JOHN 3
3
Nicodemus: Ndidibe Mbet Jesus, Edi Etiene Jesus ke Okoneyo
1OWO mme Pharisee kiet okodu, emi ekerede Nicodemus, ɔbɔŋ mme Jew. 2Owo emi etiene Jesus ke okoneyo ɔkɔdɔhɔ Enye ete, Rabbi, nnyin imɔfiɔk ite Afo edi Andikpep emi Abasi osiode ɔdɔŋ; koro baba owo kiet ikemeke ndinam mme idiɔŋɔ emi Afo ananam, ibɔhɔke Abasi odu ye enye. 3Jesus ɔbɔrɔ enye ete, ke akpanikɔ ke ndɔhɔ fi nte, Edieke owo mitɔŋɔke ntak imana, enye ikemeke ndikut Obio Ubɔŋ Abasi. 4Nicodemus ɔdɔhɔ Enye ete, Owo edikeme didie ndimana ke ini enye ama ɔkɔsɔŋ? nte enye ekeme nditɔŋɔ ntak nduk ke idibi eka esie nnyuŋ mmana? Jesus ɔbɔrɔ ete, 5Ke akpanikɔ ke ndɔhɔ fi nte, Edieke owo mimanake oto ke mmɔŋ ye Spirit, enye ikemeke ndiduk ke Obio Ubɔŋ Abasi. 6Se itode ke obukidem imana edi obukidem: se inyuŋ itode ke Spirit imana edi spirit. 7Kuyik ke emi ndɔhɔde fi nte, mbufo enyene nditɔŋɔ ntak mmana. 8Ofim ofime ɔtɔ nte amama, ndien afo okop uyom esie, edi ufiɔkke ebiet enye oto, ye ebiet enye aka: 9ntre ke edi ye kpukpru owo eke etode ke Spirit emana. Nicodemus ɔbɔrɔ Enye ete, Ŋkpɔ emi ekeme didie ndiwɔrɔ? 10Jesus ɔbɔrɔ enye ete, Nte afo edi anditeme owo efen ke Israel, ndien ufiɔkke mme ŋkpɔ emi? 11Ke akpanikɔ ke ndɔhɔ fi, nnyin itiŋ se ifiɔkde inyuŋ itie ntiense ibaŋa se ikokutde; edi mbufo ibɔhɔ ikɔ ntiense nnyin. 12Edieke ŋketiŋde ŋkpɔ isɔŋ nnɔ mbufo ndien mbufo minimke ke akpanikɔ, didie ke mbufo edinim ke akpanikɔ ke mma ntiŋ ŋkpɔ enyɔŋ nnɔ mbufo? 13Ndien baba owo kiet ikɔdɔkke ikoduk ke heaven, ke mibɔhɔke Enye emi okotode ke heaven ɔsuhɔre edi, kpa Eyen Owo emi odude ke heaven. 14Ndien kpa nte Moses ekemende urukikɔt ke enyɔŋ ke desert, kpa ntre ke ana nte edimen Eyen Owo ke enyɔŋ: 15man owo ekededi eke ɔbuɔtde idem ye Enye enyene nsinsi uwem. 16Koro Abasi akamama erimbot ntem, tutu Enye osio ikpɔŋ-ikpɔŋ Eyen emi Enye obonde ɔnɔ, man owo ekededi eke ɔbuɔtde idem ye Enye okutak, edi enyene nsinsi uwem. 17Koro Abasi ikɔdɔŋke Eyen Esie ke ererimbot ete ekpe ikpe ererimbot, edi ɔkɔdɔŋ, man enyaŋa ererimbot oto ke Enye. 18Owo eke ɔbuɔtde idem ye Enye ikaha ikpe; ema ekekpe ikpe owo eke mibuɔtke idem ye Enye ema, koro enye mibuɔtke idem ke enyiŋ Edibon Eyen Abasi kierakiet. 19Ndien emi edi ke ererimbot, edi owo emama ekim ekan uŋwana; koro utom mmɔ ɔdiɔkde. 20Koro kpukpru owo eke enamde idiɔk esasua uŋwana, inyuŋ iwɔrɔke idi ke uŋwana, mbak edibiom se mmɔ enamde. 21Edi owo eke anamde se idide akpanikɔ ɔwɔrɔ edi ke uŋwana, man eyarare utom esie, ete, enye etie ke Abasi ananam mmɔ.
22Ke ŋkpɔ emi ema ekebe, Jesus ye mbet Esie eka ke isɔŋ Judaea; onyuŋ etie do ye mmɔ, onim baptism. 23John ŋko onyuŋ onim baptism ke Aenon emi ekperede Salim, koro mmɔŋ awakde do: ndien mme owo eka do ekana baptism. 24Koro ikesinke John kaŋa ke ufɔk-ŋkpɔkɔbi. 25Ekem eneni otibe ke ofuɔt mbet John ye Jew kiet abaŋa ŋkeŋ-idem. 26Ntre ke mmɔ etiene John ekɔdɔhɔ enye ete, Rabbi, Owo oro okodude ye afo ke edem Jordan oko, emi afo okonyuŋ etiede ntiense abaŋa Enye, Sese, Enye ke onim baptism, kpukpru owo enyuŋ etiene Enye. 27John ɔbɔrɔ ete, Owo ikemeke ndinyene baba ŋkpɔ kiet, ibɔhɔke Abasi etie ke heaven ɔnɔ enye. 28Mbufo ke idem mbufo edi ntiense enɔ mi, ete, mmɔdɔhɔ nte, ami ndige Christ, edi edɔŋ mi mbem Enye iso. 29Enyene-aŋwan-ndɔ edi ebe-ŋwan: edi ufan ebeŋwan, emi adade da okop enye uyo, adara eti-eti ndikop uyo ebeŋwan: ntem ke idara mi emi ama akabare ɔyɔhɔ. 30Enye enyene ndidiɔŋ ŋkpon ŋka iso, edi ami nnyene ndidiɔŋ ŋkabare ŋkpri.
31Enye emi otode ke enyɔŋ akan kpukpru owo: owo eke otode ke isɔŋ edi owo-isɔŋ, onyuŋ osio ŋkpɔ ke isɔŋ etiŋ: enye emi otode ke heaven akan kpukpru owo. 32Se Enye okokutde onyuŋ okopde, ke Enye etiŋ nte ntiense abaŋa; ndien baba owo kiet idaha ikɔ ntiense Esie. 33Owo emi akadade ikɔ-ntiense Esie ekesin ubɔk etiense owut ete Abasi edi akpanikɔ. 34Koro Enye emi Abasi okosiode ɔdɔŋ etiŋ ikɔ Abasi: koro Abasi idomoke domo Spirit inɔ Enye. 35Ete amama Eyen, omonyuŋ ayak kpukpru ŋkpɔ esin Enye ke ubɔk. 36Owo eke ɔbuɔtde idem ye Eyen enyene nsinsi uwem; edi owo eke mibuɔtke idem ye Eyen idikwe uwem, edi iyaresit Abasi osuk ɔkɔbɔ enye.
Sélection en cours:
JOHN 3: ENA
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
Efik Old Bible With Sectional Headings © Bible Society of Nigeria, 2013, 2019.
