JOHN 4

Ŋwan-a-Samaria Osobo Ye Jesus

1EKEM ke adaŋemi Ɔbɔŋ ɔfiɔkde ete mme Pharisee ekop ete Jesus ke anam mme owo edi mbet onyuŋ onim mmɔ baptism, akan John 2(okposuk edi nte Jesus ke Idem Esie minimke baptism, edi edide mbet Esie enim), 3Enye ɔkpɔŋ Judaea, afiak ɔnyɔŋ ke Galilee. 4Edi ana nte Enye asaŋa ke Samaria ebe. 5Ntre ke Enye edisim obio Samaria kiet emi ekerede Sychar, emi ekperede iŋwaŋ oro Jacob ɔkɔnɔde Joseph eyen esie: 6obube-mmɔŋ Jacob onyuŋ odu do. Ndien sia Jesus okopde mba ɔnɔ isaŋ, Enye ɔsuhɔre etetie do ntem ke mben obube-mmɔŋ: ekpere ufɔt uwem-eyo. 7Ŋwan-a-Samaria kiet edi ndikoi mmɔŋ. 8Jesus ete enye, Nɔ Mi mmɔŋ ŋŋwɔŋ. Koro mbet Esie ema edaha eka obio ekedep udia. 9Ŋwan-a-Samaria ete Enye, Afo emi edide Jew anam didie ebeŋe mi mmɔŋ, ke ini ndide ŋwan-a-Samaria? (Koro mme Jew misaŋake ŋkpɔ ye mbon Samaria) 10Jesus ɔbɔrɔ enye ete, Edieke afo ɔkpɔfiɔkde enɔ Abasi, ye owo emi obupde fi ete, Nɔ Mi mmɔŋ ŋŋwɔŋ, afo ekpebeŋe Enye, ndien Enye ɔkpɔnɔ fi odu-uwem mmɔŋ. 11Ŋwan oro ete Enye, Ɔbɔŋ, unyeneke se adade okoi mmɔŋ, obube onyuŋ ɔtuŋɔ: ada odu-uwem mmɔŋ oro ndien ke mmɔŋ? 12Nte omokpon akan ete nnyin Jacob, emi ɔkɔnɔde nnyin obube emi, onyuŋ ɔŋwɔŋde mmɔŋ do ke idem esie, ye nditɔ esie, ye ufene esie? 13Jesus ɔbɔrɔ enye ete, Kpukpru owo eke eŋwɔŋde mmɔŋ emi eyetɔŋɔ ntak ekop nsat-itɔŋ: 14edi owo ekededi eke ɔŋwɔŋde mmɔŋ emi Ami ndinɔde enye idikopke nsat-itɔŋ aba: edi mmɔŋ oro ndinɔde enye eyekabare edi idim mmɔŋ ke esit esie eke otopde akabare ɔwɔrɔ edi nsinsi uwem.

15Ŋwan oro ete Enye, Ɔbɔŋ, nɔ mi mmɔŋ oro, man itɔŋ okusat mi, ami ŋkunyuŋ nsaŋa adaŋa usuŋ emi ndi ke ɔtɔ emi ndikoi mmɔŋ. 16Jesus ete enye, Ka kokot uberi, di ken. 17Ŋwan oro ɔbɔrɔ Enye ete, Nnyeneke ebe. Jesus ete enye, Emenen ndidɔhɔ ete, Nnyeneke ebe: 18koro ɔmɔdɔdɔ ebe ition, ndien owo emi odude ye enye idahemi idige uberi; etiŋ akpanikɔ ke ikɔ oro. 19Ŋwan oro ete Enye, Ɔbɔŋ, mmokut nte Afo edi prophet. 20Mme ete nnyin ekam etuak ibuot enɔ Abasi ke obot emi; ndien mbufo ete, ebiet eke owo ekpetuakde ibuot enɔ Abasi odu ke Jerusalem. 21Jesus ete enye, Ŋwan owo, nim Mi ke akpanikɔ; ini ke edi, eke mbufo edituakde ibuot enɔ Ete, idige ke obot emi inyuŋ idige ke Jerusalem. 22Mbufo etuak ibuot enɔ se mbufo mifiɔkke: nnyin ituak ibuot inɔ se ifiɔkde: koro erinyaŋa otode mme Jew. 23Edi ini ke edi, omonyuŋ ededi ama, eke ata mme andituak ibuot edituakde ibuot enɔ Ete ke spirit ye ke akpanikɔ: koro edi mmɔ eke etiede ntem ke Ete oyom ete etuak ibuot enɔ Imɔ. 24Abasi edi spirit: ndien mme andituak ibuot nnɔ Enye enyene ndituak ibuot ke spirit ye ke akpanikɔ. 25Ŋwan oro ete Enye, Mmɔfiɔk nte Messiah (emi ekerede Christ) ɔmɔŋ ededi: ke ini Enye edide, Enye eyeŋwaŋade kpukpru ŋkpɔ ɔnɔ nnyin. 26Jesus ete enye, Ami emi nneneme nneme mi ye afo ndi Enye.

27Ekem ke ini oro mbet Esie eto edi; idem onyuŋ akpa mmɔ ndikut nte Enye enemede nneme ye ŋwan; edi ndomo owo mmɔ kiet ibukpe Enye ete, Oyom nso? mme, Nsinam enemede nneme ye enye?

