ST. JOHN 13
13
1Chepwah dush kuhbekoosa‐wekoonding, Jesus kekandung kedebishkoosanig ewh ookezhegudoom cheoönje-mahjaud emuh uhkeeng, cheëzhaud dush enewh Wayoosememindjin, kesahgeäud enewh oodahnishenahbamun uhkeeng ayahnejin, nahnauzh ishquah‐bemahdezid oomah uhkeeng oogesahgeäun.
2Kahishquah‐wesenewaud, ahzhuh kahahtuhmuhwaud owh mujje‐muhnedoo emuh oodaëning Judas Iscariotun, Simon oogwissun, chebahtahahnid;
3Jesus dush kekandung ahnooj gagoo kemeenegood enewh Oosun emuh ooneenjeeng, kuhya Kesha‐Muhnedoong keöonjebaud, kuhya weëzhaud emuh ahyahnid Kesha‐Muhnedoon;
4Kepuhsegwe dush magwah wesenewaud, oogekesekaunun enewh oodahgwewinun; oogeöodahpenaun dush kesingwaöon, kekechepezood dush.
5Oogesegenaun dush ewh nebe emuh kesingwa‐oonahguning, kemahje‐kesebegesittanaud dush enewh kekenooähmahgunun, kuhya dush kekahzesittawaud keähyood ewh kesingwaöon kahkechepezood.
6Oogeöodissaun dush enewh Simon Peterun, oo‐oo dush oodegoon, Tabaningayun, kewekesebegenun enuh nesittun?
7Jesus dush oogenuhquatuhwaun oo‐oo keënaud, Azhechegayaun kahween noongoom kekekanduhseen, bahmah nahguj kegahkekandaun.
8Peter dush oo‐oo oodenaun, Kah wekah kegahkesebegenunsenun neen nesittun. Jesus dush oogenuhquatuhwaun, Kishpin kesebegenesenoowaun, kahween kedebandahgoozese emuh neyowing.
9Simon Peter dush oo‐oo oodenaun. Tabaningayun, kahween nesittun atuh, kuhya dush neneenjeen kuhya nishtequaun.
10Jesus dush oo‐oo oodenaun, Owh kahkesebegenind kahween nundahwandahgoozese chekesebegenind me atuh oosittun, medush wawane tapeenezid; kenuhwah dush kepeenezim, kahween goo kuhkenuh.
11Oogekekanemaun muh enewh kabahtahegoojin; me suh kahoonjeëkedood, Kahween kuhkenuh kepeenezeseem.
12Uhpe dush kahkesebegenesittanaud, kuhya kahoodahpenung enewh oodahgwewinun, menuhwah dush kenuhmuhduhbe, oo‐oo keënaud, Kekekandahnahwah nuh ewh kahdoodoonenuhgoog?
13Kakenooähmahgad kuhya Tabaningad kedezheweenzhim: quuhyuk suh kedekedoom; me muh anandahgoozeyaun.
14Kishpin dush neen, Tabaningayaun kuhya kakenoöahmahgayaun, kekesebegenesittanenuhgoog, kuhya kenuhwah kedahkesebegenesittanedim.
15Kekenoowahbunjegun suh kegemeenenim, neen suh kahdoodoonuhgoog kuhya dush kenuhwah cheëzhechegayag.
16Kagate, kagate, kedenenim, Owh buhmeetahgun kahween ahwahshema ahpetandahgoozese dush ween oodoogemahmun; kuhya owh anoonind kahween ahwahshema ahpetandahgoozese dush ween enewh anoonegoojin.
17Kishpin kekanduhmag oonoo, keshahwandahgoozeem, kishpin ezhechegayag.
18Kahween kuhkenuh keduhzhemesenoonim: neke kanemaug muh egewh kahwahwanahbuhmugig: chedebishkoosag dush ween ewh oozhebeëgun, Owh suh buhquazhegunun amwaud wahdoopuhmid nindoombetuhmaug oodoondun.
19Noongoom dush keweenduhmoonenim chepwah oojechesag, uhpe dush keöojechesag, chedabwayanemeyag neen ahweyaun.
20Kagate, kagate, kedenenim, Owh wadahpenaud enewh azhenahzhahug nindoodahpenik; owh dush wadahpenid oodoodahpenaun enewh kahpeëzhenahzhahoojin.
