ita edɔ ndɔ ke Cana ke Galilee; 2ndien eka Jesus odu do; enyuŋ ekot Jesus ŋko ye mbet Esie, ete edi ndɔ. 3Ndien ke ini wine ananade, eka Jesus ete Enye, Mmɔ inyeneke wine. 4Jesus ete enye, Ŋwan owo, Ami nsaŋa didie ye afo? Ini Mi ikemke kaŋa. 5Eka Esie ɔdɔhɔ mme asaŋutom ete, Enam se Enye edidɔdɔhɔ mbufo. 6Abaŋ mmɔŋ itiokiet, eke ebotde ke itiat, ediɔhɔ do, nte asaŋade ekem ye ido ŋkeŋ-idem mme Jew; ŋkpɔ nte gallon mmɔŋ edip esine ke abaŋ kiet. 7Jesus ɔdɔhɔ mmɔ ete, Esin mmɔŋ ke mme abaŋ emi ɔyɔhɔ. Mmɔ esin mmɔŋ ɔyɔhɔ osim inua. 8Ekem Enye ɔdɔhɔ mmɔ ete, Ekoi naŋa, eda esɔk etubom udia. Mmɔ eda esɔk enye. 9Edi ke ini etubom udia atabide mmɔŋ oro akabarede edi wine, minyuŋ ifiɔkke ebiet eke wine oro otode (edi mme asaŋutom emi ekokoide mmɔŋ efiɔk), etubom udia okot ebe-ndɔ, onyuŋ ɔdɔhɔ enye ete, 10Kpukpru owo ebem iso ɔnɔ owo eti wine; ndien ke ini mme owo ema ekeŋwɔŋ ediwak, ɔnɔ mmɔ se mifɔnke ikan; afo omomum eti wine onim tutu osim emi. 11Jesus akanam akpa idiɔŋɔ emi ke Cana ke Galilee, ayarare ubɔŋ Esie; mbet Esie enyuŋ ebuɔt idem ye Enye.
12Ke ŋkpɔ emi ama ekebe, Jesus ye eka Esie, ye nditɔ-eka Esie, ye mbet Esie, esuhɔre eka ke Capernaum ekedu do ndusuk usen.
Jesus Aka Ebiet Ntuahibuot
(Mt 21.12,13; Mk 11.15-18; Lk 19.45,46)
13Passover mme Jew ekpere, ndien Jesus ɔdɔk aka Jerusalem. 14Enye onyuŋ okut mme anyam enaŋ ye erɔŋ ye ibiom nte ebonode do ke temple, ye mme ɔkpuhɔ-okuk nte etiede do. 15Ndien Enye ada uruk anam ikpa, ebin mmɔ kpukpru, ye erɔŋ ye enaŋ, ewɔŋɔ ke temple; onyuŋ aŋwaŋa okuk mme ɔkphɔ-okuk ɔduɔk, onyuŋ onuk mme okpo-koro mmɔ ɔduɔk; 16onyuŋ ɔdɔhɔ mme anyam-ibiom ete, Etaŋ ŋkpɔ emi enyɔŋɔ; ekunim ufɔk Ete Mi ke ufɔk mbubine. 17Mbet Esie eti ete ema ewet ete, Ufup ufɔk Fo eyedia mi. 18Ntre ke mme Jew ebɔrɔ Enye ete, Owut nnyin nso idiɔŋɔ emi Afo anamde ŋkpɔ emi? 19Jesus ɔbɔrɔ mmɔ ete, Ewuri temple emi, ndien nyediɔŋ enye ke usen ita. 20Ntre ke mme Jew ete Enye, Ekada isua aba ye itiokiet ebɔp temple emi; nte Afo eyediɔŋ enye ke usen ita? 21Edi Enye etiŋ abaŋa temple ikpɔhidem Esie. 22Mmɔdo ke ini Enye esetde ke mkpa, mbet Esie eti ete Enye ama eketiŋ ntre; mmɔ enyuŋ enim ŋwed Abasi ye ikɔ emi Jesus etiŋde ke akpanikɔ.
23Edi ke ini Enye odude ke Jerusalem ke usɔrɔ passover, ediwak owo ebuɔt idem ke enyiŋ Esie, ke emi mmɔ ekutde mme idiɔŋɔ eke Enye anamde. 24Edi Jesus iduɔkke idem inɔ mmɔ; 25koro Enye ɔfiɔkde kpukpru owo, minyuŋ iyomke baba owo kiet etiŋ ɔnɔ Enye abaŋa owo; koro Enye ke Idem Esie ɔfiɔkde se idude owo ke esit.
Sélection en cours:
JOHN 2: ENA
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
Efik Old Bible With Sectional Headings © Bible Society of Nigeria, 2013, 2019.
