ST. JOHN 18
18
1Uhpe Jesus kahekedood oonoo ekedoowinun, kesahguhum uhneweejewaud enewh ookekenooähmahgunun emuh ahgahming ewh sebewesha Cedron, keähta dush ewh ketegaunans, emuh keëzhaud kuhya ookekenooähmahgunun.
2Judas, owh kahbahtahaud, oogekekandaun emuh ahtanig: mesuh oomah Jesus ahyahpe kahezhaud keweejewaud enewh ookekenooähmahgunun.
3Judas dush kahoodahpenaud shemahguneshun kuhya tuhkoonewa‐wenenewun wandenahmahgoojin keche‐sahsahgahwejega‐wenenewun kuhya Phariseen, tuhgwishin emuh, bahbahwahsunjegunun kuhya wahsuhkoonanjegunun kuhya ushwewinun pegegezewaud.
4Jesus dush kekandung ahnooj gagoo kapuhguhmishkahgoojin, kesahguhum, oo‐oo dush keënaud, Ahwanan nanduhwahbuhmag?
5Oogenuhquatuhwahwaun, Jesus Nazareth duhzhe enene. Jesus dush oo‐oo oodenaun, Neen suh nindow. Judas dush, enewh kahbahtahegoojin, oogeweejekahbahwemaun.
6Uhpe dush kahenaud, Neen nindow, keähzhasawug, kekahwesawaud emuh metushkuhkummig.
7Menuhwah dush oogekuhgwajemaun, Ahwanan nanduhwahbuhmag? Oo‐oo dush keëkedoowug, Jesus owh Nazareth duhzhe enene.
8Jesus dush oogenuhquatuhwaun, Ahzhuh kegeweenduhmoonenim neen cheähweyaun: kishpin dush nunduhwanemeyag, puhgedenik suh oogoo chemahjahwaud.
9Cheöonjedebishkoosanig ewh ekedoowin, kahekedood, Egewh kahmeezeyun kahween kuhnuhga pazhik ningewuhneähse.
10Simon Peter dush ayaud ewh ahzhahwashk, oogekejekoopetoon, kepuhkittawaud dush enewh keche‐sahsahgewejega‐wenenewun oobuhmeetahgunene, kekishketahwugagunahmaud ewh ookechetahwugahne. Malchus dush ezhenekahzoobun owh buhmeetahgun.
11Jesus dush oo‐oo oogeënaun enewh Peterun, Peendahun ewh kedahzhahwashkoom emuh peenduhoojeguning, kah nuh ween ningahmenequaseen ewh menequahjegun kahmeezhid owh Noos.
12Egewh dush shemahguneshug kuhya owh menesenoo‐oogemah kuhya ootuhkoonewa‐wenenemewaun egewh Jewyug, oogetuhkoonahwaun enewh Jesusun, keminjemahpenahwaud dush.
13Netum dush oogeëzhewetuhmoowahwaun Anasun, me muh enewh kahoozhenemahjin owh Caiaphas kahkeche-sahsahgewejega‐wenenewid ewh uhpe kekenoonoowining.
14Mesuh owh Caiaphas kahenaud enewh Jewyun, chenundahwandahgwuk pazhik enene chenebootahwaud enewh ahnishenahban.
15Simon Peter dush oogenoopenuhnaun enewh Jesusun, kuhya menuhwah pazhik kekenooähmahgun: owh kekenooähmahgun oogekekanemegoon enewh keche‐sahsahgewejega‐wenenewun, oogeweejepeendegamaun enewh Jesusun emuh oowegewauming owh keche‐sahsahgewejega‐wenene.
16Peter dush ahgwahjeeng kenebahwe emuh ishquaundang. Kesahgahum dush owh bakahnezid kekenooähmahgun kahkekanemegood enewh Keche‐sahsahgewejega‐wenenewun, oogeguhnoonaun dush enewh equazansun kahguhnuhwanduhmenejin ewh ishquaundam, kepeendeguhnaud dush enewh Peterun.
17Owh dush equazans ganuhwandung ewh ishquaundam oo‐oo oogeënaun enewh Peterun, Kah nuh ween kuhya keen kedookekenooähmahgunemegoose wah‐owh enene? Oo‐oo dush oodenaun, Kahween nindahwese.
18Kenebahwewug dush egewh buhmeetahgunug kuhya egewh tuhkoonewa‐wenenewug, oogepootahwanahwah dush ewh ahkahkunzhan (kesenahmahgudoobun muh) keähwuhzoowaud: kuhya ween dush owh Peter oogeweejekahbahwetahwaun, keähwuhzood.
19Owh dush keche‐sahsahgewejega‐wenene oogekuhgwajemaun enewh Jesusun, keduhzhemaud ookekenooähmahgunun, kuhya ookekenooahmahgawin.
20Jesus dush oogenuhquatuhwaun, Mezheshuh ningeguhnoonaug egewh akeewejig: moonzhug ningekekenooähmahga emuh ahnuhmeä‐weguhmigoong kuhya emuh keche‐ahnuhmeä‐weguhmigoong moonzhug anduhzhe mahoonjeedewaud egewh Jewyug, kah dush gagoo keemooj ningeëkedoose.
21Ahneeshwin kuhgwajemeyun? kuhgwajim egewh kahnoondahwejig, ewh kahenugwah: benuh, ookekandahnahwah ewh kahekedooyaun.
