LIRAANGA 48
48
Yakobo Yakasitsa Efurahimu nende Manaase
1Matukhu mati nikakhavira, Yosefu yavoolelwa ndi tata wewe nu mulwale. Khulwa yako, Yosefu yavukula vaana veve vi shiyayi vavili nivali Manaase nende Efurahimu, nivatsia khulola Yakobo. 2Lwa Yakobo yavoolelwa ndi mwana wewe Yosefu yali wakhitsa khumulola, yitinyilitsa, navukha niyikhala khu shitali. 3Yakobo yavoolela Yosefu, “Nyasaye Uli Ikulu khu Viosi yalolekha khwinzi havundu halaangwangwa Luzi mu shivala shia Kanaani khandi nangasita. 4Nyasaye yambolela, ‘Niitsa khukhukhola khwivula vaana vanyishi, khu vitsukhulu vovo valiva vandu vi tsimbia tsinyishi. Niitsa khuha vitsukhulu vovo shivala yishi khuva shiavo vene mihika ni mihika.’ ”
5Yakobo yatsililila khuvoola, “Yivi Yosefu, vaana vovo vi shiyayi vavili, va wivula nushimenyanga mu shivala shia Misri nishili khwitsa hanu, ni vaana vaanje; Efurahimu nende Manaase valiitsa khuva khuli vaana vaanje, khuli Rubeni nende Simioni vali. 6Navutswa vaana va uliitsa khwivula nivivulwa khale, navo valiitsa khuva vovo. Valiitsa khunyola tsisomo tsiavo khuvirila khu vamwavo vavo Efurahimu nende Manaase. 7Kholanga makhuva yaka shichila mama wowo Raheli. Navelela mu mwoyo muno kwanje, lwa yakhutsila mu shivala shia Kanaani, nuli himbi khutukha Efuratsa, lwa nali ningalukhanga khurula mu shivala shia Mesapotamia. Namuyeveelayo mu shilindwa havundu henaho khundulu khu muhaanda kutsitsanga Efuratsa.” (Efuratsa nalio litaala lilaangwangwa nunundi Betselehemu.)
8Lwa Yakobo yalola vaana va Yosefu, yareeva, “Yava ni vanga viina?”
9Yosefu yamuchipa, “Yava navo vaana vaanje, va Nyasaye yamba mu shivala shia Misri shinu.”
Yakobo yavoolela Yosefu, “Valere khwinzi, vakasitsi.” 10Tsimoni tsia Yakobo shitsiaheenzanga vulahi vwene, shichila yali wasakhula, khandi shiyalolanga vulahi vwene tawe. Khulwa yako, Yosefu yasuunda vaana veve himbi khuye, tata wewe navakhumbelela. 11Yakobo yavoolela Yosefu, “Shinalikhu ninganakani yu khukhulolakhu khandi tawe. Navutswa nunundi Nyasaye ukhonyi khali nakhalolakhu khandi vaana vovo.” 12Yosefu yarulitsa vaana veve mumakulu ka Yakobo, namwinamila, nakoni hasi mahunama.
13Yosefu yavukula Efurahimu namusuunda khuluveka lu mukhono musatsa kwa Yakobo khandi navukula Manaase namusuunda khuluveka lu mukhono mukhali kwa Yakobo, khandi navasuunda himbi khuye. 14Navutswa Yakobo yaviritsa makhono keke vushiama, nakumila mukhono kwekwe musatsa khu murwi kwa Efurahimu, khali niiva yali mwana mushie, khandi mukhono kwekwe mukhali khu murwi kwa Manaase, shichila yali mwana mukhulundu. 15Khulwa yako, yakasitsa Yosefu navoola,
“Nyasaye, wa vakuuka vaanje Aburahamu nende Isaka varumishilanga, akasitse vaana yava.
Nyasaye, umali khundushitsa khulitukhu linu, avakasitse!
16Injelosi yandulitsa mu vutiinyu vwosi, ivakasitse!
Lira lianje khandi lira lia vakuuka vaanje, Aburahamu nende Isaka
litsililile khuvaho khuvirila mu vaana yava!
Vivuli vaana vanyishi, vitsukhulu vanyishi!”
17Lwa Yosefu yalola tata wewe nakumilanga mukhono kwekwe musatsa khu murwi kwa Efurahimu, shikamuyaanzitsa tawe. Khulwa yako, yakumila mukhono kwa tata wewe khukurulitsa khu murwi kwa Efurahimu khukura khu murwi kwa Manaase. 18Yosefu yamuvoolela, “Tata, lekha khukhola ndio; Manaase neye mwana mukhulundu; vikha mukhono kwokwo musatsa khu murwi kwekwe.”
19Tata wewe yambakhana, navoola, “Mwana wanje, manyi shia kholanga, ni kilikali manyi shia kholanga. Khali vitsukhulu va Manaase valiitsa khuva luhia lwi tsingulu tsinyishi muno. Navutswa amwavo wewe mushie aliitsa khuva ni tsingulu tsinyishi muno khumuvira, khandi vitsukhulu veve valiitsa khuva tsimbia tsi tsingulu tsinyishi muno.”
20Yakobo yavakasitsa khulitukhu lienelo, navoola, “Vaisraeli valiitsa khurumishila mira kenyu nivenyanga khukasitsa vandu. Valiitsa khuvoola, ‘Nyasaye amukhole muve khuli Efurahimu nende Manaase.’ ” Khulwa yako, Yakobo yimilitsa Efurahimu imbeli wa Manaase.
21Yakobo yavoolela Yosefu, “Ndi himbi khukhutsa, khuli mulolanga ni tsimoni tsienyu, navutswa Nyasaye aliitsa khuva na munyi nu khumukhonyanila khukalukha mu shivala shia vakuuka venyu. 22Navutswa shivali ni vamwavo vovo vambetsanga litaala lia Shekemu, lusomo luli ni lilova linuulu, lwa narulitsa khu Vaamori khuvirila muliihe tawe; navutswa mbetsanga yivi.”
Sélection en cours:
LIRAANGA 48: LLLCATHOLIC
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© The Bible Society of Kenya, 2013