Mphattuwelo 9
9
Nleehano na Nluku ni Nowee
1Nluku ahonreriha Nowee na asaanawe amwiirelaka coo: Nnyaranace, muncereryane ni ncarace mwiilaponi. 2Inama cothene co mwiilaponi cinkowuttettemelani ciwoovakani nyu: inama co ntakhwani, asaanuni o wirimu, inama cineepurula vathi ni ihopa co mpahari. Cothene nhovahiya mmatatani mwinyu.
3Citthu cothene cirina ukumi ni ceettaka cinkokhala coolya cinyu. Toko cuvahilyakani matakhuru, nna va kinawuvahani citthu cothene. 4Nanso nhikhure inama ni iphome aya, kontha iphome aya phiri ukumi. 5Ntthu phi ntthu mpaka inama nohala umwarusa iphome ya ntthu, kinkonkohaca. Wo khula ntthu kinkohukhumu nlattu wo'kumi wa nkhwawe.
6Ntthu nohala umwarusa iphome ya nkhwawe,
iphome awe inhala umwarusiya ciicammo ni ntthu,
kontha, ni ilatta ya Nluku,
phipankiyawe ntthu.
7Nanso nyu, nkhale ooyaranaca ni muncereryane. Mmwaryeele mwiilaponi ni ncaranace mommo.
8Vano Nluku ahomwiirela Nowee, na asaanawe: 9Nkoonani, kinkopanka nleehano naka ni nyu wamoca ni ucuulu inyu wohoolo, 10ni citthu cothene cirina ukumi ciri ni nyu: asaanuni, inama coohuwiya ni inama co ntakhwani, citthu cothene co mwiilaponi cirina ukumi. 11Kinaapanka nleehano naka ni nyu. Itthu phi itthu irina ukumi khinhala tho wiiviya ni maasi oocara mwiilaponi. Khanhala tho ucara maasi mwiilaponi. 12Nluku ahopwaherera wuulumaca eeraka: Ila phi ikanyero yo nleehano naka ninoopankelakani, ukhuma nyu mpaka citthu cothene cirinenyu, cirina ukumi, mpaka maloko othene ohoolo. 13Nikhwii naka kiheesa mmahutteni. Ninkookhala ikanyero yo nleehano naka ni ilapo. 14Ukati unkelaka uwaana mahutte mwiilaponi ni nawaaka nikhwii, 15vano mi kinkowuupuwela nleehano naka ni nyu wamoca ni citthu cothene cirina ukumi co khula nnanna. Maasi khanhala tho ucara mwiilaponi wiira yiivakace citthu cirina ukumi. 16Ukati wothene unkelaya woonnya nikhwii mmahutteni, kinkooweha ni kinkowuupuwela nleehano noohimala na atthu ni citthu cothene coomumula co khula nnanna, cinkhala mwiilaponi. 17Nluku ahomwiirela Nowee coo: Ila phi ikanyero yo nleehano nipankilyaka mi ni citthu cothene cirina ukumi mwiilaponi.
Asaana a Nowee
18Vano asaana a Nowee yaakhumile nkalawani yaari: Seemu, Kani, ni Yafeti. Kani phiri athumwanaya Kanaa. 19Ala phaari asaana araru a Nowee. Ukhuma mwa yaayo, ilapo yothene yahokhaliya na atthu. 20Nowee aari mayolima, phaapacenre waala ivinya yoopacera. 21Nowee ahowurya ivinyu, ahohapaliya, ni ahokhala pwitipwiti nheemani mwawe. 22Kaamu, athumwanaya Kanaa, ahoona uhiwara waathumwane ni ahorwaa waahimyacera asunnawe eeli yaari vate. 23Nanso Seemu ni Yafeti yahokusaca ikacako, yaheesaca wanikhatani ni, yeettaka nttuli nttuli wiira ahoonace athumwanaya anari pwitipwiti, ni yahaakhuneelaca.
24Nowee, ukati wonwilyawe muuhapaliyani, ni oonenelaka yaapankilyawe mwanawe omwankani ule, 25aheera coo:
Kanaa holaphiya!
Unkokhala ipottha co'pottha ca asunnaa.
26Aheera tho coo:
Attittimihiye Mwanene Nluku, Nluku a Seemu!
Ni Kanaa akhale ipottha awe.
27Nluku uncerere ncoko wa Yafeti;
uyo akhale mmaheemani mwa Seemu,
ni Kanaa akhale ipottha awe.
28Uvira waya ucara wo maasi mwiilaponi, Nowee ahokhala nkumi myakha iminya ttharu wo hansini (350). 29Mahuku othene ookumi awe, yaari myakha iminya khentta wo hansini (950) ni ahokhwa.
Sélection en cours:
Mphattuwelo 9: NNI
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2021, Wycliffe Bible Translators, Inc. All rights reserved.