22Uhpe dush oo‐oo kahekedood; pazhik tuhkoonewa‐wenene pashoo wanjekahbahwid oogenahbugushkeneenjetahwaun enewh Jesusun, oo‐oo keëkedood. Me nuh oo‐oo azhenuhquatuhwud owh keche‐sahsahgewejega‐wenene?
23Jesus dush oogenuhquatuhwaun, Kishpin kahmujje‐kekedoowaunan, debahdoodun ewh mujje‐uhyeweesh: kishpin dush quuhyuk kahkekedoowaunan, ahneeshwin puhked-daöoyun?
24Annas dush oogeëzhenahzhahwaun ewh minjemahpezoonid emuh andahnid Caiaphasun keche‐sahsahgewejega‐wenenewun.
25Simon Peter dush kenebahwe keähwuhzood. Oo‐oo dush oogeënahwaun, Kah nuh ween kuhya keen kedookekenooähmahgunemegoose wah‐owh? Keähgoonwatum dush ween, oo‐oo keëkedood, Kahween nindahwese.
26Enewh dush pazhik oobuhmeetahgunun, oodenahwamahgunun enewh kahkishketahwugagunahmahjin owh Peter, oo‐oo keëkedoowun, Kah nuh ween kegewahbuhmesenoon keweejewud emuh ketegaunansing.
27Menuhwah dush keähgoonwatum owh Peter: bahbega dush kenoondahgooze owh nahba‐pahkahahqua.
28Emuh dush Caiaphas andaud oodoonjemahjewenahwaun enewh Jesusun, keëzhewenahwaud emuh tebahkoonede‐weguhmigoong: keekezhabahwahgudoobun: Kah dush wenuhwah tebenuhwa kepeendegasewug emuh tebahkoonede‐weguhmigoong, oodahgeweenishkahgoonahwah muh, cheöonjemeejewahpun dush ewh kuhbekoosa‐wekoondewin.
29Kepesahguhum dush owh Pilate, oo‐oo keëkedood, Ahneen azheähnahmemag wah‐owh enene?
30Oogenuhquatuhwahwaun dush oo‐oo keënahwaud, Kishpin suh mujje‐ezhechegasigoobun, kahween kedahgepuhgedenemahgoose weyowh.
31Pilate dush oo‐oo oogeënaun, Kenuhwah oodahpenik, kuhya tebahkoonik debishkoo anandahgwuk ketebahkoonegawinewah. Egewh dush Jewyug oo‐oo oogeënahwaun, Kahween nenuhwind nindenandahgoozesemin chenesungid ahweyah.
32Chedebishkoosanig ewh oodekedoowin owh Jesus kahekedood, kedebahdoodung ewh kaënahpenad.
33Menuhwah dush kepeendega owh Pilate emuh tebahkoonede‐weguhmigoong, kenundoomaud dush enewh Jesusun, oo‐oo dush keënaud, Keen enuh kedow oodoogemahmewaun egewh Jewyug?
34Jesus dush oogenuhquatuhwaun, Keen enuh tebenuhwa kedekid, gamuh ahnind nuh kegeweenduhmahgoog ewh anandahgoozeyaun?
35Pilate dush oogenuhquatuhwaun, Neen enuh nin‐Jewewh? Keejeduhnuhkeewamahgunug kuhya egewh keche‐sahsahgewejega‐wenenewug ningemeenegoog keyowh: wagoonash kahezhechegayun?
36Jesus dush oogenuhquatuhwaun, Kahween oomah uhkeeng debandahgwussenoon ewh nindoogemahwewin; kishpin oomah uhkeeng debandahgwukebun ewh nindoogemahwewin, tahgemegahzoowug egewh nebuhmeetahgunug, chepuhgedenegoosewaunbaun emuh ooneenjewaung egewh Jewyug: noongoom dush kahween oomah debandahgwussenoon ewh nindoogemahwewin.
37Pilate dush oo‐oo oogeënaun, Kagate nuh kekeche‐oogemowh? Jesus dush oogenuhquatuhwaun, Kedekid suh chekeche‐oogemahweyaun. Me suh kahoonjenegeyaun, me suh dush kahoonjetuhgwishenaun oomah uhkeeng, chedebahdooduhmaun ewh dabwawin. Kuhkenuh egewh dabandahgoozejig emuh dabwawining nebezindahgoog ewh anwayaun.
38Pilate dush oo‐oo oogeënaun, Wagoonan ewh dabwawin? Uhpe dush oo‐oo kahekedood, menuhwah kesahguhum, keëzhaud dush emuh ahyahnid enewh Jewyun, oo‐oo dush oodenaun, Kahween gagoo nemekunse oomujje‐ezhewabezewin.
39Kedenandahgoozim suh, chepuhgedenuhmoonuhgoog pazhik, uhpe kabekoosa‐wekoondingin: kedenandaum nuh chepuhgedenuhmoonuhgoog owh ookeche‐oogemahmewaun egewh Jewyug?
40Menuhwah dush kepepahgewug kuhkenuh, oo‐oo keëkedoowaud, Kahween mahbuh, Barabbas suh atuh: kemuhkundwashke suh owh Barabbas.
Sélection en cours:
ST. JOHN 18: OTW
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
Psalms published by the Canadian Bible Society 1856. New Testament and Pentateuch published by the Society for Promoting Christian Knowledge (SPCK) 1861-1874.