28Ntre ke ŋwan oro ɔkpɔŋ abaŋ esie, adaha oduk obio ɔkɔdɔhɔ mbio-obio ete, 29Edi edise owo emi ekemende kpukpru se akananam nnamde etiŋ ɔnɔ mi; ndi Enye edi Christ? 30Mmɔ ewɔŋɔ ke obio edi editiene Enye.

31Ke ufɔt ini oro mbet Esie ekpe ye Enye ete, Rabbi, di didia ŋkpɔ. 32Edi Enye ete mmɔ, Mmenyene udia ndidia eke mbufo mifiɔkke. 33Ntem ke mbet edɔhɔ kiet eken ete, Nte owo ekededi akada udia ɔsɔk Enye adia? 34Jesus ete mmɔ, Udia Mi edi ndinam uduak Andidɔŋ Mi, nnyuŋ mma utom Esie. 35Nte mbufo idɔhɔke ite, eyesuk ɔfiɔŋ inaŋ ndien osim ini ukpeŋe? Sese, mmɔdɔhɔ mbufo nte, Emenere enyin ese iŋwaŋ ete ŋkpɔ adat kesit ama, ekem ini ukpeŋe. 36Kpa ke idaha emi andikpeŋe ukpeŋe ke ɔbɔ ŋkpɔ-eyen-utom, onyuŋ ataŋ mbuŋwum ɔnɔ nsinsi uwem; man andisuan mkpasip ye andikpeŋe ukpeŋe ekpadara ɔtɔ kiet. 37Ŋke oro etopde ete, Owo kiet asuan mkpasip, owo efen ekpeŋe, ɔwɔrɔ osu ke ŋkpɔ emi. 38Ami ŋkosio mbufo ndɔŋ nte ekpeŋe ukpeŋe ke ebiet eke mbufo mikanamke utom ke esit; owo eŋwen ekanam utom, ndien mbufo emeduk ke utom mmɔ.

39Edi ediwak mbio Samaria emi etode ke obio oro ebuɔt idem ye Enye, oto ke ikɔ-ntiense oro ŋwan ɔnɔde ete, Enye etiŋ kpukpru se akananam nnamde ɔnɔ mi. 40Ntem ke ini mbio Samaria esimde Enye, mmɔ ekpe ye Enye ete etie kaŋa ye mme imɔ: ndien Enye adaŋ do usen iba. 41Ediwak owo efen enyuŋ enim ke akpanikɔ oto ke ikɔ-inua Esie; 42ndien mmɔ edɔhɔ ŋwan oro ete, Ke emi nnyin imonim ke akpanikɔ, idige koro afo eketiŋde, edi koro nnyin ima ikokop ke idem nnyin, inyuŋ ifiɔk ite, Owo emi edi Andinyaŋa ererimbot ke akpanikɔ.

43Edi ke usen iba oro ema ekebe, Enye adaha do aka ke Galilee. 44Koro Jesus ke Idem Esie edi ntiense ete, Ikɔmke prophet ŋkpɔ ke obio esiemɔ. 45Ntre ke adaŋemi Enye osimde Galilee, mbon Galilee edara Enye koro mmɔ ema ekut kpukpru se Enye akanamde ke Jerusalem ke ini usɔrɔ; koro mmɔ nde ekam esika usɔrɔ.

46Ntre ke Enye ɔtɔŋɔ ntak edi ke Cana ke Galilee, ke ebiet emi Enye akanamde mmɔŋ akabare edi wine do. Ndien ɔbɔŋ kiet odu do, emi eyen esie ɔdɔdɔŋɔ ke Capernaum. 47Ke ini ɔbɔŋ emi okopde ete Jesus oto ke Judaea ebe edi ke Galilee, enye etiene Enye ekekpe ye Enye ete, Ɔsuhɔde edi edinam udɔŋɔ okure eyen imɔ; koro eyen imɔ oyomde ndikpa. 48Ntre ke Jesus ɔdɔhɔ enye ete, Mbufo inimke ke akpanikɔ, ibɔhɔke ini ekut mme idiɔŋɔ ye mme utibe ŋkpɔ. 49Ɔbɔŋ oro ete Enye, Ɔbɔŋ, suhɔre di, ke eyen mi mikpaha kaŋa. 50Jesus ete enye, Nyɔŋ okuo; eyen fo ke odu uwem. Owo oro onim se Jesus ɔdɔhɔde enye ke akpanikɔ, onyuŋ adaha esie ɔnyɔŋ. 51Ndien nte enye ɔsuhɔrede asaŋa ke usuŋ ɔnyɔŋ, ikɔt esie edisobo ye enye, esian enye ete, ke eyen esie odu uwem. 52Ntre ke enye obup mmɔ ini eke eyen ɔtɔŋɔde ndikop idem. Mmɔ ete, Mkpɔŋ, ke ɔyɔhɔ hour kiet ke uwemeyo, ufiopidem ɔkɔkpɔŋ enye. 53Ntem ke ete eyen oro ɔfiɔk ete ke ekedi ini oro ke Jesus ɔkɔdɔhɔ imɔ ete, Eyen fo ke odu uwem: ndien enye ke idem esie onim ke akpanikɔ ye ofuri ufɔk esie. 54Emi onyuŋ edi udiana-akpa idiɔŋɔ emi Jesus anamde ke ini Enye ama okoto ke Judaea edi ke Galilee.

Sélection en cours:

JOHN 4: ENA

Surbrillance

Copier