21Uhpe dush Jesus kahekedood oonoo, kemegooshkahdandum, kedebahjemoo dush, oo‐oo keëkedood, Kagate, kagate, kedenenim, pazhik kenuhwah ningahbahtahik.
22Egewh dush kekenooähmahgunug keguhnuhwahbundewug, kekanduhsigwah ahwagwanun enewh kahenahgwanun.
23Pazhik dush ookekenooähmahgunun owh Jesus, ashooshenoon emuh ookahkegunaung, enewh kahsahgeähjin owh Jesus.
24Me suh enewh kahuhyenenahmahwahjin owh Simon Peter cheguhgwajemahnid, ahwagwanun ahyahwenegwanun enewh kahenahjin.
25Owh kahahshooshing emuh ookahkegunaung owh Jesus, oo‐oo oodenaun, Tabaningayun, ahwanan ahyahwid?
26Jesus dush oogenuhquatuhwaun, Mesuh wah‐owh kameenug ewh ahpunjegun, uhpe kequahbuhahmaun. Uhpe dush kahquahbuhung ewh ahpunjegun, oogemeenaun enewh Judas Iscariotun Simon oogwissun.
27Kahmeenind dush ewh ahpunjegun oogepeendegashkahgoon Satanun. Jesus dush oo‐oo oodenaun, Nuhmunj suh wahezhechegawunan, waweeb ezhechegan.
28Kahween ahweyah kahduhchewaud egewh namuhduhbejig emuh wesenewahguning oogekekanduhseen wagoodoogwan oo‐oo kahoonjeënahgwan.
29Ahnind dush oo‐oo keënanduhmoog, Judas keguhnuhwandung ewh shooneäh‐mooshkemood, oo‐oo oogeöonjeënahdooganun owh Jesus, Kishpenetoon gagoo kamuh-nazeyung emuh wekoondewining; gamuh oo‐oo, Gagoo meezh egewh katemahgezejig.
30Uhpe dush kahoodahpenung ewh ahpunjegun, bahbega kesahgahum, tebekudoobun dush.
31Uhpe dush kahsahgahung, Jesus dush oo‐oo keëkedoo, Mesuh zhuhyegwah peshegandahgooïnd owh Enene Oogwissun, kuhya dush owh Kesha‐Muhnedoo ween oonjepeshegandahgoöah.
32Kishpin suh owh Kesha‐Muhnedoo ween oonjepeshegandahgooïnd, kuhya ween owh Kesha‐Muhnedoo oogahpeshegandahgooäun tebenuhwa oodenandahgoozewin, kazhetena dush oogahpeshegandahgooäun.
33Ahbenoojewedoog, kayahbe wanebik keweejewenenim. Kegahnunduhwahbuhmim: kuhya debishkoo kahenugwah egewh Jewyug, Azhahyaun, kahween kekushketoosenahwah chepeëzhahyag; mesuh noongoom anenuhgoog.
34Ooshke‐kuhgequawin kemeenenim, chesahgeëdeyag; debishkoo kahezhesahgeënuhgoog, kuhya kenuhwah cheëzhesahgeëdeyag.
35Mesuh kaöonjekekanemenagwah kuhkenuh egewh enenewug nekekenooähmahgunug cheähweyag, kishpin sahgeëdeyag.
36Simon Peter dush oo‐oo oodenaun, Tabaningayun, Ahneende azhahyun? Jesus dush oogenuhquatuhwaun, Ewede azhahyaun, kahween kekushketooseen chenoopenuhzheyun noongoom; bahmuh nahguj gegahnoopenuzh.
37Peter dush oo‐oo oodenaun, Tabaningayun, Ahneeshwin kushketoosewaun chenoopenuhnenaun noongoom? Ningahpuggedenaun ewh ninbemahdezewin keen oonje.
38Jesus dush oogenuhquatuhwaun, Kegahpuggedenaun nuh ewh kebemahdezewin neen oonje? Kagate, kagate, kedenin, Kahween tahnoondahgoozese owh nahba‐pahkahahqua, nahnauzh nesing keähgoonwatahweyun.
Sélection en cours:
ST. JOHN 13: OTW
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
Psalms published by the Canadian Bible Society 1856. New Testament and Pentateuch published by the Society for Promoting Christian Knowledge (SPCK) 1861-1874.
